Chapter 8

[English text for this chapter is available]

nārada uvāca |
nāḍījaṃghabakenoktāṃ vācamākarṇyabhūpatiḥ |
mārkaṃḍeyena saṃyukto babhūvātīva duḥkhitaḥ || 1 ||
[Analyze grammar]

taṃ niśamya munirbhūpaṃ duḥkhitaṃ sāśrulocanam |
samānavyasanaḥ prāha tadarthaṃ sa punarbakam || 2 ||
[Analyze grammar]

vidhāyāśāṃ mahābhāga tvadaṃtikamupāgatau |
āvāṃ cirāyurjñātāṃśāvindradyumnamiti dvija || 3 ||
[Analyze grammar]

niṣpannaṃ nāsya tatkāryaṃ prāṇāneṣa mumukṣati |
vahnipraveśena paraṃ vairāgyaṃ samupāgataḥ || 4 ||
[Analyze grammar]

tanmāmupāgato'haṃ ca tvāṃ siddhaṃ nāsya vāṃchitam |
tadenamanuyāsyāmi maraṇena tvayā śape || 5 ||
[Analyze grammar]

āśāṃ kṛtvābhyupāyātaṃ nirāśaṃ nekṣituṃ kṣamāḥ |
bhavaṃti sādhavastasmājjīvitānmaraṇaṃ varam || 6 ||
[Analyze grammar]

prārthitaṃ cāmunā hṛtsthaṃ mayā cāsmai pratiśrutam |
tvāṃ mitraṃ tatparijñāne dhṛtvā hṛdi cirāyuṣam || 7 ||
[Analyze grammar]

asaṃpādayato nārthaṃ pratijñātaṃ mamāyuṣā |
kaluṣeṇārthinā māśāpūrakeṇa sakhedhunā || 8 ||
[Analyze grammar]

pratiśrutaṃ kṛtaṃ ślāghyā dāsatāṃtyajapakvaṇe |
hariścaṃdrasyeva nṛṇāṃ na ślāghyā satyasaṃdhatā || 9 ||
[Analyze grammar]

mitrasnehasya paryāyastacca sāptapadaṃ smṛtam |
snehaḥ sa kīdṛśo mitre duḥkhito yo na dṛśyate || 10 ||
[Analyze grammar]

tadavaśyamahaṃ sākamadhunā vahnisādhanam |
kariṣye kīrtivapuṣaḥ kṛte satyamidaṃ sakhe || 11 ||
[Analyze grammar]

anujānīhi māmetaddarśanaṃ tava paścimam |
tvayā saha mahābhāga nāḍījaṃgha dvijottama || 12 ||
[Analyze grammar]

nārada uvāca |
vajravadduḥsahāṃ vācaṃ mārkaṃḍeyasamīritām |
śuśruvānsa kṣaṇaṃ dhyātvā pratītaḥ prāha tāvubhau || 13 ||
[Analyze grammar]

nāḍījaṃgha uvāca |
yadyevaṃ tadidaṃ mitraṃ viśaṃtaṃ jvalane'dhunā |
nivāraya muniśreṣṭha matto'sti cirajīvitaḥ || 14 ||
[Analyze grammar]

prākārakarṇanāmāsāvulūkaḥ śivaparvate |
sa jñāsyati mahīpālamiṃdradyumnaṃ na saṃśayaḥ || 15 ||
[Analyze grammar]

tasmādahaṃ tvayā sārdhamamunā ca śivālayam |
vrajāmi taṃ śikhariṇaṃ mitrakāryaprasiddhaye || 16 ||
[Analyze grammar]

ityeva muktvā te jagmustrayo'pi dvijapuṃgavāḥ |
kailāsaṃ dadṛśustatra tamulūkaṃ svanīḍagam || 17 ||
[Analyze grammar]

kṛtasaṃvidasau tena bakaḥ svāgatapūjayā |
pṛṣṭaśca tāvubhau prāha tatsarvamabhivāṃchitam || 18 ||
[Analyze grammar]

cirāyurasi jānīṣe yadīndradyumnabhūpatim |
tadbrūhi tena jñānena kāryaṃ jīvāmahe vayam || 19 ||
[Analyze grammar]

iti pṛṣṭaḥ sa vimanā mitrakāryaprasādhanāt |
kauśikaḥ prāha jānāmi nendradyumnamahaṃ nṛpam || 20 ||
[Analyze grammar]

aṣṭāviṃśatpramāṇā me kalpā jātasya bhūtale |
na dṛṣṭo na śruto vāsāviṃdradyumno nṛpaḥ kṣitau || 21 ||
[Analyze grammar]

tacchrutvā vismito bhūpastasyāyuratimātrataḥ |
duḥkhito'pi tadā hetuṃ papracchāsau tadāyuṣaḥ || 22 ||
[Analyze grammar]

evamāyuryadi tava kathaṃ prāptaṃ bravīhi tat |
ulūkatvaṃ kathamidaṃ jugupsitamatīva ca || 23 ||
[Analyze grammar]

prākārakarṇa uvāca |
śrṛṇu bhadra yathā dīrghamāyurmeśivapūjanāt |
jugupsitamulūkatvaṃ śāpena ca mahāmuneḥ || 24 ||
[Analyze grammar]

vasiṣṭhakulasaṃbhūtaḥ purāhamabhavaṃ dvijaḥ |
ghaṃṭa ityabhivikhyāto vārāṇasyāṃ śiverataḥ || 25 ||
[Analyze grammar]

dharmaśravaṇaniṣṭhasya sādhūnāṃ saṃsadi svayam |
śrutvāsmi pūjayāmīśaṃ bilvapatrairakhaṃḍitaiḥ || 26 ||
[Analyze grammar]

na mālatī na maṃdāraḥ śatapatraṃ na mallikā |
tathā priyāṇi śrīvṛkṣo yathā madanavidviṣaḥ || 27 ||
[Analyze grammar]

akhaṃḍabilvapatreṇa ekena śivamūrdhani |
nihitena naraiḥ puṇyaṃ prāpyate lakṣapuṣpajam || 28 ||
[Analyze grammar]

akhaṃḍitairbilvapatraiḥ śraddhayā svayamāhṛtaiḥ |
liṃgaprapūjanaṃ kṛtvā varṣalakṣaṃ vaseddivi || 29 ||
[Analyze grammar]

sacchāstrebhya iti śrutvā pūjayāmyahamīśvaram |
trikālaṃ śraddhayā patraiḥ śrīvṛkṣasya tribhistribhiḥ || 30 ||
[Analyze grammar]

tato varṣaśatasyāṃte tutoṣa śaśiśekharaḥ |
pratyakṣībhūya māmāha meghagaṃbhīrayā girā || 31 ||
[Analyze grammar]

īśvara uvāca |
tuṣṭosmi tava vipreṃdrākhaṃḍabilvadalārcanāt |
vṛṇīṣvābhimataṃ yatte dāsyamyapi ca durlabham || 32 ||
[Analyze grammar]

akhaṃḍabilvapatreṇa mahātuṣṭiḥ prajāyate |
ekanāpi yathānyeṣāṃ tathā na mama koṭibhiḥ || 33 ||
[Analyze grammar]

ityukto'haṃ bhagavatā śaṃbhunā svamanaḥ sthitam |
vṛṇomi sma varaṃ deva kuru māmajarāmaram || 34 ||
[Analyze grammar]

atha līlāvilāso māṃ tathetyuktvā'vicāritam |
yayāvadarśanaṃ prītimahaṃ ca mahatīṃ gataḥ || 35 ||
[Analyze grammar]

kṛtakṛtyaṃ tadātmānamajñāsipamahaṃ kṣitau |
etasminneva kāle tu bhṛguvaṃśyo'bhavaddvijaḥ || 36 ||
[Analyze grammar]

avadātatrijanmāsavakṣaviccākṣarārthavit |
sudarśaneti prathitā priyā tasyābhavatsatī || 37 ||
[Analyze grammar]

atīva muditā patyurmukhaṃ prekṣyāsya darśanāt |
tanayā devalasyaipā rūpeṇāpratimā bhuvi || 38 ||
[Analyze grammar]

tasyāṃ tasmādabhūtkanyā nirviśeṣā nijāraṇeḥ |
nivṛttabālabhāvābhūtkumārī yauvanonmukhī || 39 ||
[Analyze grammar]

nālaṃ babhūva tāṃ dātuṃ tanayāṃ guṇaśālinīm |
kasyāpi janakaḥ sā ca vayaḥsaṃdhau mayekṣitā || 40 ||
[Analyze grammar]

praviśdyauvanābhogabhāvairatimanoharā |
nirvāsyamānairaparaistilataṃdulitākṛtiḥ || 41 ||
[Analyze grammar]

krīḍamānā vayasyābhirlāvaṇyapratimeva sā |
vyaciṃtayamahaṃ vipra tāṃ nirīkṣya sumadhyamām || 42 ||
[Analyze grammar]

ananyākṛtimanyo'sau vidhiryeneti nirmitā |
tataḥ sāttvikabhāvānāṃ tatkṣaṇādasmi gocaram || 43 ||
[Analyze grammar]

prāpito līlayāhatya bāṇaiḥ kusumadhanvinā |
tato mayā skhaladvālaṃ pṛṣṭā kasyeti tatsakhī || 44 ||
[Analyze grammar]

prāheti bhṛguvaṃśyasya kanyeyaṃ dvijajanmanaḥ |
anūḍhādyāpi kenāpi samāyātātra khelitum || 45 ||
[Analyze grammar]

tataḥ kusumabāṇena śaravrātairbhṛśaṃ hataḥ |
pitaraṃ praṇato gatvā yayāce tāṃ bhṛgūdvaham || 46 ||
[Analyze grammar]

sa ca māṃ sadṛśaṃ jñātvā śīlena ca kulena ca |
atīva cārthinaṃ mahyaṃ dadau vācā puraḥ kramāt || 47 ||
[Analyze grammar]

tataḥ sā tanayā tasya bhārgavasyā śrṛṇoditi |
dattāsmi tasmai viprāya virūpāyeti jalpatām || 48 ||
[Analyze grammar]

rorūyamāṇā jananīmāha paśya yathā kṛtam |
atīvānucitaṃ dattvā janakena tathā vare || 49 ||
[Analyze grammar]

viṣamāloḍya pāsyāmi pravekṣyāmi hutāśanam |
varaṃ na tu virūpasyodvoḍhurbhāryā kathaṃcana || 50 ||
[Analyze grammar]

tataḥ saṃbodhya jananī tāṃ sutāmāha bhārgavam |
na deyāsmai tvayā kanyā virūpāyeti cāgrahāt || 51 ||
[Analyze grammar]

sa vallabhāvacaḥ śrutvā dharmaśāstrāṇyavekṣya ca |
dattāmapi haretpūrvāṃ śreyāṃścedvara āvrajet || 52 ||
[Analyze grammar]

arvākchilākramaṇato niṣṭhā syātsaptame pade |
iti vyavasya pradadāvanyasmai tāṃ dvijaḥ sutām || 53 ||
[Analyze grammar]

śvobhāvini vivāhe tu tacca sarvaṃ mayā śrutam |
tatotīva vilakṣyohaṃ vayasyānāṃ purastadā || 54 ||
[Analyze grammar]

nāśakaṃ vadanaṃ bhadra tathā darśayituṃ nijam |
kāmārtotīva tāṃ suptāmarvāgniśi tadāharam || 55 ||
[Analyze grammar]

nītvā durgatamaikāṃte'kārṣamaudvāhikaṃ vidhim |
gāṃdharveṇa vivāhena tato'kārṣaṃ hṛdīpsitam || 56 ||
[Analyze grammar]

anicchaṃtīṃ tadā bālāṃ balātsuratasevanam |
athānupadamāgatya tatpitā prātareva mām || 57 ||
[Analyze grammar]

niśvasya saṃvṛto viprāstāṃ vīkṣyodvāhitāṃ sutām |
śaśāpa kupito bhadra māṃ tadānīṃ sa bhārgavaḥ || 58 ||
[Analyze grammar]

bhārgava uvāca |
niśācarasya dharmeṇa yattvayodvāhitā sutā |
tasmānniśācaraḥ pāpa bhava tvamavilaṃbitam || 59 ||
[Analyze grammar]

iti śaptaḥ praṇmyainaṃ pādopagrahapūrvakam |
hāheti ca bruvangāḍhaṃ sāśrunetraṃ sagadgadam || 60 ||
[Analyze grammar]

tatohamabravaṃ kasmādadoṣaṃ māṃ bhavāniti |
śapate bhavatā dattā mama vācā purā sutā || 61 ||
[Analyze grammar]

sodvāhitā mayā kanyā dānaṃ sakṛditi smṛtiḥ |
sakṛjjalpaṃti rājānaḥ sakṛjjalpaṃti paṇḍitāḥ || 62 ||
[Analyze grammar]

sakṛtkanyāḥ pradīyaṃte trīṇyetāni sakṛtsakṛt |
kiṃ ca pratiśrutārthasya nirvāhastatsatāṃ vratam || 63 ||
[Analyze grammar]

bhavādṛśānāṃ sādhūnāṃ sādhūnāṃ tasya tyāgo vigarhitaḥ |
pratiśrutā tvayā labdhā tadā kālamiyaṃ mayā || 64 ||
[Analyze grammar]

udvoḍhā cādhunā nāhamucitaḥ śāpabhājanam |
vṛthā śapanti mahyaṃ ca bhavaṃtastadvicāryatām || 65 ||
[Analyze grammar]

yo dattvā kanyakāṃ vācā paścāddharati durmatiḥ |
sa yāti narakaṃ ceti dharmaśāstreṣu niścitam || 66 ||
[Analyze grammar]

tadākarṇya vyavasyāsau tathyaṃ madvacanaṃ hṛdā |
paścāttāpasamopeto munirmāmityathābravīt || 67 ||
[Analyze grammar]

na me syādanyathā vāṇī ulūkastvaṃ bhaviṣyati |
niśācaro hyulūko'pi procyate dvijasattama || 68 ||
[Analyze grammar]

yadeṃdradyumnavijñāne sahāyastaṃva bhaviṣyasi |
tadā tvaṃ prakṛtiṃ vipra prāpsyasītyabravītsa mām || 69 ||
[Analyze grammar]

tadvākyasamakālaṃ ca kauśikatvamidaṃ mama |
etāvaṃti dinānyāsīdaṣṭāviṃśaddinaṃ vidheḥ || 70 ||
[Analyze grammar]

bilvīdalauriti purā śaśiśekharasya saṃpūjanena mama dīrghataraṃ kilāyuḥ |
saṃjātamatra ca jugupsitamasya śāpātkailāsarodhasi niśācararūpamāsīt || 71 ||
[Analyze grammar]