Chapter 101

yudhiṣṭhira uvāca |
ālokadānaṃ nāmaitatkīdṛśaṃ bharatarṣabha |
kathametatsamutpannaṃ phalaṃ cātra bravīhi me || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
manoḥ prajāpatervādaṃ suvarṇasya ca bhārata || 2 ||
[Analyze grammar]

tapasvī kaścidabhavatsuvarṇo nāma nāmataḥ |
varṇato hemavarṇaḥ sa suvarṇa iti paprathe || 3 ||
[Analyze grammar]

kulaśīlaguṇopetaḥ svādhyāye ca paraṃ gataḥ |
bahūnsvavaṃśaprabhavānsamatītaḥ svakairguṇaiḥ || 4 ||
[Analyze grammar]

sa kadācinmanuṃ vipro dadarśopasasarpa ca |
kuśalapraśnamanyonyaṃ tau ca tatra pracakratuḥ || 5 ||
[Analyze grammar]

tatastau siddhasaṃkalpau merau kāñcanaparvate |
ramaṇīye śilāpṛṣṭhe sahitau saṃnyaṣīdatām || 6 ||
[Analyze grammar]

tatra tau kathayāmāstāṃ kathā nānāvidhāśrayāḥ |
brahmarṣidevadaityānāṃ purāṇānāṃ mahātmanām || 7 ||
[Analyze grammar]

suvarṇastvabravīdvākyaṃ manuṃ svāyaṃbhuvaṃ prabhum |
hitārthaṃ sarvabhūtānāṃ praśnaṃ me vaktumarhasi || 8 ||
[Analyze grammar]

sumanobhiryadijyante daivatāni prajeśvara |
kimetatkathamutpannaṃ phalayogaṃ ca śaṃsa me || 9 ||
[Analyze grammar]

manuruvāca |
atrāpyudāharantīmamitihāsaṃ purātanam |
śukrasya ca baleścaiva saṃvādaṃ vai samāgame || 10 ||
[Analyze grammar]

balervairocanasyeha trailokyamanuśāsataḥ |
samīpamājagāmāśu śukro bhṛgukulodvahaḥ || 11 ||
[Analyze grammar]

tamarghyādibhirabhyarcya bhārgavaṃ so'surādhipaḥ |
niṣasādāsane paścādvidhivadbhūridakṣiṇaḥ || 12 ||
[Analyze grammar]

katheyamabhavattatra yā tvayā parikīrtitā |
sumanodhūpadīpānāṃ saṃpradāne phalaṃ prati || 13 ||
[Analyze grammar]

tataḥ papraccha daityendraḥ kavīndraṃ praśnamuttamam |
sumanodhūpadīpānāṃ kiṃ phalaṃ brahmavittama |
pradānasya dvijaśreṣṭha tadbhavānvaktumarhati || 14 ||
[Analyze grammar]

śukra uvāca |
tapaḥ pūrvaṃ samutpannaṃ dharmastasmādanantaram |
etasminnantare caiva vīrudoṣadhya eva ca || 15 ||
[Analyze grammar]

somasyātmā ca bahudhā saṃbhūtaḥ pṛthivītale |
amṛtaṃ ca viṣaṃ caiva yāścānyāstulyajātayaḥ || 16 ||
[Analyze grammar]

amṛtaṃ manasaḥ prītiṃ sadyaḥ puṣṭiṃ dadāti ca |
mano glapayate tīvraṃ viṣaṃ gandhena sarvaśaḥ || 17 ||
[Analyze grammar]

amṛtaṃ maṅgalaṃ viddhi mahadviṣamamaṅgalam |
oṣadhyo hyamṛtaṃ sarvaṃ viṣaṃ tejo'gnisaṃbhavam || 18 ||
[Analyze grammar]

mano hlādayate yasmācchriyaṃ cāpi dadhāti ha |
tasmātsumanasaḥ proktā naraiḥ sukṛtakarmabhiḥ || 19 ||
[Analyze grammar]

devatābhyaḥ sumanaso yo dadāti naraḥ śuciḥ |
tasmātsumanasaḥ proktā yasmāttuṣyanti devatāḥ || 20 ||
[Analyze grammar]

yaṃ yamuddiśya dīyerandevaṃ sumanasaḥ prabho |
maṅgalārthaṃ sa tenāsya prīto bhavati daityapa || 21 ||
[Analyze grammar]

jñeyāstūgrāśca saumyāśca tejasvinyaśca tāḥ pṛthak |
oṣadhyo bahuvīryāśca bahurūpāstathaiva ca || 22 ||
[Analyze grammar]

yajñiyānāṃ ca vṛkṣāṇāmayajñiyānnibodha me |
āsurāṇi ca mālyāni daivatebhyo hitāni ca || 23 ||
[Analyze grammar]

rākṣasānāṃ surāṇāṃ ca yakṣāṇāṃ ca tathā priyāḥ |
pitṝṇāṃ mānuṣāṇāṃ ca kāntā yāstvanupūrvaśaḥ || 24 ||
[Analyze grammar]

vanyā grāmyāśceha tathā kṛṣṭoptāḥ parvatāśrayāḥ |
akaṇṭakāḥ kaṇṭakinyo gandharūparasānvitāḥ || 25 ||
[Analyze grammar]

dvividho hi smṛto gandha iṣṭo'niṣṭaśca puṣpajaḥ |
iṣṭagandhāni devānāṃ puṣpāṇīti vibhāvayet || 26 ||
[Analyze grammar]

akaṇṭakānāṃ vṛkṣāṇāṃ śvetaprāyāśca varṇataḥ |
teṣāṃ puṣpāṇi devānāmiṣṭāni satataṃ prabho || 27 ||
[Analyze grammar]

jalajāni ca mālyāni padmādīni ca yāni ca |
gandharvanāgayakṣebhyastāni dadyādvicakṣaṇaḥ || 28 ||
[Analyze grammar]

oṣadhyo raktapuṣpāśca kaṭukāḥ kaṇṭakānvitāḥ |
śatrūṇāmabhicārārthamatharvasu nidarśitāḥ || 29 ||
[Analyze grammar]

tīkṣṇavīryāstu bhūtānāṃ durālambhāḥ sakaṇṭakāḥ |
raktabhūyiṣṭhavarṇāśca kṛṣṇāścaivopahārayet || 30 ||
[Analyze grammar]

manohṛdayanandinyo vimarde madhurāśca yāḥ |
cārurūpāḥ sumanaso mānuṣāṇāṃ smṛtā vibho || 31 ||
[Analyze grammar]

na tu śmaśānasaṃbhūtā na devāyatanodbhavāḥ |
saṃnayetpuṣṭiyukteṣu vivāheṣu rahaḥsu ca || 32 ||
[Analyze grammar]

girisānuruhāḥ saumyā devānāmupapādayet |
prokṣitābhyukṣitāḥ saumyā yathāyogaṃ yathāsmṛti || 33 ||
[Analyze grammar]

gandhena devāstuṣyanti darśanādyakṣarākṣasāḥ |
nāgāḥ samupabhogena tribhiretaistu mānuṣāḥ || 34 ||
[Analyze grammar]

sadyaḥ prīṇāti devānvai te prītā bhāvayantyuta |
saṃkalpasiddhā martyānāmīpsitaiśca manorathaiḥ || 35 ||
[Analyze grammar]

devāḥ prīṇanti satataṃ mānitā mānayanti ca |
avajñātāvadhūtāśca nirdahantyadhamānnarān || 36 ||
[Analyze grammar]

ataūrdhvaṃ pravakṣyāmi dhūpadānavidhau phalam |
dhūpāṃśca vividhānsādhūnasādhūṃśca nibodha me || 37 ||
[Analyze grammar]

niryāsaḥ saralaścaiva kṛtrimaścaiva te trayaḥ |
iṣṭāniṣṭo bhavedgandhastanme vistarataḥ śṛṇu || 38 ||
[Analyze grammar]

niryāsāḥ sallakīvarjyā devānāṃ dayitāstu te |
gugguluḥ pravarasteṣāṃ sarveṣāmiti niścayaḥ || 39 ||
[Analyze grammar]

aguruḥ sāriṇāṃ śreṣṭho yakṣarākṣasabhoginām |
daityānāṃ sallakījaśca kāṅkṣito yaśca tadvidhaḥ || 40 ||
[Analyze grammar]

atha sarjarasādīnāṃ gandhaiḥ pārthivadāravaiḥ |
phāṇitāsavasaṃyuktairmanuṣyāṇāṃ vidhīyate || 41 ||
[Analyze grammar]

devadānavabhūtānāṃ sadyastuṣṭikaraḥ smṛtaḥ |
ye'nye vaihārikāste tu mānuṣāṇāmiti smṛtāḥ || 42 ||
[Analyze grammar]

ya evoktāḥ sumanasāṃ pradāne guṇahetavaḥ |
dhūpeṣvapi parijñeyāsta eva prītivardhanāḥ || 43 ||
[Analyze grammar]

dīpadāne pravakṣyāmi phalayogamanuttamam |
yathā yena yadā caiva pradeyā yādṛśāśca te || 44 ||
[Analyze grammar]

jyotistejaḥ prakāśaścāpyūrdhvagaṃ cāpi varṇyate |
pradānaṃ tejasāṃ tasmāttejo vardhayate nṛṇām || 45 ||
[Analyze grammar]

andhaṃ tamastamisraṃ ca dakṣiṇāyanameva ca |
uttarāyaṇametasmājjyotirdānaṃ praśasyate || 46 ||
[Analyze grammar]

yasmādūrdhvagametattu tamasaścaiva bheṣajam |
tasmādūrdhvagaterdātā bhavediti viniścayaḥ || 47 ||
[Analyze grammar]

devāstejasvino yasmātprabhāvantaḥ prakāśakāḥ |
tāmasā rākṣasāśceti tasmāddīpaḥ pradīyate || 48 ||
[Analyze grammar]

ālokadānāccakṣuṣmānprabhāyukto bhavennaraḥ |
tāndattvā nopahiṃseta na harennopanāśayet || 49 ||
[Analyze grammar]

dīpahartā bhavedandhastamogatirasuprabhaḥ |
dīpapradaḥ svargaloke dīpamālī virājate || 50 ||
[Analyze grammar]

haviṣā prathamaḥ kalpo dvitīyastvauṣadhīrasaiḥ |
vasāmedosthiniryāsairna kāryaḥ puṣṭimicchatā || 51 ||
[Analyze grammar]

giriprapāte gahane caityasthāne catuṣpathe |
dīpadātā bhavennityaṃ ya icchedbhūtimātmanaḥ || 52 ||
[Analyze grammar]

kuloddyoto viśuddhātmā prakāśatvaṃ ca gacchati |
jyotiṣāṃ caiva sālokyaṃ dīpadātā naraḥ sadā || 53 ||
[Analyze grammar]

balikarmasu vakṣyāmi guṇānkarmaphalodayān |
devayakṣoraganṛṇāṃ bhūtānāmatha rakṣasām || 54 ||
[Analyze grammar]

yeṣāṃ nāgrabhujo viprā devatātithibālakāḥ |
rākṣasāneva tānviddhi nirvaṣaṭkāramaṅgalān || 55 ||
[Analyze grammar]

tasmādagraṃ prayaccheta devebhyaḥ pratipūjitam |
śirasā praṇataścāpi haredbalimatandritaḥ || 56 ||
[Analyze grammar]

gṛhyā hi devatā nityamāśaṃsanti gṛhātsadā |
bāhyāścāgantavo ye'nye yakṣarākṣasapannagāḥ || 57 ||
[Analyze grammar]

ito dattena jīvanti devatāḥ pitarastathā |
te prītāḥ prīṇayantyetānāyuṣā yaśasā dhanaiḥ || 58 ||
[Analyze grammar]

balayaḥ saha puṣpaistu devānāmupahārayet |
dadhidrapsayutāḥ puṇyāḥ sugandhāḥ priyadarśanāḥ || 59 ||
[Analyze grammar]

kāryā rudhiramāṃsāḍhyā balayo yakṣarakṣasām |
surāsavapuraskārā lājollepanabhūṣitāḥ || 60 ||
[Analyze grammar]

nāgānāṃ dayitā nityaṃ padmotpalavimiśritāḥ |
tilānguḍasusaṃpannānbhūtānāmupahārayet || 61 ||
[Analyze grammar]

agradātāgrabhogī syādbalavarṇasamanvitaḥ |
tasmādagraṃ prayaccheta devebhyaḥ pratipūjitam || 62 ||
[Analyze grammar]

jvalatyaharaho veśma yāścāsya gṛhadevatāḥ |
tāḥ pūjyā bhūtikāmena prasṛtāgrapradāyinā || 63 ||
[Analyze grammar]

ityetadasurendrāya kāvyaḥ provāca bhārgavaḥ |
suvarṇāya manuḥ prāha suvarṇo nāradāya ca || 64 ||
[Analyze grammar]

nārado'pi mayi prāha guṇānetānmahādyute |
tvamapyetadviditveha sarvamācara putraka || 65 ||
[Analyze grammar]