Chapter 3

[English text for this chapter is available]

skanda uvāca |
bhagavansarvabhūteṣu sarvadharmaviśārada |
agnitīrthasya māhātmyaṃ kṛpayā vada me pitaḥ || 1 ||
[Analyze grammar]

śiva uvāca |
atiguhyatamaṃ tīrthaṃ sarvatīrthaniṣevitam |
saṃkṣepātkathayāmyetattavādaravaśādaham || 2 ||
[Analyze grammar]

mahāpātakino ye ca atipātakinastathā |
snānamātreṇa śuddhyaṃti vināyāsena putraka || 3 ||
[Analyze grammar]

prāyaścittena yatpāpaṃ na gacchenmaraṇāṃtikam |
snānamātreṇa tīrthasya pāvakasya viśuddhyati || 4 ||
[Analyze grammar]

atyaṃtamalasaṃbaddhaṃ yathā śuddhyati hāṭakam |
tathāgnitīrthamāsādya dehī pāpairviśuddhyati || 5 ||
[Analyze grammar]

kuśāgreṇodabiṃduṃ ca pītvā varṣatrayaṃ naraḥ |
anyakṣetre tapaḥ kṛtvā tadatra snānamātrataḥ || 6 ||
[Analyze grammar]

brāhmaṇānbhojayitvāsminyathāvibhavasaṃbhavaiḥ |
daridratā kule teṣāṃ na kadācitprajāyate || 7 ||
[Analyze grammar]

upavāsena yaḥ prāṇānvahnitīrthe tyajennaraḥ |
sa bhittvā sūryalokādīnviṣṇulokaṃ prapadyate || 8 ||
[Analyze grammar]

cāṃdrāyaṇasahasraistu kṛcchraiḥ koṭibhireva ca |
yatphalaṃ labhate martyastatsnānādvahnitīrthataḥ || 9 ||
[Analyze grammar]

paṃcadhā ye prakurvaṃti pāpamasminṣaḍānana |
japena pavanāyāmairviśuddhiriti me matiḥ || 10 ||
[Analyze grammar]

jñānena mohavaśataḥ pāpaṃ kurvanti ye'dhamāḥ |
paiśācīṃ yonimāyāmati yāvadiṃdrāścaturdaśa || 11 ||
[Analyze grammar]

anāśramī cāśramī vā yāvaddehasyadhāraṇam |
na tīrthe pāvake kuryātpātakaṃ buddhipūrvakam || 12 ||
[Analyze grammar]

snānaṃ dānaṃ japo homaḥ saṃdhyā devārcanaṃ tathā |
atrānaṃtaguṇaṃ proktamanyatīrthātṣaḍānana || 13 ||
[Analyze grammar]

bahūni saṃti tīrthāni pāvanāni mahāṃtyapi |
vahnitīrthasamaṃ tīrthaṃ na bhūtaṃ na bhaviṣyati || 14 ||
[Analyze grammar]

na brahmā na śivaḥ śeṣo na devā na ca tāpasāḥ |
śaknuvaṃti phalaṃ nālaṃ vaktuṃ pāvakatīrthajam || 15 ||
[Analyze grammar]

kiṃ teṣāṃ bahubhiryajñaiḥ kiṃ dānairniyamairyamaiḥ |
yeṣāṃ pāvakatīrthe'sminsnānaṃ daśadinaṃ bhavet || 16 ||
[Analyze grammar]

upavāsena yaḥ prāṇānvahnitīrthe jayennaraḥ |
upavāsatrayaṃ kṛtvā pūjayitvā janārddanam |
naraḥ pāvakatīrthe'sminsa bhavetpāvakopamaḥ || 17 ||
[Analyze grammar]

śilāpaṃcakamadhyasthaṃ sānnidhyaṃ nityadā hareḥ |
tatraiva pāvakaṃ tīrthaṃ sarvapāpapraṇāśanam || 18 ||
[Analyze grammar]

skaṃda uvāca |
kathaṃ tatra śilāḥ paṃca kena vā tatra nirmitāḥ |
kiṃ puṇyaṃ kiṃ phalaṃ tāsāṃ vaktumarhasyaśeṣataḥ || 19 ||
[Analyze grammar]

śiva uvāca |
nāradī nārasiṃhī ca vārāhī gāruḍī tathā |
mārkaṃḍeyīti vikhyātāḥ śilāḥ sarvārthasiddhidāḥ || 20 ||
[Analyze grammar]

nārado bhagavāṃstepe tapaḥ paramadāruṇam |
darśanārthaṃ mahāviṣṇoḥ śilāyāṃ vāyubhojanaḥ || 21 ||
[Analyze grammar]

ṣaṣṭivarṣasahasrāṇi śilāyāṃ vṛkṣavṛttimān |
tadāsau bhagavānviṣṇustatra brāhmaṇarūpadhṛk || 22 ||
[Analyze grammar]

jagāma puratastasya kṛpayā munisattamam |
uvāca vacanaṃ cāru kimiti kliśyate hyṛṣe |
kiṃ vā tavepsitaṃ brūhi tapasā kṣīṇakalmaṣa || 23 ||
[Analyze grammar]

nārada uvāca |
ko bhavānvijane'raṇye mamānugrahatatparaḥ |
manaḥ prasannatāmeti darśanātte dvijottama || 24 ||
[Analyze grammar]

ityukto nāradenāsau śaṃkhacakragadādharaḥ |
pītāṃbaralasatpadmavanamālāvibhūṣaṇaḥ || 25 ||
[Analyze grammar]

śrīvatsakaustubhabhrājatkamalāvimalālayaḥ |
sunaṃdanapramukhyaiḥ sa stūyamāno janārddanaḥ || 26 ||
[Analyze grammar]

darśayāmāsa rūpaṃ svaṃ nāradāya kṛpārditaḥ |
taṃ dṛṣṭvā sahasotthāya tanuṃ prāṇa ivāgataḥ || 27 ||
[Analyze grammar]

kṛtāṃjalipuṭo bhūtvā namaskṛtya punaḥ punaḥ |
tuṣṭāva praṇato bhūtvā jagatāmīśvareśvaram || 28 ||
[Analyze grammar]

nārada uvāca |
yaḥ sarvasākṣī jagatāmadhīśvaro bhaktecchayā jātaśarīrasaṃpadaḥ |
kṛpāmahāṃbhonidhirāśritānāṃ prasīdatāṃ pāvanadivyamūrtiḥ || 29 ||
[Analyze grammar]

hitāya lokasya satāṃ punarmanaḥ sutoṣaṇāyāciramutkalādibhiḥ |
prasannalīlāhasitāvalokanaḥ prasīdatāṃ sattvanikāyamūrtimān || 30 ||
[Analyze grammar]

kaṃdarppalāvaṇyavilāsasuṃdaraḥ prasannagaṃbhīragireṃdirotsavaḥ |
svamāśritānāṃ varakalpapādapaḥ prasīdatāṃ dīnadayārdramānasaḥ || 31 ||
[Analyze grammar]

yadaṃghripadmārcananirmalāṃtarā jñānāsinā śātitabaṃdhahetavaḥ |
vidaṃti yadbrahmasukhaṃ gataklamāḥ prasīdatāṃ dīnadayārdramānasaḥ || 32 ||
[Analyze grammar]

saṃsāravārāṃnidhibaddhaseturyaḥ sṛṣṭipālāṃtavidhānahetuḥ |
upāṃtanāmā guṇalabdhamūrtiḥ prasīdatāṃ brahmasukhānubhūtiḥ || 33 ||
[Analyze grammar]

ya iṃdriyādhiṣṭhitabhūtasūkṣmādvikāsaheturdyutimadvariṣṭhaḥ |
jīvātmatāṃ gacchati māyayā svayā sa eka īśo bhagavānprasīdatām || 34 ||
[Analyze grammar]

svadṛgguṇairyena vilipyate mahānguṇāśrayaṃ yena ca pāñcabhautikam |
eko'pi nānāguṇasaṃprayuktaḥ prasīdatāṃ dīnadayāluvaryaḥ || 35 ||
[Analyze grammar]

yasyānuvartino devā vipadāṃ padamaṃbudhim |
kṛtvā vatsapadaṃ svarge nirātaṃkā vasaṃti hi || 36 ||
[Analyze grammar]

namaste vāsudevāya namaḥ saṃkarṣaṇāya ca |
pradyumnāyāniruddhāya sarvabhūtātmane namaḥ || 37 ||
[Analyze grammar]

adya me jīvitaṃ dhanyamadya me saphalaṃ tapaḥ |
adya me saphalaṃ jñānaṃ darśanātte janārdana || 38 ||
[Analyze grammar]

śrībhagavānuvāca |
tuṣṭo'haṃ tapasānena stotreṇa tava nārada |
tvatto bhakto na me kaścittriṣu lokeṣu vidyate || 39 ||
[Analyze grammar]

varaṃ varaya bhadraṃ te varado'haṃ tavāgrataḥ |
maddarśanātte kāmaḥ syātsaṃsiddho viddhi nārada || 40 ||
[Analyze grammar]

nārada uvāca |
 varado yadi me deva varārho yadi vāpyaham |
bhaktiṃ tava padāṃbhoje niścalāṃ dehi me vibho || 41 ||
[Analyze grammar]

pacchilāsannidhānaṃ ca na tyājyaṃ te kadācana |
mattīrthadarśanātsparśātsnānādācamanāttathā |
dehairna yujyate deyastatīyastu varo mama || 42 ||
[Analyze grammar]

śrībhagavānuvāca |
evamastu tava snehāttava tīrthe vasāmyaham |
carācarāṇāṃ jaṃtūnāṃ videhāya na saṃśayaḥ || 43 ||
[Analyze grammar]

evamuktvā hariḥ sākṣāttatraivāṃtaradhīyata |
nārado'pi mahātejā dināni katicitsaha |
badarīmāvasanhṛṣṭo yayau madhupurīṃ tataḥ || 44 ||
[Analyze grammar]

skaṃda uvāca |
mārkaṃḍeyaśilāyāstu mahimānaṃ vadasva me |
kiṃ puṇyaṃ kiṃ phalaṃ tasyāḥ saṃjñā ca tādṛśī katham || 45 ||
[Analyze grammar]

śiva uvāca |
purā tretāyugasyāṃte mṛkaṃḍutanayo mahān |
svalpāyuṣaṃ nijaṃ jñātvā jajāpa paramaṃ japam || 46 ||
[Analyze grammar]

dvādaśākṣaramaṃtreṇa pūjito hariravyayaḥ |
saptakalpāyuṣaṃ jñātvā tatraivāṃtarato yayau || 47 ||
[Analyze grammar]

mārkaṃḍeyastataḥ śrutvā tīrthāṭanapariśramam |
darśanaṃ nāradasyāsīnmathurāyāṃ ṣaḍānana || 48 ||
[Analyze grammar]

pūjito vaṃditastena nārado munisattamaḥ |
kathayāmāsa māhātmyaṃ badaryā yatra keśavaḥ || 49 ||
[Analyze grammar]

nārada uvāca |
kimiti kliśyate sādho tīrthāṭanapariśramaiḥ |
badaryākhyaṃ mahākṣetraṃ sānnidhyaṃ nityadā hareḥ || 50 ||
[Analyze grammar]

tatra yāhi yatra sākṣāddhariṃ paśyasi cakṣuṣā |
tacchrutvā vismayopeto viśālāmāyayāvṛṣiḥ || 51 ||
[Analyze grammar]

snātvā śilāmupaviśañjajāpāṣṭākṣaraṃ param |
tataḥprasanno bhagavāṃstrirātryaṃte janārdanaḥ || 52 ||
[Analyze grammar]

śaṃkhacakragadāpadmavanamālāvibhūṣaṇam |
taṃ dṛṣṭvā sahasotthāya premagadgadayā girā |
tuṣṭāva praṇato bhūtvā mārkaṃḍeyo janārdanam || 53 ||
[Analyze grammar]

mārkaṃḍeya uvāca |
aśāśvate ca saṃsāre sāre te caraṇāṃbuje |
samuddhāraḥ kathaṃ nṛṇāṃ trāhi māṃ parameśvara || 54 ||
[Analyze grammar]

tāpatrayapariśrāṃtamanekājñānajṛṃbhitam |
saṃsārakuhare bhrāṃtaṃ trāhi māṃ kṛpayā'cyuta || 55 ||
[Analyze grammar]

anekayoniyaṃtreṣu niḥsṛtestanuvedanām |
garbhavāsakṛtāṃ prāptaṃ trāhi māṃ karuṇāṃbudhe || 56 ||
[Analyze grammar]

kṛmibhakṣitasarvāṃgaṃ kṣutpipāsākulaṃ ca hi |
āṃtramālākulegarbhe trāhi māṃ madhusūdana || 57 ||
[Analyze grammar]

amedhyādibhirāliptaṃ niśceṣṭaśramamākulam |
smaraṃtaṃ nijakarmotthaṃ trāhi māṃ madhusūdana || 58 ||
[Analyze grammar]

vacanādānaniḥśvāsāśaktaṃ bhayamupāgatam |
garbhavāsamahāduḥkhaṃ trāhi māṃ madhusūdana || 59 ||
[Analyze grammar]

jarāmaraṇabālyādiduḥkhasaṃsārapīḍitam |
duḥkhābdhau sukhabuddhiṃ māṃ kṛpāsiṃdho prapālaya || 60 ||
[Analyze grammar]

kadācitkṛmitāṃ prāptaṃ kadācitsvedajanmitām |
kadācidudbhijjatvaṃ ca kadācinnaratāṃ gatam || 61 ||
[Analyze grammar]

sarvayonisamāpannaṃ vipannaṃ vigataprabham |
anāthaṃ tvāṃ samāpannaṃ trāhi māṃ kṛpayā'cyuta || 62 ||
[Analyze grammar]

evaṃ stutastataḥ kṛṣṇo mārkaṇḍeyena dhīmatā |
prītastamāha viprarṣe varaṃ me vriyatāmiti || 63 ||
[Analyze grammar]

śrīmārkaṃḍeya uvāca |
yadi tuṣṭo bhavānmahyaṃ bhagavandīnavatsala |
niścalāṃ dehi me bhaktiṃ pūjāyāṃ darśane tava |
śilāyāṃ tava sānnidhyameṣa eva varo mama || 64 ||
[Analyze grammar]

sūta uvāca |
tathetyuktvā mahāviṣṇuryayāvaṃtarhitaṃ dvija |
mārkaṃḍeyastatastuṣṭo jagāma piturāśramam || 65 ||
[Analyze grammar]

upasthānamidaṃ puṇyaṃ sarvapāpapraṇāśanam |
śṛṇuyācchrāvayenmartyo govinde labhate gatim || 66 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śivakārtikeyasaṃvāde agnitīrthanāradaśilāmārkaṇḍeyaśilāmāhātmyavarṇanaṃnāma tṛtīyo'dhyāyaḥ || 3 ||
[Analyze grammar]