Chapter 60

saṃjaya uvāca |
tato bhūriśravā rājansātyakiṃ navabhiḥ śaraiḥ |
avidhyadbhṛśasaṃkruddhastottrairiva mahādvipam || 1 ||
[Analyze grammar]

kauravaṃ sātyakiścaiva śaraiḥ saṃnataparvabhiḥ |
avākiradameyātmā sarvalokasya paśyataḥ || 2 ||
[Analyze grammar]

tato duryodhano rājā sodaryaiḥ parivāritaḥ |
saumadattiṃ raṇe yattaḥ samantātparyavārayat || 3 ||
[Analyze grammar]

tathaiva pāṇḍavāḥ sarve sātyakiṃ rabhasaṃ raṇe |
parivārya sthitāḥ saṃkhye samantātsumahaujasaḥ || 4 ||
[Analyze grammar]

bhīmasenastu saṃkruddho gadāmudyamya bhārata |
duryodhanamukhānsarvānputrāṃste paryavārayat || 5 ||
[Analyze grammar]

rathairanekasāhasraiḥ krodhāmarṣasamanvitaḥ |
nandakastava putrastu bhīmasenaṃ mahābalam |
vivyādha niśitaiḥ ṣaḍbhiḥ kaṅkapatraiḥ śilāśitaiḥ || 6 ||
[Analyze grammar]

duryodhanastu samare bhīmasenaṃ mahābalam |
ājaghānorasi kruddho mārgaṇairniśitaistribhiḥ || 7 ||
[Analyze grammar]

tato bhīmo mahābāhuḥ svarathaṃ sumahābalaḥ |
āruroha rathaśreṣṭhaṃ viśokaṃ cedamabravīt || 8 ||
[Analyze grammar]

ete mahārathāḥ śūrā dhārtarāṣṭrā mahābalāḥ |
māmeva bhṛśasaṃkruddhā hantumabhyudyatā yudhi || 9 ||
[Analyze grammar]

etānadya haniṣyāmi paśyataste na saṃśayaḥ |
tasmānmamāśvānsaṃgrāme yattaḥ saṃyaccha sārathe || 10 ||
[Analyze grammar]

evamuktvā tataḥ pārthaḥ putraṃ duryodhanaṃ tava |
vivyādha daśabhistīkṣṇaiḥ śaraiḥ kanakabhūṣaṇaiḥ |
nandakaṃ ca tribhirbāṇaiḥ pratyavidhyatstanāntare || 11 ||
[Analyze grammar]

taṃ tu duryodhanaḥ ṣaṣṭyā viddhvā bhīmaṃ mahābalam |
tribhiranyaiḥ suniśitairviśokaṃ pratyavidhyata || 12 ||
[Analyze grammar]

bhīmasya ca raṇe rājandhanuściccheda bhāsvaram |
muṣṭideśe śaraistīkṣṇaistribhī rājā hasanniva || 13 ||
[Analyze grammar]

bhīmastu prekṣya yantāraṃ viśokaṃ saṃyuge tadā |
pīḍitaṃ viśikhaistīkṣṇaistava putreṇa dhanvinā || 14 ||
[Analyze grammar]

amṛṣyamāṇaḥ saṃkruddho dhanurdivyaṃ parāmṛśat |
putrasya te mahārāja vadhārthaṃ bharatarṣabha || 15 ||
[Analyze grammar]

samādatta ca saṃrabdhaḥ kṣurapraṃ lomavāhinam |
tena ciccheda nṛpaterbhīmaḥ kārmukamuttamam || 16 ||
[Analyze grammar]

so'pavidhya dhanuśchinnaṃ krodhena prajvalanniva |
anyatkārmukamādatta satvaraṃ vegavattaram || 17 ||
[Analyze grammar]

saṃdhatta viśikhaṃ ghoraṃ kālamṛtyusamaprabham |
tenājaghāna saṃkruddho bhīmasenaṃ stanāntare || 18 ||
[Analyze grammar]

sa gāḍhaviddho vyathitaḥ syandanopastha āviśat |
sa niṣaṇṇo rathopasthe mūrchāmabhijagāma ha || 19 ||
[Analyze grammar]

taṃ dṛṣṭvā vyathitaṃ bhīmamabhimanyupurogamāḥ |
nāmṛṣyanta maheṣvāsāḥ pāṇḍavānāṃ mahārathāḥ || 20 ||
[Analyze grammar]

tatastu tumulāṃ vṛṣṭiṃ śastrāṇāṃ tigmatejasām |
pātayāmāsuravyagrāḥ putrasya tava mūrdhani || 21 ||
[Analyze grammar]

pratilabhya tataḥ saṃjñāṃ bhīmaseno mahābalaḥ |
duryodhanaṃ tribhirviddhvā punarvivyādha pañcabhiḥ || 22 ||
[Analyze grammar]

śalyaṃ ca pañcaviṃśatyā śarairvivyādha pāṇḍavaḥ |
rukmapuṅkhairmaheṣvāsaḥ sa viddho vyapayādraṇāt || 23 ||
[Analyze grammar]

pratyudyayustato bhīmaṃ tava putrāścaturdaśa |
senāpatiḥ suṣeṇaśca jalasaṃdhaḥ sulocanaḥ || 24 ||
[Analyze grammar]

ugro bhīmaratho bhīmo bhīmabāhuralolupaḥ |
durmukho duṣpradharṣaśca vivitsurvikaṭaḥ samaḥ || 25 ||
[Analyze grammar]

visṛjanto bahūnbāṇānkrodhasaṃraktalocanāḥ |
bhīmasenamabhidrutya vivyadhuḥ sahitā bhṛśam || 26 ||
[Analyze grammar]

putrāṃstu tava saṃprekṣya bhīmaseno mahābalaḥ |
sṛkkiṇī vilihanvīraḥ paśumadhye vṛko yathā |
senāpateḥ kṣurapreṇa śiraściccheda pāṇḍavaḥ || 27 ||
[Analyze grammar]

jalasaṃdhaṃ vinirbhidya so'nayadyamasādanam |
suṣeṇaṃ ca tato hatvā preṣayāmāsa mṛtyave || 28 ||
[Analyze grammar]

ugrasya saśirastrāṇaṃ śiraścandropamaṃ bhuvi |
pātayāmāsa bhallena kuṇḍalābhyāṃ vibhūṣitam || 29 ||
[Analyze grammar]

bhīmabāhuṃ ca saptatyā sāśvaketuṃ sasārathim |
nināya samare bhīmaḥ paralokāya māriṣa || 30 ||
[Analyze grammar]

bhīmaṃ bhīmarathaṃ cobhau bhīmaseno hasanniva |
bhrātarau rabhasau rājannanayadyamasādanam || 31 ||
[Analyze grammar]

tataḥ sulocanaṃ bhīmaḥ kṣurapreṇa mahāmṛdhe |
miṣatāṃ sarvasainyānāmanayadyamasādanam || 32 ||
[Analyze grammar]

putrāstu tava taṃ dṛṣṭvā bhīmasenaparākramam |
śeṣā ye'nye'bhavaṃstatra te bhīmasya bhayārditāḥ |
vipradrutā diśo rājanvadhyamānā mahātmanā || 33 ||
[Analyze grammar]

tato'bravīcchāṃtanavaḥ sarvāneva mahārathān |
eṣa bhīmo raṇe kruddho dhārtarāṣṭrānmahārathān || 34 ||
[Analyze grammar]

yathāprāgryānyathājyeṣṭhānyathāśūrāṃśca saṃgatān |
nipātayatyugradhanvā taṃ pramathnīta pārthivāḥ || 35 ||
[Analyze grammar]

evamuktāstataḥ sarve dhārtarāṣṭrasya sainikāḥ |
abhyadravanta saṃkruddhā bhīmasenaṃ mahābalam || 36 ||
[Analyze grammar]

bhagadattaḥ prabhinnena kuñjareṇa viśāṃ pate |
apatatsahasā tatra yatra bhīmo vyavasthitaḥ || 37 ||
[Analyze grammar]

āpatanneva ca raṇe bhīmasenaṃ śilāśitaiḥ |
adṛśyaṃ samare cakre jīmūta iva bhāskaram || 38 ||
[Analyze grammar]

abhimanyumukhāstatra nāmṛṣyanta mahārathāḥ |
bhīmasyācchādanaṃ saṃkhye svabāhubalamāśritāḥ || 39 ||
[Analyze grammar]

ta enaṃ śaravarṣeṇa samantātparyavārayan |
gajaṃ ca śaravṛṣṭyā taṃ bibhiduste samantataḥ || 40 ||
[Analyze grammar]

sa śastravṛṣṭyābhihataḥ prādravaddviguṇaṃ padam |
prāgjyotiṣagajo rājannānāliṅgaiḥ sutejanaiḥ || 41 ||
[Analyze grammar]

saṃjātarudhirotpīḍaḥ prekṣaṇīyo'bhavadraṇe |
gabhastibhirivārkasya saṃsyūto jalado mahān || 42 ||
[Analyze grammar]

sa codito madasrāvī bhagadattena vāraṇaḥ |
abhyadhāvata tānsarvānkālotsṛṣṭa ivāntakaḥ |
dviguṇaṃ javamāsthāya kampayaṃścaraṇairmahīm || 43 ||
[Analyze grammar]

tasya tatsumahadrūpaṃ dṛṣṭvā sarve mahārathāḥ |
asahyaṃ manyamānāste nātipramanaso'bhavan || 44 ||
[Analyze grammar]

tatastu nṛpatiḥ kruddho bhīmasenaṃ stanāntare |
ājaghāna naravyāghra śareṇa nataparvaṇā || 45 ||
[Analyze grammar]

so'tividdho maheṣvāsastena rājñā mahārathaḥ |
mūrchayābhiparītāṅgo dhvajayaṣṭimupāśritaḥ || 46 ||
[Analyze grammar]

tāṃstu bhītānsamālakṣya bhīmasenaṃ ca mūrchitam |
nanāda balavannādaṃ bhagadattaḥ pratāpavān || 47 ||
[Analyze grammar]

tato ghaṭotkaco rājanprekṣya bhīmaṃ tathāgatam |
saṃkruddho rākṣaso ghorastatraivāntaradhīyata || 48 ||
[Analyze grammar]

sa kṛtvā dāruṇāṃ māyāṃ bhīrūṇāṃ bhayavardhinīm |
adṛśyata nimeṣārdhādghorarūpaṃ samāśritaḥ || 49 ||
[Analyze grammar]

airāvataṃ samāruhya svayaṃ māyāmayaṃ kṛtam |
tasya cānye'pi diṅnāgā babhūvuranuyāyinaḥ || 50 ||
[Analyze grammar]

añjano vāmanaścaiva mahāpadmaśca suprabhaḥ |
traya ete mahānāgā rākṣasaiḥ samadhiṣṭhitāḥ || 51 ||
[Analyze grammar]

mahākāyāstridhā rājanprasravanto madaṃ bahu |
tejovīryabalopetā mahābalaparākramāḥ || 52 ||
[Analyze grammar]

ghaṭotkacastu svaṃ nāgaṃ codayāmāsa taṃ tataḥ |
sagajaṃ bhagadattaṃ tu hantukāmaḥ paraṃtapaḥ || 53 ||
[Analyze grammar]

te cānye coditā nāgā rākṣasaistairmahābalaiḥ |
paripetuḥ susaṃrabdhāścaturdaṃṣṭrāścaturdiśam |
bhagadattasya taṃ nāgaṃ viṣāṇaiste'bhyapīḍayan || 54 ||
[Analyze grammar]

saṃpīḍyamānastairnāgairvedanārtaḥ śarāturaḥ |
so'nadatsumahānādamindrāśanisamasvanam || 55 ||
[Analyze grammar]

tasya taṃ nadato nādaṃ sughoraṃ bhīmanisvanam |
śrutvā bhīṣmo'bravīddroṇaṃ rājānaṃ ca suyodhanam || 56 ||
[Analyze grammar]

eṣa yudhyati saṃgrāme haiḍimbena durātmanā |
bhagadatto maheṣvāsaḥ kṛcchreṇa parivartate || 57 ||
[Analyze grammar]

rākṣasaśca mahāmāyaḥ sa ca rājātikopanaḥ |
tau sametau mahāvīryau kālamṛtyusamāvubhau || 58 ||
[Analyze grammar]

śrūyate hyeṣa hṛṣṭānāṃ pāṇḍavānāṃ mahāsvanaḥ |
hastinaścaiva sumahānbhītasya ruvato dhvaniḥ || 59 ||
[Analyze grammar]

tatra gacchāma bhadraṃ vo rājānaṃ parirakṣitum |
arakṣyamāṇaḥ samare kṣipraṃ prāṇānvimokṣyate || 60 ||
[Analyze grammar]

te tvaradhvaṃ mahāvīryāḥ kiṃ cireṇa prayāmahe |
mahānhi vartate raudraḥ saṃgrāmo lomaharṣaṇaḥ || 61 ||
[Analyze grammar]

bhaktaśca kulaputraśca śūraśca pṛtanāpatiḥ |
yuktaṃ tasya paritrāṇaṃ kartumasmābhiracyutāḥ || 62 ||
[Analyze grammar]

bhīṣmasya tadvacaḥ śrutvā bhāradvājapurogamāḥ |
sahitāḥ sarvarājāno bhagadattaparīpsayā |
uttamaṃ javamāsthāya prayayuryatra so'bhavat || 63 ||
[Analyze grammar]

tānprayātānsamālokya yudhiṣṭhirapurogamāḥ |
pāñcālāḥ pāṇḍavaiḥ sārdhaṃ pṛṣṭhato'nuyayuḥ parān || 64 ||
[Analyze grammar]

tānyanīkānyathālokya rākṣasendraḥ pratāpavān |
nanāda sumahānādaṃ visphoṭamaśaneriva || 65 ||
[Analyze grammar]

tasya taṃ ninadaṃ śrutvā dṛṣṭvā nāgāṃśca yudhyataḥ |
bhīṣmaḥ śāṃtanavo bhūyo bhāradvājamabhāṣata || 66 ||
[Analyze grammar]

na rocate me saṃgrāmo haiḍimbena durātmanā |
balavīryasamāviṣṭaḥ sasahāyaśca sāṃpratam || 67 ||
[Analyze grammar]

naiṣa śakyo yudhā jetumapi vajrabhṛtā svayam |
labdhalakṣyaḥ prahārī ca vayaṃ ca śrāntavāhanāḥ |
pāñcālaiḥ pāṇḍaveyaiśca divasaṃ kṣatavikṣatāḥ || 68 ||
[Analyze grammar]

tanna me rocate yuddhaṃ pāṇḍavairjitakāśibhiḥ |
ghuṣyatāmavahāro'dya śvo yotsyāmaḥ paraiḥ saha || 69 ||
[Analyze grammar]

pitāmahavacaḥ śrutvā tathā cakruḥ sma kauravāḥ |
upāyenāpayānaṃ te ghaṭotkacabhayārditāḥ || 70 ||
[Analyze grammar]

kauraveṣu nivṛtteṣu pāṇḍavā jitakāśinaḥ |
siṃhanādamakurvanta śaṅkhaveṇusvanaiḥ saha || 71 ||
[Analyze grammar]

evaṃ tadabhavadyuddhaṃ divasaṃ bharatarṣabha |
pāṇḍavānāṃ kurūṇāṃ ca puraskṛtya ghaṭotkacam || 72 ||
[Analyze grammar]

kauravāstu tato rājanprayayuḥ śibiraṃ svakam |
vrīḍamānā niśākāle pāṇḍaveyaiḥ parājitāḥ || 73 ||
[Analyze grammar]

śaravikṣatagātrāśca pāṇḍuputrā mahārathāḥ |
yuddhe sumanaso bhūtvā śibirāyaiva jagmire || 74 ||
[Analyze grammar]

puraskṛtya mahārāja bhīmasenaghaṭotkacau |
pūjayantastadānyonyaṃ mudā paramayā yutāḥ || 75 ||
[Analyze grammar]

nadanto vividhānnādāṃstūryasvanavimiśritān |
siṃhanādāṃśca kurvāṇā vimiśrāñśaṅkhanisvanaiḥ || 76 ||
[Analyze grammar]

vinadanto mahātmānaḥ kampayantaśca medinīm |
ghaṭṭayantaśca marmāṇi tava putrasya māriṣa |
prayātāḥ śibirāyaiva niśākāle paraṃtapāḥ || 77 ||
[Analyze grammar]

duryodhanastu nṛpatirdīno bhrātṛvadhena ca |
muhūrtaṃ cintayāmāsa bāṣpaśokasamākulaḥ || 78 ||
[Analyze grammar]

tataḥ kṛtvā vidhiṃ sarvaṃ śibirasya yathāvidhi |
pradadhyau śokasaṃtapto bhrātṛvyasanakarśitaḥ || 79 ||
[Analyze grammar]