Chapter 30

saṃjaya uvāca |
āmantraye tvā naradevadeva gacchāmyahaṃ pāṇḍava svasti te'stu |
kaccinna vācā vṛjinaṃ hi kiṃciduccāritaṃ me manaso'bhiṣaṅgāt || 1 ||
[Analyze grammar]

janārdanaṃ bhīmasenārjunau ca mādrīsutau sātyakiṃ cekitānam |
āmantrya gacchāmi śivaṃ sukhaṃ vaḥ saumyena māṃ paśyata cakṣuṣā nṛpāḥ || 2 ||
[Analyze grammar]

yudhiṣṭhira uvāca |
anujñātaḥ saṃjaya svasti gaccha na no'kārṣīrapriyaṃ jātu kiṃcit |
vidmaśca tvā te ca vayaṃ ca sarve śuddhātmānaṃ madhyagataṃ sabhāstham || 3 ||
[Analyze grammar]

āpto dūtaḥ saṃjaya supriyo'si kalyāṇavākśīlavāndṛṣṭimāṃśca |
na muhyestvaṃ saṃjaya jātu matyā na ca krudhyerucyamāno'pi tathyam || 4 ||
[Analyze grammar]

na marmagāṃ jātu vaktāsi rūkṣāṃ nopastutiṃ kaṭukāṃ nota śuktām |
dharmārāmāmarthavatīmahiṃsrāmetāṃ vācaṃ tava jānāmi sūta || 5 ||
[Analyze grammar]

tvameva naḥ priyatamo'si dūta ihāgacchedviduro vā dvitīyaḥ |
abhīkṣṇadṛṣṭo'si purā hi nastvaṃ dhanaṃjayasyātmasamaḥ sakhāsi || 6 ||
[Analyze grammar]

ito gatvā saṃjaya kṣiprameva upātiṣṭhethā brāhmaṇānye tadarhāḥ |
viśuddhavīryāṃścaraṇopapannānkule jātānsarvadharmopapannān || 7 ||
[Analyze grammar]

svādhyāyino brāhmaṇā bhikṣavaśca tapasvino ye ca nityā vaneṣu |
abhivādyā vai madvacanena vṛddhāstathetareṣāṃ kuśalaṃ vadethāḥ || 8 ||
[Analyze grammar]

purohitaṃ dhṛtarāṣṭrasya rājña ācāryāśca ṛtvijo ye ca tasya |
taiśca tvaṃ tāta sahitairyathārhaṃ saṃgacchethāḥ kuśalenaiva sūta || 9 ||
[Analyze grammar]

ācārya iṣṭo'napago vidheyo vedānīpsanbrahmacaryaṃ cacāra |
yo'straṃ catuṣpātpunareva cakre droṇaḥ prasanno'bhivādyo yathārham || 10 ||
[Analyze grammar]

adhītavidyaścaraṇopapanno yo'straṃ catuṣpātpunareva cakre |
gandharvaputrapratimaṃ tarasvinaṃ tamaśvatthāmānaṃ kuśalaṃ sma pṛccheḥ || 11 ||
[Analyze grammar]

śāradvatasyāvasathaṃ sma gatvā mahārathasyāstravidāṃ varasya |
tvaṃ māmabhīkṣṇaṃ parikīrtayanvai kṛpasya pādau saṃjaya pāṇinā spṛśeḥ || 12 ||
[Analyze grammar]

yasmiñśauryamānṛśaṃsyaṃ tapaśca prajñā śīlaṃ śrutisattve dhṛtiśca |
pādau gṛhītvā kurusattamasya bhīṣmasya māṃ tatra nivedayethāḥ || 13 ||
[Analyze grammar]

prajñācakṣuryaḥ praṇetā kurūṇāṃ bahuśruto vṛddhasevī manīṣī |
tasmai rājñe sthavirāyābhivādya ācakṣīthāḥ saṃjaya māmarogam || 14 ||
[Analyze grammar]

jyeṣṭhaḥ putro dhṛtarāṣṭrasya mando mūrkhaḥ śaṭhaḥ saṃjaya pāpaśīlaḥ |
praśāstā vai pṛthivī yena sarvā suyodhanaṃ kuśalaṃ tāta pṛccheḥ || 15 ||
[Analyze grammar]

bhrātā kanīyānapi tasya mandastathāśīlaḥ saṃjaya so'pi śaśvat |
maheṣvāsaḥ śūratamaḥ kurūṇāṃ duḥśāsanaṃ kuśalaṃ tāta pṛccheḥ || 16 ||
[Analyze grammar]

vṛndārakaṃ kavimartheṣvamūḍhaṃ mahāprajñaṃ sarvadharmopapannam |
na tasya yuddhaṃ rocate vai kadācidvaiśyāputraṃ kuśalaṃ tāta pṛccheḥ || 17 ||
[Analyze grammar]

nikartane devane yo'dvitīyaśchannopadhaḥ sādhudevī matākṣaḥ |
yo durjayo devitavyena saṃkhye sa citrasenaḥ kuśalaṃ tāta vācyaḥ || 18 ||
[Analyze grammar]

yasya kāmo vartate nityameva nānyaḥ śamādbhāratānāmiti sma |
sa bāhlikānāmṛṣabho manasvī purā yathā mābhivadetprasannaḥ || 19 ||
[Analyze grammar]

guṇairanekaiḥ pravaraiśca yukto vijñānavānnaiva ca niṣṭhuro yaḥ |
snehādamarṣaṃ sahate sadaiva sa somadattaḥ pūjanīyo mato me || 20 ||
[Analyze grammar]

arhattamaḥ kuruṣu saumadattiḥ sa no bhrātā saṃjaya matsakhā ca |
maheṣvāso rathināmuttamo yaḥ sahāmātyaḥ kuśalaṃ tasya pṛccheḥ || 21 ||
[Analyze grammar]

ye caivānye kurumukhyā yuvānaḥ putrāḥ pautrā bhrātaraścaiva ye naḥ |
yaṃ yameṣāṃ yena yenābhigaccheranāmayaṃ madvacanena vācyaḥ || 22 ||
[Analyze grammar]

ye rājānaḥ pāṇḍavāyodhanāya samānītā dhārtarāṣṭreṇa kecit |
vasātayaḥ śālvakāḥ kekayāśca tathāmbaṣṭhā ye trigartāśca mukhyāḥ || 23 ||
[Analyze grammar]

prācyodīcyā dākṣiṇātyāśca śūrāstathā pratīcyāḥ pārvatīyāśca sarve |
anṛśaṃsāḥ śīlavṛttopapannāsteṣāṃ sarveṣāṃ kuśalaṃ tāta pṛccheḥ || 24 ||
[Analyze grammar]

hastyārohā rathinaḥ sādinaśca padātayaścāryasaṃghā mahāntaḥ |
ākhyāya māṃ kuśalinaṃ sma teṣāmanāmayaṃ paripṛccheḥ samagrān || 25 ||
[Analyze grammar]

tathā rājño hyarthayuktānamātyāndauvārikānye ca senāṃ nayanti |
āyavyayaṃ ye gaṇayanti yuktā arthāṃśca ye mahataścintayanti || 26 ||
[Analyze grammar]

gāndhārarājaḥ śakuniḥ pārvatīyo nikartane yo'dvitīyo'kṣadevī |
mānaṃ kurvandhārtarāṣṭrasya sūta mithyābuddheḥ kuśalaṃ tāta pṛccheḥ || 27 ||
[Analyze grammar]

yaḥ pāṇḍavānekarathena vīraḥ samutsahatyapradhṛṣyānvijetum |
yo muhyatāṃ mohayitādvitīyo vaikartanaṃ kuśalaṃ tāta pṛccheḥ || 28 ||
[Analyze grammar]

sa eva bhaktaḥ sa guruḥ sa bhṛtyaḥ sa vai pitā sa ca mātā suhṛcca |
agādhabuddhirviduro dīrghadarśī sa no mantrī kuśalaṃ tāta pṛccheḥ || 29 ||
[Analyze grammar]

vṛddhāḥ striyo yāśca guṇopapannā yā jñāyante saṃjaya mātarastāḥ |
tābhiḥ sarvābhiḥ sahitābhiḥ sametya strībhirvṛddhābhirabhivādaṃ vadethāḥ || 30 ||
[Analyze grammar]

kaccitputrā jīvaputrāḥ susamyagvartante vo vṛttimanṛśaṃsarūpām |
iti smoktvā saṃjaya brūhi paścādajātaśatruḥ kuśalī saputraḥ || 31 ||
[Analyze grammar]

yā no bhāryāḥ saṃjaya vettha tatra tāsāṃ sarvāsāṃ kuśalaṃ tāta pṛccheḥ |
susaṃguptāḥ surabhayo'navadyāḥ kaccidgṛhānāvasathāpramattāḥ || 32 ||
[Analyze grammar]

kaccidvṛttiṃ śvaśureṣu bhadrāḥ kalyāṇīṃ vartadhvamanṛśaṃsarūpām |
yathā ca vaḥ syuḥ patayo'nukūlāstathā vṛttimātmanaḥ sthāpayadhvam || 33 ||
[Analyze grammar]

yā naḥ snuṣāḥ saṃjaya vettha tatra prāptāḥ kulebhyaśca guṇopapannāḥ |
prajāvatyo brūhi sametya tāśca yudhiṣṭhiro vo'bhyavadatprasannaḥ || 34 ||
[Analyze grammar]

kanyāḥ svajethāḥ sadaneṣu saṃjaya anāmayaṃ madvacanena pṛṣṭvā |
kalyāṇā vaḥ santu patayo'nukūlā yūyaṃ patīnāṃ bhavatānukūlāḥ || 35 ||
[Analyze grammar]

alaṃkṛtā vastravatyaḥ sugandhā abībhatsāḥ sukhitā bhogavatyaḥ |
laghu yāsāṃ darśanaṃ vākca laghvī veśastriyaḥ kuśalaṃ tāta pṛccheḥ || 36 ||
[Analyze grammar]

dāsīputrā ye ca dāsāḥ kurūṇāṃ tadāśrayā bahavaḥ kubjakhañjāḥ |
ākhyāya māṃ kuśalinaṃ sma tebhyo anāmayaṃ paripṛccherjaghanyam || 37 ||
[Analyze grammar]

kaccidvṛttirvartate vai purāṇī kaccidbhogāndhārtarāṣṭro dadāti |
aṅgahīnānkṛpaṇānvāmanāṃśca ānṛśaṃsyāddhṛtarāṣṭro bibharti || 38 ||
[Analyze grammar]

andhāśca sarve sthavirāstathaiva hastājīvā bahavo ye'tra santi |
ākhyāya māṃ kuśalinaṃ sma teṣāmanāmayaṃ paripṛccherjaghanyam || 39 ||
[Analyze grammar]

mā bhaiṣṭa duḥkhena kujīvitena nūnaṃ kṛtaṃ paralokeṣu pāpam |
nigṛhya śatrūnsuhṛdo'nugṛhya vāsobhirannena ca vo bhariṣye || 40 ||
[Analyze grammar]

santyeva me brāhmaṇebhyaḥ kṛtāni bhāvīnyatho no bata vartayanti |
paśyāmyahaṃ yuktarūpāṃstathaiva tāmeva siddhiṃ śrāvayethā nṛpaṃ tam || 41 ||
[Analyze grammar]

ye cānāthā durbalāḥ sarvakālamātmanyeva prayatante'tha mūḍhāḥ |
tāṃścāpi tvaṃ kṛpaṇānsarvathaiva asmadvākyātkuśalaṃ tāta pṛccheḥ || 42 ||
[Analyze grammar]

ye cāpyanye saṃśritā dhārtarāṣṭrānnānādigbhyo'bhyāgatāḥ sūtaputra |
dṛṣṭvā tāṃścaivārhataścāpi sarvānsaṃpṛcchethāḥ kuśalaṃ cāvyayaṃ ca || 43 ||
[Analyze grammar]

evaṃ sarvānāgatābhyāgatāṃśca rājño dūtānsarvadigbhyo'bhyupetān |
pṛṣṭvā sarvānkuśalaṃ tāṃśca sūta paścādahaṃ kuśalī teṣu vācyaḥ || 44 ||
[Analyze grammar]

na hīdṛśāḥ santyapare pṛthivyāṃ ye yodhakā dhārtarāṣṭreṇa labdhāḥ |
dharmastu nityo mama dharma eva mahābalaḥ śatrunibarhaṇāya || 45 ||
[Analyze grammar]

idaṃ punarvacanaṃ dhārtarāṣṭraṃ suyodhanaṃ saṃjaya śrāvayethāḥ |
yaste śarīre hṛdayaṃ dunoti kāmaḥ kurūnasapatno'nuśiṣyām || 46 ||
[Analyze grammar]

na vidyate yuktiretasya kācinnaivaṃvidhāḥ syāma yathā priyaṃ te |
dadasva vā śakrapuraṃ mamaiva yudhyasva vā bhāratamukhya vīra || 47 ||
[Analyze grammar]