Chapter 50

[English text for this chapter is available]

śeṣa uvāca |
atha rāmānujo vegātsamāgatya svasevakān |
papraccha kutra vāho'sau yājñikaḥ sumanoharaḥ || 1 ||
[Analyze grammar]

tadā te vacanaṃ procuḥ śatrughnaṃ sumahābalāḥ |
na jānīmo bhaṭāḥ keciddhayaṃ nītvā gatāḥ pure || 2 ||
[Analyze grammar]

vayaṃ ca dhikkṛtāḥ sarve balibhī rājasevakaiḥ |
atra pramāṇaṃ bhagavāniti kartavya tāṃ prati || 3 ||
[Analyze grammar]

tacchrutvā vacanaṃ teṣāṃ śatrughnaḥ kupito bhṛśam |
daśanroṣātsvadaśanāñjihvayā lelihanmuhuḥ || 4 ||
[Analyze grammar]

uvāca vīro madvāhaṃ hṛtvā kutra gamiṣyasi |
idānīṃ pātaye bāṇaiḥ puraṃjanasamanvitam || 5 ||
[Analyze grammar]

ityuktvā sumatiṃ prāha kasyedaṃ puṭabhedanam |
ko vartate'syādhipatiryo me vāhamajīharat || 6 ||
[Analyze grammar]

śeṣa uvāca |
iti vākyaṃ samākarṇya bhūpateḥ kopasaṃyutam |
jagāda maṃtrī sugirā sphuṭākṣarasamanvitam || 7 ||
[Analyze grammar]

viddhīdaṃ kuṃḍalaṃ nāma nagaraṃ sumanoharam |
asminvasati dharmātmā surathaḥ kṣattriyo balī || 8 ||
[Analyze grammar]

nityaṃ dharmaparo rāmacaraṇadvaṃdvasevakaḥ |
manasā karmaṇā vācā hanūmāniva sevakaḥ || 9 ||
[Analyze grammar]

caritānyasya śataśo vartaṃte dharmakāriṇaḥ |
mahābalaparīvāraḥ surathaḥ sarvaśobhanaḥ || 10 ||
[Analyze grammar]

mahadyuddhaṃ bhavedatra hṛtaścedvāhasattamaḥ |
aneke prapatiṣyaṃti vīrā raṇaviśāradāḥ || 11 ||
[Analyze grammar]

evamuktaṃ samāśrutya śatrughnaḥ sacivaṃ prati |
uvāca punarapyevaṃ vacanaṃ vadatāṃ varaḥ || 12 ||
[Analyze grammar]

śatrughna uvāca |
kathamatra prakartavyaṃ rāmāśvo'nena ceddhṛtaḥ |
nāyāti yoddhuṃ prabalaṃ kaṭakaṃ vīrasevitam || 13 ||
[Analyze grammar]

sumatiruvāca |
dūtaḥ preṣyo mahārāja rājānaṃ prati vāgmikaḥ |
yadvākyena samāyāti balena balināṃ varaḥ || 14 ||
[Analyze grammar]

nocedajñānato vāho dhṛtaḥ kenāpi māninā |
arpayiṣyati naḥ sādhumaśvaṃ kratuvaraṃ śubham || 15 ||
[Analyze grammar]

iti śrutvātu tadvākyaṃ śatrughno buddhimānbalī |
aṃgadaṃ pratyuvācedaṃ vacanaṃ vinayānvitam || 16 ||
[Analyze grammar]

śatrughna uvāca |
yāhi tvaṃ nikaṭasthe vai surathasya mahāpure |
dūtatvena tato gatvā prabrūhi nṛpatiṃ prati || 17 ||
[Analyze grammar]

tvayā dhṛto rāmavāho jñānato'jñānatopi vā |
arpayatu na vā yātu pradhanaṃ vīrasaṃyutam || 18 ||
[Analyze grammar]

rāmasya dautyaṃ laṃkāyāṃ rāvaṇaṃ prati yatkṛtam |
tathaiva kuru bhūyiṣṭha balasaṃyutabuddhiman || 19 ||
[Analyze grammar]

śeṣa uvāca |
etacchrutvāṃgado vīra omiti procya bhūmipam |
jagāma saṃsado madhye vīraśreṇisamanvite || 20 ||
[Analyze grammar]

dadarśa surathaṃ bhūpaṃ tulasīmaṃjarīdharam |
rāmabhadraṃ rasanayā bruvaṃtaṃ sevakānnijān || 21 ||
[Analyze grammar]

rājāpi dṛṣṭvā plavagaṃ manoharavapurdharam |
śatrughnadūtaṃ matvāpi vālijaṃ pratyabhāṣata || 22 ||
[Analyze grammar]

suratha uvāca |
plavagādhipa kasmāttvamāgato'tra kathaṃ bhavān |
brūhi me kāraṇaṃ sarvaṃ yathā jñātvā karomi tat || 23 ||
[Analyze grammar]

śeṣa uvāca |
iti saṃbhāṣamāṇaṃ taṃ pratyuvāca kapīśvaraḥ |
vismayaṃścetasi bhṛśaṃ rāmasevākaraṃ nṛpam || 24 ||
[Analyze grammar]

jānīhi māṃ nṛpaśreṣṭha vāliputraṃ harīśvaram |
śatrughnena ca dūtatve preṣito bhavatoṃ'tikam || 25 ||
[Analyze grammar]

sevakaiḥ kaiścidāgatya dhṛto'śvo mama sāṃpratam |
ajñānato mahānyāyyaṃ kurvadbhiḥ sahasā nṛpa || 26 ||
[Analyze grammar]

tamaśvaṃ saha rājyena sahaputrairmudānvitaḥ |
śatrughnaṃ yāhi caraṇe patitvāśu pradehi ca || 27 ||
[Analyze grammar]

nocecchatrughnanirmuktanārācaiḥ kṣatavigrahaḥ |
pṛthvītalamalaṃ kurvañchayiṣyasi viśīrṣakaḥ || 28 ||
[Analyze grammar]

yena laṃkāpatirnāśaṃ prāpito līlayā kṣaṇāt |
tasyāśvaṃ yāgayogyaṃ tu hṛtvā kutra gamiṣyasi || 29 ||
[Analyze grammar]

śeṣa uvāca |
ityādibhāṣamāṇaṃ taṃ pratyuvāca mahīśvaraḥ |
sarvaṃ tathyaṃ bravīṣi tvaṃ nānṛtaṃ tava bhāṣitam || 30 ||
[Analyze grammar]

paraṃ śṛṇuṣva madvākyaṃ śatrughnapadasevaka |
mayā dhṛto mahānaśvo rāmacaṃdrasya dhīmataḥ || 31 ||
[Analyze grammar]

na mokṣye sarvathā vāhaṃ śatrughnādibhayādaham |
cedrāmaḥ svayamāgatya darśanaṃ dāsyate mama || 32 ||
[Analyze grammar]

tadāhaṃ caraṇau natvā dāsyāmi sutasaṃyutaḥ |
sarvaṃ rājyaṃ kuṭuṃbaṃ ca dhanaṃ dhānyaṃ balaṃ bahu || 33 ||
[Analyze grammar]

kṣattriyāṇāmayaṃ dharmaḥ svāmināpi viruddhyate |
dharmeṇa yuddhaṃ tatrāpi rāmadarśanamicchatā || 34 ||
[Analyze grammar]

śatrughnādīnpravīrāṃstānadhunāhaṃ kṣaṇādapi |
jitvā badhnāmi madgehe nocedrāmaḥ samāvrajet || 35 ||
[Analyze grammar]

śeṣa uvāca |
iti śrutvāṃgado dhīmāñjahāsa nṛpatiṃ tadā |
uvāca ca mahadvākyaṃ mahādhairyasamanvitam || 36 ||
[Analyze grammar]

aṃgada uvāca |
buddhihīnaḥ pravadasi vṛddhatvātsāgatā tava |
yattvaṃ śatrughnanṛpatiṃ dhikkaroṣi dhiyā balī || 37 ||
[Analyze grammar]

yo māṃdhātṛripuṃ daityaṃ lavaṇaṃ līlayāvadhīt |
yenāneke jitāḥ saṃkhye vairiṇaḥ prabaloddhatāḥ || 38 ||
[Analyze grammar]

vidyunmālī hato yena rākṣasaḥ kāmage sthitaḥ |
tvaṃ taṃ badhnāsi vīreṃdraṃ matihīnaḥ prabhāsi me || 39 ||
[Analyze grammar]

bhrātṛjo yasya subalī puṣkalaḥ paramāstravit |
yena rudragaṇaḥ saṃkhye vīrabhadraḥ sutoṣitaḥ || 40 ||
[Analyze grammar]

varṇayāmi kimetasya parākrāṃtiṃ balorjitām |
yena nāsti samaḥ pṛthvyāṃ balena yaśasā śriyā || 41 ||
[Analyze grammar]

hanūmānyasya nikaṭe raghunāthapadābjadhīḥ |
yasyānekāni karmāṇi bhaviṣyaṃti śrutāni te || 42 ||
[Analyze grammar]

satrikūṭā rākṣasapūrdagdhā yena kṣaṇādbalāt |
akṣo yena hataḥ putro rākṣaseṃdrasya durmateḥ || 43 ||
[Analyze grammar]

droṇonāma giriryena pucchāgreṇa sadaivataḥ |
ānīto jīvanārthaṃ tu sainikānāṃ muhurmuhuḥ || 44 ||
[Analyze grammar]

jānāti rāmaścāritraṃ nānyo jānāti mūḍhadhīḥ |
yaṃ kapīṃdraṃ manāksvāntānna vismarati sevakam || 45 ||
[Analyze grammar]

sugrīvādyāḥ kapīṃdrā ye pṛthvīṃ sarvāṃ grasaṃti ye |
te śatrughnaṃ nṛpaṃ sarve sevaṃte prekṣaṇotsukāḥ || 46 ||
[Analyze grammar]

kuśadhvajo nīlaratno riputāpo mahāstravit |
pratāpāgryaḥ subāhuśca vimalaḥ sumadastathā || 47 ||
[Analyze grammar]

rājā vīramaṇiḥ satyayuto rāmasya sevakaḥ |
ete'nyepi nṛpā bhūmeḥ patayaḥ paryupāsate || 48 ||
[Analyze grammar]

tatra tvaṃ vīra jaladhau maśakaḥ ko bhavāniti |
tajjñātvā gaccha śatrughnaṃ kṛpāluṃ putrakairyutaḥ || 49 ||
[Analyze grammar]

vāhaṃ samarpya gaṃtāsi rāmaṃ rājīvalocanam |
dṛṣṭvā kṛtārthī kuruṣe svāṃgāni januṣā saha || 50 ||
[Analyze grammar]

śeṣa uvāca |
rājā provāca taṃ dūtaṃ prabruvaṃtamanekadhā |
etāndarśayasi kṣipraṃ sarve na mamagocarāḥ || 51 ||
[Analyze grammar]

yādṛśaṃ madbalaṃ dūta tādṛśaṃ na hanūmataḥ |
yo rāmaṃ pṛṣṭhataḥ kṛtvā prāgādyāgasya pālane || 52 ||
[Analyze grammar]

yadyahaṃ manasā vācā karmaṇā kutukānvitaḥ |
bhajāmi rāmaṃ tarhyāśu darśayiṣyati svāṃ tanum || 53 ||
[Analyze grammar]

anyathā hanumanmukhyā vīrā badhnaṃtu māṃ balāt |
gṛhṇaṃtu vāhaṃ tarasā rāmabhaktisamanvitāḥ || 54 ||
[Analyze grammar]

gaccha tvaṃ nṛpa śatrughnaṃ kathayasva mamoditam |
sajjībhavaṃtu subhaṭā eṣa yāmi raṇe balī || 55 ||
[Analyze grammar]

sa vicārya yathāyuktaṃ kariṣyati raṇāṃgaṇe |
mocayaṃtu mahāvāhaṃ na vāmā mā dadaṃtu te || 56 ||
[Analyze grammar]

śeṣa uvāca |
iti śrutvāsmi taṃ kṛtvā yayau vīro yato nṛpaḥ |
gatvā nivedayāmāsa yathoktaṃ surathena vai || 57 ||
[Analyze grammar]

iti śrīpadmapurāṇe pātālakhaṇḍe śeṣavātsyāyanasaṃvāde rāmāśvamedhe |
surathadūtayoḥ saṃvādonāma paṃcāśattamo'dhyāyaḥ || 50 ||
[Analyze grammar]