Chapter 1

[English text for this chapter is available]

|| śrīgaṇeśāya namaḥ |
|| śrīgaurīśaṃkarābhyāṃ namaḥ |
|| nārada uvāca |
śrutamasmābhirānaṃdapradaṃ caritamuttamam |
gṛhasthasyaiva śaṃbhośca gaṇaskaṃdādisatkatham || 1 ||
[Analyze grammar]

idānīṃ brūhi suprītyā caritaṃ varamuttamam |
śaṃkaro hi yathā rudro jaghāna viharankhalān || 2 ||
[Analyze grammar]

kathaṃ dadāha bhagavānnagarāṇi suradviṣām |
trīṇyekena ca bāṇena yugapatkena vīryavān || 3 ||
[Analyze grammar]

etatsarvaṃ samācakṣva caritaṃ śaśimaulinaḥ |
devarṣisukhadaṃ śaśvanmāyāviharataḥ prabhoḥ || 4 ||
[Analyze grammar]

|| brahmovāca |
evametatpurā pṛṣṭo vyāsena ṛṣisattamaḥ |
sanatkumāraṃ provāca tadeva kathayāmyaham || 5 ||
[Analyze grammar]

sanatkumāra uvāca |
śṛṇu vyāsa mahāprājña caritaṃ śaśimaulinaḥ |
yathā dadāha tripuraṃ bāṇenaikena viśva hṛt || 6 ||
[Analyze grammar]

śivātmajena skandena nihate tārakāsure |
tatputrāstu trayo daityāḥ paryatapyanmunīśvara || 7 ||
[Analyze grammar]

tārakākhyastu tajjeṣṭho vidyunmālī ca madhyamaḥ |
kamalākṣaḥ kanīyāṃśca sarve tulyabalāssadā || 8 ||
[Analyze grammar]

jitendriyāssasannaddhāssaṃyatāssatyavādinaḥ |
dṛḍhacittā mahāvīrā devadrohiṇa eva ca || 9 ||
[Analyze grammar]

te tu meruguhāṃ gatvā tapaścakrurmahādbhutam |
trayassarvānsubhogāṃśca vihāya sumanoharān || 10 ||
[Analyze grammar]

vasaṃte sarvakāmāṃśca gītavāditranissvanam |
vihāya sotsavaṃ tepustrayaste tārakātmajāḥ || 11 ||
[Analyze grammar]

grīṣme sūryaprabhāṃ jitvā dikṣu prajvālya pāvakam |
tanmadhyasaṃsthāḥ siddhyarthaṃ juhuvurhavyamādarāt || 12 ||
[Analyze grammar]

mahāpratāpapatitāssarvepyāsan sumūrchitāḥ |
varṣāsu gatasaṃtrāsā vṛṣṭiṃ mūrddhanyadhārayan || 13 ||
[Analyze grammar]

śaratkāle prasūtaṃ tu bhojanaṃ tu bubhukṣitāḥ |
ramyaṃ snigdhaṃ sthiraṃ hṛdyaṃ phalaṃ mūlamanuttamam || 14 ||
[Analyze grammar]

saṃyamātkṣuttṛṣo jitvā pānānyuccāvacānyapi |
bubhukṣitebhyo dattvā tu bubhūvurupalā iva || 15 ||
[Analyze grammar]

saṃsthitāste mahātmāno nirādhārāścaturdiśam |
hemaṃte girimāśritya dhairyeṇa parameṇa tu || 16 ||
[Analyze grammar]

tuṣāradehasaṃchannā jalaklinnena vāsasā |
āsādya dehaṃ kṣaumeṇa śiśire toyamadhyagāḥ || 17 ||
[Analyze grammar]

anirviṇṇāstatassarve kramaśo'varddhayaṃstapaḥ |
tepustrayaste tatputrā vidhimuddiśya sattamāḥ || 18 ||
[Analyze grammar]

tapa ugraṃ samāsthāya niyame parame sthitā |
tapasā karṣayāmāsurdehān svān dānavottamāḥ || 19 ||
[Analyze grammar]

varṣāṇāṃ śatakaṃ caiva padamekaṃ nidhāya ca |
bhūmau sthitvā paraṃ tatra tepuste balavattarāḥ || 20 ||
[Analyze grammar]

te sahasraṃ tu varṣāṇāṃ vātabhakṣāssudāruṇāḥ |
tapastepurdurātmānaḥ paraṃ tāpamupāgatāḥ || 21 ||
[Analyze grammar]

varṣāṇāṃ tu sahasraṃ vai mastakenāsthitāstathā |
varṣāṇāṃ tu śatenaiva ūrddhvabāhava āsitāḥ || 22 ||
[Analyze grammar]

evaṃ duḥkhaṃ paraṃ prāptā durāgrahaparā ime |
īdṛkte saṃsthitā daityā divārātramataṃdritā || 23 ||
[Analyze grammar]

evaṃ teṣāṃ gataḥ kālo mahān sutapatāṃ mune |
brahmātmanāṃ tārakāṇāṃ dharmeṇeti matirmama || 24 ||
[Analyze grammar]

prādurāsīttato brahmā surāsuragururmahān |
saṃtuṣṭastapasā teṣāṃ varaṃ dātuṃ mahāyaśāḥ || 25 ||
[Analyze grammar]

munidevāsuraissārddhaṃ sāṃtvapūrvamidaṃ vacaḥ |
tatastānabravītsarvān sarvabhūtapitāmahaḥ || 25 ||
[Analyze grammar]

brahmovāca |
prasanno'smi mahādaityā yuṣmākaṃ tapasā mune |
sarvaṃ dāsyāmi yuṣmabhyaṃ varaṃ brūta yadīpsitam || 27 ||
[Analyze grammar]

kimarthaṃ sutapastaptaṃ kathayadhvaṃ suradviṣāṃ |
sarveṣāṃ tapaso dātā sarvakartāsmi sarvadā || 28 ||
[Analyze grammar]

sanatkumāra uvāca |
tasya tadvacanaṃ śrutvā śanaiste svātmano gatam |
ūcuḥ prāṃjalayassarve praṇipatya pitāmaham || 29 ||
[Analyze grammar]

daityā ūcuḥ |
yadi prasanno deveśa yadi deyo varastvayā |
avadhyatvaṃ ca sarveṣāṃ sarvabhūteṣu dehinaḥ || 30 ||
[Analyze grammar]

sthirān kuru jagannātha pāṃtu naḥ paripaṃthinaḥ |
jarārogādayassarve nāsmānmṛtyuragāt kvacit || 31 ||
[Analyze grammar]

ajarāścāmarāssarve bhavāma iti no matam |
samṛtyavaḥ kariṣyāmassarvānanyāṃstrilokake || 32 ||
[Analyze grammar]

lakṣmyā kiṃ tadvipulayā kiṃ kāryaṃ hi purottamaiḥ |
anyaiśca vipulairbhogaissthānaiśvaryeṇa vā punaḥ || 33 ||
[Analyze grammar]

yatraiva mṛtyunā grasto niyataṃ paṃcabhirdinaiḥ |
vyarthaṃ tasyākhilaṃ brahman niścitaṃ na itīva hi || 34 ||
[Analyze grammar]

sanatkumāra uvāca |
iti śrutvā vacasteṣāṃ daityānāṃ ca tapasvinām |
pratyuvāca śivaṃ smṛtvā svaprabhuṃ giriśaṃ vidhiḥ || 35 ||
[Analyze grammar]

brahmovāca |
nāsti sarvāmaratvaṃ ca nivartadhvamato'surāḥ |
anyaṃ varaṃ vṛṇīdhvaṃ vai yādṛśo vo hi rocate || 36 ||
[Analyze grammar]

jāto janiṣyate nūnaṃ jaṃtuḥ kopyasurāḥ kvacit |
ajaraścāmaro loke na bhaviṣyati bhūtale || 37 ||
[Analyze grammar]

ṛte tu khaṃḍaparaśoḥ kālakālāddharestathā |
tau dharmādharmaparamāvavyaktau vyaktarūpiṇau || 38 ||
[Analyze grammar]

saṃpīḍanāya jagato yadi sa kriyate tapaḥ |
saphalaṃ tadgataṃ vedyaṃ tasmātsuvihitaṃ tapaḥ || 39 ||
[Analyze grammar]

tadvicārya svayaṃ buddhyā na śakyaṃ yatsurāsuraiḥ |
durlabhaṃ vā sudussādhyaṃ mṛtyuṃ vaṃcayatānaghāḥ || 40 ||
[Analyze grammar]

tatkiṃcinmaraṇe hetuṃ vṛṇīdhvaṃ sattvamāśritāḥ |
yena mṛtyurnaiva vṛto rakṣatastatpṛthak pṛthak || 41 ||
[Analyze grammar]

sanatkumāra uvāca |
etadvidhivacaḥ śrutvā muhūrttaṃ dhyānamāsthitāḥ |
procuste ciṃtayitvātha sarvalokapitāmaham || 42 ||
[Analyze grammar]

daityā ūcuḥ |
bhagavannāsti no veśma parākramavatāmapi |
adhṛṣyāḥ śātravānāṃ tu yanna vatsyāmahe sukham || 43 ||
[Analyze grammar]

purāṇi trīṇi no dehi nirmāyātyadbhutāni hi |
sarvasaṃpatsamṛddhānya pradhṛṣyāṇi divaukasām || 44 ||
[Analyze grammar]

vayaṃ purāṇi trīṇyeva samāsthāya mahīmimām |
cariṣyāmo hi lokeśa tvatprasādājjagadguro || 45 ||
[Analyze grammar]

tārakākṣastataḥ prāha yadabhedyaṃ surairapi |
karoti viśvakarmā tanmama hemamayaṃ puram || 46 ||
[Analyze grammar]

yayāce kamalākṣastu rājataṃ sumahatpuram |
vidyunmālī ca saṃhṛṣṭo vajrāyasamayaṃ mahat || 47 ||
[Analyze grammar]

pureṣveteṣu bho brahmannekasthānasthiteṣu ca |
madhyāhnābhijite kāle śītāṃśau puṣpa saṃsthite || 48 ||
[Analyze grammar]

uparyuparyadṛṣṭeṣu vyomni līlābhrasaṃsthite |
varṣatsu kālamegheṣu puṣkarāvartanāmasu || 49 ||
[Analyze grammar]

tathā varṣasahasrāte sameṣyāmaḥ parasparam |
ekībhāvaṃ gamiṣyaṃti purāṇyetāni nānyathā || 50 ||
[Analyze grammar]

sarvadevamayo devassarveṣāṃ me kuhelayā |
asaṃbhave rathe tiṣṭhan sarvopaskaraṇānvite || 51 ||
[Analyze grammar]

asaṃbhāvyaikakāṃḍena bhinattu nagarāṇi naḥ |
nirvairaḥ kṛttivāsāstu yosmākamiti nityaśaḥ || 52 ||
[Analyze grammar]

vaṃdyaḥ pūjyobhivādyaśca sosmākaṃ nirdahetkatham |
iti cetasi saṃdhāya tādṛśo bhuvi durlabhaḥ || 53 ||
[Analyze grammar]

sanatkumāra uvāca |
etacchrutvā vacasteṣāṃ brahmā lokapitāmahaḥ |
evamastīti tān prāha sṛṣṭikartā smarañśivam || 54 ||
[Analyze grammar]

ājñāṃ dadau mayasyāpi kutra tvaṃ nagaratrayam |
kāṃcanaṃ rājataṃ caiva āyasaṃ ceti bho maya || 55 ||
[Analyze grammar]

ityādiśya mayaṃ brahmā pratyakṣaṃ prāviśaddivam |
teṣāṃ tārakaputrāṇāṃ paśyatāṃ nijadhāma hi || 56 ||
[Analyze grammar]

tato mayaśca tapasā cakre dhīraḥ purāṇyatha |
kāṃcanaṃ tārakākṣasya kamalākṣasya rājatam || 57 ||
[Analyze grammar]

vidyunmālyāyasaṃ caiva trividhaṃ durgamuttamam |
svarge vyomni ca bhūmau ca kramājjñeyāni tāni vai || 58 ||
[Analyze grammar]

datvā tebhyo surebhyaśca purāṇi trīṇi vai mayaḥ |
praviveśa svayaṃ tatra hitakāmaparāyaṇaḥ || 59 ||
[Analyze grammar]

evaṃ putratrayaṃ prāpya praviṣṭāstārakātmajāḥ |
bubhujussakalānbhogānmahābalaparākramāḥ || 60 ||
[Analyze grammar]

kalpadrumaiśca saṃkīrṇaṃ gajavājisamākulam |
nānāprāsādasaṃkīrṇaṃ maṇijālasamā vṛtam || 61 ||
[Analyze grammar]

sūryamaṇḍalasaṃkāśairvimānaissarvatomukhaiḥ |
padmarāgamayaiścaiva śobhitaṃ candrasannibhaiḥ || 62 ||
[Analyze grammar]

prāsādairgopurairdivyaiḥ kailāsaśikharopamaiḥ |
divyastrījanasaṃkīrṇairgaṃdharvaissiddhacāraṇaiḥ || 63 ||
[Analyze grammar]

rudrālayaiḥ pratigṛhamagnihotraiḥ pratiṣṭhitaiḥ |
dvijottamaiśśāstra jñaiśśivabhaktirataissadā || 64 ||
[Analyze grammar]

vāpīkūpataḍāgaiśca dīrghikābhissuśobhitam |
udyānavanavṛkṣaiśca svargacyuta guṇottamaiḥ || 65 ||
[Analyze grammar]

nadīnadasarinmukhyapuṣkaraiḥ śobhitaṃ sadā |
sarvakāmaphalādyaiścānekairvṛkṣairmanoharam || 66 ||
[Analyze grammar]

mattamātaṃgayūthaiśca turaṃgaiśca suśobhanaiḥ |
rathaiśca vividhākāraiśśibikābhiralaṃkṛtam || 67 ||
[Analyze grammar]

samayādiśikaiścaiva krīḍāsthānaiḥ pṛthakpṛthak |
vedādhyayanaśālābhirvividhābhiḥ pṛthakpṛthak || 68 ||
[Analyze grammar]

adṛṣṭaṃ manasā vācā pāpānvitanaraissadā |
mahātmabhiśśubhācāraiḥ puṇyavadbhiḥ pravīkṣyate || 69 ||
[Analyze grammar]

pativratābhiḥ sarvatra pāvitaṃ sthalamuttamam |
patisevanaśīlābhirvimukhābhiḥ kudharmataḥ || 70 ||
[Analyze grammar]

daityaśūrairmahābhāgaissadāraissasutairdvijaiḥ |
śrautasmārtārthatattvajñaissvadharmaniratairyutam || 71 ||
[Analyze grammar]

vyūḍhoraskairvṛṣaskaṃdhaissāmayuddhadharaissadā |
praśāṃtaiḥ kupitaiścaiva kubjairvāmanakaistathā || 72 ||
[Analyze grammar]

nīlotpaladalaprakhyairnīlakuṃcitamūrddhajaiḥ |
mayena rakṣitaissarvaiśśikṣitairyuddhalālasaiḥ || 73 ||
[Analyze grammar]

varasamararatairyutaṃ samaṃtādajaśivapūjanayā viśuddhavīryaiḥ |
ravimarutamahendrasaṃnikāśaissuramathanaissudṛḍhaissusevitaṃ yat || 74 ||
[Analyze grammar]

śāstravedapurāṇeṣu yeye dharmāḥ prakīrtitāḥ |
śivapriyāssadā devāste dharmāstatra sarvataḥ || 75 ||
[Analyze grammar]

evaṃ labdhavarāste tu daiteyāstārakātmajāḥ |
śaivaṃ mayamupāśritya nivasaṃti sma tatra ha || 76 ||
[Analyze grammar]

sarvaṃ trailokyamutsārya praviśya nagarāṇi te |
kurvaṃti sma mahadrājyaṃ śivamārgaratāssadā || 77 ||
[Analyze grammar]

tato mahān gataḥ kālo vasatāṃ puṇyakarmaṇām |
yathāsukhaṃ yathājoṣaṃ sadrājyaṃ kurvatāṃ mune || 78 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe tripuravadhopākhyāne tripuravarṇanaṃ nāma prathamo'dhyāyaḥ || 1 ||
[Analyze grammar]