Chapter 10

[English text for this chapter is available]

brahmovāca |
pratipadyatha cā'bhyaṃgaṃ kṛtvā nīrājanaṃ tataḥ |
suveṣaḥ satkathāgītairdānaiśca divasaṃ nayet || 1 ||
[Analyze grammar]

śaṃkarastu purā dyūtaṃ sasarja sumanoharam |
kārtike śuklapakṣe tu prathame'hani satyavat || 2 ||
[Analyze grammar]

balirājyadinasyā'pi māhātmyaṃ śṛṇu tattvataḥ |
snātavyaṃ tilatailena narairnārībhireva ca || 3 ||
[Analyze grammar]

yadi mohānna kurvīta sa yāti yamasādanam |
purā kṛtayugasyādau dānaveṃdro balirmahān || 4 ||
[Analyze grammar]

tena dattā vāmanāya bhūmiḥ svamastakānvitā |
tadānīṃ bhagavānsākṣāttuṣṭo balimuvāca ha || 5 ||
[Analyze grammar]

kārtike māsi śuklāyāṃ pratipadyāṃ yato bhavān |
bhūmiṃ me dattavānbhaktyā tena tuṣṭo'smi te'nagha || 6 ||
[Analyze grammar]

varaṃ dadāmi te rājannityuktvā'dādvaraṃ tadā |
tvannāmnaiva bhavedrājankārtikī pratipattithiḥ || 7 ||
[Analyze grammar]

etasyāṃ ye kariṣyaṃti tailasnānādikārcanam |
tadakṣayaṃ bhavedrājannātra kāryā vicāraṇā || 8 ||
[Analyze grammar]

tadāprabhṛti loke'sminprasiddhā pratipattithiḥ |
pratipatpūrvaviddhā no kartavyā tu kathaṃcana || 9 ||
[Analyze grammar]

tatrābhyaṃgaṃ na kurvīta anyathā mṛtimāpnuyāt |
pratipadyāṃ yadā darśo muhūrtapramito bhavet || 10 ||
[Analyze grammar]

māṃgalyaṃ taddine cetsyādvittādistasya naśyati |
baleśca pratipaddarśādyadi viddhaṃ bhaviṣyati || 11 ||
[Analyze grammar]

tasyāṃ yadyatha cā'rtikyaṃ nārī mohātkariṣyati |
nārīṇāṃ tatra vaidhavyaṃ prajānāṃ maraṇaṃ dhruvam || 12 ||
[Analyze grammar]

aviddhā pratipaccetsyānmuhūrtamapare'hani |
utsavādikakṛtyeṣu saiva proktā manīṣibhiḥ || 13 ||
[Analyze grammar]

pratipatsvalpamātrā'pi yadi na syātpare'hani |
pūrvaviddhā tadā kāryā kṛtā no doṣabhāgbhavet || 14 ||
[Analyze grammar]

taddine gṛhamadhye tu kuryānmūrtiṃ tadāṃgaṇe |
gomayena ca tatrā'pi dadhi tatpurataḥ kṣipet || 15 ||
[Analyze grammar]

ārtikyaṃ tatra saṃsthāpya evaṃ kuryādvidhānataḥ |
abhyaṃgaṃ ye na kurvaṃti tasyāṃ tu munipuṃgava || 16 ||
[Analyze grammar]

na māṃgalyaṃ bhavetteṣāṃ yāvatsyādvatsaraṃ dhruvam |
yo yādṛśena rūpeṇa tasyāṃ tiṣṭhecchubhe dine || 17 ||
[Analyze grammar]

āvarṣaṃ tadbhavettasya tasmānmaṃgalamācaret |
yadīcchetsvaśubhānbhogānbhoktuṃ divyānmanoharān || 18 ||
[Analyze grammar]

kuru dīpotsavaṃ ramyaṃ trayodaśyādikeṣu ca |
śaṃkaraśca bhavānī ca krīḍayā dyūtamāsthite || 19 ||
[Analyze grammar]

gauryā jitvā purā śaṃbhurnagno dyūte visarjitaḥ |
ato'rthaṃ śaṃkaro duḥkhī gaurī nityaṃ sukhasthitā || 20 ||
[Analyze grammar]

dyūtaṃ niṣiddhaṃ sarvatra hitvā pratipadaṃ budhāḥ |
prathamaṃ vijayo yasya tasya saṃvatsaraṃ sukham || 21 ||
[Analyze grammar]

bhavānyā'bhyarthitā lakṣmīrdhenurūpeṇa saṃsthitā |
prātargovarddhanaḥ pūjyo dyūtaṃ rātrau samācaret || 22 ||
[Analyze grammar]

bhūṣaṇīyāstadā gāvo varjyā vahanadohanāt || 23 ||
[Analyze grammar]

govarddhana dharā'dhāra gokulatrāṇakāraka |
viṣṇubāhukṛtocchrāya gavāṃ koṭiprado bhava || 24 ||
[Analyze grammar]

yā lakṣmīrlokapālānāṃ dhenurūpeṇa saṃsthitā |
ghṛtaṃ vahati yajñārthe mama pāpaṃ vyapohatu || 25 ||
[Analyze grammar]

agrataḥ saṃtu me gāvo gāvo me saṃtu pṛṣṭhataḥ |
gāvo me hṛdayaṃ saṃtu gavāṃ madhye vasāmyaham || 26 ||
[Analyze grammar]

iti govarddhanapūjā |
sadbhāvenaiva saṃtoṣya devānsatpuruṣānnarān |
itareṣāmannapānairvākyadānena paṃḍitān || 27 ||
[Analyze grammar]

vastraistāṃbūladhūpaiśca puṣpakarpūrakuṃkumaiḥ |
bhakṣyairuccāvacairbhojyairaṃtaḥpuranivāsinaḥ || 28 ||
[Analyze grammar]

grāmyānvṛṣabhadānaiśca sāmaṃtānnṛpatirdhanaiḥ |
padātijanasaṃghāṃśca graiveyaiḥ kaṭakaiḥ śubhaiḥ |
svanāmāṃkaiśca tānrājā toṣayetsajjanānpṛthak || 29 ||
[Analyze grammar]

yathārthaṃ toṣayitvā tu tato mallānnarāṃstathā |
vṛṣabhānmahiṣāṃścaiva yudhyamānānparaiḥ saha || 30 ||
[Analyze grammar]

rājñastathaiva yodhāṃśca padātīnsamalaṃkṛtān |
maṃcā'rūḍhaḥ svayaṃ paśyennaṭanartakacāraṇān || 31 ||
[Analyze grammar]

yuddhāpayedvāsayecca gomahiṣyādikaṃ ca yat |
vatsānākarṣayedgobhiruktipratyuktivādanāt || 32 ||
[Analyze grammar]

tato'parāhnasamaye pūrvasyāṃ diśi suvrata |
mārgapālīṃ prabadhnāti durgastaṃbhe'tha pādape || 33 ||
[Analyze grammar]

kuśakāśamayīṃ divyāṃ laṃbakairbahubhiḥ priye |
vīkṣayitvā gajānaśvānmārgapālyāstale nayet || 34 ||
[Analyze grammar]

gāvo vṛṣāṃśca mahiṣānmahiṣīrghaṭakotkaṭān |
kṛtahomairdvijeṃdraistu badhnīyānmārgapālikām || 35 ||
[Analyze grammar]

namaskāraṃ tataḥ kuryānmantreṇānena suvrata |
mārgapāli namastubhyaṃ sarvalokasukhaprade |
tale tava sukhenāśvā gajā gāvaśca saṃtu me || 36 ||
[Analyze grammar]

mārgapālītale putra yāṃti gāvo mahāvṛṣāḥ |
rājāno rājaputrāśca brāhmaṇāśca viśeṣataḥ || 37 ||
[Analyze grammar]

mārgapālī samullaṃghya nīrujaḥ sukhino hi te |
kṛtvaitatsarvameveha rātrau daityapaterbaleḥ || 38 ||
[Analyze grammar]

pūjāṃ kuryāttataḥ sākṣādbhūmau maṃḍalake kṛte |
balimālikhya daityeṃdraṃ varṇakaiḥ paṃcaraṃgakaiḥ || 39 ||
[Analyze grammar]

sarvābharaṇasaṃpūrṇaṃ viṃdhyāvalisamanvitam |
kūṣmāṃḍamayajaṃbhorumadhudānavasaṃvṛtam || 40 ||
[Analyze grammar]

saṃpūrṇaṃ kṛṣṭavadanaṃ kirīṭotkaṭakuṇḍalam |
dvibhujaṃ daityarājānaṃ kārayitvā svake punaḥ || 41 ||
[Analyze grammar]

gṛhasya madhye śālāyāṃ viśālāyāṃ tato'rcayet |
mātṛbhrātṛjanaiḥ sārddhaṃ saṃtuṣṭo bandhubhiḥ saha || 42 ||
[Analyze grammar]

kamalaiḥ kumudaiḥ puṣpaiḥ kahlārai raktakotpalaiḥ |
gandhapuṣpānnanaivedyaiḥ sakṣīrairguḍapāyasaiḥ || 43 ||
[Analyze grammar]

madyamāṃsasurālehyacoṣyabhakṣyopahārakaiḥ |
mantreṇā'nena rājeṃdra samantrī sapurohitaḥ |
pūjāṃ kariṣyate yo vai saukhyaṃ syāttasya vatsaram || 44 ||
[Analyze grammar]

balirāja namatubhyaṃ virocanasuta prabho |
bhaviṣyeṃdra surārāte pūjeyaṃ pratigṛhyatām || 45 ||
[Analyze grammar]

evaṃ pūjāvidhānena rātrau jāgaraṇaṃ tataḥ |
kārayedvai kṣaṇaṃ rātrau naṭanṛtyakathānakaiḥ || 46 ||
[Analyze grammar]

lokaścāpi gṛhasyāṃte saparyāṃ śuklataṃdulaiḥ |
saṃsthāpya balirājānaṃ phalaiḥ puṣpaiḥ prapūjayet || 47 ||
[Analyze grammar]

balimuddiśya vai tatra kāryaṃ sarva ca suvrata |
yāni yānyakṣayāṇyāhurmunayastattvadarśinaḥ || 48 ||
[Analyze grammar]

yadatra dīyate dānaṃ svalpaṃ vā yadi vā bahu |
tadakṣayaṃ bhavetsarvaṃ viṣṇoḥ prītikaraṃ śubham || 49 ||
[Analyze grammar]

rātrau ye na kariṣyaṃti tava pūjāṃ bale narāḥ |
teṣāṃ ca śrotriyo dharmaḥ sarvastvāmupatiṣṭhatu || 50 ||
[Analyze grammar]

viṣṇunā ca svayaṃ vatsa tuṣṭena balaye punaḥ |
upakārakaraṃ dattamasurāṇāṃ mahotsavam || 51 ||
[Analyze grammar]

ekamevamahorātraṃ varṣevarṣe ca kārtike |
dattaṃ dānavarājasya ādarśamiva bhūtale || 52 ||
[Analyze grammar]

yaḥ karoti nṛpo rājye tasya vyādhibhayaṃ kutaḥ |
subhikṣaṃ kṣemamārogyaṃ tasya saṃpadanuttamā || 53 ||
[Analyze grammar]

nīrujaśca janāḥ sarve sarvopadravavarjitāḥ || 54 ||
[Analyze grammar]

kaumudī kriyate yasmādbhāvaṃ kartuṃ mahītale |
yo yādṛśena bhāvena tiṣṭhatyasyāṃ ca suvrata |
harṣaduḥkhādibhāvena tasya varṣaṃ prayāti hi || 55 ||
[Analyze grammar]

rudite roditaṃ varṣaṃ prahṛṣṭe tu praharṣitam |
bhuktau bhogyaṃ bhavedvarṣaṃ svasthe svasthaṃ bhaviṣyati || 56 ||
[Analyze grammar]

vaiṣṇavī dānavī ceyaṃ tithiḥ proktā ca kārtike || 57 ||
[Analyze grammar]

dīpotsavaṃ janitasarvajanapramodaṃ kurvaṃti ye śubhatayā valirājapūjām |
dānopabhogasukhabuddhimatāṃ kulānāṃ harṣaṃ prayāti sakalaṃ pramudā ca varṣam || 58 ||
[Analyze grammar]

balipūjāṃ vidhāyaivaṃ paścādgokrīḍanaṃ caret || 59 ||
[Analyze grammar]

gavāṃ krīḍādine yatra rātrau dṛśyeta candramāḥ |
somo rājā paśūnhaṃti surabhīpūjakāṃstathā || 60 ||
[Analyze grammar]

pratipaddarśasaṃyoge krīḍanaṃ tu gavāṃ matam |
paraviddhāsu yaḥ kuryātputradāradhanakṣayaḥ || 61 ||
[Analyze grammar]

alaṃkāryāstadā gāvo gogrāsādibhirarcitāḥ |
gītavāditranirghoṣairnayennagarabāhyataḥ |
ānīya ca tataḥ paścātkuryānnīrājanāvidhim || 62 ||
[Analyze grammar]

atha cetpratipatsvalpā nārī nīrājanaṃ caret |
dvitīyāyāṃ tataḥ kuryātsāyaṃ maṃgalamālikāḥ || 63 ||
[Analyze grammar]

evaṃ nīrājanaṃ kṛtvā sarvapāpaiḥ pramucyate |
pratipatpūrvaviddhaiva yaṣṭikākarṣaṇe bhavet || 64 ||
[Analyze grammar]

kuśakāśamayīṃ kuryādyaṣṭikāṃ sudṛḍhāṃ navām |
devadvāre nṛpadvāre'thavā'neyā catuṣpathe || 65 ||
[Analyze grammar]

tāmekato rājaputrā hīnavarṇāstathaikataḥ |
gṛhītvā karṣayeyuste yathāsāraṃ muhurmuhuḥ || 66 ||
[Analyze grammar]

samasaṃkhyā dvayoḥ kāryā sarve'pi balavattarāḥ |
jayo'tra hīnajātīnāṃ jayo rājñastu vatsaram || 67 ||
[Analyze grammar]

ubhayoḥ pṛṣṭhataḥ kāryā rekhā tatkarṣakopari |
rekhāṃte yo nayettasya jayo bhavati nā'nyathā || 68 ||
[Analyze grammar]

jayacihnamidaṃ rājā nidadhīta prayatnataḥ || 69 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye kārtikaśuklapratipanmāhātmyavarṇanaṃnāma daśamo'dhyāyaḥ || 10 ||
[Analyze grammar]