Chapter 126

yudhiṣṭhira uvāca |
pitāmaha mahāprājña sarvaśāstraviśārada |
āgamairbahubhiḥ sphīto bhavānnaḥ prathitaḥ kule || 1 ||
[Analyze grammar]

tvatto dharmārthasaṃyuktamāyatyāṃ ca sukhodayam |
āścaryabhūtaṃ lokasya śrotumicchāmyariṃdama || 2 ||
[Analyze grammar]

ayaṃ ca kālaḥ saṃprāpto durlabhajñātibāndhavaḥ |
śāstā ca na hi naḥ kaścittvāmṛte bharatarṣabha || 3 ||
[Analyze grammar]

yadi te'hamanugrāhyo bhrātṛbhiḥ sahito'nagha |
vaktumarhasi naḥ praśnaṃ yattvāṃ pṛcchāmi pārthiva || 4 ||
[Analyze grammar]

ayaṃ nārāyaṇaḥ śrīmānsarvapārthivasaṃmataḥ |
bhavantaṃ bahumānena praśrayeṇa ca sevate || 5 ||
[Analyze grammar]

asya caiva samakṣaṃ tvaṃ pārthivānāṃ ca sarvaśaḥ |
bhrātṝṇāṃ ca priyārthaṃ me snehādbhāṣitumarhasi || 6 ||
[Analyze grammar]

vaiśaṃpāyana uvāca |
tasya tadvacanaṃ śrutvā snehādāgatasaṃbhramaḥ |
bhīṣmo bhāgīrathīputra idaṃ vacanamabravīt || 7 ||
[Analyze grammar]

hanta te kathayiṣyāmi kathāmatimanoramām |
asya viṣṇoḥ purā rājanprabhāvo'yaṃ mayā śrutaḥ || 8 ||
[Analyze grammar]

yaśca govṛṣabhāṅkasya prabhāvastaṃ ca me śṛṇu |
rudrāṇyāḥ saṃśayo yaśca daṃpatyostaṃ ca me śṛṇu || 9 ||
[Analyze grammar]

vrataṃ cacāra dharmātmā kṛṣṇo dvādaśavārṣikam |
dīkṣitaṃ cāgatau draṣṭumubhau nāradaparvatau || 10 ||
[Analyze grammar]

kṛṣṇadvaipāyanaścaiva dhaumyaśca japatāṃ varaḥ |
devalaḥ kāśyapaścaiva hastikāśyapa eva ca || 11 ||
[Analyze grammar]

apare ṛṣayaḥ santo dīkṣādamasamanvitāḥ |
śiṣyairanugatāḥ sarve devakalpaistapodhanaiḥ || 12 ||
[Analyze grammar]

teṣāmatithisatkāramarcanīyaṃ kulocitam |
devakītanayaḥ prīto devakalpamakalpayat || 13 ||
[Analyze grammar]

hariteṣu suvarṇeṣu barhiṣkeṣu naveṣu ca |
upopaviviśuḥ prītā viṣṭareṣu maharṣayaḥ || 14 ||
[Analyze grammar]

kathāścakrustataste tu madhurā dharmasaṃhitāḥ |
rājarṣīṇāṃ surāṇāṃ ca ye vasanti tapodhanāḥ || 15 ||
[Analyze grammar]

tato nārāyaṇaṃ tejo vratacaryendhanotthitam |
vaktrānniḥsṛtya kṛṣṇasya vahniradbhutakarmaṇaḥ || 16 ||
[Analyze grammar]

so'gnirdadāha taṃ śailaṃ sadrumaṃ salatākṣupam |
sapakṣimṛgasaṃghātaṃ saśvāpadasarīsṛpam || 17 ||
[Analyze grammar]

mṛgaiśca vividhākārairhāhābhūtamacetanam |
śikharaṃ tasya śailasya mathitaṃ dīptadarśanam || 18 ||
[Analyze grammar]

sa tu vahnirmahājvālo dagdhvā sarvamaśeṣataḥ |
viṣṇoḥ samīpamāgamya pādau śiṣyavadaspṛśat || 19 ||
[Analyze grammar]

tato viṣṇurvanaṃ dṛṣṭvā nirdagdhamarikarśanaḥ |
saumyairdṛṣṭinipātaistatpunaḥ prakṛtimānayat || 20 ||
[Analyze grammar]

tathaiva sa girirbhūyaḥ prapuṣpitalatādrumaḥ |
sapakṣigaṇasaṃghuṣṭaḥ saśvāpadasarīsṛpaḥ || 21 ||
[Analyze grammar]

tadadbhutamacintyaṃ ca dṛṣṭvā munigaṇastadā |
vismito hṛṣṭalomā ca babhūvāsrāvilekṣaṇaḥ || 22 ||
[Analyze grammar]

tato nārāyaṇo dṛṣṭvā tānṛṣīnvismayānvitān |
praśritaṃ madhuraṃ snigdhaṃ papraccha vadatāṃ varaḥ || 23 ||
[Analyze grammar]

kimasya ṛṣipūgasya tyaktasaṅgasya nityaśaḥ |
nirmamasyāgamavato vismayaḥ samupāgataḥ || 24 ||
[Analyze grammar]

etaṃ me saṃśayaṃ sarvaṃ yāthātathyamaninditāḥ |
ṛṣayo vaktumarhanti niścitārthaṃ tapodhanāḥ || 25 ||
[Analyze grammar]

ṛṣaya ūcuḥ |
bhavānvisṛjate lokānbhavānsaṃharate punaḥ |
bhavāñśītaṃ bhavānuṣṇaṃ bhavāneva pravarṣati || 26 ||
[Analyze grammar]

pṛthivyāṃ yāni bhūtāni sthāvarāṇi carāṇi ca |
teṣāṃ pitā tvaṃ mātā ca prabhuḥ prabhava eva ca || 27 ||
[Analyze grammar]

etanno vismayakaraṃ praśaṃsa madhusūdana |
tvamevārhasi kalyāṇa vaktuṃ vahnervinirgamam || 28 ||
[Analyze grammar]

tato vigatasaṃtrāsā vayamapyarikarśana |
yacchrutaṃ yacca dṛṣṭaṃ nastatpravakṣyāmahe hare || 29 ||
[Analyze grammar]

vāsudeva uvāca |
etattadvaiṣṇavaṃ tejo mama vaktrādviniḥsṛtam |
kṛṣṇavartmā yugāntābho yenāyaṃ mathito giriḥ || 30 ||
[Analyze grammar]

ṛṣayaścārtimāpannā jitakrodhā jitendriyāḥ |
bhavanto vyathitāścāsandevakalpāstapodhanāḥ || 31 ||
[Analyze grammar]

vratacaryāparītasya tapasvivratasevayā |
mama vahniḥ samudbhūto na vai vyathitumarhatha || 32 ||
[Analyze grammar]

vrataṃ cartumihāyātastvahaṃ girimimaṃ śubham |
putraṃ cātmasamaṃ vīrye tapasā sraṣṭumāgataḥ || 33 ||
[Analyze grammar]

tato mamātmā yo dehe so'gnirbhūtvā viniḥsṛtaḥ |
gataśca varadaṃ draṣṭuṃ sarvalokapitāmaham || 34 ||
[Analyze grammar]

tena cātmānuśiṣṭo me putratve munisattamāḥ |
tejaso'rdhena putraste bhaviteti vṛṣadhvajaḥ || 35 ||
[Analyze grammar]

so'yaṃ vahnirupāgamya pādamūle mamāntikam |
śiṣyavatparicaryātha śāntaḥ prakṛtimāgataḥ || 36 ||
[Analyze grammar]

etadasya rahasyaṃ vaḥ padmanābhasya dhīmataḥ |
mayā premṇā samākhyātaṃ na bhīḥ kāryā tapodhanāḥ || 37 ||
[Analyze grammar]

sarvatra gatiravyagrā bhavatāṃ dīrghadarśanāḥ |
tapasvivratasaṃdīptā jñānavijñānaśobhitāḥ || 38 ||
[Analyze grammar]

yacchrutaṃ yacca vo dṛṣṭaṃ divi vā yadi vā bhuvi |
āścaryaṃ paramaṃ kiṃcittadbhavanto bruvantu me || 39 ||
[Analyze grammar]

tasyāmṛtanikāśasya vāṅmadhorasti me spṛhā |
bhavadbhiḥ kathitasyeha tapovananivāsibhiḥ || 40 ||
[Analyze grammar]

yadyapyahamadṛṣṭaṃ vā divyamadbhutadarśanam |
divi vā bhuvi vā kiṃcitpaśyāmyamaladarśanāḥ || 41 ||
[Analyze grammar]

prakṛtiḥ sā mama parā na kvacitpratihanyate |
na cātmagatamaiśvaryamāścaryaṃ pratibhāti me || 42 ||
[Analyze grammar]

śraddheyaḥ kathito hyarthaḥ sajjanaśravaṇaṃ gataḥ |
ciraṃ tiṣṭhati medinyāṃ śaile lekhyamivārpitam || 43 ||
[Analyze grammar]

tadahaṃ sajjanamukhānniḥsṛtaṃ tatsamāgame |
kathayiṣyāmyaharaharbuddhidīpakaraṃ nṛṇām || 44 ||
[Analyze grammar]

tato munigaṇāḥ sarve praśritāḥ kṛṣṇasaṃnidhau |
netraiḥ padmadalaprakhyairapaśyanta janārdanam || 45 ||
[Analyze grammar]

vardhayantastathaivānye pūjayantastathāpare |
vāgbhirṛgbhūṣitārthābhiḥ stuvanto madhusūdanam || 46 ||
[Analyze grammar]

tato munigaṇāḥ sarve nāradaṃ devadarśanam |
tadā niyojayāmāsurvacane vākyakovidam || 47 ||
[Analyze grammar]

yadāścaryamacintyaṃ ca girau himavati prabho |
anubhūtaṃ munigaṇaistīrthayātrāparāyaṇaiḥ || 48 ||
[Analyze grammar]

tadbhavānṛṣisaṃghasya hitārthaṃ sarvacoditaḥ |
yathādṛṣṭaṃ hṛṣīkeśe sarvamākhyātumarhati || 49 ||
[Analyze grammar]

evamuktaḥ sa munibhirnārado bhagavānṛṣiḥ |
kathayāmāsa devarṣiḥ pūrvavṛttāṃ kathāṃ śubhām || 50 ||
[Analyze grammar]