Chapter 238

[English text for this chapter is available]

rudra uvāca |
bhrātaraṃ nihataṃ jñātvā hiraṇyakaśipustataḥ |
tapastepe mahādaityo meroḥ pārśve ca māṃ prati || 1 ||
[Analyze grammar]

divyavarṣasahasrāṇi vāyubhakṣo mahābalaḥ |
japanpaṃcākṣaraṃ maṃtraṃ pūjayāmāsa māṃ śubhe || 2 ||
[Analyze grammar]

tataḥ prahṛṣṭamanasā tamavocaṃ mahāsuram |
varaṃ vṛṇīṣva daiteya yatte manasi varttate |
tataḥ provāca daiteyo māṃ prasannaṃ śubhānane || 3 ||
[Analyze grammar]

hiraṇyakaśipuruvāca |
devāsuramanuṣyāṇāṃ gaṃdharvoragarakṣasām |
paśupakṣimṛgāṇāṃ ca siddhānāṃ vai mahātmanām || 4 ||
[Analyze grammar]

yakṣavidyādharāṇāṃ ca kinnarāṇāṃ tathaiva ca |
sarveṣāmeva rogāṇāmāyudhānāṃ tathaiva ca |
sarveṣāmṛṣimukhyānāmavadhyatvaṃ prayaccha me || 5 ||
[Analyze grammar]

rudra uvāca |
evamastviti tadrakṣastvabruvaṃ priyadarśane |
matto mahadvaraṃ prāpya sa daiteyo mahābalaḥ || 6 ||
[Analyze grammar]

jitvā maheṃdraṃ devāṃśca sa trailokyeśvaro'bhavat |
sarvāṃśca yajñabhāgāṃśca svayamevāgrahīdbalāt || 7 ||
[Analyze grammar]

trātāraṃ nādhigacchaṃti devatāstena nirjitāḥ |
tasyaiva kiṃkarāḥ sarve gaṃdharvā devadānavāḥ || 8 ||
[Analyze grammar]

yakṣāścanāgāḥ siddhāśca sādhyāśca vaśavartinaḥ |
uttānapādasya sutāṃ kalyāṇīṃ nāma kanyakām || 9 ||
[Analyze grammar]

upayeme vidhānena daityarājo mahābalaḥ |
tasyāṃ jāto mahātejāḥ prahlādo daityarāṭśubhe || 10 ||
[Analyze grammar]

anurakto hṛṣīkeśe garbhavāse'pi yo harau |
sarvāvasthāsu kṛtyeṣu manovākkāyakarmmabhiḥ || 11 ||
[Analyze grammar]

nānyaṃ jānāti deveśātprasannātmā sanātanāt |
sa kāle'pi vinītaḥ sangurugehe vasatsudhīḥ || 12 ||
[Analyze grammar]

adhītya sarvavedāṃśca śāstrāṇi vividhāni ca |
kasyacittvatha kālasya guruṇā saha daityajaḥ || 13 ||
[Analyze grammar]

pituḥ samīpamāgatya vavaṃde vinayānvitaḥ |
taṃ pariṣvajya bāhubhyāṃ tanayaṃ śubhalakṣaṇam |
aṃke nidhāya daityeṃdraḥ provācedaṃ suvismitam || 14 ||
[Analyze grammar]

hiraṇyakaśipuruvāca |
prahlāda cirakālaṃ tvaṃ gurugehe niveśitaḥ |
yaduktā guruṇā vidyā tanmamācakṣva suvrata || 15 ||
[Analyze grammar]

rudra uvāca |
iti pṛṣṭaḥ svapitrā vai prahlādo janmavaiṣṇavaḥ |
prāha daityeśvaraṃ prītyā vacanaṃ kaluṣāpaham || 16 ||
[Analyze grammar]

prahlāda uvāca |
yo vai sarvopaniṣadāmarthaḥ puruṣa īśvaraḥ |
taṃ vai sarvagataṃ viṣṇuṃ namaskṛtvā bravīmi te || 17 ||
[Analyze grammar]

rudra uvāca |
iti viṣṇustutiṃ śrutvā daityarāḍ vismayānvitaḥ |
uvāca taṃ guruṃ roṣātkiṃ tvayoktaṃ mamātmaje || 18 ||
[Analyze grammar]

mamātmajasya durbuddhe harisaṃstavamīdṛśam |
kimarthamuktavānjāḍyamakāryyaṃ brāhmaṇocitam || 19 ||
[Analyze grammar]

aśrāvyaṃ madamitrasya stavametaṃ mamāgrataḥ |
bālenāpikṛtaṃtvetattvatprasādāddivajādhama || 20 ||
[Analyze grammar]

ityuktvā parito vīkṣya daityarāṭkrodhamūrcchitaḥ |
uvāca daityamekaṃ tu baṃdhayainaṃ dvijādhamam || 21 ||
[Analyze grammar]

itirājavacaḥ śrutvā sa babaṃdha bhṛgoḥ sutam |
badhyamānaṃ guruṃ dṛṣṭvā prahlādo brāhmaṇapriyaḥ |
uvāca pitaraṃ tāta idaṃ me noktavānguruḥ || 22 ||
[Analyze grammar]

kṛpayā devadevasya śikṣitosmi hareḥ prabho |
nānyo gururme bhavati sa eva prerako hariḥ || 23 ||
[Analyze grammar]

śrotā maṃtā tathā vaktā draṣṭā sarvaga īśvaraḥ |
harirevākṣayaḥ karttā niyaṃtā sarvadehinām |
tasmādanāgaso vipro moktavyo'yaṃ guruḥ prabho || 24 ||
[Analyze grammar]

rudra uvāca |
iti putravacaḥ śrutvā hiraṇyakaśipustataḥ |
taṃ brāhmaṇaṃ mocayitvā svasutaṃ prāha vismayāt || 25 ||
[Analyze grammar]

kiṃ vatsa tvaṃ bhramasyevaṃ mithyāvākyairdvijanmanaḥ |
ko viṣṇuḥ kiṃ tu tadrūpaṃ kutrāsau saṃsthito hariḥ || 26 ||
[Analyze grammar]

ahameveśvaro loke trailokyādhipatiryataḥ |
māmevārccaya goviṃdaṃ tyaja śatruṃ durāsadam || 27 ||
[Analyze grammar]

athavā śaṃkaraṃ devaṃ rudraṃ lokaguruṃ prabhum |
arccayasvāsurādhyakṣaṃ sarvaiśvaryyapradaṃ śivam || 28 ||
[Analyze grammar]

tripuṃḍradhāraṇaṃ kṛtvā bhasmanā daityapūjitam |
pūjayitvā mahādevaṃ pāśupatyoktamārgataḥ || 29 ||
[Analyze grammar]

rudra uvāca |
iti daityapatervākyaṃ śrutvā daityapurohitāḥ || 30 ||
[Analyze grammar]

purohitā ūcuḥ |
evameva mahābhāga kuruṣva vacanaṃ pituḥ |
tyaja śatruṃ kaiṭabhāriṃ pūjayasva trilocanam || 31 ||
[Analyze grammar]

rudrātparataro devo nāsti sarvaprado nṝṇām |
pitā tavāpi tasyaiva prasādādīśvaro'bhavat || 32 ||
[Analyze grammar]

rudra uvāca |
iti teṣāṃ vacaḥ śrutvā prahlādo janmavaiṣṇavaṃ || 33 ||
[Analyze grammar]

prahlāda uvāca |
aho bhagavataḥ śreṣṭhā yanmāyā mohitaṃ jagat |
aho vedāṃtaviduṣaḥ sarvalokeṣu pūjitāḥ || 34 ||
[Analyze grammar]

brāhmaṇā api cāpalyādvadaṃtyevaṃ madānvitāḥ |
nārāyaṇaḥ paraṃ brahma tatvaṃ nārāyaṇaḥ param || 35 ||
[Analyze grammar]

nārāyaṇaḥ paro dhyātā dhyānaṃ nārayaṇaḥ param |
gatirviśvasya jagataḥ śāśvataṃ śivamacyutaḥ || 36 ||
[Analyze grammar]

dhātā vidhātā jagato vāsudevaḥ sanātanaḥ |
viśvamevedaṃ puruṣastadviśvamupajīvati || 37 ||
[Analyze grammar]

hiraṇmayavapurnityaḥpuṃḍarīkanibhekṣaṇaḥ |
śrībhūlīlāpatiḥ saumyonirmmalaḥ śubhavigrahaḥ || 38 ||
[Analyze grammar]

tenaiva sṛṣṭau brahmeśau sarge devottamau vibhū |
tasyaivājñāṃ puraskṛtya varttete brahmaśaṃkarau || 39 ||
[Analyze grammar]

bhīṣāsmādvāti pavano bhīṣodeti divākaraḥ |
bhīṣāsmādagniścaṃdro'tha mṛtyurdhāvati paṃcamaḥ || 40 ||
[Analyze grammar]

āsīdeko harirdivyo devo nārāyaṇaḥ paraḥ |
brahmā neṃdro na ceśāno na ca caṃdra divākarau || 41 ||
[Analyze grammar]

na vā dyāvāpṛthivyau ca nakṣatrāṇi divaukasaḥ |
tasya viṣṇoḥ paraṃ dhāma sadā paśyaṃti sūrayaḥ || 42 ||
[Analyze grammar]

evaṃ sarvopaniṣadāmarthaṃ hitvā dvijottamāḥ |
rāgāllobhādbhayādvāpi kiṃ bravītha mamāgrataḥ || 43 ||
[Analyze grammar]

taṃ sarvarakṣakaṃ devaṃ tyaktvā sarveśvaraṃ harim |
kathaṃ pāṣaṃḍamāśritya pūjayāmi ca śaṃkaram || 44 ||
[Analyze grammar]

lakṣmīpatiṃ devadevamanaṃtaṃ puruṣottamam |
iṃdīvaradalaśyāmaṃ padmapatrāyatekṣaṇam || 45 ||
[Analyze grammar]

śrīvatsalakṣitoraskaṃ sarvvābharaṇabhūṣitam |
sadā kumāraṃ sarvveśaṃ nityānandasukhapradam || 46 ||
[Analyze grammar]

kṛṣṇaṃ dadhyurmahātmāno yoginaḥ sanakādayaḥ |
yamarcayaṃti brahmeśa śakrādyā devatāgaṇāḥ || 47 ||
[Analyze grammar]

yasya patnyāḥ kaṭākṣārddhadṛṣṭyā dṛṣṭā divaukasaḥ |
brahmeṃdra rudra varuṇa yama soma dhanādhipāḥ || 48 ||
[Analyze grammar]

yannāmasmaraṇādeva pāpināmapi satvaram |
muktirbhavati jaṃtūnāṃ brahmādīnāṃ sudurlabhā || 49 ||
[Analyze grammar]

sa evaṃ rakṣakaḥ śrīśo devānāmapi sarvadā |
tameva pūjayiṣyāmi lakṣmyā saṃyutamacyutam || 50 ||
[Analyze grammar]

prāpsyāmi susukhenaiva tadviṣṇoḥ paramaṃ padam |
rudra uvāca |
iti tasya vacaḥ śrutvā hiraṇyakaśipustataḥ || 51 ||
[Analyze grammar]

krodhena mahatāviṣṭo jajvālāgnirivāparaḥ |
parito vīkṣya daiteyānityāha krodhamūrchitaḥ || 52 ||
[Analyze grammar]

hiraṇyakaśipuruvāca |
bhīṣaṇaiḥ śastrasaṃghātaiḥ prahlādaṃ pāpakāriṇam |
mamājñayā ghātayadhvaṃ śatrupūjanatatparam || 53 ||
[Analyze grammar]

rakṣitā harireveti rakṣate tena vātsalāt |
adyaiva saphalaṃ tasya paśyeyaṃ harirakṣaṇam || 54 ||
[Analyze grammar]

rudra uvāca |
tadodyatāstrā daiteyā haṃtuṃ daityeśvarātmajam |
parivārya mahātmānaṃ tasthurdaityeśvarājñayā || 55 ||
[Analyze grammar]

prahlādo'pi tathā viṣṇuṃ dhyātvā hṛdayapaṃkaje |
japannaṣṭākṣaraṃ maṃtraṃ tasthau giririvāparaḥ || 56 ||
[Analyze grammar]

taṃ jaghnuḥ parito vīrāḥ śūlatomaraśaktibhiḥ |
prahlādasya vapustatra harisaṃsmaraṇācchubhe || 57 ||
[Analyze grammar]

viṣṇoḥ prabhāvādduddharṣādvajrabhūtamabhūdbhṛśam |
tataḥ saṃprāpya tadgātraṃ mahāstrāṇi suradviṣām || 58 ||
[Analyze grammar]

nīlotpaladalānīva petuścichannāḥ kṣitau śubhe |
alpamapyasya tadgātraṃ bhettuṃ daityā na ca kṣamāḥ || 59 ||
[Analyze grammar]

vismitāvāṅmukhāstasthurdaitya rājāṃtike bhaṭāḥ |
tādṛgvidhaṃ mahātmānaṃ dṛṣṭvā putraṃ mahābalam || 60 ||
[Analyze grammar]

vismayaṃ paramaṃ gatvā daityarāṭkrodhamūrchitaḥ |
ādideśa tataḥ sarvāndaṃdaśūkānmahāviṣān || 61 ||
[Analyze grammar]

vāsukiprabhṛtīnbhīmānkhādayadhvamiti krudhā |
ādiṣṭāstena rājñātha te nāgāḥ sumahābalāḥ || 62 ||
[Analyze grammar]

jvalitāsyā mahābhīmāstaṃ ca khādurmahābalam |
garuḍadhvajabhaktaṃ taṃ vidaśya garalāyudhāḥ || 63 ||
[Analyze grammar]

nirviṣāścchinnadaśanā babhūvuranilāśanāḥ |
vainateyasahasreṇa chinnagātrāḥ suvihvalāḥ || 64 ||
[Analyze grammar]

pradudruvurdiśaḥ sarvāvamaṃto rudhiraṃ bhṛśam |
tādṛgvidhānmahāsarpāndṛṣṭvā daityapatistadā || 65 ||
[Analyze grammar]

ādideśa tataḥ kruddho diggajānsumadānvitān |
nirdiṣṭāstena rājñātha diggajāśca madoddhatāḥ || 66 ||
[Analyze grammar]

parivāryātha taṃ jaghnurdaṃtaiḥ pṛthutarairbhṛśam |
atha diggajadaṃtāśca chinnamūlāḥ patanbhuvi || 67 ||
[Analyze grammar]

daṃtairvinākṛtā nāgā bhayārtā vai pradudruvuḥ |
tāndṛṣṭvātha mahānāgāndaityeṃdraḥ kupito balī || 68 ||
[Analyze grammar]

prajvālya ca mahāvahniṃ cikṣepa sutamātmanaḥ |
jalaśāyipriyaṃ dṛṣṭvā prahlādaṃ havyavāhanaḥ || 69 ||
[Analyze grammar]

na dadāha ca taṃ dhīraṃ suśītaḥ samabhūcchikhī |
adahyamānaṃ taṃ bālaṃ dṛṣṭvā rājā suvismitaḥ || 70 ||
[Analyze grammar]

prādāttasmai viṣaṃ ghoraṃ sarvabhūtahitaṃ tadā |
tasya viṣṇoḥ prabhāvācca viṣamasyāmṛtaṃ bhavet || 71 ||
[Analyze grammar]

arpaṇāttasya devasya viṣaṃ cāmṛtamaśnute |
evamādyairvadhopāyairghorarūpaiḥ sudāruṇaiḥ || 72 ||
[Analyze grammar]

mohayitvātmajaṃ rājā tasyāvadhyatvamīkṣya ca |
tataḥ sāmnā sutaṃ prāha daityarāḍvismayākulaḥ || 73 ||
[Analyze grammar]

hiraṇyakaśipuruvāca |
tvayā viṣṇoḥ paratvaṃ ca samyaguktaṃ mamāgrataḥ |
vyāpitvātsarvabhūtānāṃ viṣṇurityabhidhīyate || 74 ||
[Analyze grammar]

yo'sau sarvagato devaḥ sa eva parameśvaraḥ |
tasya sarvagatatvaṃ vai pratyakṣaṃ darśayasva me || 75 ||
[Analyze grammar]

aiśvaryaśaktitejāṃsi jñānavīryabalāni ca |
parasya tasya paramaṃ rūpaṃ guṇavibhūtayaḥ || 76 ||
[Analyze grammar]

samyagdṛṣṭvā prayatnena viṣṇuṃ manye divaukasām |
mama pratibalo loke nāsti deveṣu kaścana || 77 ||
[Analyze grammar]

īśānavaradānena sarvabhūteṣvavadhyatām |
prāptavānsarvabhūtānāṃnadurjayatvaṃ ca mānada |
īśvaratvaṃ labhedviṣṇurmāṃ jitvā balavīryataḥ || 78 ||
[Analyze grammar]

rudra uvāca |
iti tasya vacaḥ śrutvā prahlādaḥ prāha vismitaḥ |
hareḥ prabhāvaṃ dainyasya kathayāmāsa suvrataḥ || 79 ||
[Analyze grammar]

prahlāda uvāca |
yo'sau nārāyaṇaḥ śrīmānparamātmā sanātanaḥ |
vasanātsarvabhūteṣu vāsudevaḥ sa ucyate || 80 ||
[Analyze grammar]

sarvasyāpi jagaddhātā viṣṇurityabhidhīyate |
na kiṃcidasmādanyaṃ tu jagatsthāvara jaṃgamam || 81 ||
[Analyze grammar]

sarvatra cidacidvastu rūpaṃ tasyaiva nānyathā |
tripādvyāptiḥ paraṃ vyomni pādavyāpti kalādbhutā || 82 ||
[Analyze grammar]

yo'sau cakragadāpāṇiḥ pītavāsā janārdanaḥ |
yogibhirdṛśyate bhaktyā nābhaktyā dṛśyate kvacit || 83 ||
[Analyze grammar]

draṣṭuṃ na śakyo roṣācca matsarādvā janārdanaḥ |
devatiryaṅmanuṣyeṣu sthāvareṣvapi jaṃtuṣu |
vyāpya tiṣṭhati sarvveṣu kṣudreṣvapi mahatsu ca || 84 ||
[Analyze grammar]

rudra uvāca |
iti prahlādavacanaṃ śrutvā daityavarastadā |
uvāca roṣatāmrākṣo bhartsayaṃśca sutaṃ muhuḥ || 85 ||
[Analyze grammar]

hiraṇyakaśipuruvāca |
asau sarvagato viṣṇurapi cetparamaḥ pumān |
pratyayaṃ darśayasvādya bahubhiḥ kiṃ ca lāpitaiḥ || 86 ||
[Analyze grammar]

mahādeva uvāca |
ityuktvā sahasā daityaḥ prāsādastaṃbhamātmanaḥ |
tāḍayāmāsa hastena prahlādamidamabravīt || 87 ||
[Analyze grammar]

hiraṇyakaśipuruvāca |
asmindarśaya taṃ viṣṇuṃ yadi sarvagato bhavet |
anyathā tvāṃ vadhiṣyāmi mithyāvākyapralāpinam || 88 ||
[Analyze grammar]

rudra uvāca |
ityuktvā sahasā khaṅgamākṛṣya ditijeśvaraḥ |
prahlādorasi cikṣepa haṃtuṃ khaṅgena taṃ ruṣā || 89 ||
[Analyze grammar]

tasminkṣaṇe mahāśabdaḥ staṃbhe saṃśrūyate bhṛśam |
saṃvartāśanisaṃrāvaiḥ khamiva sphuṭitāṃtaram || 90 ||
[Analyze grammar]

tena śabdena mahatā daityaśrotravighātinā |
sarve nipātitā bhūmau chinnamūlā iva drumāḥ || 91 ||
[Analyze grammar]

bibhyaṃtaḥ saṃplutaṃ daityā menire vai jagattrayam |
tataḥ staṃbhe mahātejā niṣkrāṃto vai mahāhariḥ || 92 ||
[Analyze grammar]

cakāra sa mahāghoraṃ jagatkṣayanibhaṃ svanam |
tena nādena mahatā tārakāḥ patitā bhuvi || 93 ||
[Analyze grammar]

nṛsiṃhavapurāsthāya tatraivāvirabhūddhariḥ |
anekakoṭisūryyāgni tejasā sa samāvṛtaḥ || 94 ||
[Analyze grammar]

mukhe paṃcānanaprakhyaḥ śarīre mānuṣākṛtiḥ |
daṃṣṭrākarālavadanaḥ sphurajjihvāmbaroddhataḥ || 95 ||
[Analyze grammar]

jvālāvalitakeśāṃtastaptālātekṣaṇo vibhuḥ |
sahasrabāhubhirdīrghaiḥ sarvāyudhasamanvitaiḥ || 96 ||
[Analyze grammar]

vṛto merurivābhāti bahuśākhānagānvitaḥ |
divyamālyāṃbaradharo divyābharaṇabhūṣitaḥ || 97 ||
[Analyze grammar]

tasthau nṛkesarīrūpaḥ saṃharttuṃ sarvadānavān |
taṃ dṛṣṭvā ghorasaṃkāśaṃ narasiṃhaṃ mahābalam || 98 ||
[Analyze grammar]

dagdhākṣipakṣmo daityeṃdro vihvalāṃgaḥ papāta ha |
prahlādo'tha tadā dṛṣṭvā nārasiṃhopamaṃ harim || 99 ||
[Analyze grammar]

jayaśabdena deveśaṃ namaścakre janārdanam |
dadarśa tasya gātreṣu nṛsiṃhasya mahātmanaḥ || 100 ||
[Analyze grammar]

lokānsamudrā nsadvīpānsuragaṃdharvamānuṣān |
ajāṃḍānāṃ sahasraṃ tu saṭāgre tasya dṛśyate || 101 ||
[Analyze grammar]

dṛśyaṃte tasya netreṣu somasūryyādayastathā |
karṇayoraśvinau devau diśaśca vidiśastathā || 102 ||
[Analyze grammar]

lalāṭe brahmarudrau ca nabho vāyuśca nāsike |
iṃdrāgnī tasya vaktrāṃtejihvāyāṃ tu sarasvatī || 103 ||
[Analyze grammar]

daṃṣṭrāsu siṃhaśārdūlāḥ śarabhāśca mahoragāḥ |
kaṃṭhe ca dṛśyate meruḥ skaṃdheṣvapi mahādrayaḥ || 104 ||
[Analyze grammar]

devatiryyaṅmanuṣyāśca bāhuṣvapi mahātmanaḥ |
nābhau cāsyāṃtarikṣaṃ ca pādayoḥ pṛthivītathā || 105 ||
[Analyze grammar]

romasvoṣadhayaḥ sarvāḥ pādapā nakhapaṃktiṣu |
niḥśvāseṣu ca vedāśca sāṅgopāṅgasamanvitāḥ || 106 ||
[Analyze grammar]

ādityā vasavo rudrā viśvedevā marudgaṇāḥ |
sarvāṅgeṣu pradṛśyaṃte gaṃdharvāpsarasaśca ye || 107 ||
[Analyze grammar]

itthaṃ vibhūtayastasya dṛśyaṃte paramātmanaḥ |
śrīvatsakaustubhoraskaṃ vanamālāvibhūṣitam || 108 ||
[Analyze grammar]

śaṃkhacakragadākhaṅga śārṅgādyairhetibhiryutam |
sarvopaniṣadāmarthaṃ dṛṣṭvā daityeśvarātmajaḥ || 109 ||
[Analyze grammar]

harṣāśrujalasiktāṃgaḥ praṇanāma muhurmuhuḥ |
daityeṃdrastu hariṃ dṛṣṭvā krodhānmṛtyuvaśe sthitaḥ || 110 ||
[Analyze grammar]

yoddhuṃ khaṅgaṃ samudyamya nṛsiṃhaṃ tamabhidravat |
atha daityagaṇāḥ sarvve labdhasaṃjñā mahābalāḥ || 111 ||
[Analyze grammar]

svānyāyudhāni cādāya hariṃ jaghnustvarānvitāḥ |
palālakāṇḍāni yathā vahnau kṣiptānyanekaśaḥ || 112 ||
[Analyze grammar]

tathaiva bhasmatāṃ yāṃti mahāstrāṇi harestanau |
tānyanīkāni daityānāṃ dṛṣṭvā naraharistadā || 113 ||
[Analyze grammar]

saṭairdadāha ca jvālāmālāviracita sphuṭaiḥ |
nṛkesari saṭodbhūtavahninā dānavā bhṛśam || 114 ||
[Analyze grammar]

nirbhasmitā gaṇāḥ sarve niḥśeṣaṃ tadabhūdbalam |
prahlādaṃ sānugaṃ hitvā bhasmite vīkṣya tadbale || 115 ||
[Analyze grammar]

krodhāddaityapatiḥ khaṅgamākṛṣyābhiprapadyata |
khaṅgahastaṃ tu daityeṃdraṃ jagrāhaikena bāhunā || 116 ||
[Analyze grammar]

pātayāmāsa deveśo yathā śākhāṃ mahānilaḥ |
gṛhītvā patitaṃ bhūmau mahākāyaṃ nṛkesarī || 117 ||
[Analyze grammar]

svotsaṃge sthāpayāmāsa dadarśāsau mukhaṃ hareḥ |
viṣṇuniṃdākṛtaṃpāpaṃtathāvaiṣṇavadoṣajam || 118 ||
[Analyze grammar]

nṛsiṃhasparśanādevanirbhasmitamabhūttadā |
athadaityeśvarasyāthamahadgātraṃnṛkesarī || 119 ||
[Analyze grammar]

nakhervidārayāmāsatīkṣṇairvajranibhairghanaiḥ |
sanirmmalātmādaityeṃdra paḥśyansākṣānmukhaṃ hareḥ || 120 ||
[Analyze grammar]

nakhanirbhinnahṛdayaḥ kṛtārtho vijahāvasūn |
tadgātraṃ śatadhā bhittvā nakhaistīkṣṇairmahāhariḥ || 121 ||
[Analyze grammar]

ākṛṣyāṃtrāṇi dīrghāṇi kaṃṭhe saṃsaktavānpriyān |
atha devagaṇāḥ sarvve munayaśca tapodhanāḥ || 122 ||
[Analyze grammar]

brahmarudrau puraskṛtya śanaiḥ stotuṃ samāyayuḥ |
te prasādayituṃ bhītā jvalaṃtaṃ viśvatomukham || 123 ||
[Analyze grammar]

mātaraṃ jagatāṃ dhātrīṃ ciṃtayāmāsurīśvarīm |
hiraṇyavarṇāṃ hariṇīṃ sarvvopadravanāśinīm || 124 ||
[Analyze grammar]

viṣṇornityānavadyāṃgīṃ dhyātvā nārāyaṇīṃ śubhām |
devīsūktajapairbhaktyā namaścakruḥ sanātanīm || 125 ||
[Analyze grammar]

taiściṃtyamānā sā devī tatraivāvirabhūttadā |
caturbhujā viśālākṣī sarvābharaṇabhūṣitā || 126 ||
[Analyze grammar]

dukūlavastrasahitāṃ divyamālānulepanām |
tāṃ dṛṣṭvā devadevasya priyāṃ sarve divaukasaḥ || 127 ||
[Analyze grammar]

ūcuḥ prāṃjalayo devīṃ prasannaṃ kurute priyam |
trailokyasyābhayaṃ svāmī yathā dadyāttathā kuru || 128 ||
[Analyze grammar]

rudra uvāca |
ityuktā sahasā devī priyaṃ prāpya janārdanam |
praṇipatya namaskṛtya prasīdeti uvāca tam || 129 ||
[Analyze grammar]

tāṃ dṛṣṭvā mahiṣīṃ svasya priyāṃ sarvveśvaro hariḥ |
rakṣaḥśarīrajaṃ krodhaṃ tatyāja prītavatkṣaṇāt || 130 ||
[Analyze grammar]

aṃkamādāya tāṃ devīṃ samāśliṣya dayānidhiḥ |
kṛpāsudhārdradṛṣṭyā vai niraikṣata surānhariḥ || 131 ||
[Analyze grammar]

tato jayajayetyuccaiḥ stuvatāṃ namatāṃ tadā |
taddayādṛṣṭidṛṣṭānāṃ sānaṃdaḥ saṃbhramo'bhavat || 132 ||
[Analyze grammar]

tato devagaṇāḥ sarve harṣanirbharamānasāḥ |
ūcuḥ prāṃjalayo devaṃ namaskṛtya jagatpatim || 133 ||
[Analyze grammar]

devagaṇā ūcuḥ |
draṣṭumatyadbhutaṃ tejo na śaktāste jagatpate |
atyadbhutamidaṃ rūpaṃ bahubāhupadāṃkitam || 134 ||
[Analyze grammar]

jagattrayasamākrāṃtaṃ tejastīkṣṇataraṃ tava |
draṣṭuṃ sthātuṃ na śaktāḥ smaḥ sarvva eva divaukasaḥ || 135 ||
[Analyze grammar]

mahādeva uvāca |
ityarthitastu vibudhaistejastadatibhīṣaṇam |
upasaṃhṛtya deveśo babhūva sukhadarśanaḥ || 136 ||
[Analyze grammar]

śaratkoṭīṃdusaṃkāśaḥ puṃḍarīkanibhekṣaṇaḥ |
sudhāmaya saṭāpuṃja vidyutkoṭinibhaḥ śubhaḥ || 137 ||
[Analyze grammar]

nānāratnamayairdivyaiḥ keyūraiḥ kaṭakānvitaiḥ |
bāhubhiḥ kalpavṛkṣasya śākhaughairiva satphalaiḥ || 138 ||
[Analyze grammar]

caturbhiḥ komalairdivyairanvitaḥ parameśvaraḥ |
japākusumasaṃkāśaiḥ śobhitaḥ karapaṃkajaiḥ || 139 ||
[Analyze grammar]

śaṃkhacakragṛhītābhyāmudbāhubhyāṃ virājitaḥ |
varadābhayahastābhyāmitarābhyāṃ nṛkesarī || 140 ||
[Analyze grammar]

śrīvatsakaustubhorasko vanamālāvibhūṣitaḥ |
udyaddinakārābhyāṃ ca kuṇḍalābhyāṃ virājitaḥ || 141 ||
[Analyze grammar]

hārakeyūrakaṭakairbhūṣaṇaiḥ samalaṃkṛtaḥ |
savyāṃgastha śriyāyukto rājate narakesarī || 142 ||
[Analyze grammar]

lakṣmīnṛsiṃhaṃ taṃ dṛṣṭvā devatāḥ samaharṣayaḥ |
ānandāśrujalaiḥ siktā harṣanirbharacetasaḥ || 143 ||
[Analyze grammar]

ānaṃdasiṃdhumagnāste namaścakrurniraṃtaram |
arcayāmāsurātmeśaṃ divyapuṣpasamarpaṇaiḥ || 144 ||
[Analyze grammar]

ratnakuṃbhaiḥ sudhāpūrṇairabhiṣicya sanātanam |
vastrairābharaṇairgaṃdhaiḥ puṣpairdhūpairmmanoramaiḥ || 145 ||
[Analyze grammar]

divyairniveditairdīpairarccayitvā nṛkesarim |
tuṣṭuvuḥ stavanairdivyairnamaścakrurmmuhurmmahuḥ || 146 ||
[Analyze grammar]

tataḥ prasanno lakṣmīśasteṣāmiṣṭānvarāndadau |
tato devagaṇaiḥ sārdhaṃ sarvveśo bhaktavatsalaḥ || 147 ||
[Analyze grammar]

prahlādaṃ sarvadaityānāṃ cakre rājānamavyayam |
āśvāsya bhaktaṃ prahlādamabhiṣicya surottamaiḥ || 148 ||
[Analyze grammar]

dadau tasmai varāniṣṭānbhaktiṃ cāvyabhicāriṇīm |
tato devagaṇaiḥ sarvaiḥ stūyamāno nṛkesarī || 149 ||
[Analyze grammar]

vikīrṇapuṣpavapubhistatraivāṃtaradhīyata |
tataḥ suragaṇāḥ sarve svaṃsvaṃ sthānaṃ prapedire || 150 ||
[Analyze grammar]

punaśca yajñabhāgānsvānbubhujuḥ prītamānasāḥ |
tato devāḥ sagaṃdharvā nirātaṃkābhavaṃstadā || 151 ||
[Analyze grammar]

tasminhate mahādaitye sarva eva praharṣitāḥ |
prahlādastu tadā cakre rājyaṃ dharmeṇa vaiṣṇavaḥ || 152 ||
[Analyze grammar]

hareḥ prasādāllabdhaṃ tu rājyaṃ vaiṣṇavasattamaḥ |
bahubhiryajñadānādyairarcayitvā nṛkesarim || 153 ||
[Analyze grammar]

kāle haripadaṃ prāpa yogigamyaṃ sanātanam |
etatprahlādacaritaṃ ye tu śṛṇvaṃti nityaśaḥ || 154 ||
[Analyze grammar]

te sarvepāpanirmuktā yāsyaṃti paramāṃ gatim |
etatte kathitaṃ devi nṛsiṃhaṃ vaibhavaṃ hareḥ |
śeṣāṃ ca vaibhavāvasthāṃ śṛṇu devi yathākramam || 155 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ sahiṃtāyāmuttarakhaṃḍe umāmaheśvara |
saṃvāde nṛsiṃhaprādurbhāvonāmāṣṭatriṃśadadhikadviśatatamo'dhyāyaḥ || 238 ||
[Analyze grammar]