Chapter 19

[English text for this chapter is available]

sanatkumāra uvāca |
ravicandramasoryāvanmayūkhā bhāsayaṃti hi |
tāvatpramāṇā pṛthivī bhūlokassa tu gīyate || 1 ||
[Analyze grammar]

bhūmeryojanalakṣe tu saṃsthitaṃ ravimaṇḍalam |
yojanānāṃ sahasrāṇi sadaiva parisaṃkhyayā || 2 ||
[Analyze grammar]

śaśinastu pramāṇāya jagataḥ paricakṣate |
raverūrdhvaṃ śaśī tasthau lakṣayojanasaṃkhyayā || 3 ||
[Analyze grammar]

grahāṇāṃ maṇḍalaṃ kṛtsnaṃ śaśerupari saṃsthitam |
sanakṣatraṃ sahasrāṇi daśaiva paritopari || 4 ||
[Analyze grammar]

budhastasmādatho kāvyastasmādbhaumasya maṇḍalam |
bṛhaspatistadūrdhvaṃ tu tasyopari śanaiścaraḥ || 5 ||
[Analyze grammar]

saptarṣimaṇḍalaṃ tasmāllakṣeṇaikena saṃsthitam |
ṛṣibhya tu sahasrāṇāṃ śatādūrdhvaṃ dhruvaḥ sthitaḥ || 6 ||
[Analyze grammar]

meḍhībhūtassa yastasya jyotiścakrasya vai dhruvaḥ |
bhūrbhuvaḥsvariti jñeyaṃ bhuva ūrdhvaṃ dhruvādavāk || 7 ||
[Analyze grammar]

ekayojanakoṭistu yatra te kalpavāsinaḥ |
dhruvādūrdhvaṃ maharlokassaptaite brahmaṇassutāḥ || 8 ||
[Analyze grammar]

sanakaśca sanandaśca tṛtīyaśca sanātanaḥ |
kapilaścāsuriścaiva voḍhuḥ paṃcaśikhastathā || 9 ||
[Analyze grammar]

upariṣṭāttataśśukro dvilakṣābhyaṃtare sthitaḥ |
dvilakṣayojanaṃ tasmādadhaḥ somasutaḥ smṛtaḥ || 10 ||
[Analyze grammar]

dvilakṣayojanaṃ tasmādūrdhvaṃ bhaumassthito mune |
dvilakṣayojanaṃ tasmādūrdhvaṃ jīvaḥ sthito guru || 11 ||
[Analyze grammar]

dvilakṣayojanaṃ jīvādūrdhvaṃ saurirvyavasthitaḥ |
ete saptagrahāḥ proktāssvasvarāśivyavasthitā || 12 ||
[Analyze grammar]

rudralakṣairyojanatassaptordhvamṛṣayaḥ sthitāḥ |
viśvalakṣairyojanato dhruvasthitirudāhṛtā || 13 ||
[Analyze grammar]

caturguṇottare cārddhe janalokāttapaḥ smṛtam |
vairājā yatra devā vai sthitā dāhavivarjitāḥ || 14 ||
[Analyze grammar]

ṣaḍguṇena tapolokātsatyaloko vyavasthitaḥ |
brahmalokaḥ sa vijñeyo vasaṃtyamalacetasaḥ || 15 ||
[Analyze grammar]

satyadharmaratāścaiva jñānino brahmacāriṇaḥ |
yadgāmino'tha bhūlokānnivasaṃti hi mānavāḥ || 16 ||
[Analyze grammar]

bhuvarloke tu saṃsiddhā munayo devarūpiṇaḥ |
svargaloke surādityā maruto vasavo'śvinau || 17 ||
[Analyze grammar]

viśvedevāstathā rudrāssādhyā nāgāḥ khagādayaḥ |
navagrahāstatastatra ṛṣayo vītakalmaṣāḥ || 18 ||
[Analyze grammar]

ete sapta mahālokāḥ kāleya kathitāstava |
pātālāni ca saptaiva brahmāṇḍasya ca vistaraḥ || 19 ||
[Analyze grammar]

dadhivṛkṣaphalaṃ yadvadvṛttiścordhvamadhastathā |
etadaṃḍakaṭāhena sarvato vai samāvṛtam || 20 ||
[Analyze grammar]

daśaguṇena payasā sarvatastatsamāvṛtam |
vahninā vāyunā cāpi nabhasā tamasā tathā || 21 ||
[Analyze grammar]

bhūtādināpi mahatā digguṇottaraveṣṭitaḥ |
mahāṃtaṃ ca samāvṛtya pradhānaṃ puruṣaḥ sthitaḥ || 22 ||
[Analyze grammar]

anaṃtasya na tasyāsti saṃkhyāpi paramātmanaḥ |
tenānaṃta iti khyātaḥ pramāṇaṃ nāsti vai yataḥ || 23 ||
[Analyze grammar]

hetubhūtassamastasya prakṛtissā parā mune |
aṃḍānāṃ tu sahasrāṇāṃ sahasrāṇyayutāni ca || 24 ||
[Analyze grammar]

īdṛśānāṃ prabhūtāni tasmādavyaktajanmanaḥ |
dāruṇyagnistile tailaṃ payassu ca yathā ghṛtam || 25 ||
[Analyze grammar]

tathāsau paramātmā vai sarvaṃ vyāpyātmavedanaḥ |
ādibījātprasuvate tatastebhyaḥ pareṇḍajāḥ || 26 ||
[Analyze grammar]

tebhyaḥ putrāstathānyeṣāṃ bījānyanyāni vai tataḥ |
mahadādayo viśeṣāṃtāstadbhavaṃti surādayaḥ || 27 ||
[Analyze grammar]

bījādvṛkṣapraroheṇa yathā nāpacayastaroḥ |
sūryyakāṃtamaṇeḥ sūryyādyadvadvahniḥ prajāyate || 28 ||
[Analyze grammar]

tadvatsaṃjāyate sṛṣṭiḥ śivastatraḥ na kāmayet |
śivaśaktisamāyoge devādyāḥ prabhavaṃti hi || 29 ||
[Analyze grammar]

tathā svakarmaṇaikena prarohamupayāṃti vai |
brahmā viṣṇuśca rudrāśca sa śivaḥ parigīyate || 30 ||
[Analyze grammar]

tasmāduddharate sarvaṃ yasmiṃśca layameṣyati |
kartā kriyāṇāṃ sarvāsāṃ sa śivaḥ parigīyate || 31 ||
[Analyze grammar]

vyāsa uvāca |
sanatkumāra sarvajña chiṃdhi me saṃśayaṃ mahat |
santi lokā hi brahmāṃḍādupariṣṭānna vā mune || 32 ||
[Analyze grammar]

sanatkumāra uvāca |
brahmāṃḍādupariṣṭācca saṃti lokā munīśvara |
tāñchṛṇu tvaṃ viśeṣeṇa vacmi te'haṃ samāgataḥ || 33 ||
[Analyze grammar]

vidhilokātparo loko vaikuṃṭha iti viśrutaḥ |
virājate mahādīptyā yatra viṣṇuḥ pratiṣṭhitaḥ || 34 ||
[Analyze grammar]

tasyopariṣṭātkaumāro loko hi paramādbhutaḥ |
senānīḥ śaṃbhutanayo rājate yatra suprabhaḥ || 35 ||
[Analyze grammar]

tataḥ paramumāloko mahādivyo virā jate |
yatra śaktirvibhātyekā tridevajananī śivā || 36 ||
[Analyze grammar]

parātparā hi prakṛtī rajassattvatamomayī |
nirguṇā ca svayaṃ devī nirvikārā śivātmikā || 37 ||
[Analyze grammar]

tasyopariṣṭādvijñeyaśśivalokassanātanaḥ |
avināśī mahādivyo mahāśobhānvitassadā || 38 ||
[Analyze grammar]

virājate paraṃ brahma yatra śaṃbhurmaheśvaraḥ |
tridevajanakasvāmī sarveṣāṃ triguṇātparaḥ || 39 ||
[Analyze grammar]

tata ūrdhvaṃ na lokāśca golokastatsamīpataḥ |
gomātarassuśīlākhyāstatra saṃti śivapriyā || 40 ||
[Analyze grammar]

tatpālaḥ kṛṣṇanāmā hi rājate śaṃkarājñayā |
pratiṣṭhitaśśivenaiva śaktyā svacchandacāriṇā || 41 ||
[Analyze grammar]

śivaloko'dbhuto vyāsa nirādhāro manoharaḥ |
atinirvacanīyaśca nānāvastuvirājitaḥ || 42 ||
[Analyze grammar]

śivastu tadadhiṣṭhātā sarvadevaśiromaṇiḥ |
viṣṇubrahmaharaissevyaḥ paramātmā nirañjanaḥ || 43 ||
[Analyze grammar]

iti te kathitā tāta sarvabrahmāṃḍasaṃsthitiḥ |
tadūrdhvaṃ lokasaṃsthānaṃ kimanyacchrotumicchasi || 44 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ lokavarṇanaṃnāmaikonaviṃśo'dhyāyaḥ || 19 ||
[Analyze grammar]