Chapter 238

duryodhana uvāca |
citrasenaṃ samāgamya prahasannarjunastadā |
idaṃ vacanamaklībamabravītparavīrahā || 1 ||
[Analyze grammar]

bhrātṝnarhasi no vīra moktuṃ gandharvasattama |
anarhā dharṣaṇaṃ hīme jīvamāneṣu pāṇḍuṣu || 2 ||
[Analyze grammar]

evamuktastu gandharvaḥ pāṇḍavena mahātmanā |
uvāca yatkarṇa vayaṃ mantrayanto vinirgatāḥ |
draṣṭāraḥ sma sukhāddhīnānsadārānpāṇḍavāniti || 3 ||
[Analyze grammar]

tasminnuccāryamāṇe tu gandharveṇa vacasyatha |
bhūmervivaramanvaicchaṃ praveṣṭuṃ vrīḍayānvitaḥ || 4 ||
[Analyze grammar]

yudhiṣṭhiramathāgamya gandharvāḥ saha pāṇḍavaiḥ |
asmaddurmantritaṃ tasmai baddhāṃścāsmānnyavedayan || 5 ||
[Analyze grammar]

strīsamakṣamahaṃ dīno baddhaḥ śatruvaśaṃ gataḥ |
yudhiṣṭhirasyopahṛtaḥ kiṃ nu duḥkhamataḥ param || 6 ||
[Analyze grammar]

ye me nirākṛtā nityaṃ ripuryeṣāmahaṃ sadā |
tairmokṣito'haṃ durbuddhirdattaṃ tairjīvitaṃ ca me || 7 ||
[Analyze grammar]

prāptaḥ syāṃ yadyahaṃ vīra vadhaṃ tasminmahāraṇe |
śreyastadbhavitā mahyamevaṃbhūtaṃ na jīvitam || 8 ||
[Analyze grammar]

bhavedyaśaḥ pṛthivyāṃ me khyātaṃ gandharvato vadhāt |
prāptāśca lokāḥ puṇyāḥ syurmahendrasadane'kṣayāḥ || 9 ||
[Analyze grammar]

yattvadya me vyavasitaṃ tacchṛṇudhvaṃ nararṣabhāḥ |
iha prāyamupāsiṣye yūyaṃ vrajata vai gṛhān |
bhrātaraścaiva me sarve prayāntvadya puraṃ prati || 10 ||
[Analyze grammar]

karṇaprabhṛtayaścaiva suhṛdo bāndhavāśca ye |
duḥśāsanaṃ puraskṛtya prayāntvadya puraṃ prati || 11 ||
[Analyze grammar]

na hyahaṃ pratiyāsyāmi puraṃ śatrunirākṛtaḥ |
śatrumānāpaho bhūtvā suhṛdāṃ mānakṛttathā || 12 ||
[Analyze grammar]

sa suhṛcchokado bhūtvā śatrūṇāṃ harṣavardhanaḥ |
vāraṇāhvayamāsādya kiṃ vakṣyāmi janādhipam || 13 ||
[Analyze grammar]

bhīṣmo droṇaḥ kṛpo drauṇirviduraḥ saṃjayastathā |
bāhlīkaḥ somadattaśca ye cānye vṛddhasaṃmatāḥ || 14 ||
[Analyze grammar]

brāhmaṇāḥ śreṇimukhyāśca tathodāsīnavṛttayaḥ |
kiṃ māṃ vakṣyanti kiṃ cāpi prativakṣyāmi tānaham || 15 ||
[Analyze grammar]

ripūṇāṃ śirasi sthitvā tathā vikramya corasi |
ātmadoṣātparibhraṣṭaḥ kathaṃ vakṣyāmi tānaham || 16 ||
[Analyze grammar]

durvinītāḥ śriyaṃ prāpya vidyāmaiśvaryameva ca |
tiṣṭhanti na ciraṃ bhadre yathāhaṃ madagarvitaḥ || 17 ||
[Analyze grammar]

aho bata yathedaṃ me kaṣṭaṃ duścaritaṃ kṛtam |
svayaṃ durbuddhinā mohādyena prāpto'smi saṃśayam || 18 ||
[Analyze grammar]

tasmātprāyamupāsiṣye na hi śakṣyāmi jīvitum |
cetayāno hi ko jīvetkṛcchrācchatrubhiruddhṛtaḥ || 19 ||
[Analyze grammar]

śatrubhiścāvahasito mānī pauruṣavarjitaḥ |
pāṇḍavairvikramāḍhyaiśca sāvamānamavekṣitaḥ || 20 ||
[Analyze grammar]

vaiśaṃpāyana uvāca |
evaṃ cintāparigato duḥśāsanamathābravīt |
duḥśāsana nibodhedaṃ vacanaṃ mama bhārata || 21 ||
[Analyze grammar]

pratīccha tvaṃ mayā dattamabhiṣekaṃ nṛpo bhava |
praśādhi pṛthivīṃ sphītāṃ karṇasaubalapālitām || 22 ||
[Analyze grammar]

bhrātṝnpālaya visrabdhaṃ maruto vṛtrahā yathā |
bāndhavāstvopajīvantu devā iva śatakratum || 23 ||
[Analyze grammar]

brāhmaṇeṣu sadā vṛttiṃ kurvīthāścāpramādataḥ |
bandhūnāṃ suhṛdāṃ caiva bhavethāstvaṃ gatiḥ sadā || 24 ||
[Analyze grammar]

jñātīṃścāpyanupaśyethā viṣṇurdevagaṇāniva |
guravaḥ pālanīyāste gaccha pālaya medinīm || 25 ||
[Analyze grammar]

nandayansuhṛdaḥ sarvāñśātravāṃścāvabhartsayan |
kaṇṭhe cainaṃ pariṣvajya gamyatāmityuvāca ha || 26 ||
[Analyze grammar]

tasya tadvacanaṃ śrutvā dīno duḥśāsano'bravīt |
aśrukaṇṭhaḥ suduḥkhārtaḥ prāñjaliḥ praṇipatya ca |
sagadgadamidaṃ vākyaṃ bhrātaraṃ jyeṣṭhamātmanaḥ || 27 ||
[Analyze grammar]

prasīdetyapatadbhūmau dūyamānena cetasā |
duḥkhitaḥ pādayostasya netrajaṃ jalamutsṛjan || 28 ||
[Analyze grammar]

uktavāṃśca naravyāghro naitadevaṃ bhaviṣyati |
vidīryetsanagā bhūmirdyauścāpi śakalībhavet |
ravirātmaprabhāṃ jahyātsomaḥ śītāṃśutāṃ tyajet || 29 ||
[Analyze grammar]

vāyuḥ śaighryamatho jahyāddhimavāṃśca parivrajet |
śuṣyettoyaṃ samudreṣu vahnirapyuṣṇatāṃ tyajet || 30 ||
[Analyze grammar]

na cāhaṃ tvadṛte rājanpraśāseyaṃ vasuṃdharām |
punaḥ punaḥ prasīdeti vākyaṃ cedamuvāca ha |
tvameva naḥ kule rājā bhaviṣyasi śataṃ samāḥ || 31 ||
[Analyze grammar]

evamuktvā sa rājendra sasvanaṃ praruroda ha |
pādau saṃgṛhya mānārhau bhrāturjyeṣṭhasya bhārata || 32 ||
[Analyze grammar]

tathā tau duḥkhitau dṛṣṭvā duḥśāsanasuyodhanau |
abhigamya vyathāviṣṭaḥ karṇastau pratyabhāṣata || 33 ||
[Analyze grammar]

viṣīdathaḥ kiṃ kauravyau bāliśyātprākṛtāviva |
na śokaḥ śocamānasya vinivarteta kasyacit || 34 ||
[Analyze grammar]

yadā ca śocataḥ śoko vyasanaṃ nāpakarṣati |
sāmarthyaṃ kiṃ tvataḥ śoke śocamānau prapaśyathaḥ |
dhṛtiṃ gṛhṇīta mā śatrūñśocantau nandayiṣyathaḥ || 35 ||
[Analyze grammar]

kartavyaṃ hi kṛtaṃ rājanpāṇḍavaistava mokṣaṇam |
nityameva priyaṃ kāryaṃ rājño viṣayavāsibhiḥ |
pālyamānāstvayā te hi nivasanti gatajvarāḥ || 36 ||
[Analyze grammar]

nārhasyevaṃgate manyuṃ kartuṃ prākṛtavadyathā |
viṣaṇṇāstava sodaryāstvayi prāyaṃ samāsthite |
uttiṣṭha vraja bhadraṃ te samāśvāsaya sodarān || 37 ||
[Analyze grammar]

rājannadyāvagacchāmi taveha laghusattvatām |
kimatra citraṃ yadvīra mokṣitaḥ pāṇḍavairasi |
sadyo vaśaṃ samāpannaḥ śatrūṇāṃ śatrukarśana || 38 ||
[Analyze grammar]

senājīvaiśca kauravya tathā viṣayavāsibhiḥ |
ajñātairyadi vā jñātaiḥ kartavyaṃ nṛpateḥ priyam || 39 ||
[Analyze grammar]

prāyaḥ pradhānāḥ puruṣāḥ kṣobhayantyarivāhinīm |
nigṛhyante ca yuddheṣu mokṣyante ca svasainikaiḥ || 40 ||
[Analyze grammar]

senājīvāśca ye rājñāṃ viṣaye santi mānavāḥ |
taiḥ saṃgamya nṛpārthāya yatitavyaṃ yathātatham || 41 ||
[Analyze grammar]

yadyevaṃ pāṇḍavai rājanbhavadviṣayavāsibhiḥ |
yadṛcchayā mokṣito'dya tatra kā paridevanā || 42 ||
[Analyze grammar]

na caitatsādhu yadrājanpāṇḍavāstvāṃ nṛpottama |
svasenayā saṃprayāntaṃ nānuyānti sma pṛṣṭhataḥ || 43 ||
[Analyze grammar]

śūrāśca balavantaśca saṃyugeṣvapalāyinaḥ |
bhavataste sabhāyāṃ vai preṣyatāṃ pūrvamāgatāḥ || 44 ||
[Analyze grammar]

pāṇḍaveyāni ratnāni tvamadyāpyupabhuñjase |
sattvasthānpāṇḍavānpaśya na te prāyamupāviśan |
uttiṣṭha rājanbhadraṃ te na cintāṃ kartumarhasi || 45 ||
[Analyze grammar]

avaśyameva nṛpate rājño viṣayavāsibhiḥ |
priyāṇyācaritavyāni tatra kā paridevanā || 46 ||
[Analyze grammar]

madvākyametadrājendra yadyevaṃ na kariṣyasi |
sthāsyāmīha bhavatpādau śuśrūṣannarimardana || 47 ||
[Analyze grammar]

notsahe jīvitumahaṃ tvadvihīno nararṣabha |
prāyopaviṣṭastu nṛpa rājñāṃ hāsyo bhaviṣyasi || 48 ||
[Analyze grammar]

vaiśaṃpāyana uvāca |
evamuktastu karṇena rājā duryodhanastadā |
naivotthātuṃ manaścakre svargāya kṛtaniścayaḥ || 49 ||
[Analyze grammar]