Chapter 20

[English text for this chapter is available]

jaiminiruvāca |
itthaṃ prabodhitastena nāradena kṣitīśvaraḥ |
tuṣṭāva jagatāṃ nāthaṃ vacobhiḥ karuṇānvitam || 1 ||
[Analyze grammar]

indradyumna uvāca |
tvadaṃghripāthojayugaṃ murāre nopāsitaṃ janmasu pūrvajeṣu |
tatkarmaṇāṃ dāruṇapākabhājaṃ dīnaṃ paritrāhi kṛpāṃbudhe mām || 2 ||
[Analyze grammar]

kva nirmalaṃ tvaccaraṇābjayugmaṃ viriṃcirudreṃdrakirīṭamagnam |
kvāhaṃ kudīnaḥ śakṛdasramāṃsamūtrāsthisaṃghaiḥ pihitastvacā vai || 3 ||
[Analyze grammar]

asārasaṃsāraparibhrameṇa śramāturastvāṃ kathamīśa jāne |
jānaṃti te tvāṃ khalu devadeva yeṣāṃ bhavo duḥkhabhavaprakāśaḥ || 4 ||
[Analyze grammar]

prabho mayā duḥkhamanekajanmapāpārjitaṃ bhuktamanekabhāvam |
śubhārjito yaḥ sukhaleśabhāvo nidarśanaṃ yanmadhupṛktatikte || 5 ||
[Analyze grammar]

yadeva saukhyānubhavāya deva karmārjito me viṣayopabhogaḥ |
sa eva duḥkhaṃ pariṇāmato me na madvidho duḥkhijano'sti cānyaḥ || 6 ||
[Analyze grammar]

vibho yadi tvāṃ manasāpi pūrvamupāstamanyadviṣamekṣaṇo'ham |
kathaṃ tadālapsyamanekajanma punaḥ punarbhogyamaśeṣaduḥkham || 7 ||
[Analyze grammar]

vibhutvadāsatvapitṛtvaputrapriyatvamātṛtvadhanitvabhāvaiḥ |
vadhyatvahiṃsratvapatitvajāyābhāvaiśca tiryaktvasurādibhāvaiḥ || 8 ||
[Analyze grammar]

nīcorddhabhāvaṃ bahuśaḥ sakṛdvā bhavāṃgaṇe'smiṃnluṭhatānubhūtam |
na vā murāre tava pādapadmadūrībhavasyeṣṭaphalaṃ hi caitat || 9 ||
[Analyze grammar]

kośaṃ balaṃ caitadaśeṣapṛthivīdhanairvṛtaṃ yauvanarūparūpyaḥ |
mano'nukūlāḥ śataśaḥ striyaśca niṣkaṃṭakaṃ me nṛpamaṃḍalaṃ ca || 10 ||
[Analyze grammar]

sāmrājyatā cāpi bharo mahānme tvajjñānahīsya paśorivāyam |
bhārāvatāraṃ kuru me kṛpābdhe sadaiva tatrodita khedayogaḥ || 11 ||
[Analyze grammar]

dīnānukaṃpinkariṇo vimuktiḥ kṛtā vibho tvatsmṛtimātrakeṇa |
bhrāṃtaṃ ghaṭīyaṃtravadatra nātha māṃ trātumarhasyanukaṃpibhāvāt || 12 ||
[Analyze grammar]

na me tvadanyaḥ khalu bandhuratra pravāhavibhraṣṭatarusvabhāve |
pāpīyasī buddhirupetabhāvā snehānubandhā viṣaye'bhibhedyā || 13 ||
[Analyze grammar]

aharniśaṃ me tava pādapadmānnāpaitu matprārthitametadeva |
tvāṃ saccidānaṃdasupūrṇasiṃdhuṃ prāptāstu ye janmasahasrabhāgyaiḥ || 14 ||
[Analyze grammar]

kiṃ te hi paśyaṃti lavaikasaukhyamanekaduḥkhaṃ viṣayendrajālam |
kva bandhanaṃ karmabhiriṣṭaleśaduḥkhākaragraṃthiśatairabhedyam || 15 ||
[Analyze grammar]

anaṃtamādyaṃtavihīnamekamānaṃdadaṃ tvatpadapaṃkajaṃ kva |
māyāṃbudhau te mamatā bhramau ca kukarmanakrāyitagartamadhye || 16 ||
[Analyze grammar]

nirāśrayaṃ me patitaṃ vilāsakaṭākṣapātena nayādya tīram |
svakāryasaṃsādhanayāśritānāṃ saṃpādanāyeṣṭavidherajasram || 17 ||
[Analyze grammar]

bhrāmyaṃtamātmīyahitaṃ visṛjya māṃ trāhi mūḍhaṃ sahajānukaṃpin |
kṣudrāya kāryāya bahu bhramaṃtamaprāpya mūlaṃ parameśvaraṃ tvām || 18 ||
[Analyze grammar]

oṃ āyāsapātraṃ paramaṃ sudīnaṃ māṃ trāhi viṣṇo jagadekavaṃdya |
vedāṃtavedyāvyaya viśvanātha tatvamīśiṣe haṃtumaghaugharāśīn || 19 ||
[Analyze grammar]

taṃ tvāṃ parityajya sukhaikahetuṃ kṣudrāśayaṃ māṃ paripāhi viṣṇo |
prasupta eṣo'khilabhūtasaṃghaścaturvidho yatkṛtamoharātrau || 20 ||
[Analyze grammar]

tvajñānabhānūdayametya cāṃte prabodhyate tvāṃ śaraṇaṃ prapadye |
tvameka evākhilalokakarttā phaṇāsahasraiḥ parivītamūrtiḥ || 21 ||
[Analyze grammar]

paryāyavṛttyā balināṃ variṣṭha tvāmiśitāraṃ śaraṇaṃ prapadye |
yayā sṛjasyatsi jagaṃti nātha vakṣaḥsarojāsanayā svaśaktyā || 22 ||
[Analyze grammar]

tāṃ bhadrarūpāṃ jagadāśrayāṃ te devāraṇiṃ pādayuge nato'smi |
yadaṃśujālapratisṛṣṭametadbrahmāṃḍajālaṃ karasaṃgi nātha || 23 ||
[Analyze grammar]

sudarśanaṃ daityabalasya haṃtṛ cakrābhidhaṃ tvāṃ praṇataḥ sudarśanam |
stutvetthaṃ nṛpatiśreṣṭhaḥ sāṣṭāṃga praṇanāma saḥ || 24 ||
[Analyze grammar]

paritrāhi jagannātha magnaṃ saṃsārasāgare |
anāthabandho kṛpayā dīnaṃ māṃ tamasākulam || 25 ||
[Analyze grammar]

nārada uvāca |
jaya jaya nārāyaṇa apārabhavasāgarottāraparāyaṇa sanakasanaṃdanasanātanaprabhṛti yogivaraviciṃtyamānadivyatattva svamāyāvilasitādhyāsapariṇa mitāśeṣabhūtatattva |
tritattva tridaṇḍadhara triṇāciketatrimadhutrisuparṇopagīyamānadivyajñāna cchandomaya svāsanasuparṇapriya bhaktapriya bhaktajanaikavatsala svamāyājālavyavahitasvarūpa viśvarūpa viśvaprakāśa viśvatomukha viśvatokṣi viśvataḥśravaṇa viśvataḥpādaśirogrīva viśvahastanāsārasanātvakkeśalomaliṃga sarvalokātmaka sarvalokasukhāvaha sarvalokopakāraka sarvalokanamaskṛta līlāvilasitakoṭipadmodbhava rudreṃdramarudaśvisādhyasiddhagaṇapraṇatāśeṣasurāsuratribhuvanaguro na kasyāpi jñānagocara namaste namaste || 26 ||
[Analyze grammar]

jaiminiruvāca |
anye ca ye nṛpatayaḥ śrotriyā vedapāragāḥ |
munayo dvijāḥ kṣatriyāśca vidvāṃso vaiśyajātayaḥ || 27 ||
[Analyze grammar]

astuvanpuṇḍarīkākṣaṃ balinaṃ bhadrayā saha |
sūktaiḥ stotraiḥ purāṇaiśca kavitābhiryathā tathā || 28 ||
[Analyze grammar]

atheṃdradyumnaḥ provāca purodhasamakalmaṣam |
pūjārthaṃ vāsudevasya upacāropasaṃskṛtam || 29 ||
[Analyze grammar]

svayaṃ sa nṛpatiśreṣṭhaḥ pūjayāmāsa tānkramāt |
nāradasyopadeśena vidhinā maṃtratastathā || 30 ||
[Analyze grammar]

dvādaśākṣaramaṃtreṇa balabhadramapūjayat |
yamupāsya dhruvaḥ sthānaṃ prāptavānuttamottamam || 31 ||
[Analyze grammar]

trayīprasiddhaṃ yatsūktaṃ pāvanaṃ pauruṣaṃ mahat |
tena nārāyaṇaṃ bhūpaḥ pūjayāmāsa śaktitaḥ || 32 ||
[Analyze grammar]

devyāḥ sūktena bhadrāṃ tāṃ saudarśanyā sudarśanam |
yathāsamṛddhi bhaktyā tānpūjayitvā nṛpottamaḥ || 33 ||
[Analyze grammar]

tatprītyai dvijamukhyebhyo dadau dānāni bhaktitaḥ |
tulāpuruṣadānāni mahādānāni pārthivaḥ || 34 ||
[Analyze grammar]

aśvamedhāṃgabhūtāśca koṭiśo gā dadau tadā |
alaṃkṛtāstathānyāśca dadau gā bahudakṣiṇāḥ || 35 ||
[Analyze grammar]

tāsāṃ khuroddhṛteryogādgartobhūddvijasattamāḥ |
dānāṃbunā sa pūrṇo vai tīrthamāsīnmahāphalam || 36 ||
[Analyze grammar]

tasminsnātvā pitṝndevānsaṃtarpya vidhivannaraḥ |
aśvamedhasahasrasya phalamāpnotyasaṃśayaḥ || 37 ||
[Analyze grammar]

nāmnā khyātaṃ sarastasya indradyumnasya bhūpateḥ |
nirvapatyatra piṃḍāṃśca pitṝnuddiśya mānavaḥ || 38 ||
[Analyze grammar]

kulaikaviṃśamuddhatya brahmaloke mahīyate |
nātaḥ parataraṃ tīrthaṃ hayamedhāṃgasaṃbhavāt || 39 ||
[Analyze grammar]

indradyumnasya sarasaḥ syādvā tripathagā samā |
tataḥ prāsādaghaṭanāmupacakrāma bhūpatiḥ || 40 ||
[Analyze grammar]

śubhe kāle sunakṣatre daivajñavidhicodite |
samuhūrte nāradādīnbrāhmaṇāgryānprapūjya ca || 41 ||
[Analyze grammar]

svastivācaṃ ca karmarddhiṃ vācayitvā nṛpottamaḥ |
arghyaṃ dadau jagannāthaṃ smaranprāsādaveśmani || 42 ||
[Analyze grammar]

vasudhāṃ prārthayitvā tu sthānamācaṃdratārakam |
śilpinaḥ pūjayāmāsa vāstuyāgapuraḥsaram || 43 ||
[Analyze grammar]

mahotsavaṃ tathā cakre gītavādyaiḥ prabhūtakaiḥ |
dīnānāthavipannebhyo dadau vastu yathepsitam || 44 ||
[Analyze grammar]

rājño visarjayāmāsa bahumānapuraḥsaram |
kṛtārthānavatāraṃ taṃ harerdṛṣṭvā hatāṃhasaḥ || 45 ||
[Analyze grammar]

tataḥ sa koṭiśo vittaṃ dadau pāṣāṇadārake |
āhṛtau bahudeśebhyo dṛṣadāṃ pārthivottamaḥ || 46 ||
[Analyze grammar]

uvācedaṃ mudā yuktaḥ sabhāyāṃ pṛthivīdharaḥ |
aṣṭādaśabhyo dvīpebhyo yanmayā pauruṣārjitam || 47 ||
[Analyze grammar]

tatsarvaṃ jagadīśasya prāsādāyāpavarjitam |
jaitrayātrāprasaṃgena śramo labdhastu yo mayā || 48 ||
[Analyze grammar]

saphalo'stu sa me viṣṇoḥ prāsādāyārthayogataḥ |
ataḥ paraṃ me kiṃ bhāgyaṃ carācaraguruṃ harim || 49 ||
[Analyze grammar]

prasādayiṣye saṃpattyā bhujadvaṃdvārjitaśriyā |
śrīḥ sadā puṇḍarīkākṣe śriyonugrahajā mama || 50 ||
[Analyze grammar]

kiṃ kartumīśastasyāṃ vai devadevasya cakriṇaḥ |
kaṭākṣapāto yasya syāttasya śrīḥ sarvatomukhī || 51 ||
[Analyze grammar]

aṣṭādaśātmikā devī jihvāgre cāsya nṛtyati |
yamārādhya jagannāthaṃ brahmatvaṃ prāptavānvidhiḥ || 52 ||
[Analyze grammar]

rudro maheśvaratvaṃ ca śakrastridivarājatām |
lebhe tamarcya jagatāmarcayiṣyāmi śāśvatam || 53 ||
[Analyze grammar]

jitaṃ tena tridhā rāśībhūtamaṃho mahātmanā |
sāṃgopāṃgena vidhinā yena kṛṣṇaḥ samarcitaḥ || 54 ||
[Analyze grammar]

kalevaramidaṃ kṣetraṃ yatrāhaṃkāravānvibhuḥ |
āvirbhāvatirobhāvau sthitirnityā hi yatprabhuḥ || 55 ||
[Analyze grammar]

atra sākṣādvapuṣmantaṃ saṃpūjya jagatāṃ gurum |
sākṣātkṛtārtho bhavati caturvargasya bhājanam || 56 ||
[Analyze grammar]

bahuvyayā'yāsato yā rājyaṛddhirmayārjitā |
asyaivānugrahātsā tu saphalāstu padāṃbuje || 57 ||
[Analyze grammar]

sarvopacāraiḥ paripūjya devaṃ dravyairhṛtaiḥ sāgaramekhalāyāḥ |
yāvatsamāpnoti hi karmapākaḥ sāmrājyayātrā saphalā hi māstu || 58 ||
[Analyze grammar]

kiṃ dravyajātaṃ khalu yena viṣṇuṃ nopāharetsāṃgamapetakalmaṣaḥ |
kiṃ pauruṣeyaṃ yadi vāsudevaparicchado yena na sādhito me || 59 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaimini ṛṣisaṃvāde viṃśo'dhyāyaḥ || 20 ||
[Analyze grammar]