Chapter 9

[English text for this chapter is available]

vālakhilyā ūcuḥ |
kṛṣṇaḥ provāca dharmāya dvādaśīṃ vatsasaṃjñitām |
godhūlikālasaṃyuktā dvādaśī vatsapūjane || 1 ||
[Analyze grammar]

vatsapūjā vaṭe caiva kartavyā prathame'hani |
savatsāṃ tulyavarṇāṃ ca śīlinīṃ gāṃ payasvinīm |
caṃdanādibhirālipya puṣpamālābhirarcayet || 2 ||
[Analyze grammar]

taddine tailapakvaṃ ca sthālīpakvaṃ yudhiṣṭhira |
gokṣīraṃ goghṛtaṃ caiva dadhikṣīraṃ ca varjayet || 3 ||
[Analyze grammar]

dināṃte sūryabiṃbārdhādubhayatra ghaṭīdalam |
tato nīrājanaṃ kāryyaṃ nirīkṣecca śubhā'śubham || 4 ||
[Analyze grammar]

nānādīpānprakalpyā'dau svarṇapātrādi saṃsthitān |
nīrājayeddīpapūrvaṃ nirīkṣeta śubhā'śubham || 5 ||
[Analyze grammar]

lāpayitvā sarvadīpānuttarābhimukhānnyaset |
mukhyā dīpā nava proktā anyānapi ca kalpayet || 6 ||
[Analyze grammar]

jvālā ceddakṣiṇāsaṃsthā satejaskā śikhānvitā |
sthirā cetsaukhyadā proktā viparītā tu duḥkhadā || 7 ||
[Analyze grammar]

kārtike kṛṣṇapatre tu dvādaśyādiṣu paṃcasu |
tithiṣūktaḥ pūrvarātre nṛṇāṃ nīrājanāvidhiḥ || 8 ||
[Analyze grammar]

pakṣaṃ saṃsūcayatyādirdvitīyo māsameva ca |
tṛtīya ṛtumeveha caturthastvayanaṃ tathā |
varṣaṃ tu paṃcamo dīpaḥ śubhāśubhaṃ vinirṇayet || 9 ||
[Analyze grammar]

sūryāṃśasaṃbhavā dīpā aṃdhakāravināśakāḥ |
trikāle māṃ dīpayaṃtu diśaṃtu ca śubhā'śubham || 10 ||
[Analyze grammar]

abhimaṃtrya ca maṃtreṇa tato nīrājayetkramāt || 11 ||
[Analyze grammar]

ādau devāṃstato viprānhastinaśca turaṃgamān |
jyeṣṭhāñcchreṣṭhāñjaghanyāṃśca mātṛmukhyāśca yoṣitaḥ || 12 ||
[Analyze grammar]

tato nīrājitāndīpānsvasvasthāneṣu vinyaset |
rūkṣairlakṣmīvināśaḥ syācchvetairannakṣayo bhavet |
atirakteṣu yuddhāni mṛtyuḥ kṛṣṇaśikheṣu ca || 13 ||
[Analyze grammar]

ekāṃgīnāma gopālā tayaitacca vrataṃ kṛtam |
dhanadhānyasamāyuktā jātā varṣatrayeṇa sā || 14 ||
[Analyze grammar]

tasmādgopūjanaṃ kāryaṃ dvādaśyāṃ kārtikasya tu |
etadgovratamāhātmyaṃ śrutvā kurvaṃti ye narāḥ || 15 ||
[Analyze grammar]

te govrataprabhāvena na gobhirvicyutā bhuvi |
go'parādhaḥ kṛto yaḥ syātsa vratādvilayaṃ vrajet || 16 ||
[Analyze grammar]

vālakhilyā ūcuḥ |
kṛṣṇapakṣe caturdaśyāṃ māsi cā'śvayuje tathā |
dīpotsava samīpe tu vratametatsamācaret || 17 ||
[Analyze grammar]

prātaḥ snātvā trayodaśyāṃ kṛtvā vai daṃtadhāvanam |
trirātraniyamaṃ kṛtvā goviṃde bhaktitatparaḥ || 18 ||
[Analyze grammar]

kārya etadvratasyāṃte tathā govarddhanotsavaḥ |
trimuhūrtā'dhikā grāhyā paravedho na doṣabhāk || 19 ||
[Analyze grammar]

āśvinasyā'site pakṣe trayodaśyāṃ niśāmukhe |
yamadīpaṃ baliṃ dadyādapamṛtyurvinaśyati || 20 ||
[Analyze grammar]

purā hemanakasyaiva bālakaścā'pamṛtyutaḥ |
muktobhūdāśvine kṛṣṇatrayodaśyāṃ dayāvaśāt || 21 ||
[Analyze grammar]

dūtā ūcuḥ |
yathā na jīvitādbhraśyedīdṛśe tu mahotsave |
tathopāyaṃ brūhi yama kṛpāṃ kṛtvā'smadagrataḥ || 22 ||
[Analyze grammar]

yama uvāca |
āśvinasyā'site pakṣe trayodaśyāṃ niśāmukhe |
prativarṣaṃ tu yo dadyādgṛhadvāre sudīpakam || 23 ||
[Analyze grammar]

mantreṇā'nena bho dūtāḥ samāneyaḥ sa notsave |
prāpte'pamṛtyāvapi ca śāsanaṃ kriyatāṃ mama || 24 ||
[Analyze grammar]

mṛtyunā pāśadaṃḍābhyāṃ kālena ca mayā saha |
trayodaśyāṃ dīpadānātsūryajaḥ prīyatāmiti || 25 ||
[Analyze grammar]

mantreṇānena yo dīpaṃ dvāradeśe prayacchati |
utsave cā'pamṛtyośca bhayaṃ tasya na jāyate || 26 ||
[Analyze grammar]

vālakhilyā ūcuḥ |
pūrvaviddhacaturdaśyāmāśvinasya sitetare |
pakṣe pratyūṣasamaye snānaṃ kuryātprayatnataḥ || 27 ||
[Analyze grammar]

aruṇodayato'nyatra riktāyāṃ snāti yo naraḥ |
tasyā'bdikabhavo dharmo naśyatyeva na saṃśayaḥ || 28 ||
[Analyze grammar]

tathā kṛṣṇacaturdaśyāmāśvine'rkodaye surāḥ |
yāminyāḥ paścime yāme tailābhyaṃgo viśiṣyate || 29 ||
[Analyze grammar]

yadā caturdaśī na syāddvidine cedvidhūdaye |
dinadvaye bhaveccā'pi tadā pūrvaiva gṛhyate || 30 ||
[Analyze grammar]

balātkārāddhaṭhādvā'pi śiṣṭatvānna karoti cet |
tailābhyaṃgaṃ caturdaśyāṃ rauravaṃ narakaṃ vrajet || 31 ||
[Analyze grammar]

taile lakṣmīrjale gaṃgā dīpāvalyāścaturdaśīm |
prātaḥsnānaṃ hi yaḥ kuryādyamalokaṃ na paśyati || 32 ||
[Analyze grammar]

apāmārgamatho tuṃbīṃ prapunnāḍamathā'param |
bhrāmayetsnānamadhye tu narakasya kṣayāya vai || 33 ||
[Analyze grammar]

vāratrayaṃ trivāraṃ ca paṭhitvā mantramuttamam || 34 ||
[Analyze grammar]

sītāloṣṭasamāyukta sakaṃṭakadalānvita |
hara pāpamapāmārga bhrāmyamāṇaḥ punaḥ punaḥ |
apāmārgaṃ prapunnāḍaṃ bhrāmayecchirasopari || 35 ||
[Analyze grammar]

snātvārdravāsasā dadyāddīpakaṃ mṛtyuputrayoḥ |
śunakau śyāmaśabalau bhrātarau yamasevakau |
tuṣṭau syātāṃ caturdaśyāṃ dīpadānena mṛtyujau || 36 ||
[Analyze grammar]

iṣṭavaṃdhujanaiḥ sārddhametatsnānaṃ samācaret |
snānāṃgatarpaṇaṃ kṛtvā yamaṃ saṃtarpayettataḥ || 37 ||
[Analyze grammar]

yamāya dharmarājāya mṛtyave cā'ntakāya ca |
vaivasvatāya kālāya sarvabhūtakṣayāya ca || 38 ||
[Analyze grammar]

auduṃbarāya dadhnāya nīlāya parameṣṭhine |
vṛkodarāya citrāya citraguptāya te namaḥ || 39 ||
[Analyze grammar]

caturdaśaite mantrāḥ syuḥ pratyekaṃ ca namo'nvitāḥ |
ekaikena tilairmiśrāndadyāttrīnudakāñjalīn || 40 ||
[Analyze grammar]

yajñopavītinā kāryaṃ prācīnāvītinā'thavā |
devatvaṃ ca pitṛtvaṃ ca yamasyā'sti dvirūpatā || 41 ||
[Analyze grammar]

jīvatpitā'pi kurvīta tarpaṇaṃ yamabhīṣmayoḥ |
narakāya pradātavyo dīpaḥ saṃpūjya devatāḥ || 42 ||
[Analyze grammar]

atraiva lakṣmīkāmasya vidhiḥ snāne mayocyate |
iṣe bhūte ca darśe ca kārtike prathame dine || 43 ||
[Analyze grammar]

yadā snāti tadā'bhyaṃgasnānaṃ kuryādvidhūdaye |
ūrjjaśukladvitīyāyāṃ tithau ca svātiyugmage || 44 ||
[Analyze grammar]

mānavo maṃgalasnāyī naiva lakṣmyā viyujyate |
dīpairnīrājanādatra saiṣā dīpāvaliḥ smṛtā || 45 ||
[Analyze grammar]

iṃdukṣaye'pi saṃkrātau ravau pāte dinakṣaye |
atrā'bhyaṃgo na doṣāya prātaḥ pāpā'panuttaye || 46 ||
[Analyze grammar]

māṣapatrasya śākaṃ vai bhuktvā tasmindine naraḥ |
pretākhyāyāṃ caturdaśyāṃ sarvapāpaiḥ pramucyate || 47 ||
[Analyze grammar]

iṣāsitacaturdaśyāmindukṣayatithāvapi |
darśādau svātisaṃyukte tadā dīpāvalirbhavet || 48 ||
[Analyze grammar]

kuryātsaṃlagnametacca dīpotsavadinatrayam |
mahārājo baliḥ proktastuṣṭena hariṇā tathā || 49 ||
[Analyze grammar]

varaṃ yācasva bhadraṃ te yadyanmanasi vartate |
iti viṣṇuvacaḥ śrutvā balirvacanamabravīt || 50 ||
[Analyze grammar]

ātmārthaṃ kiṃ yācanīyaṃ sarvaṃ dattaṃ mayā tathā |
lokārthaṃ yācayiṣyāmi śaktaśceddehi tacca me || 51 ||
[Analyze grammar]

mayā'dya te dharā dattā vāmanacchadmarūpiṇe |
tribhiḥ padaistridivasaiḥ sā cā'krāṃtā yatastvayā || 52 ||
[Analyze grammar]

tasmādbhūmitale rājyamastu ghasratraye hare || 53 ||
[Analyze grammar]

madrājye ye dīpadānaṃ bhuvi kurvaṃti mānavāḥ |
teṣāṃ gṛhe tava strīyaṃ sadā tiṣṭhatu susthirā || 54 ||
[Analyze grammar]

mama rājye gṛhe yaiṣāmaṃdhakāraḥ patiṣyati |
lakṣmīsaṃtānāṃdhakāraḥ sadā patatu tadgṛhe || 55 ||
[Analyze grammar]

caturdaśyāṃ ca ye dīpānnarakāya dadaṃti ca |
teṣāṃ pitṛgaṇāḥ sarve narake na vasaṃti ca || 56 ||
[Analyze grammar]

balirājyaṃ samāsādya yairna dīpāvaliḥ kṛtā |
teṣāṃ gṛhe kathaṃ dīpāḥ prajvaliṣyaṃti keśava || 57 ||
[Analyze grammar]

balirājye tu ye lokāḥ śokā'nutsāhakāriṇaḥ |
teṣāṃ gṛhe sadā śokaḥ patediti na saṃśayaḥ || 58 ||
[Analyze grammar]

caturdaśītraye rājyaṃ balerastviti yācayet |
purā vāmanarūpeṇa prārthayitvā dharāmimām |
dadāvatithayeṃdrāya baliṃ pātālavāsinam || 59 ||
[Analyze grammar]

dattaṃ daityapateritthaṃ hariṇā taddinatrayam |
tasmānmahotsavaṃ cātra sarvathaiva hi kārayet || 60 ||
[Analyze grammar]

mahārātriḥ samutpannā caturdaśyāṃ munīśvarāḥ |
atastadutsavaḥ kāryaḥ śaktipūjāparāyaṇaiḥ || 61 ||
[Analyze grammar]

balirājyaṃ samāsādya yakṣagaṃdharvakinnarāḥ |
auṣadhyaśca piśācāśca maṃtrāśca maṇayastathā || 62 ||
[Analyze grammar]

sarva eva prahṛṣyaṃti nṛtyaṃti ca niśāmukhe |
tattanmaṃtrāśca siddhyaṃti balirājye na saṃśayaḥ || 63 ||
[Analyze grammar]

balirājyaṃ samāsādya yathā lokāḥ suharṣitāḥ |
tathā taddinamadhye tu lokāḥ syurharṣitā bhṛśam || 64 ||
[Analyze grammar]

tulāsaṃsthe sahasrāṃśau pradoṣe bhūtadarśayoḥ |
ulkāhastā narāḥ kuryuḥ pitṝṇāṃ mārgadarśanam || 65 ||
[Analyze grammar]

narakasthāstu ye pretāste mārgaṃ tu vratātsadā |
paśyaṃtyeva na saṃdehaḥ kāryo'tra munipuṃgavaiḥ || 66 ||
[Analyze grammar]

āśvine māsi bhūtāditithayaḥ kīrtitāstrayaḥ |
dīpadānādikāryeṣu grāhyā madhyāhnakālikāḥ || 67 ||
[Analyze grammar]

yadi syuḥ saṃgavādarvāgetāśca tithayastrayaḥ |
dīpadānādikāryeṣu kartavyāḥ pūrvasaṃyutāḥ || 68 ||
[Analyze grammar]

ṛṣaya ūcuḥ |
kaumodinyāstu māhātmyaṃ praṣṭumicchāmahe dvijāḥ |
tasmindine tu kiṃ bhojyaṃ kasya pūjāṃ tu kārayet || 69 ||
[Analyze grammar]

kimarthaṃ kriyate sā tu tasyāḥ kā devatā bhavet |
kiṃ ca tatra bhaveddeyaṃ kiṃ na deyaṃ viśeṣataḥ || 70 ||
[Analyze grammar]

praharṣaḥ ko'tra nirdiṣṭaḥ krīḍā kā'tra prakīrtitā |
dīpāvalyāḥ phalaṃ sarvaṃ vadantu ṛṣisattamāḥ || 71 ||
[Analyze grammar]

vālakhilyā ūcuḥ |
tataḥ prabhāta samaye tvamāyāṃ tu munīśvarāḥ |
snātvā devānpitṝnbhaktyā saṃpūjyā'tha praṇamya ca || 72 ||
[Analyze grammar]

kṛtvā tu pārvaṇaśrāddhaṃ dadhikṣīraghṛtādibhiḥ |
divā tatra na bhoktavyamṛte bālāturājjanāt || 73 ||
[Analyze grammar]

tataḥ pradoṣasamaye pūjayediṃdirāṃ śubhām |
kuryānnānāvidhairvastraiḥ svacchaṃ lakṣmyāśca maṇḍapam || 74 ||
[Analyze grammar]

nānāpuṣpaiḥ pallavaiśca citraiścā'pi vicitritam |
tatra saṃpūjayellakṣmīṃ devāṃścā'pi prapūjayet || 75 ||
[Analyze grammar]

saṃpūjyā devanāryo'pi vahubhiścopacārakaiḥ |
pādasaṃvāhanaṃ kuryāllakṣmyādīnāṃ tu bhaktitaḥ || 76 ||
[Analyze grammar]

asminnahani sarve'pi viṣṇunā mocitāḥ purā |
balikārāgṛhāddevā lakṣmīścā'pi vimocitā || 77 ||
[Analyze grammar]

lakṣmyā sārddhaṃ tato devā jagmuḥ kṣīrodadhau punaḥ |
prasuptā bahukālaṃ te sukhaṃ tasmānmunīśvarāḥ || 78 ||
[Analyze grammar]

racanīyāḥ sūtragarbhāḥ paryaṃkāśca sutūlikāḥ |
dugdhaphenopamairvastrairāstṛtāśca yathādiśam || 79 ||
[Analyze grammar]

sthāpayettānsurāṃllakṣmīṃ vedaghoṣasamanvitaḥ |
lakṣmīrdaityabhayānmuktā sukhaṃ suptāṃbujodare || 80 ||
[Analyze grammar]

ato'tra vidhivatkāryā tuṣṭyai tu sukhasuptikā |
tadahni padmaśayyāṃ yaḥ padmāsaukhyavivṛddhaye || 81 ||
[Analyze grammar]

kuryāttasya gṛhaṃ muktvā tatpadmā kvā'pi na vrajet |
na kurvaṃti narā itthaṃ lakṣmyā ye sukhasuptikām || 82 ||
[Analyze grammar]

dhanacintā vihīnāste kathaṃ rātrau svapaṃti hi |
tasmātsarvaprayatnena lakṣmīṃ saṃpūjayennaraḥ || 83 ||
[Analyze grammar]

sa tu dāridryanirmuktaḥ svajātau syātpratiṣṭhitaḥ |
jātipatralaṃvagailātvakkarpūrasamanvitam || 84 ||
[Analyze grammar]

pācayitvā gavyadugdhaṃ sitāṃ dattvā yathocitām |
laḍḍukāṃstasya kurvīta tāṃśca lakṣmyai samarpayet || 85 ||
[Analyze grammar]

anyaccaturvidhaṃ bhakṣyaṃ dadyācchrīḥ prīyatāmiti |
aprabuddhe harau pūrvaṃ strībhirlakṣmīṃ prabodhayet || 86 ||
[Analyze grammar]

prabodhasamaye lakṣmīṃ bodhayitvā bhunakti yā |
pumānvā vatsaraṃ yāvallakṣmīstaṃ naiva muñcati || 87 ||
[Analyze grammar]

abhayaṃ prāpya viprebhyo viṣṇubhītāḥ suradviṣaḥ |
kṣīrābdhau tuṣṭuvurjñātvā suptāṃ padmāśritāṃ śriyam || 88 ||
[Analyze grammar]

tvaṃ jyotiḥ śrīravīndvagnividyutsauvarṇatārakāḥ |
sarveṣāṃ jyotiṣāṃ jyotirdīpajyotiḥsthite namaḥ || 89 ||
[Analyze grammar]

yā lakṣmīrdivase puṇye dīpāvalyāṃ ca bhūtale |
gavāṃ goṣṭhe tu kārtikyāṃ sā lakṣmīrvaradā mama || 90 ||
[Analyze grammar]

dīpadānaṃ tataḥ kuryātpradoṣe ca tatholmukam |
bhrāmayetsvasya śirasi sarvā'riṣṭanivāraṇam || 91 ||
[Analyze grammar]

dīpavṛkṣāstathā kāryāḥ śaktyā devagṛhādiṣu |
catuṣpathe śmaśāne ca nadīparvataveśmasu || 92 ||
[Analyze grammar]

vṛkṣamūleṣu goṣṭheṣu catvareṣu gṛheṣu ca |
vastraiḥ puṣpaiḥ śobhitavyā rājamārgasya bhūmayaḥ || 93 ||
[Analyze grammar]

sarvaṃ puramalaṃkṛtya pradoṣe tadanantaram |
brāhmaṇānbhojayitvā'dau saṃbhojya ca bubhukṣitān || 94 ||
[Analyze grammar]

alaṃkṛtena bhoktavyaṃ navavastropaśobhinā |
tato'parāhnasamaye ghoṣayennagaraṃ nṛpaḥ || 95 ||
[Analyze grammar]

adya rājyaṃ balerlokā yathecchaṃ krīḍyatāmiti |
yathecchaṃ krīḍatāṃ bālā ityājñāpya nṛpeṇa tu || 96 ||
[Analyze grammar]

tebhyo dadyātkrīḍanakaṃ tataḥ paśyecchubhāśubhya |
balirājye prakartavyaṃ yadyanmanasi vartate || 97 ||
[Analyze grammar]

jīvahiṃsā surāpānamagamyāgamanaṃ tathā |
cauryaṃ viśvāsaghātaśca paṃcaitāni munīśvarāḥ |
balirājye tu narakadvārāṇyuktāni saṃtyajet || 98 ||
[Analyze grammar]

tato'rddharātrasamaye svayaṃ rājā vrajetpuram |
avalokayituṃ ramyaṃ padbhyāmeva śanaiḥśanaiḥ |
balirājyapramodaṃ ca dṛṣṭvā svagṛhamāvrajet || 99 ||
[Analyze grammar]

evaṃ gate niśīthe ca jane nidrārddhalocane |
evaṃ nagaranārībhiḥ śūrpaḍiṃḍimavādanaiḥ |
niṣkāsyate pradṛṣṭābhiralakṣmīḥ svagṛhāṃ'gaṇāt || 100 ||
[Analyze grammar]

daṃḍaikarajanīyoge darśaḥ syāttu pare'hani |
tadā vihāya pūrvedyuḥ pare'hni sukharātrikā || 101 ||
[Analyze grammar]

ye vaiṣṇavā'vaiṣṇavāśca balirājyotsavaṃ narāḥ |
na kurvaṃti vṛthā teṣāṃ dharmāḥ syurnātra saṃśayaḥ || 102 ||
[Analyze grammar]

rātrau jāgaraṇaṃ kuryātpurāṇapaṭhanādibhiḥ |
dyūtena vā hareragre gītayā vā tathaiva ca || 103 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye vatsadvādaśīyamatrayodaśīnarakacaturdaśīdīpāvalīkṛtyavarṇanaṃnāma navamo'dhyāyaḥ || 9 ||
[Analyze grammar]