Chapter 128

maheśvara uvāca |
tilottamā nāma purā brahmaṇā yoṣiduttamā |
tilaṃ tilaṃ samuddhṛtya ratnānāṃ nirmitā śubhā || 1 ||
[Analyze grammar]

sābhyagacchata māṃ devi rūpeṇāpratimā bhuvi |
pradakṣiṇaṃ lobhayantī māṃ śubhe rucirānanā || 2 ||
[Analyze grammar]

yato yataḥ sā sudatī māmupādhāvadantike |
tatastato mukhaṃ cāru mama devi vinirgatam || 3 ||
[Analyze grammar]

tāṃ didṛkṣurahaṃ yogāccaturmūrtitvamāgataḥ |
caturmukhaśca saṃvṛtto darśayanyogamātmanaḥ || 4 ||
[Analyze grammar]

pūrveṇa vadanenāhamindratvamanuśāsmi ha |
uttareṇa tvayā sārdhaṃ ramāmyahamanindite || 5 ||
[Analyze grammar]

paścimaṃ me mukhaṃ saumyaṃ sarvaprāṇisukhāvaham |
dakṣiṇaṃ bhīmasaṃkāśaṃ raudraṃ saṃharati prajāḥ || 6 ||
[Analyze grammar]

jaṭilo brahmacārī ca lokānāṃ hitakāmyayā |
devakāryārthasiddhyarthaṃ pinākaṃ me kare sthitam || 7 ||
[Analyze grammar]

indreṇa ca purā vajraṃ kṣiptaṃ śrīkāṅkṣiṇā mama |
dagdhvā kaṇṭhaṃ tu tadyātaṃ tena śrīkaṇṭhatā mama || 8 ||
[Analyze grammar]

umovāca |
vāhaneṣu prabhūteṣu śrīmatsvanyeṣu satsu te |
kathaṃ govṛṣabho deva vāhanatvamupāgataḥ || 9 ||
[Analyze grammar]

maheśvara uvāca |
surabhīṃ sasṛje brahmāmṛtadhenuṃ payomucam |
sā sṛṣṭā bahudhā jātā kṣaramāṇā payo'mṛtam || 10 ||
[Analyze grammar]

tasyā vatsamukhotsṛṣṭaḥ pheno madgātramāgataḥ |
tato dagdhā mayā gāvo nānāvarṇatvamāgatāḥ || 11 ||
[Analyze grammar]

tato'haṃ lokaguruṇā śamaṃ nīto'rthavedinā |
vṛṣaṃ cemaṃ dhvajārthaṃ me dadau vāhanameva ca || 12 ||
[Analyze grammar]

umovāca |
nivāsā bahurūpāste viśvarūpaguṇānvitāḥ |
tāṃśca saṃtyajya bhagavañśmaśāne ramase katham || 13 ||
[Analyze grammar]

keśāsthikalile bhīme kapālaghaṭasaṃkule |
gṛdhragomāyukalile citāgniśatasaṃkule || 14 ||
[Analyze grammar]

aśucau māṃsakalile vasāśoṇitakardame |
vinikīrṇāmiṣacaye śivānādavinādite || 15 ||
[Analyze grammar]

maheśvara uvāca |
medhyānveṣī mahīṃ kṛtsnāṃ vicarāmi niśāsvaham |
na ca medhyataraṃ kiṃcicchmaśānādiha vidyate || 16 ||
[Analyze grammar]

tena me sarvavāsānāṃ śmaśāne ramate manaḥ |
nyagrodhaśākhāsaṃchanne nirbhuktasragvibhūṣite || 17 ||
[Analyze grammar]

tatra caiva ramante me bhūtasaṃghāḥ śubhānane |
na ca bhūtagaṇairdevi vināhaṃ vastumutsahe || 18 ||
[Analyze grammar]

eṣa vāso hi me medhyaḥ svargīyaśca mato hi me |
puṇyaḥ paramakaścaiva medhyakāmairupāsyate || 19 ||
[Analyze grammar]

umovāca |
bhagavansarvabhūteśa sarvadharmabhṛtāṃ vara |
pinākapāṇe varada saṃśayo me mahānayam || 20 ||
[Analyze grammar]

ayaṃ munigaṇaḥ sarvastapastapa iti prabho |
taponveṣakaro loke bhramate vividhākṛtiḥ || 21 ||
[Analyze grammar]

asya caivarṣisaṃghasya mama ca priyakāmyayā |
etaṃ mameha saṃdehaṃ vaktumarhasyariṃdama || 22 ||
[Analyze grammar]

dharmaḥ kiṃlakṣaṇaḥ proktaḥ kathaṃ vācarituṃ naraiḥ |
śakyo dharmamavindadbhirdharmajña vada me prabho || 23 ||
[Analyze grammar]

nārada uvāca |
tato munigaṇaḥ sarvastāṃ devīṃ pratyapūjayat |
vāgbhirṛgbhūṣitārthābhiḥ stavaiścārthavidāṃ vara || 24 ||
[Analyze grammar]

maheśvara uvāca |
ahiṃsā satyavacanaṃ sarvabhūtānukampanam |
śamo dānaṃ yathāśakti gārhasthyo dharma uttamaḥ || 25 ||
[Analyze grammar]

paradāreṣvasaṃkalpo nyāsastrīparirakṣaṇam |
adattādānaviramo madhumāṃsasya varjanam || 26 ||
[Analyze grammar]

eṣa pañcavidho dharmo bahuśākhaḥ sukhodayaḥ |
dehibhirdharmaparamaiḥ kartavyo dharmasaṃcayaḥ || 27 ||
[Analyze grammar]

umovāca |
bhagavansaṃśayaṃ pṛṣṭastaṃ me vyākhyātumarhasi |
cāturvarṇyasya yo dharmaḥ sve sve varṇe guṇāvahaḥ || 28 ||
[Analyze grammar]

brāhmaṇe kīdṛśo dharmaḥ kṣatriye kīdṛśo bhavet |
vaiśye kiṃlakṣaṇo dharmaḥ śūdre kiṃlakṣaṇo bhavet || 29 ||
[Analyze grammar]

maheśvara uvāca |
nyāyataste mahābhāge saṃśayaḥ samudīritaḥ |
bhūmidevā mahābhāgāḥ sadā loke dvijātayaḥ || 30 ||
[Analyze grammar]

upavāsaḥ sadā dharmo brāhmaṇasya na saṃśayaḥ |
sa hi dharmārthamutpanno brahmabhūyāya kalpate || 31 ||
[Analyze grammar]

tasya dharmakriyā devi vratacaryā ca nyāyataḥ |
tathopanayanaṃ caiva dvijāyaivopapadyate || 32 ||
[Analyze grammar]

gurudaivatapūjārthaṃ svādhyāyābhyasanātmakaḥ |
dehibhirdharmaparamaiścartavyo dharmasaṃbhavaḥ || 33 ||
[Analyze grammar]

umovāca |
bhagavansaṃśayo me'tra taṃ me vyākhyātumarhasi |
cāturvarṇyasya dharmaṃ hi naipuṇyena prakīrtaya || 34 ||
[Analyze grammar]

maheśvara uvāca |
rahasyaśravaṇaṃ dharmo vedavrataniṣevaṇam |
vratacaryāparo dharmo gurupādaprasādanam || 35 ||
[Analyze grammar]

bhaikṣacaryāparo dharmo dharmo nityopavāsitā |
nityasvādhyāyitā dharmo brahmacaryāśramastathā || 36 ||
[Analyze grammar]

guruṇā tvabhyanujñātaḥ samāvarteta vai dvijaḥ |
vindetānantaraṃ bhāryāmanurūpāṃ yathāvidhi || 37 ||
[Analyze grammar]

śūdrānnavarjanaṃ dharmastathā satpathasevanam |
dharmo nityopavāsitvaṃ brahmacaryaṃ tathaiva ca || 38 ||
[Analyze grammar]

āhitāgniradhīyāno juhvānaḥ saṃyatendriyaḥ |
vighasāśī yatāhāro gṛhasthaḥ satyavākśuciḥ || 39 ||
[Analyze grammar]

atithivratatā dharmo dharmastretāgnidhāraṇam |
iṣṭīśca paśubandhāṃśca vidhipūrvaṃ samācaret || 40 ||
[Analyze grammar]

yajñaśca paramo dharmastathāhiṃsā ca dehiṣu |
apūrvabhojanaṃ dharmo vighasāśitvameva ca || 41 ||
[Analyze grammar]

bhukte parijane paścādbhojanaṃ dharma ucyate |
brāhmaṇasya gṛhasthasya śrotriyasya viśeṣataḥ || 42 ||
[Analyze grammar]

daṃpatyoḥ samaśīlatvaṃ dharmaśca gṛhamedhinām |
gṛhyāṇāṃ caiva devānāṃ nityaṃ puṣpabalikriyā || 43 ||
[Analyze grammar]

nityopalepanaṃ dharmastathā nityopavāsitā |
susaṃmṛṣṭopalipte ca sājyadhūmodgame gṛhe || 44 ||
[Analyze grammar]

eṣa dvijajane dharmo gārhasthyo lokadhāraṇaḥ |
dvijātīnāṃ satāṃ nityaṃ sadaivaiṣa pravartate || 45 ||
[Analyze grammar]

yastu kṣatragato devi tvayā dharma udīritaḥ |
tamahaṃ te pravakṣyāmi taṃ me śṛṇu samāhitā || 46 ||
[Analyze grammar]

kṣatriyasya smṛto dharmaḥ prajāpālanamāditaḥ |
nirdiṣṭaphalabhoktā hi rājā dharmeṇa yujyate || 47 ||
[Analyze grammar]

prajāḥ pālayate yo hi dharmeṇa manujādhipaḥ |
tasya dharmārjitā lokāḥ prajāpālanasaṃcitāḥ || 48 ||
[Analyze grammar]

tatra rājñaḥ paro dharmo damaḥ svādhyāya eva ca |
agnihotraparispando dānādhyayanameva ca || 49 ||
[Analyze grammar]

yajñopavītadhāraṇaṃ yajño dharmakriyāstathā |
bhṛtyānāṃ bharaṇaṃ dharmaḥ kṛte karmaṇyamoghatā || 50 ||
[Analyze grammar]

samyagdaṇḍe sthitirdharmo dharmo vedakratukriyāḥ |
vyavahārasthitirdharmaḥ satyavākyaratistathā || 51 ||
[Analyze grammar]

ārtahastaprado rājā pretya ceha mahīyate |
gobrāhmaṇārthe vikrāntaḥ saṃgrāme nidhanaṃ gataḥ |
aśvamedhajitāṃllokānprāpnoti tridivālaye || 52 ||
[Analyze grammar]

vaiśyasya satataṃ dharmaḥ pāśupālyaṃ kṛṣistathā |
agnihotraparispando dānādhyayanameva ca || 53 ||
[Analyze grammar]

vāṇijyaṃ satpathasthānamātithyaṃ praśamo damaḥ |
viprāṇāṃ svāgataṃ tyāgo vaiśyadharmaḥ sanātanaḥ || 54 ||
[Analyze grammar]

tilāngandhānrasāṃścaiva na vikrīṇīta vai kvacit |
vaṇikpathamupāsīno vaiśyaḥ satpathamāśritaḥ || 55 ||
[Analyze grammar]

sarvātithyaṃ trivargasya yathāśakti yathārhataḥ |
śūdradharmaḥ paro nityaṃ śuśrūṣā ca dvijātiṣu || 56 ||
[Analyze grammar]

sa śūdraḥ saṃśitatapāḥ satyasaṃdho jitendriyaḥ |
śuśrūṣannatithiṃ prāptaṃ tapaḥ saṃcinute mahat || 57 ||
[Analyze grammar]

tyaktahiṃsaḥ śubhācāro devatādvijapūjakaḥ |
śūdro dharmaphalairiṣṭaiḥ saṃprayujyeta buddhimān || 58 ||
[Analyze grammar]

etatte sarvamākhyātaṃ cāturvarṇyasya śobhane |
ekaikasyeha subhage kimanyacchrotumicchasi || 59 ||
[Analyze grammar]