Chapter 89

janamejaya uvāca |
bhagavañśrotumicchāmi pūrorvaṃśakarānnṛpān |
yadvīryā yādṛśāścaiva yāvanto yatparākramāḥ || 1 ||
[Analyze grammar]

na hyasmiñśīlahīno vā nirvīryo vā narādhipaḥ |
prajāvirahito vāpi bhūtapūrvaḥ kadācana || 2 ||
[Analyze grammar]

teṣāṃ prathitavṛttānāṃ rājñāṃ vijñānaśālinām |
caritaṃ śrotumicchāmi vistareṇa tapodhana || 3 ||
[Analyze grammar]

vaiśaṃpāyana uvāca |
hanta te kathayiṣyāmi yanmāṃ tvaṃ paripṛcchasi |
pūrorvaṃśadharānvīrāñśakrapratimatejasaḥ || 4 ||
[Analyze grammar]

pravīreśvararaudrāśvāstrayaḥ putrā mahārathāḥ |
pūroḥ pauṣṭyāmajāyanta pravīrastatra vaṃśakṛt || 5 ||
[Analyze grammar]

manasyurabhavattasmācchūraḥ śyenīsutaḥ prabhuḥ |
pṛthivyāścaturantāyā goptā rājīvalocanaḥ || 6 ||
[Analyze grammar]

subhrūḥ saṃhanano vāgmī sauvīrītanayāstrayaḥ |
manasyorabhavanputrāḥ śūrāḥ sarve mahārathāḥ || 7 ||
[Analyze grammar]

raudrāśvasya maheṣvāsā daśāpsarasi sūnavaḥ |
yajvāno jajñire śūrāḥ prajāvanto bahuśrutāḥ |
sarve sarvāstravidvāṃsaḥ sarve dharmaparāyaṇāḥ || 8 ||
[Analyze grammar]

ṛcepuratha kakṣepuḥ kṛkaṇepuśca vīryavān |
sthaṇḍilepurvanepuśca sthalepuśca mahārathaḥ || 9 ||
[Analyze grammar]

tejepurbalavāndhīmānsatyepuścendravikramaḥ |
dharmepuḥ saṃnatepuśca daśamo devavikramaḥ |
anādhṛṣṭisutāstāta rājasūyāśvamedhinaḥ || 10 ||
[Analyze grammar]

matinārastato rājā vidvāṃścarceputo'bhavat |
matinārasutā rājaṃścatvāro'mitavikramāḥ |
taṃsurmahānatiratho druhyuścāpratimadyutiḥ || 11 ||
[Analyze grammar]

teṣāṃ taṃsurmahāvīryaḥ pauravaṃ vaṃśamudvahan |
ājahāra yaśo dīptaṃ jigāya ca vasuṃdharām || 12 ||
[Analyze grammar]

ilinaṃ tu sutaṃ taṃsurjanayāmāsa vīryavān |
so'pi kṛtsnāmimāṃ bhūmiṃ vijigye jayatāṃ varaḥ || 13 ||
[Analyze grammar]

rathaṃtaryāṃ sutānpañca pañcabhūtopamāṃstataḥ |
ilino janayāmāsa duḥṣantaprabhṛtīnnṛpa || 14 ||
[Analyze grammar]

duḥṣantaṃ śūrabhīmau ca prapūrvaṃ vasumeva ca |
teṣāṃ jyeṣṭho'bhavadrājā duḥṣanto janamejaya || 15 ||
[Analyze grammar]

duḥṣantādbharato jajñe vidvāñśākuntalo nṛpaḥ |
tasmādbharatavaṃśasya vipratasthe mahadyaśaḥ || 16 ||
[Analyze grammar]

bharatastisṛṣu strīṣu nava putrānajījanat |
nābhyanandanta tānrājā nānurūpā mametyuta || 17 ||
[Analyze grammar]

tato mahadbhiḥ kratubhirījāno bharatastadā |
lebhe putraṃ bharadvājādbhumanyuṃ nāma bhārata || 18 ||
[Analyze grammar]

tataḥ putriṇamātmānaṃ jñātvā pauravanandanaḥ |
bhumanyuṃ bharataśreṣṭha yauvarājye'bhyaṣecayat || 19 ||
[Analyze grammar]

tatastasya mahīndrasya vitathaḥ putrako'bhavat |
tataḥ sa vitatho nāma bhumanyorabhavatsutaḥ || 20 ||
[Analyze grammar]

suhotraśca suhotā ca suhaviḥ suyajustathā |
puṣkariṇyāmṛcīkasya bhumanyorabhavansutāḥ || 21 ||
[Analyze grammar]

teṣāṃ jyeṣṭhaḥ suhotrastu rājyamāpa mahīkṣitām |
rājasūyāśvamedhādyaiḥ so'yajadbahubhiḥ savaiḥ || 22 ||
[Analyze grammar]

suhotraḥ pṛthivīṃ sarvāṃ bubhuje sāgarāmbarām |
pūrṇāṃ hastigavāśvasya bahuratnasamākulām || 23 ||
[Analyze grammar]

mamajjeva mahī tasya bhūribhārāvapīḍitā |
hastyaśvarathasaṃpūrṇā manuṣyakalilā bhṛśam || 24 ||
[Analyze grammar]

suhotre rājani tadā dharmataḥ śāsati prajāḥ |
caityayūpāṅkitā cāsīdbhūmiḥ śatasahasraśaḥ |
pravṛddhajanasasyā ca sahadevā vyarocata || 25 ||
[Analyze grammar]

aikṣvākī janayāmāsa suhotrātpṛthivīpateḥ |
ajamīḍhaṃ sumīḍhaṃ ca purumīḍhaṃ ca bhārata || 26 ||
[Analyze grammar]

ajamīḍho varasteṣāṃ tasminvaṃśaḥ pratiṣṭhitaḥ |
ṣaṭputrānso'pyajanayattisṛṣu strīṣu bhārata || 27 ||
[Analyze grammar]

ṛkṣaṃ dhūminyatho nīlī duḥṣantaparameṣṭhinau |
keśinyajanayajjahnumubhau ca janarūpiṇau || 28 ||
[Analyze grammar]

tatheme sarvapāñcālā duḥṣantaparameṣṭhinoḥ |
anvayāḥ kuśikā rājañjahnoramitatejasaḥ || 29 ||
[Analyze grammar]

janarūpiṇayorjyeṣṭhamṛkṣamāhurjanādhipam |
ṛkṣātsaṃvaraṇo jajñe rājanvaṃśakarastava || 30 ||
[Analyze grammar]

ārkṣe saṃvaraṇe rājanpraśāsati vasuṃdharām |
saṃkṣayaḥ sumahānāsītprajānāmiti śuśrumaḥ || 31 ||
[Analyze grammar]

vyaśīryata tato rāṣṭraṃ kṣayairnānāvidhaistathā |
kṣunmṛtyubhyāmanāvṛṣṭyā vyādhibhiśca samāhatam |
abhyaghnanbhāratāṃścaiva sapatnānāṃ balāni ca || 32 ||
[Analyze grammar]

cālayanvasudhāṃ caiva balena caturaṅgiṇā |
abhyayāttaṃ ca pāñcālyo vijitya tarasā mahīm |
akṣauhiṇībhirdaśabhiḥ sa enaṃ samare'jayat || 33 ||
[Analyze grammar]

tataḥ sadāraḥ sāmātyaḥ saputraḥ sasuhṛjjanaḥ |
rājā saṃvaraṇastasmātpalāyata mahābhayāt || 34 ||
[Analyze grammar]

sindhornadasya mahato nikuñje nyavasattadā |
nadīviṣayaparyante parvatasya samīpataḥ |
tatrāvasanbahūnkālānbhāratā durgamāśritāḥ || 35 ||
[Analyze grammar]

teṣāṃ nivasatāṃ tatra sahasraṃ parivatsarān |
athābhyagacchadbharatānvasiṣṭho bhagavānṛṣiḥ || 36 ||
[Analyze grammar]

tamāgataṃ prayatnena pratyudgamyābhivādya ca |
arghyamabhyāharaṃstasmai te sarve bhāratāstadā |
nivedya sarvamṛṣaye satkāreṇa suvarcase || 37 ||
[Analyze grammar]

taṃ samāmaṣṭamīmuṣṭaṃ rājā vavre svayaṃ tadā |
purohito bhavānno'stu rājyāya prayatāmahe |
omityevaṃ vasiṣṭho'pi bhāratānpratyapadyata || 38 ||
[Analyze grammar]

athābhyaṣiñcatsāmrājye sarvakṣatrasya pauravam |
viṣāṇabhūtaṃ sarvasyāṃ pṛthivyāmiti naḥ śrutam || 39 ||
[Analyze grammar]

bharatādhyuṣitaṃ pūrvaṃ so'dhyatiṣṭhatpurottamam |
punarbalibhṛtaścaiva cakre sarvamahīkṣitaḥ || 40 ||
[Analyze grammar]

tataḥ sa pṛthivīṃ prāpya punarīje mahābalaḥ |
ājamīḍho mahāyajñairbahubhirbhūridakṣiṇaiḥ || 41 ||
[Analyze grammar]

tataḥ saṃvaraṇātsaurī suṣuve tapatī kurum |
rājatve taṃ prajāḥ sarvā dharmajña iti vavrire || 42 ||
[Analyze grammar]

tasya nāmnābhivikhyātaṃ pṛthivyāṃ kurujāṅgalam |
kurukṣetraṃ sa tapasā puṇyaṃ cakre mahātapāḥ || 43 ||
[Analyze grammar]

aśvavantamabhiṣvantaṃ tathā citrarathaṃ munim |
janamejayaṃ ca vikhyātaṃ putrāṃścāsyānuśuśrumaḥ |
pañcaitānvāhinī putrānvyajāyata manasvinī || 44 ||
[Analyze grammar]

abhiṣvataḥ parikṣittu śabalāśvaśca vīryavān |
abhirājo virājaśca śalmalaśca mahābalaḥ || 45 ||
[Analyze grammar]

uccaiḥśravā bhadrakāro jitāriścāṣṭamaḥ smṛtaḥ |
eteṣāmanvavāye tu khyātāste karmajairguṇaiḥ || 46 ||
[Analyze grammar]

janamejayādayaḥ sapta tathaivānye mahābalāḥ |
parikṣito'bhavanputrāḥ sarve dharmārthakovidāḥ || 47 ||
[Analyze grammar]

kakṣasenograsenau ca citrasenaśca vīryavān |
indrasenaḥ suṣeṇaśca bhīmasenaśca nāmataḥ || 48 ||
[Analyze grammar]

janamejayasya tanayā bhuvi khyātā mahābalāḥ |
dhṛtarāṣṭraḥ prathamajaḥ pāṇḍurbāhlīka eva ca || 49 ||
[Analyze grammar]

niṣadhaśca mahātejāstathā jāmbūnado balī |
kuṇḍodaraḥ padātiśca vasātiścāṣṭamaḥ smṛtaḥ |
sarve dharmārthakuśalāḥ sarve bhūtahite ratāḥ || 50 ||
[Analyze grammar]

dhṛtarāṣṭro'tha rājāsīttasya putro'tha kuṇḍikaḥ |
hastī vitarkaḥ krāthaśca kuṇḍalaścāpi pañcamaḥ |
haviḥśravāstathendrābhaḥ sumanyuścāparājitaḥ || 51 ||
[Analyze grammar]

pratīpasya trayaḥ putrā jajñire bharatarṣabha |
devāpiḥ śaṃtanuścaiva bāhlīkaśca mahārathaḥ || 52 ||
[Analyze grammar]

devāpistu pravavrāja teṣāṃ dharmaparīpsayā |
śaṃtanuśca mahīṃ lebhe bāhlīkaśca mahārathaḥ || 53 ||
[Analyze grammar]

bharatasyānvaye jātāḥ sattvavanto mahārathāḥ |
devarṣikalpā nṛpate bahavo rājasattamāḥ || 54 ||
[Analyze grammar]

evaṃvidhāścāpyapare devakalpā mahārathāḥ |
jātā manoranvavāye ailavaṃśavivardhanāḥ || 55 ||
[Analyze grammar]