Chapter 49

[English text for this chapter is available]

munaya ūcuḥ |
umāyā bhuvaneśānyāssūta sarvārthavittama |
avatāraṃ samācakṣva yato jātā sarasvatī || 1 ||
[Analyze grammar]

yā gīyate parabrahmamūlaprakṛtirīśvarī |
nirākārāpi sākārā nityā nandamathī satī || 2 ||
[Analyze grammar]

sūta uvāca |
tāpasāḥ śṛṇuta premṇā caritraṃ paramaṃ mahat |
yasya vijñānamātreṇa naro yāti parāṃ gatim || 3 ||
[Analyze grammar]

devadānavayoryuddhamekadāsītparasparam |
mahāmāyāprabhāveṇāmarāṇāṃ vijayo'bhavat || 4 ||
[Analyze grammar]

tato'valiptā amarāssvapraśaṃsāṃ vitenire |
vayaṃ dhanyā vayaṃ dhanyā kiṃ kariṣyaṃti no'surāḥ || 5 ||
[Analyze grammar]

ye prabhāvaṃ samālokyāsmākaṃ paramaduḥsaham |
bhītā nāgālayaṃ yātā yātayāteti vādinaḥ || 6 ||
[Analyze grammar]

aho balamaho tejo daityavaṃśakṣayaṃkaram |
aho bhāgyaṃ sumanasāmevaṃ sarve'bhyavarṇayan || 7 ||
[Analyze grammar]

tata āvirabhūttejaḥ kūṭarūpantadaiva hi |
adṛṣṭapūrvaṃ taddṛṣṭvā vismitā abhavansurāḥ || 8 ||
[Analyze grammar]

kimidaṃ kimidaṃ ceti ruddhakaṇṭhāssamabruvana |
ajānantaḥ paraṃ śyāmānu bhāvaṃ mānabhañjanam || 9 ||
[Analyze grammar]

tata ājñāpayaddevāndevānāmadhināyakaḥ |
yāta yūyaṃ parīkṣadhvaṃ yāthātathyena kinviti || 10 ||
[Analyze grammar]

surendraprerito vāyurmahasaḥ sannidhiṃ gataḥ |
kastvaṃ bhoriti sambodhyāvocadenaṃ ca tanmahaḥ || 11 ||
[Analyze grammar]

iti pṛṣṭastadā vāyurmahasātigarīyasā |
vāyurasmi jagatprāṇassābhimāno'bravīdidam || 12 ||
[Analyze grammar]

jaṃgamājaṃgamaṃ sarvamotaprotamidaṃ jagat |
mayyeva nikhilādhāre cālayāmyakhilaṃ jagat || 13 ||
[Analyze grammar]

tadovāca mahātejaḥ śakto'si yadi cālane |
dhṛtametattṛṇaṃ vāyo cālayasva nijecchayā || 14 ||
[Analyze grammar]

tataḥ sarvaprayatnenākarodyatnaṃ sadāgatiḥ |
na cacāla yadā sthānāttadāsau lajjito'bhavata || 15 ||
[Analyze grammar]

tūṣṇīṃ bhūtvā tato vāyurjagāmendraṃ sabhāṃ prati |
kathayāmāsa tad vṛttaṃ svakīyābhibhavānvitam || 16 ||
[Analyze grammar]

sarveśatvaṃ vayaṃ sarve mṛṣaivātmani manmahe |
na pārayāmahe kiṃcidvi dhātuṃ kṣudravastvapi || 17 ||
[Analyze grammar]

tataśca preṣayāmāsa marutvānsakalānsurān |
na śekuste yadā jñātuṃ tadendraḥ svayamabhyagāt || 18 ||
[Analyze grammar]

maghavantamathāyāntaṃ dṛṣṭvā tejotiduḥsaham |
babhūvāntarhitaṃ sadyo vismito'bhūcca vāsavaḥ || 19 ||
[Analyze grammar]

caritramīdṛśaṃ yasya tameva śaraṇaṃ śraye |
iti saṃcintayāmāsa sahasrākṣaḥ punaḥpunaḥ || 20 ||
[Analyze grammar]

etasminnaṃtare tatra nirvyājakaruṇātanuḥ |
teṣāmanugrahaṃ kartuṃ hartuṃ garvaṃ śivāṃganā || 21 ||
[Analyze grammar]

caitraśuklanavamyāṃ tu madhyāhnasthe divākare |
prādurāsīdumā devī saccidānandarūpiṇī || 22 ||
[Analyze grammar]

mahomadhye virājantī bhāsayantī diśo rucā |
bodhayantī surānsarvānbrahmaivāhamiti sphuṭam || 23 ||
[Analyze grammar]

caturbhirdadhatī hastairvarapāśāṃkuśābhayān |
śrutibhissevitā ramyā navayauvanagarvitā || 24 ||
[Analyze grammar]

raktāmbaraparīdhānā raktamālyānulepanā |
koṭikaṃdarppasaṃkāśā candrakoṭisamaprabhā || 25 ||
[Analyze grammar]

vyājahāra mahāmāyā sarvāntaryyāmirūpiṇī |
sākṣiṇī sarvabhūtānāṃ parabrahmasvarūpiṇī || 26 ||
[Analyze grammar]

umovāca |
na brahmā na surārātirna purārātirīśvaraḥ |
madagre garvituṃ kiṃcitkā kathānyasuparvaṇām || 27 ||
[Analyze grammar]

paraṃ brahma paraṃ jyotiḥ praṇavadvandvarūpiṇī |
ahamevāsmi sakalaṃ madanyo nāsti kaścana || 28 ||
[Analyze grammar]

nirākārāpi sākārā sarvatattvasvarūpiṇī |
apratarkyaguṇā nityā kāryakāraṇarūpiṇī || 29 ||
[Analyze grammar]

kadāciddayitākārā kadācitpuruṣākṛtiḥ |
kadācidubhayākārā sarvākārāhamīśvarī || 30 ||
[Analyze grammar]

virañciḥ sṛṣṭikartāhaṃ jagatpātāhamacyutaḥ |
rudraḥ saṃhārakartāhaṃ sarvaviśvavimohinī || 31 ||
[Analyze grammar]

kālikā kamalāvāṇī mukhāssarvā hi śaktayaḥ |
madaṃśādeva saṃjātāstathemāssakalāḥ kalāḥ || 32 ||
[Analyze grammar]

matprabhāvājjitāssarve yuṣmābhirdditinandanāḥ |
tāmavijñāya māṃ yūyaṃ vṛthā sarveśamāninaḥ || 33 ||
[Analyze grammar]

yathā dārumayīṃ yoṣāṃ nartayatyaindrajālikaḥ |
tathaiva sarvabhūtāni nartayāmyahamīśvarī || 34 ||
[Analyze grammar]

madbhayādvāti pavanaḥ sarvaṃ dahati havyabhuk |
lokapālāḥ prakurvaṃti svasvakarmāṇyanāratam || 35 ||
[Analyze grammar]

kadāciddevavargāṇāṃ kadācidditijanma nām |
karomi vijayaṃ samyaksvatantrā nijalīlayā || 36 ||
[Analyze grammar]

avināśi paraṃ dhāma māyātītaṃ parātparam |
śrutayo varṇayante yatta drūpantu mamaiva hi || 37 ||
[Analyze grammar]

saguṇaṃ nirguṇaṃ ceti madrūpaṃ dvividhaṃ matam |
māyāśabalitaṃ caikaṃ dvitīyantadanāśritam || 38 ||
[Analyze grammar]

evaṃ vijñāya māṃ devāssvaṃ svaṃ garvaṃ vihāya ca |
bhajata praṇayopetāḥ prakṛtiṃ māṃ sanātanīm || 39 ||
[Analyze grammar]

iti devyā vacaḥ śrutvā karuṇāgarbhitaṃ surāḥ |
tuṣṭuvuḥ parameśānīṃ bhaktisaṃnatakandharāḥ || 40 ||
[Analyze grammar]

kṣamasva jagadīśāni prasīda parameśvari |
maivaṃ bhūyātkadācinno garvo mātarddayāṃ kuru || 41 ||
[Analyze grammar]

tataḥprabhṛti te daivā hitvā garvaṃ samāhitāḥ |
umāmārādhayāmāsuryathāpūrvaṃ yathāvidhi || 42 ||
[Analyze grammar]

iti vaḥ kathito viprā umāprādurbhavo mayā |
yasya śravaṇamātreṇa paramaṃ padamaśnute || 43 ||
[Analyze grammar]

iti śrīśivamahāpurāṇe pañcamyāmumāsaṃhitāyāmumāprādurbhāvavarṇanaṃ nāmaikonapañcāśattamo'dhyāyaḥ || 49 ||
[Analyze grammar]