Chapter 18

[English text for this chapter is available]

brahmovāca |
śrutvā tathā sa vṛttāṃtaṃ prāktanaṃ svaṃ viniṃdya ca |
kāṃciddiśaṃ samālokya niryayau dīkṣitāṃgajaḥ || 1 ||
[Analyze grammar]

kiyacciraṃ tato gatvā yajñadattātmajassa hi |
duṣṭo guṇanidhistasthau gatotsāho visarjitaḥ || 2 ||
[Analyze grammar]

ciṃtāmavāpa mahatīṃ kva yāmi karavāṇi kim |
nāhamabhyastavidyo'smi na caivātidhano'smyaham || 3 ||
[Analyze grammar]

deśāṃtare yasya dhanaṃ sa sadyassukhamedhate |
bhayamasti dhane caurātsa vighnassarvatobhavaḥ || 4 ||
[Analyze grammar]

yājakasya kule janma kathaṃ me vyasanaṃ mahat |
aho balīyānhi vidhirbhāvikarmānusaṃdhayet || 5 ||
[Analyze grammar]

bhikṣitunnādhigacchāmi na me paricitiḥ kvacit |
na ca pārśve dhanaṃ kiñcitkimatra śaraṇaṃ bhavet || 6 ||
[Analyze grammar]

sadānabhyudite bhānau prasūrme miṣṭabhojanam |
dadyādadyātra kaṃ yāce na ceha jananī mama || 7 ||
[Analyze grammar]

brahmovāca |
iti ciṃtayatastasya bahuśastatra nārada |
ati dīnaṃ tarormūle bhānurastācalaṃ gataḥ || 8 ||
[Analyze grammar]

etasminneva samaye kaścinmāheśvaro naraḥ |
sahopahārānādāya nagarādbahirabhyagāt || 9 ||
[Analyze grammar]

nānāvidhānmahādivyānsvajanaiḥ parivāritaḥ |
samabhyarcitumīśānaṃ śivarātrāvupoṣitaḥ || 10 ||
[Analyze grammar]

śivālayaṃ praviśyātha sa bhaktaśśivasaktadhīḥ |
yathocitaṃ sucittena pūjayāmāsa śaṃkaram || 11 ||
[Analyze grammar]

pakvānnagaṃdhamāghrāya yajñadattātmajo dvijaḥ |
pitṛtyakto mātṛhīnaḥ kṣudhitaḥ sa tamanvagāt || 12 ||
[Analyze grammar]

idamannaṃ mayā grāhyaṃ śivāyopakṛtaṃ niśi |
supte śaivajane daivātsarvasminvividhaṃ mahat || 13 ||
[Analyze grammar]

ityāśāmavalambyātha dvāri śaṃbhorupāviśat |
dadarśa ca mahāpūjāṃ tena bhaktena nirmitām || 14 ||
[Analyze grammar]

vidhāya nṛtyagītādi bhaktāssuptāḥ kṣaṇe yadā |
naivedyaṃ sa tadādātuṃ bhargāgāraṃ viveśa ha || 15 ||
[Analyze grammar]

dīpaṃ maṃdaprabhaṃ dṛṣṭvā pakvānnavīkṣaṇāya saḥ |
nijacailāṃjalādvartiṃ kṛtvā dīpaṃ prakāśya ca || 16 ||
[Analyze grammar]

yajñadattātmajasso'tha śivanaivedyamādarāt |
jagrāha sahasā prītyā pakvānna vahuśastataḥ || 17 ||
[Analyze grammar]

tataḥ pakvānnamādāya tvaritaṃ gacchato bahiḥ |
tasya pādatalāghātātprasuptaḥ kopyabudhyata || 18 ||
[Analyze grammar]

ko'yaṃ ko'yaṃ tvarāpanno gṛhyatāṃ gṛhyatā masau |
iti cukrośa sa jano girā bhayamahoccayā || 19 ||
[Analyze grammar]

yāvadbhayātsamāgatya tāvatsa purarakṣakaiḥ |
palāyamāno nihataḥ kṣaṇādaṃdhatvamāgataḥ || 20 ||
[Analyze grammar]

abhakṣayacca naivedyaṃ yajñadattātmajo mune |
śivānugrahato nūnaṃ bhāvipuṇyabalānna saḥ || 21 ||
[Analyze grammar]

atha baddhassamāgatya pāśamudgarapāṇibhiḥ |
ninīṣubhiḥ saṃyamanīṃ yāmyaissa vikaṭairbhaṭaiḥ || 22 ||
[Analyze grammar]

tāvatpāriṣadāḥ prāptāḥ kiṃki ṇījālamālinaḥ |
divyaṃ vimānamādāya taṃ netuṃ śūlapāṇayaḥ || 23 ||
[Analyze grammar]

śivagaṇā ūcuḥ |
muṃcatainaṃ dvijaṃ yāmyā gaṇāḥ parama dhārmikam |
daṇḍayogyo na vipro'sau dagdhasarvāghasaṃcayaḥ || 24 ||
[Analyze grammar]

ityākarṇya vacaste hi yamarājagaṇāstataḥ |
mahādevagaṇānāhurbabhūvuścakitā bhṛśam || 25 ||
[Analyze grammar]

śaṃbhorgaṇānathālokya bhītaistairyamakiṃkaraiḥ |
avādi praṇatairitthaṃ durvṛtto'yaṃ gaṇā dvijaḥ || 26 ||
[Analyze grammar]

yamagaṇā ūcuḥ |
kulācāraṃ pratīryyaiṣa pitrorvākyaparāṅmukhaḥ |
satyaśaucaparibhraṣṭassaṃdhyāsnānavivarjitaḥ || 27 ||
[Analyze grammar]

āstāṃ dūresya karmānyacchivanirmālyalaṃghakaḥ |
pratyakṣato'tra vīkṣadhvamaspṛśyo'yaṃ bhavādṛśām || 28 ||
[Analyze grammar]

śivanirmālyabhoktāraśśivanirmmālyalaṃghakāḥ |
śivanirmālyadātāraḥ sparśasteṣāṃ hyapuṇyakṛt || 29 ||
[Analyze grammar]

viṣamālokya vā peyaṃ śreyo vā sparśanaṃ param |
sevitavyaṃ śivasvaṃ na prāṇaḥ kaṇṭhagatairapi || 30 ||
[Analyze grammar]

yūyaṃ pramāṇaṃ dharmeṣu yathā na ca tathā vayam |
asti ceddharmaleśosya gaṇāstaṃ śṛṇumo vayam || 31 ||
[Analyze grammar]

itthaṃ tadvākyamākarṇya yāmānāṃ śivakiṃkarāḥ |
smṛtvā śivapadāmbhojaṃ procuḥ pāriṣadāstu tān || 32 ||
[Analyze grammar]

śivakiṃkarā ūcuḥ |
kiṃkarāśśivadharmā ye sūkṣmāste tu bhavādṛśaiḥ |
sthūlalakṣyaiḥ kathaṃ lakṣyā lakṣyā ye sūkṣmadṛṣṭibhiḥ || 33 ||
[Analyze grammar]

anenānenasā karma yatkṛtaṃ śṛṇuteha tat |
yajñadattātmajenātha sāvadhānatayā gaṇāḥ || 34 ||
[Analyze grammar]

pataṃtī liṃgaśirasi dīpacchāyā nivāritā |
svacailāṃcalato'nena dattvā dīpadaśāṃ niśi || 39 ||
[Analyze grammar]

aparopi paro dharmo jātastatrāsya kiṃkaraḥ |
śṛṇvataḥ śivanāmāni prasaṃgādapi gṛhṇatām || 36 ||
[Analyze grammar]

bhaktena vidhinā pūjā kriyamāṇā nirīkṣitā |
upoṣitena bhūtāyāmanenāsthitacetasā || 37 ||
[Analyze grammar]

śivalokamayaṃ hyadya gaṃtāsmābhissahaiva tu |
kaṃcitkālaṃ mahābhogānkariṣyati śivānugaḥ || 38 ||
[Analyze grammar]

kaliṃgarājo bhavitā tato nirdhūtakalmaṣaḥ |
eṣa dvijavaro nūnaṃ śivapriyataro yataḥ || 39 ||
[Analyze grammar]

anyatkiṃcinna vaktavyaṃ yūyaṃ yāta yathāgatam |
yamadūtāssvalokaṃ tu suprasannena cetasā || 40 ||
[Analyze grammar]

|| brahmovāca |
ityākarṇya vacasteṣāṃ yamadūtā munīśvara |
yathāgataṃ yayussarve yamalokaṃ parāṅmukhāḥ || 41 ||
[Analyze grammar]

sarvaṃ nivedayāmāsuśśamanāya gaṇā mune |
tadvṛttamāditaḥ proktaṃ śaṃbhudūtaiśca dharmataḥ || 42 ||
[Analyze grammar]

|| dharmarāja uvāca |
sarve śṛṇuta madvākyaṃ sāvadhānatayā gaṇāḥ |
tadeva prītyā kuruta macchāsanapurassaram || 43 ||
[Analyze grammar]

ye tripuṇḍradharā loke vibhūtyā sitayā gaṇāḥ |
te sarve parihartavyā nānetavyāḥ kadācana || 44 ||
[Analyze grammar]

uddhūlanakarā ye hi vibhūtyā sitayā gaṇāḥ |
te sarve parihartavyā nānetavyāḥ kadācana || 45 ||
[Analyze grammar]

śivaveṣatayā loke yena kenāpi hetunā |
te sarve parihartavyā nānetavyāḥ kadācana || 46 ||
[Analyze grammar]

ye rudrākṣadharā loke jaṭādhāriṇa eva ye |
te save parihartavyā nānetavyāḥ kadācana || 47 ||
[Analyze grammar]

upajīvanahetośca śivaveṣadharā hi ye |
te sarve parihartavyā nānetavyāḥ kadācana || 48 ||
[Analyze grammar]

daṃbhenāpi cchalenāpi śivaveṣadharā hi ye |
te sarve parihartavyā nānetavyāḥ kadācana || 49 ||
[Analyze grammar]

evamājñāpayāmāsa sa yamo nija kiṃkarān |
tatheti matvā te sarve tūṣṇīmāsañchucismitāḥ || 50 ||
[Analyze grammar]

|| brahmovāca |
pārṣadairyamadūtebhyo mocitastviti sa dvijaḥ |
śivalokaṃ jagāmāśu tairgaṇaiśśucimānasaḥ || 51 ||
[Analyze grammar]

tatra bhuktvākhilānbhogānsaṃsevya ca śivāśivau |
ariṃdamasya tanayaḥ kaliṃgādhipaterabhūt || 52 ||
[Analyze grammar]

dama ityabhidhāno'bhūcchivasevāparāyaṇaḥ |
bālo'pi śiśubhiḥ sākaṃ śivabhaktiṃ cakāra saḥ || 53 ||
[Analyze grammar]

kramādrājyamavāpātha pitaryuparate yuvā |
prītyā pravartayāmāsa śivadharmāṃśca sarvaśaḥ || 54 ||
[Analyze grammar]

nānyaṃ dharmaṃ sa jānāti durdamo bhūpatirdamaḥ |
śivālayeṣu sarveṣu dīpadānādṛte dvijaḥ || 55 ||
[Analyze grammar]

grāmādhīśānsamāhūya sarvānsa viṣayasthitān |
itthamājñāpayāmāsa dīpā deyāśśivālaye || 56 ||
[Analyze grammar]

anyathā satyamevedaṃ sa me daṇḍyo bhaviṣyati |
dīpa dānācchivastuṣṭo bhavatīti śrutīritam || 57 ||
[Analyze grammar]

yasyayasyābhito grāmaṃ yāvataśca śivālayāḥ |
tatratatra sadā dīpo dyotanīyo'vicāritam || 58 ||
[Analyze grammar]

mamājñābhaṃgadoṣeṇa śiraśchetsyāmyasaṃśayam |
iti tadbhayato dīpā dīptāḥ pratiśivālayam || 59 ||
[Analyze grammar]

anenaiva sa dharmeṇa yāvajjīvaṃ damo nṛpaḥ |
dharmarddhiṃ mahatīṃ prāpya kāladharmavaśaṃ gataḥ || 60 ||
[Analyze grammar]

sa dīpavāsanāyogādbahūndīpānpradīpya vai |
alakāyāḥ patirabhūdratnadīpaśikhāśrayaḥ || 61 ||
[Analyze grammar]

evaṃ phalati kālena śive'lpamapi yatkṛtam |
iti jñātvā śive kāryaṃ bhajanaṃ susukhārthibhiḥ || 62 ||
[Analyze grammar]

kva sa dīkṣitadāyādaḥ sarvadharmāratiḥ sadā |
śivālaye daivayogādyātaścorayituṃ vasu |
svārthadīpadaśodyotaliṃgamaulitamoharaḥ || 63 ||
[Analyze grammar]

kaliṃgaviṣaye rājyaṃ prāpto dharmaratiṃ sadā |
śivālaye samuddīpya dīpānprāgvāsanodayāt || 64 ||
[Analyze grammar]

kaiṣā dikpālapadavī munīśvara vilokaya |
manuṣyadharmiṇānena sāṃprataṃ yeha bhujyate || 65 ||
[Analyze grammar]

iti proktaṃ guṇanidheryajñadattātmajasya hi |
caritaṃ śivasaṃtoṣaṃ śṛṇvatāṃ sarvakāmadam || 66 ||
[Analyze grammar]

sarvadevaśivenāsau sakhitvaṃ ca yatheyivān |
tadapyekamanā bhūtvā śṛṇu tāta bravīmi te || 67 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe sṛṣṭyu pākhyāne kailāśagamanopākhyāne guṇanidhisadgativarṇano nāmāṣṭādaśo'dhyāyaḥ || 18 ||
[Analyze grammar]