Chapter 4

[English text for this chapter is available]

skanda uvāca |
vainateyaśilāyāstu māhātmyaṃ vada me pitaḥ |
kiṃ puṇyaṃ kiṃ phalaṃ cāsya anubhāvaṃ ca kiṃ bhavet || 1 ||
[Analyze grammar]

śiva uvāca |
kaśyapādvinatāgarbhe mahābalaparākramau |
garuḍāruṇau prajātau dvāvaruṇaḥ sūryasārathiḥ || 2 ||
[Analyze grammar]

badaryyā dakṣiṇe bhāge gandhamādanaśṛṅgake |
garuḍastapa ātepe harivāhanakāmyayā || 3 ||
[Analyze grammar]

phalamūlajalāhāro nirdvaṃdvo japatāṃ varaḥ |
padaikenopasaṃkramya bhuvi jepe nirāmayaḥ || 4 ||
[Analyze grammar]

triṃśadvarṣasahasrāṇi haridarśana lālasaḥ |
tatastu bhagavānsākṣātpītavāsā nijāyudhaḥ || 5 ||
[Analyze grammar]

āvirāsīdyathā prācyāṃ diśīṃduriva puṣkalaḥ |
uvāca vacanaṃ samyaṅmeghagaṃbhīranisvanaḥ || 6 ||
[Analyze grammar]

tathāpi na bahirvṛttirdadhmau daravaraṃ tataḥ |
tathāpi na bahirvṛttirgaruḍasya mahātmanaḥ || 7 ||
[Analyze grammar]

tataḥ praviśya bhagavānaṃtaraṃ pavanakramāt |
bahirunmukhatāṃ caiva racayanbahirābabhau || 8 ||
[Analyze grammar]

bhagavaṃtaṃ hariṃ dṛṣṭvā garuḍo gatasādhvasaḥ |
pulakāṃkita sarvāṃgastuṣṭāva vihitāṃjaliḥ || 9 ||
[Analyze grammar]

garuḍa uvāca |
jayajaya tribhuvanajanamanobhavana vidalitāghaguṇa sakalagīrvāṇavaṃdita caraṇakamalayugalaparimalabahalaripuvanavibhaṃjana vidyotamāna sakalasurāsuramukuṭakoṭivilasita nijapīṭhakamalanirasita nijajanahṛdayatimirapaṭalabahala himakara iva trividhasaṃtāpasaṃdohaharaṇacaraṇa |
jagadudayasthitilayavilāsavilasita trividhamūrtikīrtivisphūrjita jagadudayasaṃdoha dinakara iva nijajanamānasasarojaṣaṭpadavidita sakalavedavidyotamāna mānasa nijajanamunijanavandita padanakhanīrapavitrīkṛta gīrvāṇamunimānasavaṃdita caraṇarajaḥprasādasārabhūta jagatāmadhīśa namaste namaste || 10 ||
[Analyze grammar]

api ca |
aṣṭaśaktisahito vanamālī pītacailakusumāvaliśobhaḥ |
paṃkajākaravirājitapādaḥ pātu māmavahitendriyavargaḥ || 11 ||
[Analyze grammar]

bhaktahṛtkamalarājitamūrtirduṣṭadaityadalanotthitakīrtiḥ |
baddhaseturavitāśritalokaḥ pātu māmanudinaṃ bhuvaneśaḥ || 12 ||
[Analyze grammar]

sthiracalatrividhatāpahimāṃśurbhāsamānataraṇipratibhāsaḥ |
eka eva bahudhā kṛtaveṣo māyayāvatu mahāmatirīśaḥ || 13 ||
[Analyze grammar]

bhaktaciṃtanakṛte kṛtarūpaḥ śaiśavena bahuśāsitabhūpaḥ |
vedamārga urudhā hitakārī rītirīśituriyaṃ guṇaśālī || 14 ||
[Analyze grammar]

yajñabhugghṛdayabaṃdhanadhārī viśvamūrtirabalāṃśukahārī |
pālane'pi mahatāṃ bahudeho rāsa eṣa tanumānavatānnaḥ || 15 ||
[Analyze grammar]

premabhaktipuruṣairupalabhyaḥ pūruṣaḥ kṛtasamastanivāsaḥ |
dāsyavṛṃdahṛṣito nijadāsaḥ prekṣaṇaikakaruṇovatu viśvam || 16 ||
[Analyze grammar]

kaṃṭhalaṃbitatarakṣunakhāgrakruṣṭagoparamaṇīkucabhāraḥ |
līlayā yuvatibhiḥ kṛtaveṣaḥ śeṣa eṣa bhavatādupaśāṃtyai || 17 ||
[Analyze grammar]

daṃḍapāṇirayameva janānāṃ śāsitātmaniyamoktahitānām |
pāvanāya mahatāmanuśālī viśvaduḥkhaśamano bhavatānnaḥ || 18 ||
[Analyze grammar]

evaṃ stutastataḥ sākṣādgaruḍena mahātmanā |
pūjārthamājuhāvaināṃ gaṃgāṃ tripathagāminīm || 19 ||
[Analyze grammar]

tataḥ paṃcamukhī sākṣādāvirāsīnnagopari |
tenodakena pādārghaṃ cakāra vinatāsutaḥ || 20 ||
[Analyze grammar]

vriyatāṃ vara ityukto garuḍo hariṇā tataḥ |
tavaikavāhanaḥ śrīmānbalavīryaparākramaḥ |
ajeyo devadaityānāṃ syāmahaṃ te prasādataḥ || 21 ||
[Analyze grammar]

iyaṃ mannāmavikhyātā sarvapāpaharā śilā |
etasyāḥ smaraṇātpuṃsāṃ viṣavyādhirna jāyatām || 22 ||
[Analyze grammar]

evamuktvā tatastūṣṇīṃ babhūva vinatāsutaḥ |
omityuktvā tato viṣṇuruvācedaṃ vaco hitam || 23 ||
[Analyze grammar]

badarīṃ tvaṃ prayāhīti nāradena niṣevitām |
snānaṃ nāradatīrthādāvupavāsatrayaṃ śuciḥ |
kṛtvā maddarśanaṃ tatra sulabhaṃ te bhaviṣyati || 24 ||
[Analyze grammar]

ityuktvāṃtarddadhe viṣṇustaḍitsaudāmanī yathā |
garuḍastu tataḥ śīghramāgatya badarīṃ mudā || 25 ||
[Analyze grammar]

vahnitīrthaṃ samāsādya śilāmāśritya tatparaḥ |
snātvā nāradatīrtheṣu vratacaryāmathākarot || 26 ||
[Analyze grammar]

tatastu nārade tīrthe dṛṣṭvā bhagavataḥ sthitim |
namaskṛtya vidhānena tadājñātaḥ puraṃ yayau || 27 ||
[Analyze grammar]

tataḥ prabhṛti trailokye gāruḍīti śilocyate || 28 ||
[Analyze grammar]

skaṃda uvāca |
vārāhyā vada māhātmyaṃ kīdṛśaṃ hīśvareśvara |
kiṃ puṇyaṃ kiṃ phalaṃ tasyā abhidhānaṃ tathā katham || 29 ||
[Analyze grammar]

śiva uvāca |
rasātalātsamuddhṛtya mahīṃ daivatavairiṇam |
hiraṇyākṣaṃ raṇe hatvā badarīṃ samupāgataḥ || 30 ||
[Analyze grammar]

ākalpāṃtaṃ mahādevo yogadhāraṇayā sthitaḥ |
badaryāḥ sauṣṭhavādeva vidadhe sthitimātmanaḥ || 31 ||
[Analyze grammar]

śilārūpeṇa bhagavānsthitiṃ tatra cakāra ha |
tatra gatvā tu manujaḥ snātvā gaṃgājale'male || 32 ||
[Analyze grammar]

dānaṃ dattvā svaśaktyā vai gaṃgāṃbhaḥ śāṃtamānasaḥ |
ahorātre sthito bhūtvā japedekāgramānasaḥ || 33 ||
[Analyze grammar]

śilāyāṃ devadṛṣṭiśca tasya puṃsaḥ prajāyate |
bahunā kimihoktena yadvadiṣyati sādhakaḥ || 34 ||
[Analyze grammar]

tattasya sidhyati kṣipraṃ yadyapi syātsuduṣkaram || 35 ||
[Analyze grammar]

skaṃda uvāca |
nārasiṃhīśilāyāstu māhātmyaṃ vada me prabho |
tvatprasādānmahādeva durllabhaṃ śrutavānaham || 36 ||
[Analyze grammar]

śiva uvāca |
hiraṇyakaśipuṃ hatvā nakhāgreṇaiva līlayā |
krodhāgninā pradīptāṃgaḥ pralayānalasannibhaḥ || 37 ||
[Analyze grammar]

tadā devaiḥ samāgatya sthitvā dūre dayālubhiḥ |
stuto'sau bhagavāndevo līlayā dhṛtavigrahaḥ || 38 ||
[Analyze grammar]

tadā prasanno harirugravikramaḥ svatejasā vyāptasurāsurottamaḥ |
uvāca matto varamāvṛṇīdhvaṃ gīrvāṇanirvāṇa sukhaikahetum || 39 ||
[Analyze grammar]

tadāsurāṇāmadhipaḥ svayaṃbhūruvāca vākyaṃ smitaśobhitānanaḥ |
rūpaṃ tavātyugramaśeṣadehināṃ bhayāvahaṃ saṃhara nārasiṃha || 40 ||
[Analyze grammar]

anekadhaitadvidhivadvidhāya nidhāya śailādiṣu divyamūrtim |
uvāca kiṃ vaḥ prakaromi kṛtyamahaṃ prasannastridaśāḥ paraṃtapāḥ || 41 ||
[Analyze grammar]

tatomarā ūcuranena caiva rūpeṇa saṃkṣobhitaviśvamūrte |
praśāṃtamaṃtaḥsukhahetubaṃdhi caturbhujatvaṃ varamīpsitaṃ naḥ || 42 ||
[Analyze grammar]

tato harirvīkṣya nirīkṣaṇena divyena viśvaṃ prayayau viśālām |
gaṃgājale krīḍati viṣṭacetāḥ surāsurebhyo bhagavānuvāca || 43 ||
[Analyze grammar]

tato'marāḥ śāṃtabhayā athainaṃ nirīkṣya devaṃ jalamadhyasaṃstham |
natvā parikramya tadā samāyayurnirūḍhabhāvāḥ svapuraṃ tataḥ kramāt || 44 ||
[Analyze grammar]

tataḥ samastā ṛṣayastapodhanāḥ samāyayurbhaktibharāvanamrāḥ |
nṛsiṃhamatyadbhutavikamaṃ hariṃ samīḍire baddhakarā vacobhiḥ || 45 ||
[Analyze grammar]

ṛṣaya ūcuḥ |
namonamaste jagatāmadhīśa viśveśa viśvābhaya viśvamūrte |
kṛpāṃburāśe bhajanīyatīrtha pādāṃbuja śrīśa dayāṃ vidhehi || 46 ||
[Analyze grammar]

eko'si nānā nijamāyayā svayā ghaṭe payo yadvadupādhibhinnam |
bhaktecchayopāttavicitravigraha prasīda viśvānana viśvabhāvana || 47 ||
[Analyze grammar]

tataḥ prasanno bhagavānnṛsiṃhaḥ siṃhavikramaḥ |
uvāca vacanaṃ cāru varaṃ me vriyatāmiti || 48 ||
[Analyze grammar]

ṛṣaya ūcuḥ |
yadi prasanno bhagavankṛpayā jagatāṃ pate |
viśālā na parityājyā varo'smākamabhīpsitaḥ || 49 ||
[Analyze grammar]

evamastu tataḥ sarve svāśramaṃ hyṛṣayo yayuḥ |
nṛsiṃho'pi śilārūpī jalakrīḍāparo'bhavat || 50 ||
[Analyze grammar]

upavāsatrayaṃ kṛtvā japadhyānaparāyaṇaḥ |
nṛsiṃharūpiṇaṃ sākṣātpaśyatyeva na saṃśayaḥ || 51 ||
[Analyze grammar]

ya etacchraddhayā martyaḥ śṛṇoti śrāvayañchuciḥ |
sarvapāpavinirmukto vaikuṃṭhe vasatiṃ labhet || 52 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe badarikāśramamāhātmye śivakārttikeyasaṃvāde garuḍaśilā vārāhīśilā nārasiṃhīśilāmāhātmyavarṇanaṃnāma caturtho'dhyāyaḥ || 4 ||
[Analyze grammar]