Chapter 29

vāsudeva uvāca |
avināśaṃ saṃjaya pāṇḍavānāmicchāmyahaṃ bhūtimeṣāṃ priyaṃ ca |
tathā rājño dhṛtarāṣṭrasya sūta sadāśaṃse bahuputrasya vṛddhim || 1 ||
[Analyze grammar]

kāmo hi me saṃjaya nityameva nānyadbrūyāṃ tānprati śāmyateti |
rājñaśca hi priyametacchṛṇomi manye caitatpāṇḍavānāṃ samartham || 2 ||
[Analyze grammar]

suduṣkaraścātra śamo hi nūnaṃ pradarśitaḥ saṃjaya pāṇḍavena |
yasmingṛddho dhṛtarāṣṭraḥ saputraḥ kasmādeṣāṃ kalaho nātra mūrcchet || 3 ||
[Analyze grammar]

tattvaṃ dharmaṃ vicaransaṃjayeha mattaśca jānāsi yudhiṣṭhirācca |
atho kasmātsaṃjaya pāṇḍavasya utsāhinaḥ pūrayataḥ svakarma |
yathākhyātamāvasataḥ kuṭumbaṃ purākalpātsādhu vilopamāttha || 4 ||
[Analyze grammar]

asminvidhau vartamāne yathāvaduccāvacā matayo brāhmaṇānām |
karmaṇāhuḥ siddhimeke paratra hitvā karma vidyayā siddhimeke |
nābhuñjāno bhakṣyabhojyasya tṛpyedvidvānapīha viditaṃ brāhmaṇānām || 5 ||
[Analyze grammar]

yā vai vidyāḥ sādhayantīha karma tāsāṃ phalaṃ vidyate netarāsām |
tatreha vai dṛṣṭaphalaṃ tu karma pītvodakaṃ śāmyati tṛṣṇayārtaḥ || 6 ||
[Analyze grammar]

so'yaṃ vidhirvihitaḥ karmaṇaiva tadvartate saṃjaya tatra karma |
tatra yo'nyatkarmaṇaḥ sādhu manyenmoghaṃ tasya lapitaṃ durbalasya || 7 ||
[Analyze grammar]

karmaṇāmī bhānti devāḥ paratra karmaṇaiveha plavate mātariśvā |
ahorātre vidadhatkarmaṇaiva atandrito nityamudeti sūryaḥ || 8 ||
[Analyze grammar]

māsārdhamāsānatha nakṣatrayogānatandritaścandramā abhyupaiti |
atandrito dahate jātavedāḥ samidhyamānaḥ karma kurvanprajābhyaḥ || 9 ||
[Analyze grammar]

atandritā bhāramimaṃ mahāntaṃ bibharti devī pṛthivī balena |
atandritāḥ śīghramapo vahanti saṃtarpayantyaḥ sarvabhūtāni nadyaḥ || 10 ||
[Analyze grammar]

atandrito varṣati bhūritejāḥ saṃnādayannantarikṣaṃ divaṃ ca |
atandrito brahmacaryaṃ cacāra śreṣṭhatvamicchanbalabhiddevatānām || 11 ||
[Analyze grammar]

hitvā sukhaṃ manasaśca priyāṇi tena śakraḥ karmaṇā śraiṣṭhyamāpa |
satyaṃ dharmaṃ pālayannapramatto damaṃ titikṣāṃ samatāṃ priyaṃ ca |
etāni sarvāṇyupasevamāno devarājyaṃ maghavānprāpa mukhyam || 12 ||
[Analyze grammar]

bṛhaspatirbrahmacaryaṃ cacāra samāhitaḥ saṃśitātmā yathāvat |
hitvā sukhaṃ pratirudhyendriyāṇi tena devānāmagamadgauravaṃ saḥ || 13 ||
[Analyze grammar]

nakṣatrāṇi karmaṇāmutra bhānti rudrādityā vasavo'thāpi viśve |
yamo rājā vaiśravaṇaḥ kubero gandharvayakṣāpsarasaśca śubhrāḥ |
brahmacaryaṃ vedavidyāḥ kriyāśca niṣevamāṇā munayo'mutra bhānti || 14 ||
[Analyze grammar]

jānannimaṃ sarvalokasya dharmaṃ brāhmaṇānāṃ kṣatriyāṇāṃ viśāṃ ca |
sa kasmāttvaṃ jānatāṃ jñānavānsanvyāyacchase saṃjaya kauravārthe || 15 ||
[Analyze grammar]

āmnāyeṣu nityasaṃyogamasya tathāśvamedhe rājasūye ca viddhi |
saṃyujyate dhanuṣā varmaṇā ca hastatrāṇai rathaśastraiśca bhūyaḥ || 16 ||
[Analyze grammar]

te cedime kauravāṇāmupāyamadhigaccheyuravadhenaiva pārthāḥ |
dharmatrāṇaṃ puṇyameṣāṃ kṛtaṃ syādārye vṛtte bhīmasenaṃ nigṛhya || 17 ||
[Analyze grammar]

te cetpitrye karmaṇi vartamānā āpadyerandiṣṭavaśena mṛtyum |
yathāśaktyā pūrayantaḥ svakarma tadapyeṣāṃ nidhanaṃ syātpraśastam || 18 ||
[Analyze grammar]

utāho tvaṃ manyase sarvameva rājñāṃ yuddhe vartate dharmatantram |
ayuddhe vā vartate dharmatantraṃ tathaiva te vācamimāṃ śṛṇomi || 19 ||
[Analyze grammar]

cāturvarṇyasya prathamaṃ vibhāgamavekṣya tvaṃ saṃjaya svaṃ ca karma |
niśamyātho pāṇḍavānāṃ svakarma praśaṃsa vā ninda vā yā matiste || 20 ||
[Analyze grammar]

adhīyīta brāhmaṇo'tho yajeta dadyādiyāttīrthamukhyāni caiva |
adhyāpayedyājayeccāpi yājyānpratigrahānvā viditānpratīcchet || 21 ||
[Analyze grammar]

tathā rājanyo rakṣaṇaṃ vai prajānāṃ kṛtvā dharmeṇāpramatto'tha dattvā |
yajñairiṣṭvā sarvavedānadhītya dārānkṛtvā puṇyakṛdāvasedgṛhān || 22 ||
[Analyze grammar]

vaiśyo'dhītya kṛṣigorakṣapaṇyairvittaṃ cinvanpālayannapramattaḥ |
priyaṃ kurvanbrāhmaṇakṣatriyāṇāṃ dharmaśīlaḥ puṇyakṛdāvasedgṛhān || 23 ||
[Analyze grammar]

paricaryā vandanaṃ brāhmaṇānāṃ nādhīyīta pratiṣiddho'sya yajñaḥ |
nityotthito bhūtaye'tandritaḥ syādeṣa smṛtaḥ śūdradharmaḥ purāṇaḥ || 24 ||
[Analyze grammar]

etānrājā pālayannapramatto niyojayansarvavarṇānsvadharme |
akāmātmā samavṛttiḥ prajāsu nādhārmikānanurudhyeta kāmān || 25 ||
[Analyze grammar]

śreyāṃstasmādyadi vidyeta kaścidabhijñātaḥ sarvadharmopapannaḥ |
sa taṃ duṣṭamanuśiṣyātprajānanna cedgṛdhyediti tasminna sādhu || 26 ||
[Analyze grammar]

yadā gṛdhyetparabhūmiṃ nṛśaṃso vidhiprakopādbalamādadānaḥ |
tato rājñāṃ bhavitā yuddhametattatra jātaṃ varma śastraṃ dhanuśca |
indreṇedaṃ dasyuvadhāya karma utpāditaṃ varma śastraṃ dhanuśca || 27 ||
[Analyze grammar]

steno haredyatra dhanaṃ hyadṛṣṭaḥ prasahya vā yatra hareta dṛṣṭaḥ |
ubhau garhyau bhavataḥ saṃjayaitau kiṃ vai pṛthaktvaṃ dhṛtarāṣṭrasya putre |
yo'yaṃ lobhānmanyate dharmametaṃ yamicchate manyuvaśānugāmī || 28 ||
[Analyze grammar]

bhāgaḥ punaḥ pāṇḍavānāṃ niviṣṭastaṃ no'kasmādādadīranpare vai |
asminpade yudhyatāṃ no vadho'pi ślāghyaḥ pitryaḥ pararājyādviśiṣṭaḥ |
etāndharmānkauravāṇāṃ purāṇānācakṣīthāḥ saṃjaya rājyamadhye || 29 ||
[Analyze grammar]

ye te mandā mṛtyuvaśābhipannāḥ samānītā dhārtarāṣṭreṇa mūḍhāḥ |
idaṃ punaḥ karma pāpīya eva sabhāmadhye paśya vṛttaṃ kurūṇām || 30 ||
[Analyze grammar]

priyāṃ bhāryāṃ draupadīṃ pāṇḍavānāṃ yaśasvinīṃ śīlavṛttopapannām |
yadupekṣanta kuravo bhīṣmamukhyāḥ kāmānugenoparuddhāṃ rudantīm || 31 ||
[Analyze grammar]

taṃ cettadā te sakumāravṛddhā avārayiṣyankuravaḥ sametāḥ |
mama priyaṃ dhṛtarāṣṭro'kariṣyatputrāṇāṃ ca kṛtamasyābhaviṣyat || 32 ||
[Analyze grammar]

duḥśāsanaḥ prātilomyānnināya sabhāmadhye śvaśurāṇāṃ ca kṛṣṇām |
sā tatra nītā karuṇānyavocannānyaṃ kṣatturnāthamadṛṣṭa kaṃcit || 33 ||
[Analyze grammar]

kārpaṇyādeva sahitāstatra rājño nāśaknuvanprativaktuṃ sabhāyām |
ekaḥ kṣattā dharmyamarthaṃ bruvāṇo dharmaṃ buddhvā pratyuvācālpabuddhim || 34 ||
[Analyze grammar]

anuktvā tvaṃ dharmamevaṃ sabhāyāmathecchase pāṇḍavasyopadeṣṭum |
kṛṣṇā tvetatkarma cakāra śuddhaṃ suduṣkaraṃ taddhi sabhāṃ sametya |
yena kṛcchrātpāṇḍavānujjahāra tathātmānaṃ nauriva sāgaraughāt || 35 ||
[Analyze grammar]

yatrābravītsūtaputraḥ sabhāyāṃ kṛṣṇāṃ sthitāṃ śvaśurāṇāṃ samīpe |
na te gatirvidyate yājñaseni prapadyedānīṃ dhārtarāṣṭrasya veśma |
parājitāste patayo na santi patiṃ cānyaṃ bhāmini tvaṃ vṛṇīṣva || 36 ||
[Analyze grammar]

yo bībhatsorhṛdaye prauḍha āsīdasthipracchinmarmaghātī sughoraḥ |
karṇāccharo vāṅmayastigmatejāḥ pratiṣṭhito hṛdaye phalgunasya || 37 ||
[Analyze grammar]

kṛṣṇājināni paridhitsamānānduḥśāsanaḥ kaṭukānyabhyabhāṣat |
ete sarve ṣaṇḍhatilā vinaṣṭāḥ kṣayaṃ gatā narakaṃ dīrghakālam || 38 ||
[Analyze grammar]

gāndhārarājaḥ śakunirnikṛtyā yadabravīddyūtakāle sa pārthān |
parājito nakulaḥ kiṃ tavāsti kṛṣṇayā tvaṃ dīvya vai yājñasenyā || 39 ||
[Analyze grammar]

jānāsi tvaṃ saṃjaya sarvametaddyūte'vācyaṃ vākyamevaṃ yathoktam |
svayaṃ tvahaṃ prārthaye tatra gantuṃ samādhātuṃ kāryametadvipannam || 40 ||
[Analyze grammar]

ahāpayitvā yadi pāṇḍavārthaṃ śamaṃ kurūṇāmatha ceccareyam |
puṇyaṃ ca me syāccaritaṃ mahodayaṃ mucyeraṃśca kuravo mṛtyupāśāt || 41 ||
[Analyze grammar]

api vācaṃ bhāṣamāṇasya kāvyāṃ dharmārāmāmarthavatīmahiṃsrām |
avekṣerandhārtarāṣṭrāḥ samakṣaṃ māṃ ca prāptaṃ kuravaḥ pūjayeyuḥ || 42 ||
[Analyze grammar]

ato'nyathā rathinā phalgunena bhīmena caivāhavadaṃśitena |
parāsiktāndhārtarāṣṭrāṃstu viddhi pradahyamānānkarmaṇā svena mandān || 43 ||
[Analyze grammar]

parājitānpāṇḍaveyāṃstu vāco raudrarūpā bhāṣate dhārtarāṣṭraḥ |
gadāhasto bhīmaseno'pramatto duryodhanaṃ smārayitvā hi kāle || 44 ||
[Analyze grammar]

suyodhano manyumayo mahādrumaḥ skandhaḥ karṇaḥ śakunistasya śākhāḥ |
duḥśāsanaḥ puṣpaphale samṛddhe mūlaṃ rājā dhṛtarāṣṭro'manīṣī || 45 ||
[Analyze grammar]

yudhiṣṭhiro dharmamayo mahādrumaḥ skandho'rjuno bhīmaseno'sya śākhāḥ |
mādrīputrau puṣpaphale samṛddhe mūlaṃ tvahaṃ brahma ca brāhmaṇāśca || 46 ||
[Analyze grammar]

vanaṃ rājā dhṛtarāṣṭraḥ saputro vyāghrā vane saṃjaya pāṇḍaveyāḥ |
mā vanaṃ chindhi savyāghraṃ mā vyāghrānnīnaśo vanāt || 47 ||
[Analyze grammar]

nirvano vadhyate vyāghro nirvyāghraṃ chidyate vanam |
tasmādvyāghro vanaṃ rakṣedvanaṃ vyāghraṃ ca pālayet || 48 ||
[Analyze grammar]

latādharmā dhārtarāṣṭrāḥ śālāḥ saṃjaya pāṇḍavāḥ |
na latā vardhate jātu anāśritya mahādrumam || 49 ||
[Analyze grammar]

sthitāḥ śuśrūṣituṃ pārthāḥ sthitā yoddhumariṃdamāḥ |
yatkṛtyaṃ dhṛtarāṣṭrasya tatkarotu narādhipaḥ || 50 ||
[Analyze grammar]

sthitāḥ śame mahātmānaḥ pāṇḍavā dharmacāriṇaḥ |
yodhāḥ samṛddhāstadvidvannācakṣīthā yathātatham || 51 ||
[Analyze grammar]