Chapter 45

vaiśaṃpāyana uvāca |
dvivarṣopanivṛtteṣu pāṇḍaveṣu yadṛcchayā |
devarṣirnārado rājannājagāma yudhiṣṭhiram || 1 ||
[Analyze grammar]

tamabhyarcya mahābāhuḥ kururājo yudhiṣṭhiraḥ |
āsīnaṃ pariviśvastaṃ provāca vadatāṃ varaḥ || 2 ||
[Analyze grammar]

cirasya khalu paśyāmi bhagavantamupasthitam |
kaccitte kuśalaṃ vipra śubhaṃ vā pratyupasthitam || 3 ||
[Analyze grammar]

ke deśāḥ paridṛṣṭāste kiṃ ca kāryaṃ karomi te |
tadbrūhi dvijamukhya tvamasmākaṃ ca priyo'tithiḥ || 4 ||
[Analyze grammar]

nārada uvāca |
ciradṛṣṭo'si me rājannāgato'smi tapovanāt |
paridṛṣṭāni tīrthāni gaṅgā caiva mayā nṛpa || 5 ||
[Analyze grammar]

yudhiṣṭhira uvāca |
vadanti puruṣā me'dya gaṅgātīranivāsinaḥ |
dhṛtarāṣṭraṃ mahātmānamāsthitaṃ paramaṃ tapaḥ || 6 ||
[Analyze grammar]

api dṛṣṭastvayā tatra kuśalī sa kurūdvahaḥ |
gāndhārī ca pṛthā caiva sūtaputraśca saṃjayaḥ || 7 ||
[Analyze grammar]

kathaṃ ca vartate cādya pitā mama sa pārthivaḥ |
śrotumicchāmi bhagavanyadi dṛṣṭastvayā nṛpaḥ || 8 ||
[Analyze grammar]

nārada uvāca |
sthirībhūya mahārāja śṛṇu sarvaṃ yathātatham |
yathā śrutaṃ ca dṛṣṭaṃ ca mayā tasmiṃstapovane || 9 ||
[Analyze grammar]

vanavāsanivṛtteṣu bhavatsu kurunandana |
kurukṣetrātpitā tubhyaṃ gaṅgādvāraṃ yayau nṛpa || 10 ||
[Analyze grammar]

gāndhāryā sahito dhīmānvadhvā kuntyā samanvitaḥ |
saṃjayena ca sūtena sāgnihotraḥ sayājakaḥ || 11 ||
[Analyze grammar]

ātasthe sa tapastīvraṃ pitā tava tapodhanaḥ |
vīṭāṃ mukhe samādhāya vāyubhakṣo'bhavanmuniḥ || 12 ||
[Analyze grammar]

vane sa munibhiḥ sarvaiḥ pūjyamāno mahātapāḥ |
tvagasthimātraśeṣaḥ sa ṣaṇmāsānabhavannṛpaḥ || 13 ||
[Analyze grammar]

gāndhārī tu jalāhārā kuntī māsopavāsinī |
saṃjayaḥ ṣaṣṭhabhaktena vartayāmāsa bhārata || 14 ||
[Analyze grammar]

agnīṃstu yājakāstatra juhuvurvidhivatprabho |
dṛśyato'dṛśyataścaiva vane tasminnṛpasya ha || 15 ||
[Analyze grammar]

aniketo'tha rājā sa babhūva vanagocaraḥ |
te cāpi sahite devyau saṃjayaśca tamanvayuḥ || 16 ||
[Analyze grammar]

saṃjayo nṛpaternetā sameṣu viṣameṣu ca |
gāndhāryāstu pṛthā rājaṃścakṣurāsīdaninditā || 17 ||
[Analyze grammar]

tataḥ kadācidgaṅgāyāḥ kacche sa nṛpasattamaḥ |
gaṅgāyāmāpluto dhīmānāśramābhimukho'bhavat || 18 ||
[Analyze grammar]

atha vāyuḥ samudbhūto dāvāgnirabhavanmahān |
dadāha tadvanaṃ sarvaṃ parigṛhya samantataḥ || 19 ||
[Analyze grammar]

dahyatsu mṛgayūtheṣu dvijihveṣu samantataḥ |
varāhāṇāṃ ca yūtheṣu saṃśrayatsu jalāśayān || 20 ||
[Analyze grammar]

samāviddhe vane tasminprāpte vyasana uttame |
nirāhāratayā rājā mandaprāṇaviceṣṭitaḥ |
asamartho'pasaraṇe sukṛśau mātarau ca te || 21 ||
[Analyze grammar]

tataḥ sa nṛpatirdṛṣṭvā vahnimāyāntamantikāt |
idamāha tataḥ sūtaṃ saṃjayaṃ pṛthivīpate || 22 ||
[Analyze grammar]

gaccha saṃjaya yatrāgnirna tvāṃ dahati karhicit |
vayamatrāgninā yuktā gamiṣyāmaḥ parāṃ gatim || 23 ||
[Analyze grammar]

tamuvāca kilodvignaḥ saṃjayo vadatāṃ varaḥ |
rājanmṛtyuraniṣṭo'yaṃ bhavitā te vṛthāgninā || 24 ||
[Analyze grammar]

na copāyaṃ prapaśyāmi mokṣaṇe jātavedasaḥ |
yadatrānantaraṃ kāryaṃ tadbhavānvaktumarhati || 25 ||
[Analyze grammar]

ityuktaḥ saṃjayenedaṃ punarāha sa pārthivaḥ |
naiṣa mṛtyuraniṣṭo no niḥsṛtānāṃ gṛhātsvayam || 26 ||
[Analyze grammar]

jalamagnistathā vāyuratha vāpi vikarśanam |
tāpasānāṃ praśasyante gaccha saṃjaya māciram || 27 ||
[Analyze grammar]

ityuktvā saṃjayaṃ rājā samādhāya manastadā |
prāṅmukhaḥ saha gāndhāryā kuntyā copāviśattadā || 28 ||
[Analyze grammar]

saṃjayastaṃ tathā dṛṣṭvā pradakṣiṇamathākarot |
uvāca cainaṃ medhāvī yuṅkṣvātmānamiti prabho || 29 ||
[Analyze grammar]

ṛṣiputro manīṣī sa rājā cakre'sya tadvacaḥ |
saṃnirudhyendriyagrāmamāsītkāṣṭhopamastadā || 30 ||
[Analyze grammar]

gāndhārī ca mahābhāgā jananī ca pṛthā tava |
dāvāgninā samāyukte sa ca rājā pitā tava || 31 ||
[Analyze grammar]

saṃjayastu mahāmātrastasmāddāvādamucyata |
gaṅgākūle mayā dṛṣṭastāpasaiḥ parivāritaḥ || 32 ||
[Analyze grammar]

sa tānāmantrya tejasvī nivedyaitacca sarvaśaḥ |
prayayau saṃjayaḥ sūto himavantaṃ mahīdharam || 33 ||
[Analyze grammar]

evaṃ sa nidhanaṃ prāptaḥ kururājo mahāmanāḥ |
gāndhārī ca pṛthā caiva jananyau te narādhipa || 34 ||
[Analyze grammar]

yadṛcchayānuvrajatā mayā rājñaḥ kalevaram |
tayośca devyorubhayordṛṣṭāni bharatarṣabha || 35 ||
[Analyze grammar]

tatastapovane tasminsamājagmustapodhanāḥ |
śrutvā rājñastathā niṣṭhāṃ na tvaśocangatiṃ ca te || 36 ||
[Analyze grammar]

tatrāśrauṣamahaṃ sarvametatpuruṣasattama |
yathā ca nṛpatirdagdho devyau te ceti pāṇḍava || 37 ||
[Analyze grammar]

na śocitavyaṃ rājendra svantaḥ sa pṛthivīpatiḥ |
prāptavānagnisaṃyogaṃ gāndhārī jananī ca te || 38 ||
[Analyze grammar]

vaiśaṃpāyana uvāca |
etacchrutvā tu sarveṣāṃ pāṇḍavānāṃ mahātmanām |
niryāṇaṃ dhṛtarāṣṭrasya śokaḥ samabhavanmahān || 39 ||
[Analyze grammar]

antaḥpurāṇāṃ ca tadā mahānārtasvaro'bhavat |
paurāṇāṃ ca mahārāja śrutvā rājñastadā gatim || 40 ||
[Analyze grammar]

aho dhigiti rājā tu vikruśya bhṛśaduḥkhitaḥ |
ūrdhvabāhuḥ smaranmātuḥ praruroda yudhiṣṭhiraḥ |
bhīmasenapurogāśca bhrātaraḥ sarva eva te || 41 ||
[Analyze grammar]

antaḥpureṣu ca tadā sumahānruditasvanaḥ |
prādurāsīnmahārāja pṛthāṃ śrutvā tathāgatām || 42 ||
[Analyze grammar]

taṃ ca vṛddhaṃ tathā dagdhaṃ hataputraṃ narādhipam |
anvaśocanta te sarve gāndhārīṃ ca tapasvinīm || 43 ||
[Analyze grammar]

tasminnuparate śabde muhūrtādiva bhārata |
nigṛhya bāṣpaṃ dhairyeṇa dharmarājo'bravīdidam || 44 ||
[Analyze grammar]