Chapter 54

duryodhana uvāca |
na bhetavyaṃ mahārāja na śocyā bhavatā vayam |
samarthāḥ sma parānrājanvijetuṃ samare vibho || 1 ||
[Analyze grammar]

vanaṃ pravrājitānpārthānyadāyānmadhusūdanaḥ |
mahatā balacakreṇa pararāṣṭrāvamardinā || 2 ||
[Analyze grammar]

kekayā dhṛṣṭaketuśca dhṛṣṭadyumnaśca pārṣataḥ |
rājānaścānvayuḥ pārthānbahavo'nye'nuyāyinaḥ || 3 ||
[Analyze grammar]

indraprasthasya cādūrātsamājagmurmahārathāḥ |
vyagarhayaṃśca saṃgamya bhavantaṃ kurubhiḥ saha || 4 ||
[Analyze grammar]

te yudhiṣṭhiramāsīnamajinaiḥ prativāsitam |
kṛṣṇapradhānāḥ saṃhatya paryupāsanta bhārata || 5 ||
[Analyze grammar]

pratyādānaṃ ca rājyasya kāryamūcurnarādhipāḥ |
bhavataḥ sānubandhasya samucchedaṃ cikīrṣavaḥ || 6 ||
[Analyze grammar]

śrutvā caitanmayoktāstu bhīṣmadroṇakṛpāstadā |
jñātikṣayabhayādrājanbhītena bharatarṣabha || 7 ||
[Analyze grammar]

na te sthāsyanti samaye pāṇḍavā iti me matiḥ |
samucchedaṃ hi naḥ kṛtsnaṃ vāsudevaścikīrṣati || 8 ||
[Analyze grammar]

ṛte ca viduraṃ sarve yūyaṃ vadhyā mahātmanaḥ |
dhṛtarāṣṭraśca dharmajño na vadhyaḥ kurusattamaḥ || 9 ||
[Analyze grammar]

samucchedaṃ ca kṛtsnaṃ naḥ kṛtvā tāta janārdanaḥ |
ekarājyaṃ kurūṇāṃ sma cikīrṣati yudhiṣṭhire || 10 ||
[Analyze grammar]

tatra kiṃ prāptakālaṃ naḥ praṇipātaḥ palāyanam |
prāṇānvā saṃparityajya pratiyudhyāmahe parān || 11 ||
[Analyze grammar]

pratiyuddhe tu niyataḥ syādasmākaṃ parājayaḥ |
yudhiṣṭhirasya sarve hi pārthivā vaśavartinaḥ || 12 ||
[Analyze grammar]

viraktarāṣṭrāśca vayaṃ mitrāṇi kupitāni naḥ |
dhikkṛtāḥ pārthivaiḥ sarvaiḥ svajanena ca sarvaśaḥ || 13 ||
[Analyze grammar]

praṇipāte tu doṣo'sti bandhūnāṃ śāśvatīḥ samāḥ |
pitaraṃ tveva śocāmi prajñānetraṃ janeśvaram |
matkṛte duḥkhamāpannaṃ kleśaṃ prāptamanantakam || 14 ||
[Analyze grammar]

kṛtaṃ hi tava putraiśca pareṣāmavarodhanam |
matpriyārthaṃ puraivaitadviditaṃ te narottama || 15 ||
[Analyze grammar]

te rājño dhṛtarāṣṭrasya sāmātyasya mahārathāḥ |
vairaṃ pratikariṣyanti kulocchedena pāṇḍavāḥ || 16 ||
[Analyze grammar]

tato droṇo'bravīdbhīṣmaḥ kṛpo drauṇiśca bhārata |
matvā māṃ mahatīṃ cintāmāsthitaṃ vyathitendriyam || 17 ||
[Analyze grammar]

abhidrugdhāḥ pare cenno na bhetavyaṃ paraṃtapa |
asamarthāḥ pare jetumasmānyudhi janeśvara || 18 ||
[Analyze grammar]

ekaikaśaḥ samarthāḥ smo vijetuṃ sarvapārthivān |
āgacchantu vineṣyāmo darpameṣāṃ śitaiḥ śaraiḥ || 19 ||
[Analyze grammar]

puraikena hi bhīṣmeṇa vijitāḥ sarvapārthivāḥ |
mṛte pitaryabhikruddho rathenaikena bhārata || 20 ||
[Analyze grammar]

jaghāna subahūṃsteṣāṃ saṃrabdhaḥ kurusattamaḥ |
tataste śaraṇaṃ jagmurdevavratamimaṃ bhayāt || 21 ||
[Analyze grammar]

sa bhīṣmaḥ susamartho'yamasmābhiḥ sahito raṇe |
parānvijetuṃ tasmātte vyetu bhīrbharatarṣabha |
ityeṣāṃ niścayo hyāsīttatkālamamitaujasām || 22 ||
[Analyze grammar]

purā pareṣāṃ pṛthivī kṛtsnāsīdvaśavartinī |
asmānpunaramī nādya samarthā jetumāhave |
chinnapakṣāḥ pare hyadya vīryahīnāśca pāṇḍavāḥ || 23 ||
[Analyze grammar]

asmatsaṃsthā ca pṛthivī vartate bharatarṣabha |
ekārthāḥ sukhaduḥkheṣu mayānītāśca pārthivāḥ || 24 ||
[Analyze grammar]

apyagniṃ praviśeyuste samudraṃ vā paraṃtapa |
madarthe pārthivāḥ sarve tadviddhi kurusattama || 25 ||
[Analyze grammar]

unmattamiva cāpi tvāṃ prahasantīha duḥkhitam |
vilapantaṃ bahuvidhaṃ bhītaṃ paravikatthane || 26 ||
[Analyze grammar]

eṣāṃ hyekaikaśo rājñāṃ samarthaḥ pāṇḍavānprati |
ātmānaṃ manyate sarvo vyetu te bhayamāgatam || 27 ||
[Analyze grammar]

sarvāṃ samagrāṃ senāṃ me vāsavo'pi na śaknuyāt |
hantumakṣayyarūpeyaṃ brahmaṇāpi svayambhuvā || 28 ||
[Analyze grammar]

yudhiṣṭhiraḥ puraṃ hitvā pañca grāmānsa yācati |
bhīto hi māmakātsainyātprabhāvāccaiva me prabho || 29 ||
[Analyze grammar]

samarthaṃ manyase yacca kuntīputraṃ vṛkodaram |
tanmithyā na hi me kṛtsnaṃ prabhāvaṃ vettha bhārata || 30 ||
[Analyze grammar]

matsamo hi gadāyuddhe pṛthivyāṃ nāsti kaścana |
nāsītkaścidatikrānto bhavitā na ca kaścana || 31 ||
[Analyze grammar]

yukto duḥkhocitaścāhaṃ vidyāpāragatastathā |
tasmānna bhīmānnānyebhyo bhayaṃ me vidyate kvacit || 32 ||
[Analyze grammar]

duryodhanasamo nāsti gadāyāmiti niścayaḥ |
saṃkarṣaṇasya bhadraṃ te yattadainamupāvasam || 33 ||
[Analyze grammar]

yuddhe saṃkarṣaṇasamo balenābhyadhiko bhuvi |
gadāprahāraṃ bhīmo me na jātu viṣahedyudhi || 34 ||
[Analyze grammar]

ekaṃ prahāraṃ yaṃ dadyāṃ bhīmāya ruṣito nṛpa |
sa evainaṃ nayedghoraṃ kṣipraṃ vaivasvatakṣayam || 35 ||
[Analyze grammar]

iccheyaṃ ca gadāhastaṃ rājandraṣṭuṃ vṛkodaram |
suciraṃ prārthito hyeṣa mama nityaṃ manorathaḥ || 36 ||
[Analyze grammar]

gadayā nihato hyājau mama pārtho vṛkodaraḥ |
viśīrṇagātraḥ pṛthivīṃ parāsuḥ prapatiṣyati || 37 ||
[Analyze grammar]

gadāprahārābhihato himavānapi parvataḥ |
sakṛnmayā viśīryeta giriḥ śatasahasradhā || 38 ||
[Analyze grammar]

sa cāpyetadvijānāti vāsudevārjunau tathā |
duryodhanasamo nāsti gadāyāmiti niścayaḥ || 39 ||
[Analyze grammar]

tatte vṛkodaramayaṃ bhayaṃ vyetu mahāhave |
vyapaneṣyāmyahaṃ hyenaṃ mā rājanvimanā bhava || 40 ||
[Analyze grammar]

tasminmayā hate kṣipramarjunaṃ bahavo rathāḥ |
tulyarūpā viśiṣṭāśca kṣepsyanti bharatarṣabha || 41 ||
[Analyze grammar]

bhīṣmo droṇaḥ kṛpo drauṇiḥ karṇo bhūriśravāstathā |
prāgjyotiṣādhipaḥ śalyaḥ sindhurājo jayadrathaḥ || 42 ||
[Analyze grammar]

ekaika eṣāṃ śaktastu hantuṃ bhārata pāṇḍavān |
samastāstu kṣaṇenaitānneṣyanti yamasādanam || 43 ||
[Analyze grammar]

samagrā pārthivī senā pārthamekaṃ dhanaṃjayam |
kasmādaśaktā nirjetumiti heturna vidyate || 44 ||
[Analyze grammar]

śaravrātaistu bhīṣmeṇa śataśo'tha sahasraśaḥ |
droṇadrauṇikṛpaiścaiva gantā pārtho yamakṣayam || 45 ||
[Analyze grammar]

pitāmaho hi gāṅgeyaḥ śaṃtanoradhi bhārata |
brahmarṣisadṛśo jajñe devairapi durutsahaḥ |
pitrā hyuktaḥ prasannena nākāmastvaṃ mariṣyasi || 46 ||
[Analyze grammar]

brahmarṣeśca bharadvājāddroṇyāṃ droṇo vyajāyata |
droṇājjajñe mahārāja drauṇiśca paramāstravit || 47 ||
[Analyze grammar]

kṛpaścācāryamukhyo'yaṃ maharṣergautamādapi |
śarastambodbhavaḥ śrīmānavadhya iti me matiḥ || 48 ||
[Analyze grammar]

ayonijaṃ trayaṃ hyetatpitā mātā ca mātulaḥ |
aśvatthāmno mahārāja sa ca śūraḥ sthito mama || 49 ||
[Analyze grammar]

sarva ete mahārāja devakalpā mahārathāḥ |
śakrasyāpi vyathāṃ kuryuḥ saṃyuge bharatarṣabha || 50 ||
[Analyze grammar]

bhīṣmadroṇakṛpāṇāṃ ca tulyaḥ karṇo mato mama |
anujñātaśca rāmeṇa matsamo'sīti bhārata || 51 ||
[Analyze grammar]

kuṇḍale rucire cāstāṃ karṇasya sahaje śubhe |
te śacyarthe mahendreṇa yācitaḥ sa paraṃtapaḥ |
amoghayā mahārāja śaktyā paramabhīmayā || 52 ||
[Analyze grammar]

tasya śaktyopagūḍhasya kasmājjīveddhanaṃjayaḥ |
vijayo me dhruvaṃ rājanphalaṃ pāṇāvivāhitam |
abhivyaktaḥ pareṣāṃ ca kṛtsno bhuvi parājayaḥ || 53 ||
[Analyze grammar]

ahnā hyekena bhīṣmo'yamayutaṃ hanti bhārata |
tatsamāśca maheṣvāsā droṇadrauṇikṛpā api || 54 ||
[Analyze grammar]

saṃśaptāni ca vṛndāni kṣatriyāṇāṃ paraṃtapa |
arjunaṃ vayamasmānvā dhanaṃjaya iti sma ha || 55 ||
[Analyze grammar]

tāṃścālamiti manyante savyasācivadhe vibho |
pārthivāḥ sa bhavānrājannakasmādvyathate katham || 56 ||
[Analyze grammar]

bhīmasene ca nihate ko'nyo yudhyeta bhārata |
pareṣāṃ tanmamācakṣva yadi vettha paraṃtapa || 57 ||
[Analyze grammar]

pañca te bhrātaraḥ sarve dhṛṣṭadyumno'tha sātyakiḥ |
pareṣāṃ sapta ye rājanyodhāḥ paramakaṃ balam || 58 ||
[Analyze grammar]

asmākaṃ tu viśiṣṭā ye bhīṣmadroṇakṛpādayaḥ |
drauṇirvaikartanaḥ karṇaḥ somadatto'tha bāhlikaḥ || 59 ||
[Analyze grammar]

prāgjyotiṣādhipaḥ śalya āvantyo'tha jayadrathaḥ |
duḥśāsano durmukhaśca duḥsahaśca viśāṃ pate || 60 ||
[Analyze grammar]

śrutāyuścitrasenaśca purumitro viviṃśatiḥ |
śalo bhūriśravāścobhau vikarṇaśca tavātmajaḥ || 61 ||
[Analyze grammar]

akṣauhiṇyo hi me rājandaśaikā ca samāhṛtāḥ |
nyūnāḥ pareṣāṃ saptaiva kasmānme syātparājayaḥ || 62 ||
[Analyze grammar]

balaṃ triguṇato hīnaṃ yodhyaṃ prāha bṛhaspatiḥ |
parebhyastriguṇā ceyaṃ mama rājannanīkinī || 63 ||
[Analyze grammar]

guṇahīnaṃ pareṣāṃ ca bahu paśyāmi bhārata |
guṇodayaṃ bahuguṇamātmanaśca viśāṃ pate || 64 ||
[Analyze grammar]

etatsarvaṃ samājñāya balāgryaṃ mama bhārata |
nyūnatāṃ pāṇḍavānāṃ ca na mohaṃ gantumarhasi || 65 ||
[Analyze grammar]

vaiśaṃpāyana uvāca |
ityuktvā saṃjayaṃ bhūyaḥ paryapṛcchata bhārata |
vidhitsuḥ prāptakālāni jñātvā parapuraṃjayaḥ || 66 ||
[Analyze grammar]