Chapter 5

janamejaya uvāca |
bhīṣmadroṇau mahātmānau dhṛtarāṣṭraśca pārthivaḥ |
virāṭadrupadau cobhau śaṅkhaścaivottarastathā || 1 ||
[Analyze grammar]

dhṛṣṭaketurjayatseno rājā caiva sa satyajit |
duryodhanasutāścaiva śakuniścaiva saubalaḥ || 2 ||
[Analyze grammar]

karṇaputrāśca vikrāntā rājā caiva jayadrathaḥ |
ghaṭotkacādayaścaiva ye cānye nānukīrtitāḥ || 3 ||
[Analyze grammar]

ye cānye kīrtitāstatra rājāno dīptamūrtayaḥ |
svarge kālaṃ kiyantaṃ te tasthustadapi śaṃsa me || 4 ||
[Analyze grammar]

āhosvicchāśvataṃ sthānaṃ teṣāṃ tatra dvijottama |
ante vā karmaṇaḥ kāṃ te gatiṃ prāptā nararṣabhāḥ |
etadicchāmyahaṃ śrotuṃ procyamānaṃ tvayā dvija || 5 ||
[Analyze grammar]

sūta uvāca |
ityuktaḥ sa tu viprarṣiranujñāto mahātmanā |
vyāsena tasya nṛpaterākhyātumupacakrame || 6 ||
[Analyze grammar]

vaiśaṃpāyana uvāca |
gantavyaṃ karmaṇāmante sarveṇa manujādhipa |
śṛṇu guhyamidaṃ rājandevānāṃ bharatarṣabha |
yaduvāca mahātejā divyacakṣuḥ pratāpavān || 7 ||
[Analyze grammar]

muniḥ purāṇaḥ kauravya pārāśaryo mahāvrataḥ |
agādhabuddhiḥ sarvajño gatijñaḥ sarvakarmaṇām || 8 ||
[Analyze grammar]

vasūneva mahātejā bhīṣmaḥ prāpa mahādyutiḥ |
aṣṭāveva hi dṛśyante vasavo bharatarṣabha || 9 ||
[Analyze grammar]

bṛhaspatiṃ viveśātha droṇo hyaṅgirasāṃ varam |
kṛtavarmā tu hārdikyaḥ praviveśa marudgaṇam || 10 ||
[Analyze grammar]

sanatkumāraṃ pradyumnaḥ praviveśa yathāgatam |
dhṛtarāṣṭro dhaneśasya lokānprāpa durāsadān || 11 ||
[Analyze grammar]

dhṛtarāṣṭreṇa sahitā gāndhārī ca yaśasvinī |
patnībhyāṃ sahitaḥ pāṇḍurmahendrasadanaṃ yayau || 12 ||
[Analyze grammar]

virāṭadrupadau cobhau dhṛṣṭaketuśca pārthivaḥ |
niśaṭhākrūrasāmbāśca bhānuḥ kampo viḍūrathaḥ || 13 ||
[Analyze grammar]

bhūriśravāḥ śalaścaiva bhūriśca pṛthivīpatiḥ |
ugrasenastathā kaṃso vasudevaśca vīryavān || 14 ||
[Analyze grammar]

uttaraśca saha bhrātrā śaṅkhena narapuṃgavaḥ |
viśveṣāṃ devatānāṃ te viviśurnarasattamāḥ || 15 ||
[Analyze grammar]

varcā nāma mahātejāḥ somaputraḥ pratāpavān |
so'bhimanyurnṛsiṃhasya phalgunasya suto'bhavat || 16 ||
[Analyze grammar]

sa yuddhvā kṣatradharmeṇa yathā nānyaḥ pumānkvacit |
viveśa somaṃ dharmātmā karmaṇo'nte mahārathaḥ || 17 ||
[Analyze grammar]

āviveśa raviṃ karṇaḥ pitaraṃ puruṣarṣabha |
dvāparaṃ śakuniḥ prāpa dhṛṣṭadyumnastu pāvakam || 18 ||
[Analyze grammar]

dhṛtarāṣṭrātmajāḥ sarve yātudhānā balotkaṭāḥ |
ṛddhimanto mahātmānaḥ śastrapūtā divaṃ gatāḥ |
dharmamevāviśatkṣattā rājā caiva yudhiṣṭhiraḥ || 19 ||
[Analyze grammar]

ananto bhagavāndevaḥ praviveśa rasātalam |
pitāmahaniyogāddhi yo yogādgāmadhārayat || 20 ||
[Analyze grammar]

ṣoḍaśastrīsahasrāṇi vāsudevaparigrahaḥ |
nyamajjanta sarasvatyāṃ kālena janamejaya |
tāścāpyapsaraso bhūtvā vāsudevamupāgaman || 21 ||
[Analyze grammar]

hatāstasminmahāyuddhe ye vīrāstu mahārathāḥ |
ghaṭotkacādayaḥ sarve devānyakṣāṃśca bhejire || 22 ||
[Analyze grammar]

duryodhanasahāyāśca rākṣasāḥ parikīrtitāḥ |
prāptāste kramaśo rājansarvalokānanuttamān || 23 ||
[Analyze grammar]

bhavanaṃ ca mahendrasya kuberasya ca dhīmataḥ |
varuṇasya tathā lokānviviśuḥ puruṣarṣabhāḥ || 24 ||
[Analyze grammar]

etatte sarvamākhyātaṃ vistareṇa mahādyute |
kurūṇāṃ caritaṃ kṛtsnaṃ pāṇḍavānāṃ ca bhārata || 25 ||
[Analyze grammar]

sūta uvāca |
etacchrutvā dvijaśreṣṭhātsa rājā janamejayaḥ |
vismito'bhavadatyarthaṃ yajñakarmāntareṣvatha || 26 ||
[Analyze grammar]

tataḥ samāpayāmāsuḥ karma tattasya yājakāḥ |
āstīkaścābhavatprītaḥ parimokṣya bhujaṃgamān || 27 ||
[Analyze grammar]

tato dvijātīnsarvāṃstāndakṣiṇābhiratoṣayat |
pūjitāścāpi te rājñā tato jagmuryathāgatam || 28 ||
[Analyze grammar]

visarjayitvā viprāṃstānrājāpi janamejayaḥ |
tatastakṣaśilāyāḥ sa punarāyādgajāhvayam || 29 ||
[Analyze grammar]

etatte sarvamākhyātaṃ vaiśaṃpāyanakīrtitam |
vyāsājñayā samākhyātaṃ sarpasatre nṛpasya ha || 30 ||
[Analyze grammar]

puṇyo'yamitihāsākhyaḥ pavitraṃ cedamuttamam |
kṛṣṇena muninā vipra niyataṃ satyavādinā || 31 ||
[Analyze grammar]

sarvajñena vidhijñena dharmajñānavatā satā |
atīndriyeṇa śucinā tapasā bhāvitātmanā || 32 ||
[Analyze grammar]

aiśvarye vartatā caiva sāṃkhyayogavidā tathā |
naikatantravibuddhena dṛṣṭvā divyena cakṣuṣā || 33 ||
[Analyze grammar]

kīrtiṃ prathayatā loke pāṇḍavānāṃ mahātmanām |
anyeṣāṃ kṣatriyāṇāṃ ca bhūridraviṇatejasām || 34 ||
[Analyze grammar]

ya idaṃ śrāvayedvidvānsadā parvaṇi parvaṇi |
dhūtapāpmā jitasvargo brahmabhūyāya gacchati || 35 ||
[Analyze grammar]

yaścedaṃ śrāvayecchrāddhe brāhmaṇānpādamantataḥ |
akṣayyamannapānaṃ vai pitṝṃstasyopatiṣṭhate || 36 ||
[Analyze grammar]

ahnā yadenaḥ kurute indriyairmanasāpi vā |
mahābhāratamākhyāya paścātsaṃdhyāṃ pramucyate || 37 ||
[Analyze grammar]

dharme cārthe ca kāme ca mokṣe ca bharatarṣabha |
yadihāsti tadanyatra yannehāsti na tatkvacit || 38 ||
[Analyze grammar]

jayo nāmetihāso'yaṃ śrotavyo bhūtimicchatā |
rājñā rājasutaiścāpi garbhiṇyā caiva yoṣitā || 39 ||
[Analyze grammar]

svargakāmo labhetsvargaṃ jayakāmo labhejjayam |
garbhiṇī labhate putraṃ kanyāṃ vā bahubhāginīm || 40 ||
[Analyze grammar]

anāgataṃ tribhirvarṣaiḥ kṛṣṇadvaipāyanaḥ prabhuḥ |
saṃdarbhaṃ bhāratasyāsya kṛtavāndharmakāmyayā || 41 ||
[Analyze grammar]

nārado'śrāvayaddevānasito devalaḥ pitṝn |
rakṣo yakṣāñśuko martyānvaiśaṃpāyana eva tu || 42 ||
[Analyze grammar]

itihāsamimaṃ puṇyaṃ mahārthaṃ vedasaṃmitam |
śrāvayedyastu varṇāṃstrīnkṛtvā brāhmaṇamagrataḥ || 43 ||
[Analyze grammar]

sa naraḥ pāpanirmuktaḥ kīrtiṃ prāpyeha śaunaka |
gacchetparamikāṃ siddhimatra me nāsti saṃśayaḥ || 44 ||
[Analyze grammar]

bhāratādhyayanātpuṇyādapi pādamadhīyataḥ |
śraddadhānasya pūyante sarvapāpānyaśeṣataḥ || 45 ||
[Analyze grammar]

maharṣirbhagavānvyāsaḥ kṛtvemāṃ saṃhitāṃ purā |
ślokaiścaturbhirbhagavānputramadhyāpayacchukam || 46 ||
[Analyze grammar]

mātāpitṛsahasrāṇi putradāraśatāni ca |
saṃsāreṣvanubhūtāni yānti yāsyanti cāpare || 47 ||
[Analyze grammar]

harṣasthānasahasrāṇi bhayasthānaśatāni ca |
divase divase mūḍhamāviśanti na paṇḍitam || 48 ||
[Analyze grammar]

ūrdhvabāhurviraumyeṣa na ca kaścicchṛṇoti me |
dharmādarthaśca kāmaśca sa kimarthaṃ na sevyate || 49 ||
[Analyze grammar]

na jātu kāmānna bhayānna lobhāddharmaṃ tyajejjīvitasyāpi hetoḥ |
nityo dharmaḥ sukhaduḥkhe tvanitye jīvo nityo heturasya tvanityaḥ || 50 ||
[Analyze grammar]

imāṃ bhāratasāvitrīṃ prātarutthāya yaḥ paṭhet |
sa bhārataphalaṃ prāpya paraṃ brahmādhigacchati || 51 ||
[Analyze grammar]

yathā samudro bhagavānyathā ca himavāngiriḥ |
khyātāvubhau ratnanidhī tathā bhāratamucyate || 52 ||
[Analyze grammar]

mahābhāratamākhyānaṃ yaḥ paṭhetsusamāhitaḥ |
sa gacchetparamāṃ siddhimiti me nāsti saṃśayaḥ || 53 ||
[Analyze grammar]

dvaipāyanoṣṭhapuṭaniḥsṛtamaprameyaṃ puṇyaṃ pavitramatha pāpaharaṃ śivaṃ ca |
yo bhārataṃ samadhigacchati vācyamānaṃ kiṃ tasya puṣkarajalairabhiṣecanena || 54 ||
[Analyze grammar]