Chapter 53

[English text for this chapter is available]

sugrīvastu tatkaṭakaṃ bhagnaṃ vīkṣya raṇāṃgaṇe |
svāminaṃ mūrcchitaṃ vāpi yayau yoddhuṃ nṛpaṃ prati || 1 ||
[Analyze grammar]

āgaccha bhūpa sarvānno mūrcchayitvā kuto bhavān |
gacchati kṣipraṃ māṃ dehi yuddhaṃ raṇaviśārada || 2 ||
[Analyze grammar]

evamuktvā nagaṃ kaṃcidviśālaṃ śākhayā yutam |
utpāṭya prāharattasya mastake balasaṃyutaḥ || 3 ||
[Analyze grammar]

tena prahāreṇa mahābalo nṛpaḥ |
saṃvīkṣyasu grīvamatho svacāpe |
bāṇānsamādhāya śitānsaroṣā |
jjaghāna vakṣasyatipauruṣo balī || 4 ||
[Analyze grammar]

tānbāṇānvyadhamatsarvānsugrīvaḥ sahasā hasan |
tāḍayāmāsa hṛdaye surathaṃ sumahābalaḥ || 5 ||
[Analyze grammar]

parvataiḥ śikharaiścaiva nagairdviradavarṣmabhiḥ |
vegātsaṃtāḍayāmāsa dārayansurathaṃ nakhaiḥ || 6 ||
[Analyze grammar]

tamapyāśu babaṃdhāstrādrāmasaṃjñātsudāruṇāt |
baddhaḥ kapivaro mene surathaṃ rāmasevakam || 7 ||
[Analyze grammar]

gajo yathāyasamayīṃ śṛṃkhalāṃ pādalaṃbitām |
prāpya kiṃcinna vai kartuṃ śaknoti sa tathā hyabhūt || 8 ||
[Analyze grammar]

jitaṃ tena mahārājñā surathena suputriṇā |
sarvānvīrānrathe sthāpya yayau svanagaraṃ prati || 9 ||
[Analyze grammar]

gatvā sabhāyāṃ sumahānbaddhaṃ mārutimabravīt |
smara śrīraghunāthaṃ tvaṃ dayāluṃ bhaktapālakam || 10 ||
[Analyze grammar]

yathā tvāṃ baṃdhanātsadyo mocayiṣyati suṣṭhudhīḥ |
nānyathāyutavarṣeṇa mocayiṣyāmi baṃdhanāt || 11 ||
[Analyze grammar]

ityuktamākarṇya samīrajastadā |
subaddhamātmānamavekṣya vīrān |
saṃmūrcchitāñchatruśarābhighāta |
pīḍāyutānbaṃdhanamuktaye smarat || 12 ||
[Analyze grammar]

śrīrāmacaṃdraṃ raghuvaṃśajātaṃ sītāpatiṃ paṃkajapatranetram |
svamuktaye baṃdhanataḥ kṛpāluṃ sasmāra sarvaiḥ karaṇairviśokaiḥ || 13 ||
[Analyze grammar]

hanūmānuvāca |
hā nātha hā naravarottama hā dayālo |
sītāpate rucirakuṃtalaśobhivaktra |
bhaktārtidāhaka manohararūpadhārin |
māṃ baṃdhanātsapadi mocaya mā vilaṃbam || 14 ||
[Analyze grammar]

saṃmocitāstu bhavatā gajapuṃgavādyāḥ |
devāśca dānavakulāgni sudahyamānāḥ |
tatsuṃdarīśirasisaṃsthitakeśabaṃdhaḥ |
saṃmocitastu karuṇālaya māṃ smarasva || 15 ||
[Analyze grammar]

tvaṃ yāgakarmanirato'si munīśvareṃdrai |
rdharmaṃ vicārayasi bhūmipatīḍyapāda |
atrāhamadya surathena vigāḍhapāśa |
baddhosmi mocaya mahāpuruṣāśu deva || 16 ||
[Analyze grammar]

no mocayasyatha yadi smaraṇātirekāt |
tvaṃ sarvadevavarapūjitapādapadma |
loko bhavaṃtamidamullasito'hasiṣya |
ttasmādvilaṃbamiha mācara mocayāśu || 17 ||
[Analyze grammar]

iti śrutvā jagannātho raghuvīraḥ kṛpānidhiḥ |
bhaktaṃ mocayituṃ prāgātpuṣpakeṇāśuveginā || 18 ||
[Analyze grammar]

lakṣmaṇenānugenātha bharatena suśobhitam |
munivṛṃdairvyāsamukhyaiḥ sametaṃ dadṛśe kapiḥ || 19 ||
[Analyze grammar]

tamāgataṃ nijaṃ nāthaṃ vīkṣya bhūpaṃ samabravīt |
paśya rājannijaṃ moktumāyātaṃ kṛpayā harim || 20 ||
[Analyze grammar]

aneke mocitāḥ pūrvaṃ smaraṇātsevakā nijāḥ |
tathā māṃ pāśato baddhaṃ saṃmocayitumāgataḥ || 21 ||
[Analyze grammar]

śrīrāmabhadramāyāṃtaṃ vīkṣyāsau surathaḥ kṣaṇāt |
natīśca śataśaścakre bhaktipūrapariplutaḥ || 22 ||
[Analyze grammar]

śrīrāmastaṃ nijairdorbhiḥ parirebhe caturbhujaḥ |
mūrdhni siṃcannaśrujalairharṣādbhaktaṃ svakaṃ muhuḥ || 23 ||
[Analyze grammar]

uvāca dhanyadeho'si mahatkarma kṛtaṃ tvayā |
kapīśvarastvayā baddho hanūmānsarvato balaḥ || 24 ||
[Analyze grammar]

śrīrāmaḥ kapivaryaṃ taṃ mocayāmāsa baṃdhanāt |
mūrchitāṃstānbhaṭānsarvānvīkṣya dṛṣṭyā svajīvayat || 25 ||
[Analyze grammar]

te mūrcchāṃ tatyajurdṛṣṭā rāmeṇa surasevinā |
utthitā dadṛśuḥ śrīmadrāmacaṃdraṃ manoramam || 26 ||
[Analyze grammar]

praṇatāste raghupatiṃ tena pṛṣṭā anāmayam |
sukhībhūtā nṛpaṃ procuḥ sarvaṃ svakuśalaṃ nṛpāḥ || 27 ||
[Analyze grammar]

suratho vīkṣya rāmaṃ ca kṛpārthaṃ sevakātmanaḥ |
āgataṃ sakalaṃ rājyaṃ sahayaṃ sumudārpayat || 28 ||
[Analyze grammar]

anekavarivasyābhiḥ śrīrāmaṃ samatoṣayat |
kathayāmāsa me'nyāyyaṃ kṛtaṃ te kṣama rāghava |
śrīrāmastamuvācātha kṛtaṃ te vāharakṣaṇam || 29 ||
[Analyze grammar]

kṣattriyāṇāmayaṃ dharmaḥ svāminā saha yuddhyate |
tvayā sādhukṛtaṃ karma raṇe vīrāḥ pratoṣitāḥ || 30 ||
[Analyze grammar]

ityuktavaṃtaṃ nṛhariṃ pūjayansasuto'bhavat |
śrīrāmastridinaṃ sthitvā yayau tamanumaṃtrya ca || 31 ||
[Analyze grammar]

kāmagena vimānena munibhiḥ sahito mahān |
taṃ dṛṣṭvā vismitāstasya kathāścakrurmanoharāḥ || 32 ||
[Analyze grammar]

caṃpakaṃ svapure sthāpya surathaḥ kṣatriyo balī |
śatrughnena samaṃ yātuṃ manaścakre mahābalaḥ || 33 ||
[Analyze grammar]

śatrughnaḥ svahayaṃ prāpya bherīnādānakārayat |
śaṃkhanādānbahuvidhānsarvatra samavādayat || 34 ||
[Analyze grammar]

surathena samaṃ vīro yajñavāhamamūmucat |
sa babhrāmāparāndeśānna kopi jagṛhe balī || 35 ||
[Analyze grammar]

yatrayatra gato vāhastatratatra paribhraman |
sainyena mahatā yātaḥ śatrughnaḥ surathena ca || 36 ||
[Analyze grammar]

kadācijjāhnavītīre vālmīkerāśramaṃ varam |
gato munivarairjuṣṭaṃ prātardhūmena cihnitam || 37 ||
[Analyze grammar]

iti śrīpadmapurāṇe pātālakhaṇḍe śeṣavātsyāyanasaṃvāde rāmāśvamedhe |
raghunāthasamāgamonāma tripaṃcāśattamo'dhyāyaḥ || 53 ||
[Analyze grammar]