Chapter 44

janamejaya uvāca |
dṛṣṭvā putrāṃstathā pautrānsānubandhāñjanādhipaḥ |
dhṛtarāṣṭraḥ kimakarodrājā caiva yudhiṣṭhiraḥ || 1 ||
[Analyze grammar]

vaiśaṃpāyana uvāca |
taddṛṣṭvā mahadāścaryaṃ putrāṇāṃ darśanaṃ punaḥ |
vītaśokaḥ sa rājarṣiḥ punarāśramamāgamat || 2 ||
[Analyze grammar]

itarastu janaḥ sarvaste caiva paramarṣayaḥ |
pratijagmuryathākāmaṃ dhṛtarāṣṭrābhyanujñayā || 3 ||
[Analyze grammar]

pāṇḍavāstu mahātmāno laghubhūyiṣṭhasainikāḥ |
anujagmurmahātmānaṃ sadāraṃ taṃ mahīpatim || 4 ||
[Analyze grammar]

tamāśramagataṃ dhīmānbrahmarṣirlokapūjitaḥ |
muniḥ satyavatīputro dhṛtarāṣṭramabhāṣata || 5 ||
[Analyze grammar]

dhṛtarāṣṭra mahābāho śṛṇu kauravanandana |
śrutaṃ te jñānavṛddhānāmṛṣīṇāṃ puṇyakarmaṇām || 6 ||
[Analyze grammar]

ṛddhābhijanavṛddhānāṃ vedavedāṅgavedinām |
dharmajñānāṃ purāṇānāṃ vadatāṃ vividhāḥ kathāḥ || 7 ||
[Analyze grammar]

mā sma śoke manaḥ kārṣīrdiṣṭe na vyathate budhaḥ |
śrutaṃ devarahasyaṃ te nāradāddevadarśanāt || 8 ||
[Analyze grammar]

gatāste kṣatradharmeṇa śastrapūtāṃ gatiṃ śubhām |
yathā dṛṣṭāstvayā putrā yathākāmavihāriṇaḥ || 9 ||
[Analyze grammar]

yudhiṣṭhirastvayaṃ dhīmānbhavantamanurudhyate |
sahito bhrātṛbhiḥ sarvaiḥ sadāraḥ sasuhṛjjanaḥ || 10 ||
[Analyze grammar]

visarjayainaṃ yātveṣa svarājyamanuśāsatām |
māsaḥ samadhiko hyeṣāmatīto vasatāṃ vane || 11 ||
[Analyze grammar]

etaddhi nityaṃ yatnena padaṃ rakṣyaṃ paraṃtapa |
bahupratyarthikaṃ hyetadrājyaṃ nāma narādhipa || 12 ||
[Analyze grammar]

ityuktaḥ kauravo rājā vyāsenāmitabuddhinā |
yudhiṣṭhiramathāhūya vāgmī vacanamabravīt || 13 ||
[Analyze grammar]

ajātaśatro bhadraṃ te śṛṇu me bhrātṛbhiḥ saha |
tvatprasādānmahīpāla śoko nāsmānprabādhate || 14 ||
[Analyze grammar]

rame cāhaṃ tvayā putra pureva gajasāhvaye |
nāthenānugato vidvanpriyeṣu parivartinā || 15 ||
[Analyze grammar]

prāptaṃ putraphalaṃ tvattaḥ prītirme vipulā tvayi |
na me manyurmahābāho gamyatāṃ putra mā ciram || 16 ||
[Analyze grammar]

bhavantaṃ ceha saṃprekṣya tapo me parihīyate |
tapoyuktaṃ śarīraṃ ca tvāṃ dṛṣṭvā dhāritaṃ punaḥ || 17 ||
[Analyze grammar]

mātarau te tathaiveme śīrṇaparṇakṛtāśane |
mama tulyavrate putra naciraṃ vartayiṣyataḥ || 18 ||
[Analyze grammar]

duryodhanaprabhṛtayo dṛṣṭā lokāntaraṃ gatāḥ |
vyāsasya tapaso vīryādbhavataśca samāgamāt || 19 ||
[Analyze grammar]

prayojanaṃ ciraṃ vṛttaṃ jīvitasya ca me'nagha |
ugraṃ tapaḥ samāsthāsye tvamanujñātumarhasi || 20 ||
[Analyze grammar]

tvayyadya piṇḍaḥ kīrtiśca kulaṃ cedaṃ pratiṣṭhitam |
śvo vādya vā mahābāho gamyatāṃ putra mā ciram || 21 ||
[Analyze grammar]

rājanītiḥ subahuśaḥ śrutā te bharatarṣabha |
saṃdeṣṭavyaṃ na paśyāmi kṛtametāvatā vibho || 22 ||
[Analyze grammar]

ityuktavacanaṃ tāta nṛpo rājānamabravīt |
na māmarhasi dharmajña parityaktumanāgasam || 23 ||
[Analyze grammar]

kāmaṃ gacchantu me sarve bhrātaro'nucarāstathā |
bhavantamahamanviṣye mātarau ca yatavrate || 24 ||
[Analyze grammar]

tamuvācātha gāndhārī maivaṃ putra śṛṇuṣva me |
tvayyadhīnaṃ kurukulaṃ piṇḍaśca śvaśurasya me || 25 ||
[Analyze grammar]

gamyatāṃ putra paryāptametāvatpūjitā vayam |
rājā yadāha tatkāryaṃ tvayā putra piturvacaḥ || 26 ||
[Analyze grammar]

ityuktaḥ sa tu gāndhāryā kuntīmidamuvāca ha |
snehabāṣpākule netre pramṛjya rudatīṃ vacaḥ || 27 ||
[Analyze grammar]

visarjayati māṃ rājā gāndhārī ca yaśasvinī |
bhavatyāṃ baddhacittastu kathaṃ yāsyāmi duḥkhitaḥ || 28 ||
[Analyze grammar]

na cotsahe tapovighnaṃ kartuṃ te dharmacāriṇi |
tapaso hi paraṃ nāsti tapasā vindate mahat || 29 ||
[Analyze grammar]

mamāpi na tathā rājñi rājye buddhiryathā purā |
tapasyevānuraktaṃ me manaḥ sarvātmanā tathā || 30 ||
[Analyze grammar]

śūnyeyaṃ ca mahī sarvā na me prītikarī śubhe |
bāndhavā naḥ parikṣīṇā balaṃ no na yathā purā || 31 ||
[Analyze grammar]

pāñcālāḥ subhṛśaṃ kṣīṇāḥ kanyāmātrāvaśeṣitāḥ |
na teṣāṃ kulakartāraṃ kaṃcitpaśyāmyahaṃ śubhe || 32 ||
[Analyze grammar]

sarve hi bhasmasānnītā droṇenaikena saṃyuge |
avaśeṣāstu nihatā droṇaputreṇa vai niśi || 33 ||
[Analyze grammar]

cedayaścaiva matsyāśca dṛṣṭapūrvāstathaiva naḥ |
kevalaṃ vṛṣṇicakraṃ tu vāsudevaparigrahāt |
yaṃ dṛṣṭvā sthātumicchāmi dharmārthaṃ nānyahetukam || 34 ||
[Analyze grammar]

śivena paśya naḥ sarvāndurlabhaṃ darśanaṃ tava |
bhaviṣyatyamba rājā hi tīvramārapsyate tapaḥ || 35 ||
[Analyze grammar]

etacchrutvā mahābāhuḥ sahadevo yudhāṃ patiḥ |
yudhiṣṭhiramuvācedaṃ bāṣpavyākulalocanaḥ || 36 ||
[Analyze grammar]

notsahe'haṃ parityaktuṃ mātaraṃ pārthivarṣabha |
pratiyātu bhavānkṣipraṃ tapastapsyāmyahaṃ vane || 37 ||
[Analyze grammar]

ihaiva śoṣayiṣyāmi tapasāhaṃ kalevaram |
pādaśuśrūṣaṇe yukto rājño mātrostathānayoḥ || 38 ||
[Analyze grammar]

tamuvāca tataḥ kuntī pariṣvajya mahābhujam |
gamyatāṃ putra maivaṃ tvaṃ vocaḥ kuru vaco mama || 39 ||
[Analyze grammar]

āgamā vaḥ śivāḥ santu svasthā bhavata putrakāḥ |
uparodho bhavedevamasmākaṃ tapasaḥ kṛte || 40 ||
[Analyze grammar]

tvatsnehapāśabaddhā ca hīyeyaṃ tapasaḥ parāt |
tasmātputraka gaccha tvaṃ śiṣṭamalpaṃ hi naḥ prabho || 41 ||
[Analyze grammar]

evaṃ saṃstambhitaṃ vākyaiḥ kuntyā bahuvidhairmanaḥ |
sahadevasya rājendra rājñaścaiva viśeṣataḥ || 42 ||
[Analyze grammar]

te mātrā samanujñātā rājñā ca kurupuṃgavāḥ |
abhivādya kuruśreṣṭhamāmantrayitumārabhan || 43 ||
[Analyze grammar]

rājanpratigamiṣyāmaḥ śivena pratinanditāḥ |
anujñātāstvayā rājangamiṣyāmo vikalmaṣāḥ || 44 ||
[Analyze grammar]

evamuktaḥ sa rājarṣirdharmarājñā mahātmanā |
anujajñe jayāśīrbhirabhinandya yudhiṣṭhiram || 45 ||
[Analyze grammar]

bhīmaṃ ca balināṃ śreṣṭhaṃ sāntvayāmāsa pārthivaḥ |
sa cāsya samyaṅmedhāvī pratyapadyata vīryavān || 46 ||
[Analyze grammar]

arjunaṃ ca samāśliṣya yamau ca puruṣarṣabhau |
anujajñe sa kauravyaḥ pariṣvajyābhinandya ca || 47 ||
[Analyze grammar]

gāndhāryā cābhyanujñātāḥ kṛtapādābhivandanāḥ |
jananyā samupāghrātāḥ pariṣvaktāśca te nṛpam |
cakruḥ pradakṣiṇaṃ sarve vatsā iva nivāraṇe || 48 ||
[Analyze grammar]

punaḥ punarnirīkṣantaḥ prajagmuste pradakṣiṇam |
tathaiva draupadī sādhvī sarvāḥ kauravayoṣitaḥ || 49 ||
[Analyze grammar]

nyāyataḥ śvaśure vṛttiṃ prayujya prayayustataḥ |
śvaśrūbhyāṃ samanujñātāḥ pariṣvajyābhinanditāḥ |
saṃdiṣṭāścetikartavyaṃ prayayurbhartṛbhiḥ saha || 50 ||
[Analyze grammar]

tataḥ prajajñe ninadaḥ sūtānāṃ yujyatāmiti |
uṣṭrāṇāṃ krośatāṃ caiva hayānāṃ heṣatāmapi || 51 ||
[Analyze grammar]

tato yudhiṣṭhiro rājā sadāraḥ sahasainikaḥ |
nagaraṃ hāstinapuraṃ punarāyātsabāndhavaḥ || 52 ||
[Analyze grammar]