Chapter 125

yudhiṣṭhira uvāca |
sāmnā vāpi pradāne vā jyāyaḥ kiṃ bhavato matam |
prabrūhi bharataśreṣṭha yadatra vyatiricyate || 1 ||
[Analyze grammar]

bhīṣma uvāca |
sāmnā prasādyate kaściddānena ca tathāparaḥ |
puruṣaḥ prakṛtiṃ jñātvā tayorekataraṃ bhajet || 2 ||
[Analyze grammar]

guṇāṃstu śṛṇu me rājansāntvasya bharatarṣabha |
dāruṇānyapi bhūtāni sāntvenārādhayedyathā || 3 ||
[Analyze grammar]

atrāpyudāharantīmamitihāsaṃ purātanam |
gṛhītvā rakṣasā mukto dvijātiḥ kānane yathā || 4 ||
[Analyze grammar]

kaścittu buddhisaṃpanno brāhmaṇo vijane vane |
gṛhītaḥ kṛcchramāpanno rakṣasā bhakṣayiṣyatā || 5 ||
[Analyze grammar]

sa buddhiśrutasaṃpannastaṃ dṛṣṭvātīva bhīṣaṇam |
sāmaivāsminprayuyuje na mumoha na vivyathe || 6 ||
[Analyze grammar]

rakṣastu vācā saṃpūjya praśnaṃ papraccha taṃ dvijam |
mokṣyase brūhi me praśnaṃ kenāsmi hariṇaḥ kṛśaḥ || 7 ||
[Analyze grammar]

muhūrtamatha saṃcintya brāhmaṇastasya rakṣasaḥ |
ābhirgāthābhiravyagraḥ praśnaṃ pratijagāda ha || 8 ||
[Analyze grammar]

videśastho vilokastho vinā nūnaṃ suhṛjjanaiḥ |
viṣayānatulānbhuṅkṣe tenāsi hariṇaḥ kṛśaḥ || 9 ||
[Analyze grammar]

nūnaṃ mitrāṇi te rakṣaḥ sādhūpacaritānyapi |
svadoṣādaparajyante tenāsi hariṇaḥ kṛśaḥ || 10 ||
[Analyze grammar]

dhanaiśvaryādhikāḥ stabdhāstvadguṇaiḥ paramāvarāḥ |
avajānanti nūnaṃ tvāṃ tenāsi hariṇaḥ kṛśaḥ || 11 ||
[Analyze grammar]

guṇavānviguṇānanyānnūnaṃ paśyasi satkṛtān |
prājño'prājñānvinītātmā tenāsi hariṇaḥ kṛśaḥ || 12 ||
[Analyze grammar]

avṛttyā kliśyamāno'pi vṛttyupāyānvigarhayan |
māhātmyādvyathase nūnaṃ tenāsi hariṇaḥ kṛśaḥ || 13 ||
[Analyze grammar]

saṃpīḍyātmānamāryatvāttvayā kaścidupaskṛtaḥ |
jitaṃ tvāṃ manyate sādho tenāsi hariṇaḥ kṛśaḥ || 14 ||
[Analyze grammar]

kliśyamānānvimārgeṣu kāmakrodhāvṛtātmanaḥ |
manye nu dhyāyasi janāṃstenāsi hariṇaḥ kṛśaḥ || 15 ||
[Analyze grammar]

prājñaiḥ saṃbhāvito nūnaṃ naprājñairupasaṃhitaḥ |
hrīmānamarṣī durvṛttaistenāsi hariṇaḥ kṛśaḥ || 16 ||
[Analyze grammar]

nūnaṃ mitramukhaḥ śatruḥ kaścidāryavadācaran |
vañcayitvā gatastvāṃ vai tenāsi hariṇaḥ kṛśaḥ || 17 ||
[Analyze grammar]

prakāśārthagatirnūnaṃ rahasyakuśalaḥ kṛtī |
tajjñairna pūjyase nūnaṃ tenāsi hariṇaḥ kṛśaḥ || 18 ||
[Analyze grammar]

asatsvabhiniviṣṭeṣu bruvato muktasaṃśayam |
guṇāste na virājante tenāsi hariṇaḥ kṛśaḥ || 19 ||
[Analyze grammar]

dhanabuddhiśrutairhīnaḥ kevalaṃ tejasānvitaḥ |
mahatprārthayase nūnaṃ tenāsi hariṇaḥ kṛśaḥ || 20 ||
[Analyze grammar]

tapaḥpraṇihitātmānaṃ manye tvāraṇyakāṅkṣiṇam |
bandhuvargo na gṛhṇāti tenāsi hariṇaḥ kṛśaḥ || 21 ||
[Analyze grammar]

nūnamarthavatāṃ madhye tava vākyamanuttamam |
na bhāti kāle'bhihitaṃ tenāsi hariṇaḥ kṛśaḥ || 22 ||
[Analyze grammar]

dṛḍhapūrvaśrutaṃ mūrkhaṃ kupitaṃ hṛdayapriyam |
anunetuṃ na śaknoṣi tenāsi hariṇaḥ kṛśaḥ || 23 ||
[Analyze grammar]

nūnamāsaṃjayitvā te kṛtye kasmiṃścidīpsite |
kaścidarthayate'tyarthaṃ tenāsi hariṇaḥ kṛśaḥ || 24 ||
[Analyze grammar]

nūnaṃ tvā svaguṇāpekṣaṃ pūjayānaṃ suhṛddhruvam |
mayārtha iti jānāti tenāsi hariṇaḥ kṛśaḥ || 25 ||
[Analyze grammar]

antargatamabhiprāyaṃ na nūnaṃ lajjayecchasi |
vivaktuṃ prāptiśaithilyāttenāsi hariṇaḥ kṛśaḥ || 26 ||
[Analyze grammar]

nānābuddhirucīṃlloke manuṣyānnūnamicchasi |
grahītuṃ svaguṇaiḥ sarvāṃstenāsi hariṇaḥ kṛśaḥ || 27 ||
[Analyze grammar]

avidvānbhīruralpārtho vidyāvikramadānajam |
yaśaḥ prārthayase nūnaṃ tenāsi hariṇaḥ kṛśaḥ || 28 ||
[Analyze grammar]

cirābhilaṣitaṃ kiṃcitphalamaprāptameva te |
kṛtamanyairapahṛtaṃ tenāsi hariṇaḥ kṛśaḥ || 29 ||
[Analyze grammar]

nūnamātmakṛtaṃ doṣamapaśyankiṃcidātmani |
akāraṇe'bhiśasto'si tenāsi hariṇaḥ kṛśaḥ || 30 ||
[Analyze grammar]

suhṛdāmapramattānāmapramokṣyārthahānijam |
duḥkhamarthaguṇairhīnaṃ tenāsi hariṇaḥ kṛśaḥ || 31 ||
[Analyze grammar]

sādhūngṛhasthāndṛṣṭvā ca tathāsādhūnvanecarān |
muktāṃścāvasathe saktāṃstenāsi hariṇaḥ kṛśaḥ || 32 ||
[Analyze grammar]

dharmyamarthaṃ ca kāle ca deśe cābhihitaṃ vacaḥ |
na pratiṣṭhati te nūnaṃ tenāsi hariṇaḥ kṛśaḥ || 33 ||
[Analyze grammar]

dattānakuśalairarthānmanīṣī saṃjijīviṣuḥ |
prāpya vartayase nūnaṃ tenāsi hariṇaḥ kṛśaḥ || 34 ||
[Analyze grammar]

pāpānvivardhato dṛṣṭvā kalyāṇāṃścāvasīdataḥ |
dhruvaṃ mṛgayase yogyaṃ tenāsi hariṇaḥ kṛśaḥ || 35 ||
[Analyze grammar]

parasparaviruddhānāṃ priyaṃ nūnaṃ cikīrṣasi |
suhṛdāmavirodhena tenāsi hariṇaḥ kṛśaḥ || 36 ||
[Analyze grammar]

śrotriyāṃśca vikarmasthānprājñāṃścāpyajitendriyān |
manye'nudhyāyasi janāṃstenāsi hariṇaḥ kṛśaḥ || 37 ||
[Analyze grammar]

evaṃ saṃpūjitaṃ rakṣo vipraṃ taṃ pratyapūjayat |
sakhāyamakaroccainaṃ saṃyojyārthairmumoca ha || 38 ||
[Analyze grammar]