Chapter 5

[English text for this chapter is available]

skanda uvāca |
āsīdrājoparicaro vasunāmā purā mune |
bhūbhartturāyostanayaḥ khyātaścāsāvamāvasuḥ |
ākhaṇḍalasakho bhaktiṃ prāpto nārāyaṇe prabhau || 1 ||
[Analyze grammar]

dhārmikaḥ pitṛbhaktaśca pitṝndevāṃśca tarpayan |
sadācārarato dakṣaḥ kṣamāvānanasūyakaḥ || 2 ||
[Analyze grammar]

sarvopakārakaḥ śānto brahmacaryarataḥ śuciḥ |
akrodhanaśca mitabhuṅmṛdurnirvyasano muniḥ || 3 ||
[Analyze grammar]

nirdvandvo nirvikāraśca nirmāno dhīra ātmavit |
nirddambho mānado yogī tapasvī vijitendriyaḥ || 4 ||
[Analyze grammar]

dhanaputrakalatreṣu viraktaḥ svajanādiṣu |
nārāyaṇamanuṃ bhaktyā sa jajāpānvahaṃ nṛpaḥ || 5 ||
[Analyze grammar]

tasmai tuṣṭo'tha bhagavānvāsudevaḥ svayaṃ dadau |
sāmrājyaṃ so'tha nāsaktastatra bheje tamādarāt || 6 ||
[Analyze grammar]

tatroktena vidhānena pañcakālasamāhitaḥ |
pūjayāmāsa deveśaṃ taccheṣeṇa surānpitṝn || 7 ||
[Analyze grammar]

teṣāṃ śeṣeṇa viprāśca saṃvibhajyāśritāṃśca saḥ |
śeṣānnabhuksatyaparaḥ sarvabhūteṣvahiṃsakaḥ || 8 ||
[Analyze grammar]

bhakṣaṇe doṣamavidatprāṇimātrāmiṣasya tu |
mahāpātakavadrājā svaprajāśca tathā'vadat || 9 ||
[Analyze grammar]

sarvabhāvena bheje'sau devadevaṃ janārdanam |
anādimadhyanidhanaṃ lokakarttāramavyayam || 10 ||
[Analyze grammar]

śrīvāsudevapadayoḥ sa cakāra manaḥ sthiram |
śrotre ca nityaṃ bhagavatkathāyāḥ śravaṇe nṛpaḥ || 11 ||
[Analyze grammar]

nayane sve mukundasya tadbhaktānāṃ ca darśane |
guṇagāne harervāṇīṃ cakre bhūmipatiḥ sa tu || 12 ||
[Analyze grammar]

nārāyaṇāṃghrisaṃspṛṣṭa tulasīpuṣpasaurabhe |
prāṇaṃ cakāra ca nṛpo nānyagandheṣu karhicit || 13 ||
[Analyze grammar]

śrīśopabhuktavastrādi sparśane ca tvacaṃ nijām |
cakāra rasanāmanne nārāyaṇanivedite || 14 ||
[Analyze grammar]

bhagavanmandirakṣetrasadantikagatautathā |
cakāra caraṇau rājā sevāyāṃ ca karau hareḥ || 15 ||
[Analyze grammar]

uttamāṃgaṃ ca cakre'sau viṣṇupādābhivandane |
sakhyaṃ cakāra paramaṃ mahābhāgavateṣu saḥ || 16 ||
[Analyze grammar]

ekopi na kṣaṇastasya vinā bhaktiṃ ramāpateḥ |
jagāma kila rājarṣestadīya vratacāriṇaḥ || 17 ||
[Analyze grammar]

mahadbhireva saṃbhārairviṣṇorjjanmadinotsavān |
cakre tadarthamudyānamaṃdiropavanāni ca || 18 ||
[Analyze grammar]

itthaṃ nārāyaṇe bhaktiṃ vahato brāhmaṇottama |
ekaśayyāsanaṃ tasya dattavāndevarāṭ svayam || 19 ||
[Analyze grammar]

vaijayantīṃ dadau mālāṃ tasmā indro'tiśobhanām |
amlānapaṅkajamayīṃ tathā ratnāni bhūriśaḥ || 20 ||
[Analyze grammar]

ātmā rājyaṃ dhanaṃ caiva kalatraṃ vāhanādi ca |
yattadbhagavataḥ sarvamiti tatprekṣitaṃ sadā || 21 ||
[Analyze grammar]

kāmyā naimittikājasraṃ yajñiyāḥ paramāḥ kriyāḥ |
sarvāḥ sātvatamāsthāya vidhiṃ cakre samāhitaḥ || 22 ||
[Analyze grammar]

pañcarātravido mukhyāstasya gehe mahātmanaḥ |
prāyaṇaṃ bhagavatprattaṃ bhuñjatesmāgrato dvijāḥ || 23 ||
[Analyze grammar]

tasya praśāsato rājyaṃ dharmeṇā'mitraghātinaḥ |
nānṛtā vāksamabhavanmano duṣṭaṃ na cā'bhavat |
na ca kāyena kṛtavānsa pāpaṃ paramaṇvapi || 24 ||
[Analyze grammar]

pañcarātraṃ mahātantraṃ bhagavadbhaktipuṣṭaye |
śuśrāvānudinaṃ rājā bhagavadbhaktavaktrataḥ || 25 ||
[Analyze grammar]

dharmaṃ saṃsthāpayañchuddhaṃ rañjayansakalāḥ prajāḥ |
pālayāmāsa pṛthivīṃ divamākhaṇḍalo yathā || 26 ||
[Analyze grammar]

api saptavidhastasya rājye palalabhakṣakaḥ |
pumānkopyabhavannaiva na ca pāṣaṇḍaveṣiṇaḥ || 27 ||
[Analyze grammar]

asādhyo yoṣitaścaiva puruṣāḥ pāradārikāḥ |
na śrutāstasya rājye ca dharmasaṃkarakāriṇaḥ || 28 ||
[Analyze grammar]

ekādaśavidhaṃ madyaṃ trividhāṃ ca surāmapi |
nājighradapi kopīha tasminrājyaṃ praśāsati || 29 ||
[Analyze grammar]

evaṃguṇaḥ sa tu kvāpi pakṣapātāddivaukasām |
mithyālāpāddivo bhraṣṭaḥ praviveśa mahītalam || 30 ||
[Analyze grammar]

antarbhūmigataścāsau satataṃ dharmavatsalaḥ |
nārāyaṇaparo bhūtvā tanmaṃtramajapatsthiraḥ || 31 ||
[Analyze grammar]

tasyaiva ca prasādena punarevotthitastu saḥ |
divaṃ prāpya sukhaṃ tatra manobhīṣṭaṃ samanvabhūt || 32 ||
[Analyze grammar]

punaścedipatirbhūtvā bhuvyasau pitṛśāpataḥ |
pañcarātroktavidhinā bheje harimatandritaḥ || 33 ||
[Analyze grammar]

svargalokaṃ tataḥ prāpaddivyadehena bhūpatiḥ |
upāsanāṃ ca tatratyaiḥ paramarṣigaṇaiḥ saha || 34 ||
[Analyze grammar]

dṛḍhīkurvanbhagavataḥ kañcitkālamuvāsa tat |
paraṃ padamatha prāpadvāsudevasya nirbhayam || 35 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmya uparicaravasusadguṇavarṇanaṃ nāma paṃcamo'dhyāyaḥ || 5 ||
[Analyze grammar]