Chapter 50

[English text for this chapter is available]

munaya ūcuḥ |
śrotukāmā vayaṃ sarve durgācaritamanvaham |
aparaṃ ca mahāprājña tattvaṃ varṇaya no'dbhutam || 1 ||
[Analyze grammar]

śṛṇvatāntvanmukhāmbhojātkathā nānā sudhopamāḥ |
na tṛpyati mano'smākaṃ sūta sarvārthavittama || 2 ||
[Analyze grammar]

|| sūta uvāca |
durgamaḥ prathito nāmnā ruruputro mahābalaḥ |
brahmaṇo varadānena catasro'labhata śrutīḥ || 3 ||
[Analyze grammar]

devājeyabalaṃ cāpi saṃprāpya jagatītale |
karoti sma bahūtpātāndivi devāścakampire || 4 ||
[Analyze grammar]

sarvā naṣṭeṣu vedeṣu kriyā naṣṭā babhūva ha |
brāhmaṇāśca durācārā babhūbussasurāstadā || 5 ||
[Analyze grammar]

na dānaṃ na tapo'tyugraṃ na yāgo havanaṃ na hi |
anāvṛṣṭistato jātā pṛthivyāṃ śatavārṣikī || 6 ||
[Analyze grammar]

hāhākāro mahānāsīttriṣu lokeṣu duḥkhitāḥ |
abhavaṃśca janāssarve kṣuttṛḍbhyāṃ pīḍitā bhṛśam || 7 ||
[Analyze grammar]

saritaḥ sāgarāścaiva vāpīkūpasarāṃsi ca |
nirjalā abhavansarve saṃśuṣkā vṛkṣavīrudhaḥ || 8 ||
[Analyze grammar]

tato dṛṣṭvā madādduḥkhaṃ prajānāṃ dīnacetasām |
tridaśāśśaraṇaṃ yātā yogamāyāṃ maheśvarīm || 9 ||
[Analyze grammar]

devā ūcuḥ |
rakṣarakṣa mahāmāye svakīyāssakalāḥ prajāḥ |
kopaṃ saṃhara nūnantvaṃ lokā naṃkṣyaṃti vānyathā || 10 ||
[Analyze grammar]

kathā śuṃbhohato daityo niśuṃbhaśca mahābalaḥ |
dhūmrākṣaścaṇḍamuṇḍau ca raktabījo mahābalaḥ || 11 ||
[Analyze grammar]

sa madhuḥ kaiṭabho daityo mahiṣāsura eva ca |
tathaivāmuṃ kṛpāsindho dīnabandho jahi drutam || 12 ||
[Analyze grammar]

aparādho bhavatyeva bālakānāṃ pade pade |
sahate ko jano loke kevalaṃ mātaraṃ vinā || 13 ||
[Analyze grammar]

yadāyadābhavadduḥkha devānāṃ brahmaṇāntathā |
tadātadāvatīryāśu kuruṣe sukhino janān || 14 ||
[Analyze grammar]

iti viklavitanteṣāṃ samākarṇya kṛpāmayī |
anantākṣamayaṃ rūpandarśayāmāsa sāmpratam || 15 ||
[Analyze grammar]

dhanurbāṇau tathā padma nānāmūlaphalāni ca |
caturbhirdadhatī hastaiḥ prasannamukhapaṅkajā || 16 ||
[Analyze grammar]

tato dṛṣṭvā prajāstaptāḥ karuṇāpūritekṣaṇā |
ruroda nava ghasrāṇi nava rātrīssamākulā || 17 ||
[Analyze grammar]

mocayāmāsa dṛṣṭibhyo vāridhārāḥ sahasraśaḥ |
tābhiḥ pratarppitā lokā auṣadhyaḥ sakalā api || 18 ||
[Analyze grammar]

agādhatoyāssarito babhūvuḥ sāgarā api |
ruruhurdharaṇīpṛṣṭhe śākamūlaphalāni ca || 19 ||
[Analyze grammar]

vitatāra karasthāni sumanobhyaḥ phalāni ca |
gobhyastṛṇāni ramyāṇi tathānyebhyo yathārhataḥ || 20 ||
[Analyze grammar]

santuṣṭā abhavansarve sadaiva dvijamānuṣāḥ |
tato jagāda sā devī kimanyatkaravāṇi vaḥ || 21 ||
[Analyze grammar]

sametyocustadā devā bhavatyā toṣitā janāḥ |
vedāndehi kṛpāṃ kṛtvā durgameṇa samāhṛtām || 22 ||
[Analyze grammar]

tathāstviti prabhāṣyāha yātayāta nijālayam |
vitariṣyāmi vo vedānacireṇaiva kālataḥ || 23 ||
[Analyze grammar]

tataḥ pramuditā devāssvaṃ svaṃ dhāma samāyayuḥ |
supraṇamya jagadyoniṃ phullendīvaralocanām || 24 ||
[Analyze grammar]

tataḥ kolāhalo jāto divi bhūmyantarikṣake |
tacchrutvā rauravaḥ sadyo nyaruṇatsarvataḥ purīm || 25 ||
[Analyze grammar]

tatastejomayaṃ cakraṃ vidhāya paritaḥ śivā |
rakṣaṇārthaṃ devatānāṃ svayaṃ tasmādbahirgatā || 26 ||
[Analyze grammar]

tataḥ samabhavayuddhaṃ devyā daityasya cobhayoḥ |
vavṛṣuḥ samare bāṇānniśitānkaṃkaṭacchidaḥ || 27 ||
[Analyze grammar]

etasminnaṃtare tasyāḥ śarīrādramyamūrttayaḥ |
kālī tārā cchinnamastā śrīvidyā bhuvaneśvarī || 28 ||
[Analyze grammar]

bhairavī bagalā dhūmra śrīmattripurasudarī |
mātaṃgī ca mahāvidyā nirgatā daśa sāyudhāḥ || 29 ||
[Analyze grammar]

asaṃkhyātāstato jātā mātaro divyamūrttayaḥ |
candralekhādharāssarvāssarvā vidyutatsamaprabhāḥ || 30 ||
[Analyze grammar]

tato mātṛgaṇairyuddhaṃ prāvartata bhayaṃkaram |
rauravīyaṃ hatantābhirdalamakṣauhiṇīśatam || 31 ||
[Analyze grammar]

jaghāna sā tadā daityaṃ durgamaṃ śūladhārayā |
papāta dharaṇīpṛṣṭhe khātamūladrumo yathā || 32 ||
[Analyze grammar]

itthaṃ hatvā tadā daityaṃ durgamāsuranāma kam |
ādāya caturo vedāndadau devebhya īśvarī || 33 ||
[Analyze grammar]

devā ūcuḥ |
asmadarthaṃ tvayā rūpamanantākṣimayaṃ dhṛtam |
munayaḥ kīrtayiṣyanti śatākṣīntvāmato'mbike || 34 ||
[Analyze grammar]

ātmadehasamudbhūtaiḥ śākairlokā mṛtā yataḥ |
śākaṃbharīti vikhyātantatte nāma bhaviṣyati || 35 ||
[Analyze grammar]

durgamākhyo mahādaityo hato yasmāttataḥ śive |
durgāṃ bhagavatīṃ bhadrāṃ vyāhariṣyaṃti mānavāḥ || 36 ||
[Analyze grammar]

yoganidre namastubhyaṃ namaste'stu mahābale |
namo jñānaprade tubhyaṃ viśvamātre namo namaḥ || 37 ||
[Analyze grammar]

tattvamasyādivākyairyā bodhyate parameśvarī |
anantakoṭibrahmāṇḍanāyikāyai namo namaḥ || 38 ||
[Analyze grammar]

vāṅmanaḥkāyaduṣprāpāṃ sūryacandrāgnilocanām |
stotuṃ na śaknumo mātastva tprabhāvābudhā vayam || 39 ||
[Analyze grammar]

mādṛśānamarāndṛṣṭvā kaḥ kuryādīdṛśīndayām |
varjayitvā sureśānīṃ śatākṣī mātaraṃ vinā || 40 ||
[Analyze grammar]

trilokī nābhibhūyeta bādhābhiśca nirantaram |
evaṃ kāryastvayā yatno'smākaṃ vairivināśanam || 41 ||
[Analyze grammar]

devyuvāca |
vatsāndṛṣṭvā yathā gāvo vyagrā dhāvanti satvaram |
tathaiva bhavato dṛṣṭvā dhāvāmi vyākulā satī || 42 ||
[Analyze grammar]

mama yuṣmānapaśyantyā paśyantyā bālakāniva |
api prāṇānprayacchantyāḥ kṣaṇa eko yugāyate || 43 ||
[Analyze grammar]

kāpi cintā na karttavyā yuṣmābhirbha ktiśālibhiḥ |
bhavatyāṃ mayi tiṣṭhantyāṃ saṃharantyāṃ nijāpadaḥ || 44 ||
[Analyze grammar]

yathā pūrvaṃ hatā daityā haniṣyāmi tathā'surān |
saṃśayo nātra karttavyassatyaṃsatyaṃ bravīmyaham || 45 ||
[Analyze grammar]

yadā śuṃbho niśuṃbhaścāparau daityau bhaviṣyataḥ |
tadāhaṃ nandabhāryāyāṃ yaśodāyāṃ yaśomayī || 46 ||
[Analyze grammar]

yonijaṃ rūpamāsthāya janiṣye gopagokule |
haniṣyāmyasurau tanmāṃ vyāhariṣyanti nandajām || 47 ||
[Analyze grammar]

bhrāmaraṃ rūpamāsthāya vadhiṣyāmyaruṇaṃ yataḥ |
bhrāmarīti ca māṃ loke kīrtayiṣyanti mānavāḥ || 48 ||
[Analyze grammar]

kṛtvā bhīmaṃ punā rūpaṃ rakṣāṃsyatsyāmyahaṃ yadā |
bhīmā devīti vikhyātaṃ tanme nāma bhaviṣyati || 49 ||
[Analyze grammar]

yadāyadā'surotthaiva bādhā bhuvi bhaviṣyati |
tadātadāvatīryāhaṃ śaṃ kariṣyāmyasaṃśayam || 50 ||
[Analyze grammar]

yā śatākṣī smṛtā devī saiva śākaṃbharī matā |
saiva prakīrtitā durgā vyaktirekaiva triṣvapi || 51 ||
[Analyze grammar]

na śatākṣīsamā kāciddayālurbhuvi devatā |
dṛṣṭvā'rudatprajāstaptā yā navāhaṃ maheśvarī || 52 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ śatākṣyādyavatāravarṇanaṃ nāma paṃcāśattamo'dhyāyaḥ || 50 ||
[Analyze grammar]