Chapter 19

[English text for this chapter is available]

jaiminiruvāca |
tataḥ sa pṛthivīpālastathā kṛtvāṃ'tarikṣagā |
yaduvāca girāṃ devī tadvatparicacāra ha || 1 ||
[Analyze grammar]

evaṃ dinedine yāte divyagaṃdho'nubhūyate |
pārijātaprasūnānāṃ vṛṣṭirmartyeṣu durlabhā || 2 ||
[Analyze grammar]

divyasaṃgītanādaśca gītāni rucirāṇi ca |
svargaṃgājalavṛṣṭiśca sūkṣmabiṃdusuśobhanā || 3 ||
[Analyze grammar]

airāvatādināgānāṃ madagaṃdho vanadvipaiḥ |
duḥsahaḥ sarvabhūtānāṃ sukhakāryanubhūyate || 4 ||
[Analyze grammar]

yajñārthamāgatā devāste sarve vigatajvarāḥ |
āvirbhūtaṃ hariṃ dṛṣṭvā upāsāṃcakrire dvijāḥ || 5 ||
[Analyze grammar]

yathā hi mādhavaṃ pūrvaṃ tathā taṃ viṣṇuśākhinam |
upāsanāsu devānāṃ divyacihnāni jajñire || 6 ||
[Analyze grammar]

nirvavāha svayaṃ devaḥ kramātpaṃcadaśe dine |
caturmūrtiḥ sa bhagavānyathā pūrvaṃ mayoditaḥ || 7 ||
[Analyze grammar]

tādṛgāvirbabhūvāsau yuṣmākaṃ varṇitaḥ purā |
divyasiṃhāsanagato balabhadrāsudarśanaiḥ || 8 ||
[Analyze grammar]

śaṃkhacakragadāpadmalasadbāhurjanārdanaḥ |
gadāmusalacakrābjaṃ dhārayanpannagākṛtiḥ || 9 ||
[Analyze grammar]

chatrākṛtiphaṇāsaptamukuṭojjvalakuṃḍalaḥ |
subhadrā cāruvadanā varābjābhayadhāriṇī || 10 ||
[Analyze grammar]

lakṣmīḥ prādurbabhūveyaṃ sarvacaitanyarūpiṇī |
iyaṃ kṛṣṇāvatāre hi rohiṇīgarbhasaṃbhavā || 11 ||
[Analyze grammar]

balabhadrākṛtirjātā balarūpasya ciṃtanāt |
kṣaṇaṃ na sahate sā hi moktuṃ līlāvatāriṇam || 12 ||
[Analyze grammar]

na bhedo'stīha ko viprāḥ kṛṣṇasya ca balasya ca |
ekagarbhaprasūtatvādvyavahāro'tha laukikaḥ || 13 ||
[Analyze grammar]

bhaginī baladevasyetyeṣā paurāṇikī kathā |
puṃrūpe strīsvarūpeṇa lakṣmīḥ sarvatra tiṣṭhati || 14 ||
[Analyze grammar]

puṃnāmnā bhagavānviṣṇuḥ strīnāmnā kamalālayā |
devatiryaṅmanuṣyādau vidyate na tayoḥ param || 15 ||
[Analyze grammar]

ko hyanyaḥ puṃḍarīkākṣādbhuvanāni caturdaśa |
dhārayettu phaṇāgreṇa so'naṃto balasaṃjñitaḥ || 16 ||
[Analyze grammar]

tasya śaktisvarūpeyaṃ bhaginī śrīḥ prakīrtitā |
sudarśanaṃ tu yaccakraṃ sadā viṣṇoḥ kare sthitam || 17 ||
[Analyze grammar]

śākhāgrastaṃbhamadhyasthaṃ tadrūpaṃ tatturīyakam |
evaṃ tu mūrttayastena catasro vai prakāśitāḥ || 18 ||
[Analyze grammar]

nirvṛtte bhagavadrūpe caturddhā divyarūpiṇi |
lokānāmupakārāya punarāhāṃtarikṣagā || 19 ||
[Analyze grammar]

paṭairācchādya sudṛḍhaṃ nṛpate pratimāstvimāḥ |
svaṃ svaṃ varṇaṃ prāpayāśu varṇakaiścitrakarmaṇā || 20 ||
[Analyze grammar]

nīlābhraśyāmalaṃ viṣṇuṃ śaṃkheṃdudhavalaṃ balam |
raktaṃ sudarśanaṃ cakraṃ subhadrāṃ kuṃkumāruṇām || 21 ||
[Analyze grammar]

nānālaṃkārarucirāṃ nānābhaṃgivibhāgaśaḥ |
amī dārusvarūpeṇa dṛṣṭāḥ pāpāya hetave || 22 ||
[Analyze grammar]

gopanīyā prayatnena paṭaniryāsavalkalaiḥ |
tasmātprathamamevaitāṃstarorevāsya valkalaiḥ || 23 ||
[Analyze grammar]

śilpibhiḥ karmakuśalairdṛḍhamācchādayāgrataḥ |
varṣe varṣe ca saṃskāryāḥ pūrvasaṃskāra mocanāt || 24 ||
[Analyze grammar]

ṛte valkalalepaṃ tu sa tu divyaściraṃtanaḥ |
pramādādya imaṃ lepamapanīyeta kaścana || 25 ||
[Analyze grammar]

durbhikṣaṃ marakaṃ rāṣṭre saṃtatiścāsya hīyate |
nekṣitavyāstvayā rājankadācidapavāraṇāḥ || 26 ||
[Analyze grammar]

manuṣyaiścāpi rājeṃdra dṛṣṭāḥ syurbhayahetavaḥ |
tasmātsacitrā draṣṭavyā bahulepavilepitāḥ || 27 ||
[Analyze grammar]

sucitraṃ puṇḍarīkākṣaṃ savilāsaṃ savibhramam |
dṛṣṭvā vimucyate pāpaiḥ kalpakoṭisamudbhavaiḥ || 28 ||
[Analyze grammar]

sucitrānkuru rājeṃdra citrānkāmānavāpsyati |
āvirbabhūva bhagavāṃstavānugrahakāmyayā || 29 ||
[Analyze grammar]

tava prasādājjaṃtūnāṃ caturvargaṃ pradāsyati |
nīlādrau kalpavṛkṣasya vāyavyāṃ śatahastataḥ || 30 ||
[Analyze grammar]

pradeśe sumahatsthāne prāsādaṃ sudṛḍhāyatam |
uttare narasiṃhasya sahasrakaramucchritam || 31 ||
[Analyze grammar]

kārayitvā pratiṣṭhāpya tatrainaṃ viniveśaya |
purā sthitaṃ parvate'sminyo'bhyarcayati mādhavam || 32 ||
[Analyze grammar]

nāmnā viśvāvasurnāma śabaro vaiṣṇavottamaḥ |
purodhasaḥ sakhyamāsīttena sārddhaṃ purā ca te || 33 ||
[Analyze grammar]

tayoḥ saṃtatirevāsya lepasaṃskārakarmaṇi |
niyujyatāṃ mahārāja bhaviṣyatsūtsaveṣu ca || 34 ||
[Analyze grammar]

virarāmaitadābhāṣya sā tu divyā sarasvatī |
tayopadiṣṭamākarṇya prahṛṣṭenāṃtarātmanā || 39 ||
[Analyze grammar]

veṣṭanaṃ mocayāmāsa mahāvedyā nṛpottamaḥ |
dadṛśuste tadā sarve ratnasiṃhāsane sthitam || 36 ||
[Analyze grammar]

rāmaṃ kṛṣṇaṃ subhadrāṃ ca vāsudevaṃ sudarśanam |
yathopadiṣṭalepyādisaṃskāre rucirākṛtim || 37 ||
[Analyze grammar]

kṛpayā smeravadanamunnatāyatavakṣasam |
dīnānāmuddhṛtau nāthaṃ pralaṃbabhujapaṃjaram || 38 ||
[Analyze grammar]

prabuddhapuṇḍarīkākṣaṃ hāsaśoṇāyatādharam |
paśyatāṃ dṛṣṭimātreṇa hartāraṃ pāpasaṃcayam || 39 ||
[Analyze grammar]

padmāsanasthitaṃ kṛṣṇaṃ divyālaṃkārabhūṣitam |
svatejasā parivṛtaṃ dārudehe'pi nirmalam || 40 ||
[Analyze grammar]

nīlajīmūtasaṃkāśaṃ sarvasaṃtāpanāśanam |
dadarśa baladevaṃ ca sāṭṭahāsamukhāṃbujam || 41 ||
[Analyze grammar]

phaṇāmaṇḍalavistīrṇaṃ vāruṇīghūrṇitekṣaṇam |
protthitaṃ nāgarājānaṃ pīnonnatasuvakṣasam || 42 ||
[Analyze grammar]

kiṃcinnataṃ pṛṣṭhadeśe kuṇḍalīkṛtavigraham |
agrasaṃphullakakubhaṃ kailāsaśikharaṃ yathā || 43 ||
[Analyze grammar]

halacakrābjamusaladhāriṇaṃ vanamālinam |
hārakuṇḍalakeyūrakirīṭamukuṭojjvalam || 44 ||
[Analyze grammar]

tayormadhye sthitāṃ lakṣmīṃ subhadrāṃ bhadrarūpiṇīm || 45 ||
[Analyze grammar]

sarvadevāraṇīṃ pāpasāgarottārakāriṇīm |
vikacāṃbhojavadanāṃ varābjābhayadhāriṇīm || 46 ||
[Analyze grammar]

rūpalāvaṇyavasatiṃ śobhamānāṃ prasādhanaiḥ |
kuṃkumāruṇadehāṃ tāṃ sākṣāllakṣmīmivāparām || 47 ||
[Analyze grammar]

dadarśa viṣṇorvāmasthāṃ cakraśākhāgranirmitām |
bālārkasadṛśīṃ tīkṣṇadhārāṃ tejomayīṃ dvijāḥ || 48 ||
[Analyze grammar]

tāṃ dṛṣṭvānandapāthodhi nimagnaḥ pṛthivīpatiḥ |
kartavyamūḍhaḥ svatanau svayaṃ na prababhūva ha || 49 ||
[Analyze grammar]

daramīlitanetraḥ sansṛjanbāṣpāṃbu kevalam |
kṛtāṃjalipuṭastasthau sthūṇākāro nṛpottamaḥ || 50 ||
[Analyze grammar]

uvāca taṃ munivaraḥ smitavaktraḥ kṣitīśvaram |
yadarthaṃ śramamāpannastatsāṃpratamabhūttava || 51 ||
[Analyze grammar]

pratyakṣaṃ nṛpaśārdūla ekastvaṃ bhāgyavānbhuvi |
amuṃ paśya jagannāthaṃ puṇḍarīkāyatekṣaṇam || 52 ||
[Analyze grammar]

bhaktānugrahapāthodhiṃ sarvajñānanidhiṃ harim |
yaṃ draṣṭuṃ yogino nityaṃ yataṃti yatamānasāḥ || 53 ||
[Analyze grammar]

avadhānena mahatā kṣaṇaṃ paśyanti mānavāḥ |
so'yaṃ dārumayaṃ dehaṃ samāsthāya janārdanaḥ || 54 ||
[Analyze grammar]

anugrahītuṃ tvāṃ bhūpa pratyakṣatvamupāgataḥ |
bhajainaṃ dharaṇīnāthaṃ stuhi kāruṇyasāgaram || 55 ||
[Analyze grammar]

dadāti saṃstutaḥ kāmānsarvānnṛpa manogatān || 56 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāda ekonaviśo'dhyāyaḥ || 19 ||
[Analyze grammar]