Chapter 56

[English text for this chapter is available]

śeṣa uvāca |
prātarnityaṃ vidhāyāsau brāhmaṇānvedavittamān |
hiraṇyadānaiḥ saṃtarpya vidhivatsaṃsadaṃ yayau || 1 ||
[Analyze grammar]

lokāḥ sarve namaskartuṃ raghunāthaṃ mahīpatim |
putravatsvaprajāḥ sarvāḥ pālayaṃtaṃ yayuḥ sabhām || 2 ||
[Analyze grammar]

lakṣmaṇenātapatraṃ tu dhṛtaṃ mūrdhani bhūpateḥ |
tadā bharataśatrughnau cāmaradvaṃdva dhāriṇau || 3 ||
[Analyze grammar]

vasiṣṭhapramukhāstatra munayaḥ paryupāsata |
sumaṃtrapramukhāstatra maṃtriṇo nyāyakartṛkāḥ || 4 ||
[Analyze grammar]

evaṃ pravṛtte samaye ṣaṭcārāste svalaṃkṛtāḥ |
samājagmurnarapatiṃ namaskartuṃ sabhāsthitam || 5 ||
[Analyze grammar]

tānvaktukāmānsaṃvīkṣya cārānnṛpatisattamaḥ |
sabhāyāmaṃtarāveśma rahaḥ prāviśadutsukaḥ || 6 ||
[Analyze grammar]

ekāṃte tāṃścarānsarvānpapraccha sumatirnṛpaḥ |
kathayaṃtu carā mahyaṃ yathātathyamariṃdamāḥ || 7 ||
[Analyze grammar]

lokā bruvaṃti māṃ kīdṛgbhāryāyā mama kīdṛśam |
maṃtriṇāṃ kīdṛśaṃ lokā vadaṃti caritaṃ katham || 8 ||
[Analyze grammar]

iti vākyaṃ samākarṇya cārā rāmamathābruvan |
meghagaṃbhīrayā vācā pṛcchaṃtaṃ raghunāyakam || 9 ||
[Analyze grammar]

cārā ūcuḥ |
nātha kīrtirjanānsarvānpāvayatyadhunā bhuvi |
gṛhegṛhe śrutāsmābhiḥ puruṣaiḥ strībhirīḍitā || 10 ||
[Analyze grammar]

vivasvato mahānvaṃśo bhavatā parameṣṭhinā |
alaṃkartuṃ gataṃ bhūmau kīrtirvistāritā bahuḥ || 11 ||
[Analyze grammar]

aneke sagarādyāśca kīrtimaṃto mahābalāḥ |
abhavaṃstādṛśī kīrtisteṣāṃ nābhūdyathā tava || 12 ||
[Analyze grammar]

tvayā nāthena sakalāḥ kṛtārthāśca prajāḥ kṛtāḥ |
yāsāṃ nākālamaraṇaṃ na ca rāgādyupadrutiḥ || 13 ||
[Analyze grammar]

yādṛśaścaṃdramāloke yādṛśī jāhnavī sarit |
tādṛktava ca satkīrtiḥ prakāśayati bhūtalam || 14 ||
[Analyze grammar]

brahmādikā bhavatkīrtimākarṇya trapitā bhṛśam |
nātha sarvatra te kīrtiḥ pāvayatyadhunā janān || 15 ||
[Analyze grammar]

vayaṃ dhanyatamāḥ sarve ye cārāstava bhūpate |
kṣaṇekṣaṇe tava mukhaṃ lokayāma manoharam || 16 ||
[Analyze grammar]

ityādivākyaṃ cārāṇāṃ paṃcānāṃ vīkṣya rāghavaḥ |
ṣaṣṭhaṃ papraccha cāraṃ taṃ vilakṣaṇamukhāṃkitam || 17 ||
[Analyze grammar]

rāma uvāca |
satyaṃ vada mahābuddhe yacchrutaṃ lokasaṃkare |
tādṛkpraśaṃsa me sarvamanyathā pātakādikṛt || 18 ||
[Analyze grammar]

punaḥ punaśca taṃ rāmaḥ papracchāśu savistaram |
tathāpi na bravītyeva rāmaṃ laukikabhāṣitam || 19 ||
[Analyze grammar]

tadā rāmaḥ pratyavocaccāraṃ mukhavilakṣitam |
śapāmi tvāṃ tu satyena śaṃsa sarvaṃ yathātatham || 20 ||
[Analyze grammar]

tadā rāmaṃ pratyuvāca cāro vākyaṃ śanaiḥ śanaiḥ |
akathyamapi te vācyaṃ vākyaṃ kārujanoditam || 21 ||
[Analyze grammar]

cāra uvāca |
svāminsarvatra te kīrtirdaśānanavadhādikā |
anyatra rākṣasagṛhe sthitāyāste striyā aho || 22 ||
[Analyze grammar]

kārurekastu rajako niśīthe mahilāṃ svakām |
anyagehoṣitāṃ dṛṣṭvā dhikkurvansamatāḍayat || 23 ||
[Analyze grammar]

tanmātā pratyuvācemāṃ kathaṃ tāḍayase'naghām |
gṛhāṇa mā kṛthā niṃdāṃ striyaṃ madvākyamācara || 24 ||
[Analyze grammar]

tadāvocatsa rajako nāhaṃ rāmo mahīpatiḥ |
yadrākṣasagṛhedhyuṣṭāṃ sītāmaṃgīcakāra saḥ || 25 ||
[Analyze grammar]

sarvaṃ rājñaḥ kṛtaṃ karma nītimadbhavati prabho |
anyeṣāṃ puṇyakartṝṇāmapi kṛtyamanītimat || 26 ||
[Analyze grammar]

punaḥ punaruvācāsau nāhaṃ rāmo mahīpatiḥ |
cukrudhe samaye rājanmayā vākyaṃ tava smṛtam || 27 ||
[Analyze grammar]

tadānīṃ śira ācchidya pātayāmi mahītale |
kṛtaḥ punarvicārome kva rāmo rajakaḥ kva nu || 28 ||
[Analyze grammar]

ayaṃ duṣṭo'nṛtaṃ vakti na hīdaṃ tathyamucyate |
ājñāpayasi cedrāma sāṃprataṃ mārayāmi tam || 29 ||
[Analyze grammar]

avācyamapi te proktaṃ tvadāgrahata unnayam |
rājā pramāṇamatredaṃ vicārayatu saṃgatam || 30 ||
[Analyze grammar]

śeṣa uvāca |
iti vākyaṃ samākarṇya mahāvajranibhākṣaram |
niḥśvasanmuhurucchvāsamācaranmūrcchito'patat || 31 ||
[Analyze grammar]

taṃ mūrcchitaṃ nṛpaṃ dṛṣṭvā cārā duḥkhasamanvitāḥ |
vījayāmāsurvāsograirduḥkhāpanaya hetave || 32 ||
[Analyze grammar]

sa labdhasaṃjño nṛpatirmuhūrtena jagāda tān |
gacchaṃtu bharataṃ śīghraṃ preṣayaṃtu ca māṃ prati || 33 ||
[Analyze grammar]

te duḥkhitāścarāstūrṇaṃ bharatasya gṛhaṃ gatāḥ |
kathayāmāsu rāmasya saṃdeśaṃ nayahārakāḥ || 34 ||
[Analyze grammar]

bharato rāmasaṃdeśaṃ śrutvā dhīmānyayau sadaḥ |
rāmaṃ prati rahaḥsaṃsthaṃ śrutvā taṃ tvarayā yutaḥ || 35 ||
[Analyze grammar]

āgatya taṃ pratīhāraṃ pratyuvāca mahāmanāḥ |
kutrāste rāmabhadro'sau mama bhrātā kṛpānidhiḥ || 36 ||
[Analyze grammar]

tannirdiṣṭaṃ gṛhaṃ vīro yayau ratnamanoharam |
rāmaṃ vilokya viklāṃtaṃ bhayamāpa sa mānase || 37 ||
[Analyze grammar]

kiṃ vāsau kupito rāmaḥ kiṃ vā duḥkhamidaṃ vibhoḥ |
tadā provāca nṛpatiṃ niḥśvasaṃtaṃ muhurmuhuḥ || 38 ||
[Analyze grammar]

svāminsukhasamārādhyaṃ vaktraṃ te kathamānatam |
aśrubhirlakṣyate rāhugrastadehaḥ śaśīva te || 39 ||
[Analyze grammar]

sarvaṃ me kāraṇaṃ tathyaṃ brūhi māṃ kiṃ karomi te |
tyaja duḥkhaṃ mahārāja kathaṃ duḥkhasya bhājanam || 40 ||
[Analyze grammar]

evaṃ bhrātrā procyamāno gadgadasvarayā girā |
provāca bhrātaraṃ vīro rāmacaṃdraśca dhārmikaḥ || 41 ||
[Analyze grammar]

śṛṇu bhrātarvaco mahyaṃ mama duḥkhasya kāraṇam |
tanmārjanaṃ kuruṣvādya bhrātaḥ prātarmahāmate || 42 ||
[Analyze grammar]

vaṃśe vaivasvate rājā na kaścidayaśaḥ kṣataḥ |
matkīrtiradya kaluṣā gaṃgāyamunayā gatā || 43 ||
[Analyze grammar]

yeṣāṃ yaśo nṛṇāṃ bhūmau teṣāmeva sujīvitam |
apakīrtikṣatānāṃ tu jīvitaṃ mṛtakaiḥ samam || 44 ||
[Analyze grammar]

yeṣāṃ yaśo bhavedbhūmau teṣāṃ lokāḥ sanātanāḥ |
apakīrtyuragī daṣṭāsteṣāṃ bhūyādadhogatiḥ || 45 ||
[Analyze grammar]

adya me kaluṣā kīrtiḥ svardhunī lokaviśrutā |
tacchṛṇuṣva vaco me'dya rajakena yathoditam || 46 ||
[Analyze grammar]

asminpure'dya rajaka uktavāñjānakībhavam |
kiṃcidvācyaṃ tato bhrātaḥ kiṃ karomi mahītale || 47 ||
[Analyze grammar]

kimātmānaṃ jahāmyadya kimenāṃ jānakīṃ striyam |
ubhayoḥ kiṃ mayā kāryaṃ tattathyaṃ brūhi me bhavān || 48 ||
[Analyze grammar]

ityuktvā nirgaladbāṣpo vepathu kṣubhitāṃgakaḥ |
papāta bhūmau virajo dhārmikāṇāṃ śiromaṇiḥ || 49 ||
[Analyze grammar]

bhrātaraṃ patitaṃ dṛṣṭvā bharato duḥkhasaṃyutaḥ |
saṃvīkṣya śanakai rāmaṃ prāptasaṃjñaṃ cakāra saḥ || 50 ||
[Analyze grammar]

saṃjñāṃ prāptaṃ tu saṃvīkṣya rāmacaṃdraṃ suduḥkhitam |
uvāca duḥkhanāśāya vākyaṃ tu sumanoharam || 51 ||
[Analyze grammar]

ko'yaṃ vai rajakaḥ kiṃtu vācyaṃ vākyaṃ yathābravīt |
jihvācchedaṃ kariṣyāmi jānakīvācyakāriṇaḥ || 52 ||
[Analyze grammar]

tadā rāmo'bravīdvākyaṃ rajakasya mukhodgatam |
śrutaṃ cāreṇa tatsarvaṃ bharatāya mahātmane || 53 ||
[Analyze grammar]

tacchrutvā bharataḥ prāha bhrātaraṃ duḥkhaśokinam |
jānakīvahniśuddhābhūllaṃkāyāṃ vīrapūjitā || 54 ||
[Analyze grammar]

brahmābravīdiyaṃ śuddhā pitā daśarathastava |
kathaṃ sā rajakoktitvāddhātavyā lokapūjitā || 55 ||
[Analyze grammar]

brahmādisaṃstutā kīrtistavalokānpunāti hi |
sā kathaṃ rajakoktyā vai kaluṣādya bhaviṣyati || 56 ||
[Analyze grammar]

tasmāttyaja mahāduḥkhaṃ sītāvācyasamudbhavam |
kuru rājyaṃ tayā sārdhamaṃtarvatnyā subhāgyayā || 57 ||
[Analyze grammar]

tvaṃ kathaṃ svaśarīraṃ tu hātumicchasi śobhanam |
vayaṃ hatāḥ sma sarve'dya tvāṃ vinā duḥkhanāśakam || 58 ||
[Analyze grammar]

kṣaṇaṃ sītā na jīveta tvāṃ vinā sumahodayā |
tasmātpativratā sākaṃ bhunaktu vipulāṃ śriyam || 59 ||
[Analyze grammar]

iti vākyaṃ samākarṇya bharatasya ca dhārmikaḥ |
punareva jagādemaṃ vākyaṃ vākyavidāṃ varaḥ || 60 ||
[Analyze grammar]

yattvaṃ kathayasi bhrātastatsarvaṃ dharmasaṃyutam |
paraṃ yadvacmyahaṃ vākyaṃ tatkuruṣva mamājñayā || 61 ||
[Analyze grammar]

jānāmyenāṃ vahniśuddhāṃ pavitrāṃ lokapūjitām |
lokāpavādādbhīto'haṃ tyajāmi svāṃ tu jānakīm || 62 ||
[Analyze grammar]

tasmātkare śitaṃ dhṛtvā karavālaṃ sudāruṇam |
śiraśchiṃdhyathavā jāyāṃ jānakīṃ muṃca vai vane || 63 ||
[Analyze grammar]

iti vākyaṃ samākarṇya rāmasya bharato'patat |
mūrcchitaḥ sankṣitau dehe kaṃpayuktaḥ sabāṣpakaḥ || 64 ||
[Analyze grammar]

iti śrīpadmapurāṇe pātālakhaṇḍe śeṣavātsyāyanasaṃvāde rāmāśvamedhe |
bharatavākyaṃnāma ṣaṭpaṃcāśattamo'dhyāyaḥ || 56 ||
[Analyze grammar]