Chapter 61

dhṛtarāṣṭra uvāca |
bhayaṃ me sumahajjātaṃ vismayaścaiva saṃjaya |
śrutvā pāṇḍukumārāṇāṃ karma devaiḥ suduṣkaram || 1 ||
[Analyze grammar]

putrāṇāṃ ca parābhavaṃ śrutvā saṃjaya sarvaśaḥ |
cintā me mahatī sūta bhaviṣyati kathaṃ tviti || 2 ||
[Analyze grammar]

dhruvaṃ viduravākyāni dhakṣyanti hṛdayaṃ mama |
yathā hi dṛśyate sarvaṃ daivayogena saṃjaya || 3 ||
[Analyze grammar]

yatra bhīṣmamukhāñśūrānastrajñānyodhasattamān |
pāṇḍavānāmanīkāni yodhayanti prahāriṇaḥ || 4 ||
[Analyze grammar]

kenāvadhyā mahātmānaḥ pāṇḍuputrā mahābalāḥ |
kena dattavarāstāta kiṃ vā jñānaṃ vidanti te |
yena kṣayaṃ na gacchanti divi tārāgaṇā iva || 5 ||
[Analyze grammar]

punaḥ punarna mṛṣyāmi hataṃ sainyaṃ sma pāṇḍavaiḥ |
mayyeva daṇḍaḥ patati daivātparamadāruṇaḥ || 6 ||
[Analyze grammar]

yathāvadhyāḥ pāṇḍusutā yathā vadhyāśca me sutāḥ |
etanme sarvamācakṣva yathātattvena saṃjaya || 7 ||
[Analyze grammar]

na hi pāraṃ prapaśyāmi duḥkhasyāsya kathaṃcana |
samudrasyeva mahato bhujābhyāṃ pratarannaraḥ || 8 ||
[Analyze grammar]

putrāṇāṃ vyasanaṃ manye dhruvaṃ prāptaṃ sudāruṇam |
ghātayiṣyati me putrānsarvānbhīmo na saṃśayaḥ || 9 ||
[Analyze grammar]

na hi paśyāmi taṃ vīraṃ yo me rakṣetsutānraṇe |
dhruvaṃ vināśaḥ samare putrāṇāṃ mama saṃjaya || 10 ||
[Analyze grammar]

tasmānme kāraṇaṃ sūta yuktiṃ caiva viśeṣataḥ |
pṛcchato'dya yathātattvaṃ sarvamākhyātumarhasi || 11 ||
[Analyze grammar]

duryodhano'pi yaccakre dṛṣṭvā svānvimukhānraṇe |
bhīṣmadroṇau kṛpaścaiva saubaleyo jayadrathaḥ |
drauṇirvāpi maheṣvāso vikarṇo vā mahābalaḥ || 12 ||
[Analyze grammar]

niścayo vāpi kasteṣāṃ tadā hyāsīnmahātmanām |
vimukheṣu mahāprājña mama putreṣu saṃjaya || 13 ||
[Analyze grammar]

saṃjaya uvāca |
śṛṇu rājannavahitaḥ śrutvā caivāvadhāraya |
naiva mantrakṛtaṃ kiṃcinnaiva māyāṃ tathāvidhām |
na vai vibhīṣikāṃ kāṃcidrājankurvanti pāṇḍavāḥ || 14 ||
[Analyze grammar]

yudhyanti te yathānyāyaṃ śaktimantaśca saṃyuge |
dharmeṇa sarvakāryāṇi kīrtitānīti bhārata |
ārabhante sadā pārthāḥ prārthayānā mahadyaśaḥ || 15 ||
[Analyze grammar]

na te yuddhānnivartante dharmopetā mahābalāḥ |
śriyā paramayā yuktā yato dharmastato jayaḥ |
tenāvadhyā raṇe pārthā jayayuktāśca pārthiva || 16 ||
[Analyze grammar]

tava putrā durātmānaḥ pāpeṣvabhiratāḥ sadā |
niṣṭhurā hīnakarmāṇastena hīyanti saṃyuge || 17 ||
[Analyze grammar]

subahūni nṛśaṃsāni putraistava janeśvara |
nikṛtānīha pāṇḍūnāṃ nīcairiva yathā naraiḥ || 18 ||
[Analyze grammar]

sarvaṃ ca tadanādṛtya putrāṇāṃ tava kilbiṣam |
sāpahnavāḥ sadaivāsanpāṇḍavāḥ pāṇḍupūrvaja |
na cainānbahu manyante putrāstava viśāṃ pate || 19 ||
[Analyze grammar]

tasya pāpasya satataṃ kriyamāṇasya karmaṇaḥ |
saṃprāptaṃ sumahadghoraṃ phalaṃ kiṃpākasaṃnibham |
sa tadbhuṅkṣva mahārāja saputraḥ sasuhṛjjanaḥ || 20 ||
[Analyze grammar]

nāvabudhyasi yadrājanvāryamāṇaḥ suhṛjjanaiḥ |
vidureṇātha bhīṣmeṇa droṇena ca mahātmanā || 21 ||
[Analyze grammar]

tathā mayā cāpyasakṛdvāryamāṇo na gṛhṇasi |
vākyaṃ hitaṃ ca pathyaṃ ca martyaḥ pathyamivauṣadham |
putrāṇāṃ matamāsthāya jitānmanyasi pāṇḍavān || 22 ||
[Analyze grammar]

śṛṇu bhūyo yathātattvaṃ yanmāṃ tvaṃ paripṛcchasi |
kāraṇaṃ bharataśreṣṭha pāṇḍavānāṃ jayaṃ prati |
tatte'haṃ kathayiṣyāmi yathāśrutamariṃdama || 23 ||
[Analyze grammar]

duryodhanena saṃpṛṣṭa etamarthaṃ pitāmahaḥ |
dṛṣṭvā bhrātṝnraṇe sarvānnirjitānsumahārathān || 24 ||
[Analyze grammar]

śokasaṃmūḍhahṛdayo niśākāle sma kauravaḥ |
pitāmahaṃ mahāprājñaṃ vinayenopagamya ha |
yadabravītsutaste'sau tanme śṛṇu janeśvara || 25 ||
[Analyze grammar]

duryodhana uvāca |
tvaṃ ca droṇaśca śalyaśca kṛpo drauṇistathaiva ca |
kṛtavarmā ca hārdikyaḥ kāmbojaśca sudakṣiṇaḥ || 26 ||
[Analyze grammar]

bhūriśravā vikarṇaśca bhagadattaśca vīryavān |
mahārathāḥ samākhyātāḥ kulaputrāstanutyajaḥ || 27 ||
[Analyze grammar]

trayāṇāmapi lokānāṃ paryāptā iti me matiḥ |
pāṇḍavānāṃ samastāśca na tiṣṭhanti parākrame || 28 ||
[Analyze grammar]

tatra me saṃśayo jātastanmamācakṣva pṛcchataḥ |
yaṃ samāśritya kaunteyā jayantyasmānpade pade || 29 ||
[Analyze grammar]

bhīṣma uvāca |
śṛṇu rājanvaco mahyaṃ yattvāṃ vakṣyāmi kaurava |
bahuśaśca mamokto'si na ca me tattvayā kṛtam || 30 ||
[Analyze grammar]

kriyatāṃ pāṇḍavaiḥ sārdhaṃ śamo bharatasattama |
etatkṣamamahaṃ manye pṛthivyāstava cābhibho || 31 ||
[Analyze grammar]

bhuñjemāṃ pṛthivīṃ rājanbhrātṛbhiḥ sahitaḥ sukhī |
durhṛdastāpayansarvānnandayaṃścāpi bāndhavān || 32 ||
[Analyze grammar]

na ca me krośatastāta śrutavānasi vai purā |
tadidaṃ samanuprāptaṃ yatpāṇḍūnavamanyase || 33 ||
[Analyze grammar]

yaśca heturavadhyatve teṣāmakliṣṭakarmaṇām |
taṃ śṛṇuṣva mahārāja mama kīrtayataḥ prabho || 34 ||
[Analyze grammar]

nāsti lokeṣu tadbhūtaṃ bhavitā no bhaviṣyati |
yo jayetpāṇḍavānsaṃkhye pālitāñśārṅgadhanvanā || 35 ||
[Analyze grammar]

yattu me kathitaṃ tāta munibhirbhāvitātmabhiḥ |
purāṇagītaṃ dharmajña tacchṛṇuṣva yathātatham || 36 ||
[Analyze grammar]

purā kila surāḥ sarve ṛṣayaśca samāgatāḥ |
pitāmahamupāseduḥ parvate gandhamādane || 37 ||
[Analyze grammar]

madhye teṣāṃ samāsīnaḥ prajāpatirapaśyata |
vimānaṃ jājvaladbhāsā sthitaṃ pravaramambare || 38 ||
[Analyze grammar]

dhyānenāvedya taṃ brahmā kṛtvā ca niyato'ñjalim |
namaścakāra hṛṣṭātmā paramaṃ parameśvaram || 39 ||
[Analyze grammar]

ṛṣayastvatha devāśca dṛṣṭvā brahmāṇamutthitam |
sthitāḥ prāñjalayaḥ sarve paśyanto mahadadbhutam || 40 ||
[Analyze grammar]

yathāvacca tamabhyarcya brahmā brahmavidāṃ varaḥ |
jagāda jagataḥ sraṣṭā paraṃ paramadharmavit || 41 ||
[Analyze grammar]

viśvāvasurviśvamūrtirviśveśo viṣvakseno viśvakarmā vaśī ca |
viśveśvaro vāsudevo'si tasmādyogātmānaṃ daivataṃ tvāmupaimi || 42 ||
[Analyze grammar]

jaya viśva mahādeva jaya lokahite rata |
jaya yogīśvara vibho jaya yogaparāvara || 43 ||
[Analyze grammar]

padmagarbha viśālākṣa jaya lokeśvareśvara |
bhūtabhavyabhavannātha jaya saumyātmajātmaja || 44 ||
[Analyze grammar]

asaṃkhyeyaguṇājeya jaya sarvaparāyaṇa |
nārāyaṇa suduṣpāra jaya śārṅgadhanurdhara || 45 ||
[Analyze grammar]

sarvaguhyaguṇopeta viśvamūrte nirāmaya |
viśveśvara mahābāho jaya lokārthatatpara || 46 ||
[Analyze grammar]

mahoraga varāhādya harikeśa vibho jaya |
harivāsa viśāmīśa viśvāvāsāmitāvyaya || 47 ||
[Analyze grammar]

vyaktāvyaktāmitasthāna niyatendriya sendriya |
asaṃkhyeyātmabhāvajña jaya gambhīra kāmada || 48 ||
[Analyze grammar]

ananta viditaprajña nityaṃ bhūtavibhāvana |
kṛtakārya kṛtaprajña dharmajña vijayājaya || 49 ||
[Analyze grammar]

guhyātmansarvabhūtātmansphuṭasaṃbhūtasaṃbhava |
bhūtārthatattva lokeśa jaya bhūtavibhāvana || 50 ||
[Analyze grammar]

ātmayone mahābhāga kalpasaṃkṣepatatpara |
udbhāvana manodbhāva jaya brahmajanapriya || 51 ||
[Analyze grammar]

nisargasargābhirata kāmeśa parameśvara |
amṛtodbhava sadbhāva yugāgne vijayaprada || 52 ||
[Analyze grammar]

prajāpatipate deva padmanābha mahābala |
ātmabhūta mahābhūta karmātmañjaya karmada || 53 ||
[Analyze grammar]

pādau tava dharā devī diśo bāhurdivaṃ śiraḥ |
mūrtiste'haṃ surāḥ kāyaścandrādityau ca cakṣuṣī || 54 ||
[Analyze grammar]

balaṃ tapaśca satyaṃ ca dharmaḥ kāmātmajaḥ prabho |
tejo'gniḥ pavanaḥ śvāsa āpaste svedasaṃbhavāḥ || 55 ||
[Analyze grammar]

aśvinau śravaṇau nityaṃ devī jihvā sarasvatī |
vedāḥ saṃskāraniṣṭhā hi tvayīdaṃ jagadāśritam || 56 ||
[Analyze grammar]

na saṃkhyāṃ na parīmāṇaṃ na tejo na parākramam |
na balaṃ yogayogīśa jānīmaste na saṃbhavam || 57 ||
[Analyze grammar]

tvadbhaktiniratā deva niyamaistvā samāhitāḥ |
arcayāmaḥ sadā viṣṇo parameśaṃ maheśvaram || 58 ||
[Analyze grammar]

ṛṣayo devagandharvā yakṣarākṣasapannagāḥ |
piśācā mānuṣāścaiva mṛgapakṣisarīsṛpāḥ || 59 ||
[Analyze grammar]

evamādi mayā sṛṣṭaṃ pṛthivyāṃ tvatprasādajam |
padmanābha viśālākṣa kṛṣṇa duḥsvapnanāśana || 60 ||
[Analyze grammar]

tvaṃ gatiḥ sarvabhūtānāṃ tvaṃ netā tvaṃ jaganmukham |
tvatprasādena deveśa sukhino vibudhāḥ sadā || 61 ||
[Analyze grammar]

pṛthivī nirbhayā deva tvatprasādātsadābhavat |
tasmādbhava viśālākṣa yaduvaṃśavivardhanaḥ || 62 ||
[Analyze grammar]

dharmasaṃsthāpanārthāya daiteyānāṃ vadhāya ca |
jagato dhāraṇārthāya vijñāpyaṃ kuru me prabho || 63 ||
[Analyze grammar]

yadetatparamaṃ guhyaṃ tvatprasādamayaṃ vibho |
vāsudeva tadetatte mayodgītaṃ yathātatham || 64 ||
[Analyze grammar]

sṛṣṭvā saṃkarṣaṇaṃ devaṃ svayamātmānamātmanā |
kṛṣṇa tvamātmanāsrākṣīḥ pradyumnaṃ cātmasaṃbhavam || 65 ||
[Analyze grammar]

pradyumnāccāniruddhaṃ tvaṃ yaṃ vidurviṣṇumavyayam |
aniruddho'sṛjanmāṃ vai brahmāṇaṃ lokadhāriṇam || 66 ||
[Analyze grammar]

vāsudevamayaḥ so'haṃ tvayaivāsmi vinirmitaḥ |
vibhajya bhāgaśo''tmānaṃ vraja mānuṣatāṃ vibho || 67 ||
[Analyze grammar]

tatrāsuravadhaṃ kṛtvā sarvalokasukhāya vai |
dharmaṃ sthāpya yaśaḥ prāpya yogaṃ prāpsyasi tattvataḥ || 68 ||
[Analyze grammar]

tvāṃ hi brahmarṣayo loke devāścāmitavikrama |
taistaiśca nāmabhirbhaktā gāyanti paramātmakam || 69 ||
[Analyze grammar]

sthitāśca sarve tvayi bhūtasaṃghāḥ kṛtvāśrayaṃ tvāṃ varadaṃ subāho |
anādimadhyāntamapārayogaṃ lokasya setuṃ pravadanti viprāḥ || 70 ||
[Analyze grammar]