Chapter 2

[English text for this chapter is available]

|| vyāsa uvāca |
brahmaputra mahāprājña vada me vadatāṃ vara |
tataḥ kimabhavaddevāḥ kathaṃ ca sukhino'bhavan || 1 ||
[Analyze grammar]

|| brahmovāca |
ityākarṇya vacastasya vyāsasyāmitadhīmataḥ |
sanatkumāraḥ provāca smṛtvā śivapadāmbujam || 2 ||
[Analyze grammar]

sanatkumāra uvāca |
atha tatprabhayā dagdhā devā hīndrādayastathā |
saṃmaṃtrya duḥkhitāssarve brahmāṇaṃ śaraṇaṃ yayuḥ || 3 ||
[Analyze grammar]

natvā pitāmahaṃ prītyā parikṣiptākhilāssurāḥ |
duḥkhaṃ vijñāpayāmāsurvilokyāvasaraṃ tataḥ || 4 ||
[Analyze grammar]

devā ūcuḥ |
dhātastripuranāthena satārakasutena hi |
sarve pratāpitā nūnaṃ mayena tridivaukasaḥ || 5 ||
[Analyze grammar]

ataste śaraṇaṃ yātā duḥkhitā hi vidhe vayam |
kuru tvaṃ tadvadhopāyaṃ sukhinassyāma tadyathā || 6 ||
[Analyze grammar]

|| sanatkumāra uvāca |
iti vijñāpito devairvihasya bhavakṛdvidhiḥ |
pratyuvācātha tānsarvānmayato bhītamānasān || 7 ||
[Analyze grammar]

brahmovāca |
na bhetavyaṃ surāstebhyo dānavebhyo viśeṣataḥ |
ācakṣe tadvadhopāyaṃ śivaṃ śarvaḥ kariṣyati || 8 ||
[Analyze grammar]

matto vivardhito daityo vadhaṃ matto na cārhati |
tathāpi puṇyaṃ varddhaita nagare tripure punaḥ || 9 ||
[Analyze grammar]

śivaṃ ca prārthayadhvaṃ vai sarve devāssavāsavāḥ |
sarvādhīśaḥ prasannaścetsa vaḥ kāryaṃ kariṣyati || 10 ||
[Analyze grammar]

sanatkumāra uvāca |
ityākarṇya vidhervāṇīṃ sarve devāssavāsavāḥ |
dukhitāste yayustatra yatrāste vṛṣabhadhvajaḥ || 11 ||
[Analyze grammar]

praṇamya bhaktyā deveśaṃ sarve prāṃjalayastadā |
tuṣṭuvurvinataskaṃdhāśśaṃkaraṃ lokaśaṃkaram || 12 ||
[Analyze grammar]

|| devā ūcuḥ |
namo hiraṇyagarbhāya sarvasṛṣṭi vidhāyine |
namaḥ sthitikṛte tubhyaṃ viṣṇave prabhaviṣṇave || 13 ||
[Analyze grammar]

namo harasvarūpāya bhūtasaṃhārakāriṇe |
nirguṇāya namastubhyaṃ śivāyāmita tejase || 14 ||
[Analyze grammar]

avasthārahitāyātha nirvikārāya varcase |
mahābhūtātmabhūtāya nirliptāya mahātmane || 15 ||
[Analyze grammar]

namaste bhūtapataye mahābhārasahiṣṇave |
tṛṣṇāharāya nirvairākṛtaye bhūritejase || 16 ||
[Analyze grammar]

mahādaityamahāraṇyanāśine dāvavahnaye |
daityadrumakuṭhārāya namaste śūlapāṇaye || 17 ||
[Analyze grammar]

mahādanujanāśāya namaste parameśvara |
ambikāpataye tubhyaṃ namassarvāstradhāraka || 18 ||
[Analyze grammar]

namaste pārvatīnātha paramātmanmaheśvara |
nīlakaṃṭhāya rudrāya namaste rudrarūpiṇe || 19 ||
[Analyze grammar]

namo vedāntavedyāya mārgātītāya te namaḥ |
namoguṇasvarūpāya guṇine guṇavarjite || 20 ||
[Analyze grammar]

mahādeva namastubhyaṃ trilokīnandanāya ca |
pradyumnāyāniruddhāya vāsudevāya te namaḥ || 21 ||
[Analyze grammar]

saṃkarṣaṇāya devāya namaste kaṃsanāśine |
cāṇūramardine tubhyaṃ dāmodara viṣādine || 22 ||
[Analyze grammar]

hṛṣīkeśācyuta vibho mṛḍa śaṃkara te namaḥ |
adhokṣaja gajārāte kāmāre viṣabhakṣaṇaḥ || 23 ||
[Analyze grammar]

nārāyaṇāya devāya nārāyaṇaparāya ca |
nārāyaṇasvarūpāya nārāṇayatanūdbhava || 24 ||
[Analyze grammar]

namaste sarvarūpāya mahānarakahāriṇe |
pāpāpahāriṇe tubhyaṃ namo vṛṣabhavāhana || 25 ||
[Analyze grammar]

kṣaṇādikālarūpāya svabhaktabaladāyine |
nānārūpāya rūpāya daityacakravimardine || 26 ||
[Analyze grammar]

namo brahmaṇyadevāya gobrāhmaṇahitāya ca |
sahasramūrttaye tubhyaṃ sahasrāvayavāya ca || 27 ||
[Analyze grammar]

dharmarūpāya sattvāya namassattvātmane hara |
vedavedyasvarūpāya namo vedapriyāya ca || 28 ||
[Analyze grammar]

namo vedasvarūpāya vedavaktre namo namaḥ |
sadācārādhvagamyāya sadācārādhvagāmine || 29 ||
[Analyze grammar]

viṣṭaraśravase tubhyaṃ namassatyamayāya ca |
satyapriyāya satyāya satyagamyāya te namaḥ || 30 ||
[Analyze grammar]

namaste māyine tubhyaṃ māyādhīśāya vai namaḥ |
brahmagāya namastubhyaṃ brahmaṇe brahmajāya ca || 31 ||
[Analyze grammar]

tapase te namastvīśa tapasā phaladāyine |
stutyāya stutaye nityaṃ stutisaṃprītacetase || 32 ||
[Analyze grammar]

śrutyācāraprasannāya stutyācārapriyāya ca |
caturvidhasvarūpāya jalasthalajarūpiṇe || 33 ||
[Analyze grammar]

sarve devādayo nātha śreṣṭhatvena vibhūtayaḥ |
devānāmindrarūpo'si grahāṇāṃ tvaṃ ravirmataḥ || 34 ||
[Analyze grammar]

satyaloko'si lokānāṃ saritāṃ dyusaridbhavān |
śvetavarṇo'si varṇānāṃ sarasāṃ mānasaṃ saraḥ || 35 ||
[Analyze grammar]

śailānāṃ girijātātaḥ kāmadhuktvaṃ ca goṣu ha |
kṣīrodadhistu sindhūnāṃ dhātūnāṃ hāṭako bhavān || 36 ||
[Analyze grammar]

varṇānāṃ brāhmaṇo'si tvaṃ nṛṇāṃ rājāsi śaṃkara |
muktikṣetreṣu kāśī tvaṃ tīrthānāṃ tīrtharāḍ bhavān || 37 ||
[Analyze grammar]

upaleṣu samasteṣu sphaṭikastvaṃ maheśvara |
kamalastvaṃ prasūneṣu śaileṣu himavāṃstathā || 38 ||
[Analyze grammar]

bhavānvāgvyavahāreṣu bhārgavastvaṃ kaviṣvapi |
pakṣiṣvevāsi śarabhaḥ siṃho hiṃsreṣu saṃmataḥ || 39 ||
[Analyze grammar]

śālagrāmaśilā ca tvaṃ śilāsu vṛṣabhadhvaja |
pūjya rūpeṣu sarveṣu narmadāliṃgameva hi || 40 ||
[Analyze grammar]

nandīśvaro'si paśuṣu vṛṣabhaḥ parameśvara |
vedeṣūpaniṣadrūpī yajvanāṃ śītabhānumān || 41 ||
[Analyze grammar]

pratāpināṃ pāvakastvaṃ śaivānāmacyuto bhavān |
bhārataṃ tvaṃ purāṇānāṃ makāro'syakṣareṣu ca || 42 ||
[Analyze grammar]

praṇavo bījamaṃtrāṇāṃ dāruṇānāṃ viṣaṃ bhavān |
vyomavyaptimatāṃ tvaṃ vai paramātmāsi cātmanām || 43 ||
[Analyze grammar]

indriyāṇāṃ manaśca tvaṃ dānānāmabhayaṃ bhavān |
pāvanānāṃ jalaṃ cāsi jīvanānāṃ tathāmṛtam || 44 ||
[Analyze grammar]

lābhānāṃ putralābho'si vāyurvegavatāmasi |
nityakarmasu sarveṣu saṃdhyopāstirbhavānmatā || 45 ||
[Analyze grammar]

kratūnāmaśvamedho'si yugānāṃ prathamo yugaḥ |
puṣyastvaṃ sarvadhiṇyānāmamāvāsyā tithiṣvasi || 46 ||
[Analyze grammar]

sarvartuṣu vasaṃtastvaṃ sarvaparvasu saṃkramaḥ |
kuśo'si tṛṇajātīnāṃ sthūlavṛkṣeṣu vai vaṭaḥ || 47 ||
[Analyze grammar]

yogeṣu ca vyatīpātassomavallī latāsu ca |
buddhīnāṃ dharmabuddhistvaṃ kalatraṃ suhṛdāṃ bhavān || 48 ||
[Analyze grammar]

sādhakānāṃ śucīnāṃ tvaṃ prāṇāyāmo maheśvara |
jyotirliṃgeṣu sarveṣu bhavān viśve śvaro mataḥ || 49 ||
[Analyze grammar]

dharmastvaṃ sarvabaṃdhūnāmāśramāṇāṃ paro bhavān |
mokṣastvaṃ sarvavarṇeṣu rudrāṇāṃ nīlalohitaḥ || 50 ||
[Analyze grammar]

ādityānāṃ vāsudevo hanūmānvānareṣu ca |
yajñānāṃ japayajño'si rāmaḥ śastrabhṛtāṃ bhavān || 51 ||
[Analyze grammar]

gaṃdharvāṇāṃ citraratho vasūnāṃ pāvako dhruvam |
māsānāmadhimāsastvaṃ vratānāṃ tvaṃ caturdaśī || 52 ||
[Analyze grammar]

airāvato gajendrāṇāṃ siddhānāṃ kapilo mataḥ |
anaṃtastvaṃ hi nāgānāṃ pitṝṇāmaryamā bhavān || 53 ||
[Analyze grammar]

kālaḥ kalayatāṃ ca tvaṃ daityānāṃ balireva ca |
kiṃ bahūktena deveśa sarvaṃ viṣṭabhya vai jagat || 54 ||
[Analyze grammar]

ekāṃśena sthitastvaṃ hi bahiḥstho'nvita eva ca || 55 ||
[Analyze grammar]

sanatkumāra uvāca |
iti stutvā surāssarve mahādevaṃ vṛṣadhvajam |
stotrairnānāvidhaidiṃvyaiḥ śūlinaṃ parameśvaram || 56 ||
[Analyze grammar]

pratyūcuḥ prastutaṃ dīnāssvārthaṃ svārthavicakṣaṇāḥ |
vāsavādyā nataskadhāḥ kṛtāñjali puṭā mune || 57 ||
[Analyze grammar]

devā ūcuḥ |
parājitā mahādeva bhrātṛbhyāṃ sahitena tu |
bhagavaṃstārakotpannaiḥ sarve devāssavāsavāḥ || 58 ||
[Analyze grammar]

trailokyaṃ svavaśaṃ nītaṃ tathā ca munisattamāḥ |
vidhvastāssarvasaṃsiddhāssarvamutsāditaṃ jagat || 59 ||
[Analyze grammar]

yajñabhāgānsamagrāṃstu svayaṃ gṛhṇāti dāruṇaḥ |
pravartito hyadharmastairṛṣīṇāṃ ca nivāritaḥ || 60 ||
[Analyze grammar]

avadhyāssarvabhūtānāṃ niyataṃ tārakātmajāḥ |
tadicchayā prakurvanti sarve karmāṇi śaṃkara || 61 ||
[Analyze grammar]

yāvanna kṣīyate daityairghoraistripuravāsibhiḥ |
tāvadvidhīyatāṃ nītiryayā saṃrakṣyate jagat || 62 ||
[Analyze grammar]

|| sanatkumāra uvāca |
ityākarṇya vacasteṣāmindrādīnāṃ divaukasām |
śivaḥ saṃbhāṣamāṇānāṃ prativākyamuvāca saḥ || 63 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe devastutirnāma dvitīyo'dhyāyaḥ || 2 ||
[Analyze grammar]