Chapter 19

vāsudeva uvāca |
eṣa pārtha mahānsvāduḥ paśumānnityamambumān |
nirāmayaḥ suveśmāḍhyo niveśo māgadhaḥ śubhaḥ || 1 ||
[Analyze grammar]

vaihāro vipulaḥ śailo varāho vṛṣabhastathā |
tathaivarṣigiristāta śubhāścaityakapañcamāḥ || 2 ||
[Analyze grammar]

ete pañca mahāśṛṅgāḥ parvatāḥ śītaladrumāḥ |
rakṣantīvābhisaṃhatya saṃhatāṅgā girivrajam || 3 ||
[Analyze grammar]

puṣpaveṣṭitaśākhāgrairgandhavadbhirmanoramaiḥ |
nigūḍhā iva lodhrāṇāṃ vanaiḥ kāmijanapriyaiḥ || 4 ||
[Analyze grammar]

śūdrāyāṃ gautamo yatra mahātmā saṃśitavrataḥ |
auśīnaryāmajanayatkākṣīvādīnsutānṛṣiḥ || 5 ||
[Analyze grammar]

gautamaḥ kṣayaṇādasmādathāsau tatra veśmani |
bhajate māgadhaṃ vaṃśaṃ sa nṛpāṇāmanugrahāt || 6 ||
[Analyze grammar]

aṅgavaṅgādayaścaiva rājānaḥ sumahābalāḥ |
gautamakṣayamabhyetya ramante sma purārjuna || 7 ||
[Analyze grammar]

vanarājīstu paśyemāḥ priyālānāṃ manoramāḥ |
lodhrāṇāṃ ca śubhāḥ pārtha gautamaukaḥsamīpajāḥ || 8 ||
[Analyze grammar]

arbudaḥ śakravāpī ca pannagau śatrutāpanau |
svastikasyālayaścātra maṇināgasya cottamaḥ || 9 ||
[Analyze grammar]

aparihāryā meghānāṃ māgadheyaṃ maṇeḥ kṛte |
kauśiko maṇimāṃścaiva vavṛdhāte hyanugraham || 10 ||
[Analyze grammar]

arthasiddhiṃ tvanapagāṃ jarāsaṃdho'bhimanyate |
vayamāsādane tasya darpamadya nihanma hi || 11 ||
[Analyze grammar]

vaiśaṃpāyana uvāca |
evamuktvā tataḥ sarve bhrātaro vipulaujasaḥ |
vārṣṇeyaḥ pāṇḍaveyau ca pratasthurmāgadhaṃ puram || 12 ||
[Analyze grammar]

tuṣṭapuṣṭajanopetaṃ cāturvarṇyajanākulam |
sphītotsavamanādhṛṣyamāseduśca girivrajam || 13 ||
[Analyze grammar]

te'tha dvāramanāsādya purasya girimucchritam |
bārhadrathaiḥ pūjyamānaṃ tathā nagaravāsibhiḥ || 14 ||
[Analyze grammar]

yatra māṣādamṛṣabhamāsasāda bṛhadrathaḥ |
taṃ hatvā māṣanālāśca tisro bherīrakārayat || 15 ||
[Analyze grammar]

ānahya carmaṇā tena sthāpayāmāsa sve pure |
yatra tāḥ prāṇadanbheryo divyapuṣpāvacūrṇitāḥ || 16 ||
[Analyze grammar]

māgadhānāṃ suruciraṃ caityakāntaṃ samādravan |
śirasīva jighāṃsanto jarāsaṃdhajighāṃsavaḥ || 17 ||
[Analyze grammar]

sthiraṃ suvipulaṃ śṛṅgaṃ sumahāntaṃ purātanam |
arcitaṃ mālyadāmaiśca satataṃ supratiṣṭhitam || 18 ||
[Analyze grammar]

vipulairbāhubhirvīrāste'bhihatyābhyapātayan |
tataste māgadhaṃ dṛṣṭvā puraṃ praviviśustadā || 19 ||
[Analyze grammar]

etasminneva kāle tu jarāsaṃdhaṃ samarcayan |
paryagni kurvaṃśca nṛpaṃ dviradasthaṃ purohitāḥ || 20 ||
[Analyze grammar]

snātakavratinaste tu bāhuśastrā nirāyudhāḥ |
yuyutsavaḥ praviviśurjarāsaṃdhena bhārata || 21 ||
[Analyze grammar]

bhakṣyamālyāpaṇānāṃ ca dadṛśuḥ śriyamuttamām |
sphītāṃ sarvaguṇopetāṃ sarvakāmasamṛddhinīm || 22 ||
[Analyze grammar]

tāṃ tu dṛṣṭvā samṛddhiṃ te vīthyāṃ tasyāṃ narottamāḥ |
rājamārgeṇa gacchantaḥ kṛṣṇabhīmadhanaṃjayāḥ || 23 ||
[Analyze grammar]

balādgṛhītvā mālyāni mālākārānmahābalāḥ |
virāgavasanāḥ sarve sragviṇo mṛṣṭakuṇḍalāḥ || 24 ||
[Analyze grammar]

niveśanamathājagmurjarāsaṃdhasya dhīmataḥ |
govāsamiva vīkṣantaḥ siṃhā haimavatā yathā || 25 ||
[Analyze grammar]

śailastambhanibhāsteṣāṃ candanāgurubhūṣitāḥ |
aśobhanta mahārāja bāhavo bāhuśālinām || 26 ||
[Analyze grammar]

tāndṛṣṭvā dviradaprakhyāñśālaskandhānivodgatān |
vyūḍhoraskānmāgadhānāṃ vismayaḥ samajāyata || 27 ||
[Analyze grammar]

te tvatītya janākīrṇāstisraḥ kakṣyā nararṣabhāḥ |
ahaṃkāreṇa rājānamupatasthurmahābalāḥ || 28 ||
[Analyze grammar]

tānpādyamadhuparkārhānmānārhānsatkṛtiṃ gatān |
pratyutthāya jarāsaṃdha upatasthe yathāvidhi || 29 ||
[Analyze grammar]

uvāca caitānrājāsau svāgataṃ vo'stviti prabhuḥ |
tasya hyetadvrataṃ rājanbabhūva bhuvi viśrutam || 30 ||
[Analyze grammar]

snātakānbrāhmaṇānprāptāñśrutvā sa samitiṃjayaḥ |
apyardharātre nṛpatiḥ pratyudgacchati bhārata || 31 ||
[Analyze grammar]

tāṃstvapūrveṇa veṣeṇa dṛṣṭvā nṛpatisattamaḥ |
upatasthe jarāsaṃdho vismitaścābhavattadā || 32 ||
[Analyze grammar]

te tu dṛṣṭvaiva rājānaṃ jarāsaṃdhaṃ nararṣabhāḥ |
idamūcuramitraghnāḥ sarve bharatasattama || 33 ||
[Analyze grammar]

svastyastu kuśalaṃ rājanniti sarve vyavasthitāḥ |
taṃ nṛpaṃ nṛpaśārdūla vipraikṣanta parasparam || 34 ||
[Analyze grammar]

tānabravījjarāsaṃdhastadā yādavapāṇḍavān |
āsyatāmiti rājendra brāhmaṇacchadmasaṃvṛtān || 35 ||
[Analyze grammar]

athopaviviśuḥ sarve trayaste puruṣarṣabhāḥ |
saṃpradīptāstrayo lakṣmyā mahādhvara ivāgnayaḥ || 36 ||
[Analyze grammar]

tānuvāca jarāsaṃdhaḥ satyasaṃdho narādhipaḥ |
vigarhamāṇaḥ kauravya veṣagrahaṇakāraṇāt || 37 ||
[Analyze grammar]

na snātakavratā viprā bahirmālyānulepanāḥ |
bhavantīti nṛloke'sminviditaṃ mama sarvaśaḥ || 38 ||
[Analyze grammar]

te yūyaṃ puṣpavantaśca bhujairjyāghātalakṣaṇaiḥ |
bibhrataḥ kṣātramojaśca brāhmaṇyaṃ pratijānatha || 39 ||
[Analyze grammar]

evaṃ virāgavasanā bahirmālyānulepanāḥ |
satyaṃ vadata ke yūyaṃ satyaṃ rājasu śobhate || 40 ||
[Analyze grammar]

caityakaṃ ca gireḥ śṛṅgaṃ bhittvā kimiva sadma naḥ |
advāreṇa praviṣṭāḥ stha nirbhayā rājakilbiṣāt || 41 ||
[Analyze grammar]

karma caitadviliṅgasya kiṃ vādya prasamīkṣitam |
vadadhvaṃ vāci vīryaṃ ca brāhmaṇasya viśeṣataḥ || 42 ||
[Analyze grammar]

evaṃ ca māmupasthāya kasmācca vidhinārhaṇām |
praṇītāṃ no na gṛhṇīta kāryaṃ kiṃ cāsmadāgame || 43 ||
[Analyze grammar]

evamuktastataḥ kṛṣṇaḥ pratyuvāca mahāmanāḥ |
snigdhagambhīrayā vācā vākyaṃ vākyaviśāradaḥ || 44 ||
[Analyze grammar]

snātakavratino rājanbrāhmaṇāḥ kṣatriyā viśaḥ |
viśeṣaniyamāścaiṣāmaviśeṣāśca santyuta || 45 ||
[Analyze grammar]

viśeṣavāṃśca satataṃ kṣatriyaḥ śriyamarchati |
puṣpavatsu dhruvā śrīśca puṣpavantastato vayam || 46 ||
[Analyze grammar]

kṣatriyo bāhuvīryastu na tathā vākyavīryavān |
apragalbhaṃ vacastasya tasmādbārhadrathe smṛtam || 47 ||
[Analyze grammar]

svavīryaṃ kṣatriyāṇāṃ ca bāhvordhātā nyaveśayat |
taddidṛkṣasi cedrājandraṣṭāsyadya na saṃśayaḥ || 48 ||
[Analyze grammar]

advāreṇa riporgehaṃ dvāreṇa suhṛdo gṛham |
praviśanti sadā santo dvāraṃ no varjitaṃ tataḥ || 49 ||
[Analyze grammar]

kāryavanto gṛhānetya śatruto nārhaṇāṃ vayam |
pratigṛhṇīma tadviddhi etannaḥ śāśvataṃ vratam || 50 ||
[Analyze grammar]