Chapter 6

[English text for this chapter is available]

sāvarṇiruvāca |
sa hi bhakto bhagavata āsīdrājā mahānvasuḥ |
kiṃ mithyā'bhyavadadyena divo bhūvivaraṃ gataḥ || 1 ||
[Analyze grammar]

kenoddhṛtaḥ punarbhūmeḥ śapto'sau pitṛbhiḥ kutaḥ |
kathaṃ muktastato bhūpa ityetatskanda me vad || 2 ||
[Analyze grammar]

skanda uvāca |
śṛṇu brahmankathāmetāṃ vasorvāsa varociṣaḥ |
yasyāḥ śravaṇataḥ sadyaḥ sarvapāpakṣayo bhavet || 3 ||
[Analyze grammar]

svāyambhuvāntare pūrvamindro viśvajidāhvayaḥ |
ārarambhe mahāyajñamaśvamedhābhidhaṃ mune || 4 ||
[Analyze grammar]

nibaddhāḥ paśavo'jādyāḥ krośantastatra bhūriśaḥ |
sarve devagaṇāścāpi rasalubdhāstadāsata || 5 ||
[Analyze grammar]

kṣemāya sarvalokānāṃ vicaranto yadṛcchayā |
maharṣaya upājagmustatra bhāskaravarccasaḥ || 6 ||
[Analyze grammar]

saṃmānitā suragaṇaiḥ pādyārghyasvāgatādibhiḥ |
te bṛhanmunayo'paśyanmedhyāṃstānkrośataḥ paśūn || 7 ||
[Analyze grammar]

sāttvikānāmapi ca taṃ devānāṃ yajñavistaram |
hiṃsāmayaṃ samālokya te'tyāścaryaṃ hi lebhire || 8 ||
[Analyze grammar]

dharmavyatikramaṃ dṛṣṭvā kṛpayā te dvijottamāḥ |
mahendrapramukhānūcurdevāndharmadhiyastataḥ || 9 ||
[Analyze grammar]

maharṣaya ūcuḥ |
devaiśca ṛṣibhiḥ sākaṃ mahendrā'smadvacaḥ śṛṇu |
yathāsthitaṃ dharmatattvaṃ vadāmo hi sanātanam || 10 ||
[Analyze grammar]

yūyaṃ jagatsargakāle brahmaṇā parameṣṭhinā |
sattvena nirmitāḥ stho vai catuṣpāddharmadhārakāḥ || 11 ||
[Analyze grammar]

rajasā tamasā cāsau manūṃścaiva narādhipān |
asurāṇāṃ cādhipatīnasṛjaddharmadhāriṇaḥ || 12 ||
[Analyze grammar]

sarveṣāmatha yuṣmākaṃ yajñādividhibodhakam |
sasarja śreyase vedaṃ sarvābhīṣṭaphalapradam || 13 ||
[Analyze grammar]

ahiṃsaiva paro dharmastatra vede'sti kīrttitaḥ |
sākṣātpaśuvadho yajñe nahi vedasya saṃmataḥ || 14 ||
[Analyze grammar]

catuṣpādasya dharmasya sthāpane hyeva sarvathā |
tātparyamasti vedasya na tu nāśe'sya hiṃsayā || 15 ||
[Analyze grammar]

rajastamodoṣavaśāttathāpyasurapā nṛpāḥ |
medhyenājena yaṣṭavyamityādau matijāḍyataḥ |
chāgādimarthaṃ bubudhurvrīhyādiṃ tu na te viduḥ || 16 ||
[Analyze grammar]

sāttvikānāṃ tu yuṣmākaṃ vedasyārtho yathā sthitaḥ |
grahītavyonyathā naiva tādṛśī ca kriyocitā || 17 ||
[Analyze grammar]

yādṛśo hi guṇo yasya svabhāvastasya tādṛśaḥ |
svasvabhāvānusāreṇa pravṛttiḥ syācca karmaṇi || 18 ||
[Analyze grammar]

sāttvikānāṃ hi vo devaḥ sākṣādviṣṇū ramāpatiḥ |
ahiṃsayajñe'sti tato'dhikārastasya tuṣṭaye || 19 ||
[Analyze grammar]

pratyakṣapaśumālabhya yajñasyācaraṇaṃ tu yat |
dharmaḥ sa viparīto vai yuṣmākaṃ surasattamāḥ || 20 ||
[Analyze grammar]

rajastamoguṇavaśādāsurīṃ saṃpadaṃ śritāḥ |
yuṣmākaṃ yājakā hyete santyavedavido yathā || 21 ||
[Analyze grammar]

tatsaṅgādeva yuṣmākaṃ sāmprataṃ vyatyayo mateḥ |
jātastenedṛśaṃ karma prārabdhamiti niścitam || 22 ||
[Analyze grammar]

rājasānāṃ tāmasānāmāsurāṇāṃ tathā nṛṇām |
yathāguṇaṃ bhairavādyā upāsyāḥ santi devatāḥ || 23 ||
[Analyze grammar]

svaguṇānuguṇātmīyadevatātuṣṭaye bhuvi |
hiṃsrayajñavidhānaṃ yatteṣāmevocitaṃ hi tat || 24 ||
[Analyze grammar]

tatrāpi viṣṇubhaktā ye daityarakṣonarādayaḥ |
teṣāmapyucito nāsti hiṃsrayajñaḥ kutastu vaḥ || 25 ||
[Analyze grammar]

yajñaśeṣo hi sarveṣāṃ yajñakarmānutiṣṭhatām |
anujñāto bhakṣaṇārthaṃ nigamenaiva vartate || 26 ||
[Analyze grammar]

sāttvikānāṃ devatānāṃ surāmāṃsāśanaṃ kvacit |
asmābhistvīkṣitaṃ naiva na śrutaṃ ca satāṃ mukhāt || 27 ||
[Analyze grammar]

tasmādvrīhibhirevāsau yajñaḥ kṣīreṇa sarpiṣā |
medhyairannarasaiścā'nyaiḥ kāryo na paśuhiṃsayā || 28 ||
[Analyze grammar]

tatrāpi bījairyaṣṭavyamajasaṃjñāmupāgataiḥ |
trivarṣakālamuṣitairnna yeṣāṃ punarudgamaḥ || 29 ||
[Analyze grammar]

adrohaścāyalobhaśca damo bhūtadayā tapaḥ |
brahmacaryaṃ tathā satyamadambhaśca kṣamā dhṛtiḥ || 30 ||
[Analyze grammar]

sanātanasya dharmasya rūpametadudīritam |
tadatikramya yo varteddharmaghnaḥ sa patatyadhaḥ || 31 ||
[Analyze grammar]

skanda uvāca |
itthaṃ vedarahasyajñairmahāmunibhirādarāt |
bodhitā api sannītyā svapratijñāvighātataḥ |
tadvākyaṃ jagṛhurnaiva tatprāmāṇyavidopi te || 32 ||
[Analyze grammar]

mahadvyatikramāttarhi mānakrodhamadādayaḥ |
viviśusteṣvadharmasya vaṃśyāśchidragaveṣiṇaḥ || 33 ||
[Analyze grammar]

ajaśchāgo na bījānītyādi vādiṣu teṣvatha |
vimanassvṛṣivaryeṣu punastānbodhayatsu ca || 34 ||
[Analyze grammar]

rājoparicaraḥ śrīmāṃstatraivāgādyadṛcchayā |
tejasā dyotayannāśā indrasya paramaḥ sakhā || 35 ||
[Analyze grammar]

taṃ dṛṣṭvā sahasāyāntaṃ vasuṃ te tvantarikṣagam |
ūcurdvijātayo devāneṣa cchetsyati saṃśayam || 36 ||
[Analyze grammar]

eṣa bhūmipatiḥ pūrvaṃ mahāyajñānsahasraśaḥ |
cakre sātvatatantroktavidhināraṇyakena ca || 37 ||
[Analyze grammar]

yeṣu sākṣātpaśuvadhaḥ kasmiṃścidapi nā'bhavat |
na dakṣiṇānukalpaśca nāpratyakṣasurārccanam || 38 ||
[Analyze grammar]

ahiṃsādharmarakṣābhyāṃ khyātosau sarvato nṛpaḥ |
agraṇīrviṣṇubhaktānāmekapatnīmahāvrataḥ || 39 ||
[Analyze grammar]

īdṛśo dhārmikavaraḥ satyasandhaśca vedavit |
kathaṃcinnānyathā brūyādvākyameṣa mahānvasuḥ || 40 ||
[Analyze grammar]

evaṃ te saṃvidaṃ kṛtvā vibudhā ṛṣayastathā |
apṛcchansahasā'bhyetya vasuṃ rājānamutsukāḥ || 41 ||
[Analyze grammar]

devamaharṣaya ūcuḥ |
bho rājankena yaṣṭavyaṃ paśunā hosvidauṣadhaiḥ |
etaṃ naḥ saṃśayaṃ chindhi pramāṇaṃ no bhavānmataḥ || 42 ||
[Analyze grammar]

skanda uvāca |
sa tānkṛtāñjalirbhūtvā paripapraccha vai vasuḥ |
kasya vaḥ ko mataḥ pakṣo brūta satyaṃ samāhitāḥ || 43 ||
[Analyze grammar]

maharṣaya ūcuḥ |
dhānyairyaṣṭavyamityeva pakṣo'smākaṃ narādhipa |
devānāṃ tu paśuḥ pakṣo mataṃ rājanvadātmanaḥ || 44 ||
[Analyze grammar]

skanda uvāca |
devānāṃ tu mataṃ jñātvā vasustatpakṣasaṃśrayāt |
chāgādipaśunaivejyamityuvāca vacastadā || 45 ||
[Analyze grammar]

evaṃ hi mānināṃ pakṣamasantaṃ sa upāśritaḥ |
dharmajñopyavadanmithyā vedaṃ hiṃsāparaṃ nṛpaḥ || 46 ||
[Analyze grammar]

tasminnaiva kṣaṇe rājā vāgdoṣādantarikṣataḥ |
adhaḥ papāta sahasā bhūmiṃ ca praviveśa saḥ |
mahatīṃ vipadaṃ prāpa bhūmimadhyagato nṛpaḥ |
smṛtistvenaṃ na prajahau tadā nārāyaṇāśrayāt || 48 ||
[Analyze grammar]

mocayitvā paśūntsarvāṃstataste tridivaukasaḥ |
hiṃsābhītā divaṃ jagmuḥ svāśramāṃśca maharṣayaḥ || 49 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇava khaṇḍe śrīvāsudevamāhātmye vedasyahiṃsāparatvoktyā uparicaravasoradhaḥpātavarṇanaṃ nāma ṣaṣṭho'dhyāyaḥ || 6 ||
[Analyze grammar]