Chapter 14

[English text for this chapter is available]

munaya ūcuḥ |
rathamāruhya tau yātau yadā nāradapārthivau |
kva yātau cakratuḥ kiṃ vā tanno vada mahāmune || 1 ||
[Analyze grammar]

jaiminiruvāca |
sārddhaṃ ca vidyāpatinā purohitakanīyasā |
kṣetrāṃte nīlakaṇṭhasya samīpamupajagmatuḥ || 2 ||
[Analyze grammar]

durnimittamabhūnmārge vrajato'sya mahīkṣitaḥ |
vāmākṣibhujayoḥ spandaḥ sphuraṇaṃ ca muhurmuhuḥ || 3 ||
[Analyze grammar]

taddṛṣṭvā nṛpaśārdūlo viṣādamupasedivān |
papraccha kāraṇaṃ cāsya sarvajñānanidhiṃ munim || 4 ||
[Analyze grammar]

avyāhataṃ me sāmrājyaṃ prāptaṃ kṣetrottamaṃ tvidam |
darśanārthaṃ mādhavasya yātreyaṃ tu śubhāvahā || 5 ||
[Analyze grammar]

akāryaṃ me bhavedadya kiṃ mune brūhi tattvataḥ |
spandate vāmanetraṃ tu sphurate ca bhujo'sakṛt || 6 ||
[Analyze grammar]

tacchrutvā nāradaḥ prāha bhāvi kāryaṃ ca sūcayan |
śrāvayankuśalaṃ vākyaṃ yaduktaṃ padmayoninā || 7 ||
[Analyze grammar]

nārada uvāca |
mā bhūdviṣādaste bhūpa savighnaṃ prāyaśaḥ śubham |
vighnāṃte ca śubhaṃ puṃsāṃ punarbhāgyavatāṃ nṛpa || 8 ||
[Analyze grammar]

satyaṃ tvaṃ sārvabhaumo'si kṣetraṃ viṣṇorvapustvidam |
yātrā te'tra yadartheyaṃ so'tarddhānamupāgamat || 9 ||
[Analyze grammar]

eṣa vidyāpatirvipro dine yasmindadarśa tam |
sāyaṃkāle tato'nyedyuḥ svarṇavālukayā vṛtaḥ |
yayau pātālanilayaṃ martyaloke sudurlabhaḥ || 10 ||
[Analyze grammar]

jaiminiruvāca |
tacchrutvā ghoravacanaṃ vavrapātasamaṃ nṛpaḥ |
papāta dharaṇīpṛṣṭhe niḥsaṃjñaḥ sa dvijottamāḥ || 11 ||
[Analyze grammar]

taṃ tathā patitaṃ dṛṣṭvā purohitapurogamāḥ |
snigdhāḥ sakhāyaḥ sarve te hāhākāramupādravan || 12 ||
[Analyze grammar]

karpūraśītalaṃ vāri mukhe siktvā punaḥpunaḥ |
candanāgurukarpūraiḥ sarvāṃgaṃ lilipuśca te || 13 ||
[Analyze grammar]

cāmaraistālavṛṃtaiśca vījayāmāsurāśu tam |
nārado'pi ca saṃbhrāṃto dhārayanyogadhāraṇām || 14 ||
[Analyze grammar]

prāṇānararakṣannarapaterjānaṃstatra śubhāyatim |
so'pi rājā cirātsaṃjñāṃ lebhe yatnairanuttamaiḥ || 15 ||
[Analyze grammar]

utthāya pādayorviprā nāradasyāpatatpunaḥ |
kimakārṣaṃ mune pāpaṃ kasmiñjanmāṃtare dṛḍham || 16 ||
[Analyze grammar]

yasya pākadaśāyāṃ vai duḥkhamāsītsudāruṇam |
karmaṇā manasā vācā no dvijānāṃ gavāmapi |
aparādhaḥ kṛtaḥ kaścitsvapne'pi munipuṃgava || 17 ||
[Analyze grammar]

nityaṃ naimittikaṃ kāmyaṃ karma yatparikīrtitam |
rājñastanmuniśārdūla na tyaktaṃ vai mayā kvacit || 18 ||
[Analyze grammar]

devatātithibhṛtyānāṃ pitṝṇāṃ ca mahāmune |
tathāśritānāṃ baṃdhūnāṃ nāpamānaḥ kṛto mayā || 19 ||
[Analyze grammar]

paṃcāśadaparādhā ye viṣṇorvaiṣṇavapuṃgava |
tyaktāḥ prayatnātte sarve kruddhā iva mahoragāḥ || 20 ||
[Analyze grammar]

kiṃ bhāgyaṃ caritaṃ tena purohitakanīyasā |
yaccarmacakṣuṣā dṛṣṭo bhagavānnīlamādhavaḥ || 21 ||
[Analyze grammar]

kimarthaṃ rājyavibhraṃśo jānataiṣa nvayā kṛtaḥ |
yātrāsamaya evaitatkathaṃ vā na prakīrtitam || 22 ||
[Analyze grammar]

kimarthaṃ vā śrotriyāṇāṃ sthānabhraṃśo mayā kṛtaḥ |
kathametaiḥ parityaktāścirātsaṃskṛtabhūmayaḥ || 23 ||
[Analyze grammar]

āvaṃśabhūtervṛttiryā prajābhiḥ paripālitā |
madarthaṃ sā parityaktā jīviṣyaṃti kathaṃ nu tāḥ || 24 ||
[Analyze grammar]

prāṇānna dhārayiṣyāmi na drakṣyāmi yadā harim |
eṣa me niścayo brahmanmayi naṣṭe kutaḥ prajāḥ || 25 ||
[Analyze grammar]

mune sadā sakaruṇastvaṃ māṃ śāsti śubhāśubham |
sāṃprataṃ matsutaṃ nītvā mālaveṣvabhiṣecaya || 26 ||
[Analyze grammar]

sa pālayatu nyāyena na śocaṃtu imāḥ prajāḥ |
rājāno ye samāyātāste sarvaṃ mannideśataḥ || 27 ||
[Analyze grammar]

matsūnormālaveśasya prayāṃtu vacane sthitāḥ |
prāyopaveśavidhinā ciṃtayannīlamādhavam || 28 ||
[Analyze grammar]

āyuḥśeṣaṃ kariṣyāmi saphalaṃ kṣetrasaṃsthitaḥ || 29 ||
[Analyze grammar]

jaiminiruvāca |
vilapaṃtamindrumnaṃ rājānaṃ brahmaṇaḥ sutaḥ |
utthāpya praśrayagirā sāṃtvayannidamabravīt || 30 ||
[Analyze grammar]

nārada uvāca |
rājanpaṃḍitamūrddhanyo vaiṣṇavo dhaiyasāgaraḥ |
śreyaḥ savighnaṃ satataṃ kathaṃ vā nāvadhārayeḥ || 31 ||
[Analyze grammar]

idaṃ tu paramaṃ śreyaḥ puṃso janmaśatārjitam |
śarīradhāriṇaṃ paśyeccarmacakṣurgadādharam || 32 ||
[Analyze grammar]

niraṃkuśā harerlīlā kena vāpyavadhāryate |
jīvanmukto'pyahaṃ rājaṃstallīlāṃ nātivartaye || 33 ||
[Analyze grammar]

kiyatā vaṃcito nāhaṃ dṛḍhabhakto'ntikasthitaḥ |
duratyayā tasya māyā bahujanmaśatairapi || 34 ||
[Analyze grammar]

anantā tasya māyeyaṃ durjñeyā padmayoninā |
nābhipadmāsthitenāpi nityaṃ ca stutiśālinā || 35 ||
[Analyze grammar]

svabhāva evaṃ kathitastasya māyāvino nṛpa |
viśeṣaṃ kathayāmyevaṃ tvaṃ tu bhāgyavatāṃ varaḥ || 36 ||
[Analyze grammar]

tisro'pi mūrtayastasya tvadanugrahabuddhayaḥ |
carācarāṇāṃ sraṣṭā yaḥ sākṣāllokapitāmahaḥ |
māmuvāca vrajāśu tvamiṃdradyumnasya cāṃtikam || 37 ||
[Analyze grammar]

nīlācalaṃ prayātyeṣa didṛkṣurnīlamādhavam |
antarddhānaṃ gato hyeṣa yamena prārthito vibhuḥ || 38 ||
[Analyze grammar]

na tatra śokaḥ kartavyaḥ śakyate tatra nānyathā |
vācyo madvacanādrājā paṃcamī mama saṃtatiḥ || 39 ||
[Analyze grammar]

tatkṛte paramātmānaṃ prasādya puruṣottamam |
śvetadvīpānnayiṣyāmi sahasrāṃte mahākratoḥ || 40 ||
[Analyze grammar]

indradyumnaḥ sa idānīṃ kṣetre śrīpuruṣottame |
aśvamedhasahasraistu yajanviṣṇuṃ sa tiṣṭhatu || 41 ||
[Analyze grammar]

tadaṃte dāravatanuṃ viṣṇuṃ drakṣyati cakṣuṣā |
so'vatāro hareḥ khyātiṃ tasya dvārā gamiṣyati || 42 ||
[Analyze grammar]

tadā tu tanavo viṣṇoḥ pratiṣṭhapyā mayā dhuvam |
purā sma maṇimūrtistu caturddhāvasthito hariḥ || 43 ||
[Analyze grammar]

dṛṣṭvā purodhasā tasya sākṣādagre niveditaḥ |
divyadāruvapurbhūyaścaturddhāvatariṣyati || 44 ||
[Analyze grammar]

tasmānmā vyatha rājeṃdra vāṃchā te saphalā dhruvam |
bhaviṣyati na saṃdeho nirvyalīko vaseha vai || 45 ||
[Analyze grammar]

jaiminiruvāca |
sāṃtvayitvā nināyetthaṃ rājānaṃ nāradastadā |
viśvāsapadavīṃ viprāḥ punarvākyamuvāca ha || 46 ||
[Analyze grammar]

nārada uvāca |
śaṃkhākṛteḥ kṣetravarasya cāgre yo nīlakaṇṭhaḥ khalu durgayā'ste |
yāmo vayaṃ tatra ca vājimedhakratūpayogyā susamā sthalī sā || 47 ||
[Analyze grammar]

tasyāṃ vinirmāya sahasravarṣasthirāṃ suśālāṃ hayamedhanāya |
nīlādrivāsasya nṛsiṃhamūrtiṃ dṛṣṭvā kṛtārthaṃ viracayya janma || 48 ||
[Analyze grammar]

tasyaiva mūrtiṃ pratiyātanāṃ te nityārcanīyāṃ tava pūjanīyām |
pratyakpratiṣṭhāpya samastavighnavināśahetoḥ phalabṛṃhaṇāya || 49 ||
[Analyze grammar]

ārapsyāmaḥ kratuvaraṃ munivaryairyathocitam |
vilambo'tra na hi śreyāniti paitāmahaṃ vacaḥ || 50 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde caturdaśo'dhyāyaḥ || 14 ||
[Analyze grammar]