Chapter 61

yudhiṣṭhira uvāca |
idaṃ deyamidaṃ deyamitīyaṃ śruticodanā |
bahudeyāśca rājānaḥ kiṃ sviddeyamanuttamam || 1 ||
[Analyze grammar]

bhīṣma uvāca |
ati dānāni sarvāṇi pṛthivīdānamucyate |
acalā hyakṣayā bhūmirdogdhrī kāmānanuttamān || 2 ||
[Analyze grammar]

dogdhrī vāsāṃsi ratnāni paśūnvrīhiyavāṃstathā |
bhūmidaḥ sarvabhūteṣu śāśvatīredhate samāḥ || 3 ||
[Analyze grammar]

yāvadbhūmerāyuriha tāvadbhūmida edhate |
na bhūmidānādastīha paraṃ kiṃcidyudhiṣṭhira || 4 ||
[Analyze grammar]

apyalpaṃ pradaduḥ pūrve pṛthivyā iti naḥ śrutam |
bhūmimete daduḥ sarve ye bhūmiṃ bhuñjate janāḥ || 5 ||
[Analyze grammar]

svakarmaivopajīvanti narā iha paratra ca |
bhūmirbhūtirmahādevī dātāraṃ kurute priyam || 6 ||
[Analyze grammar]

ya etāṃ dakṣiṇāṃ dadyādakṣayāṃ pṛthivīpatiḥ |
punarnaratvaṃ saṃprāpya bhavetsa pṛthivīpatiḥ || 7 ||
[Analyze grammar]

yathā dānaṃ tathā bhoga iti dharmeṣu niścayaḥ |
saṃgrāme vā tanuṃ jahyāddadyādvā pṛthivīmimām || 8 ||
[Analyze grammar]

ityetāṃ kṣatrabandhūnāṃ vadanti paramāśiṣam |
punāti dattā pṛthivī dātāramiti śuśruma || 9 ||
[Analyze grammar]

api pāpasamācāraṃ brahmaghnamapi vānṛtam |
saiva pāpaṃ pāvayati saiva pāpātpramocayet || 10 ||
[Analyze grammar]

api pāpakṛtāṃ rājñāṃ pratigṛhṇanti sādhavaḥ |
pṛthivīṃ nānyadicchanti pāvanaṃ jananī yathā || 11 ||
[Analyze grammar]

nāmāsyāḥ priyadatteti guhyaṃ devyāḥ sanātanam |
dānaṃ vāpyatha vā jñānaṃ nāmno'syāḥ paramaṃ priyam |
tasmātprāpyaiva pṛthivīṃ dadyādviprāya pārthivaḥ || 12 ||
[Analyze grammar]

nābhūmipatinā bhūmiradhiṣṭheyā kathaṃcana |
na vā pātreṇa vā gūhedantardhānena vā caret |
ye cānye bhūmimiccheyuḥ kuryurevamasaṃśayam || 13 ||
[Analyze grammar]

yaḥ sādhorbhūmimādatte na bhūmiṃ vindate tu saḥ |
bhūmiṃ tu dattvā sādhubhyo vindate bhūmimeva hi |
pretyeha ca sa dharmātmā saṃprāpnoti mahadyaśaḥ || 14 ||
[Analyze grammar]

yasya viprānuśāsanti sādhorbhūmiṃ sadaiva hi |
na tasya śatravo rājanpraśāsanti vasuṃdharām || 15 ||
[Analyze grammar]

yatkiṃcitpuruṣaḥ pāpaṃ kurute vṛttikarśitaḥ |
api gocarmamātreṇa bhūmidānena pūyate || 16 ||
[Analyze grammar]

ye'pi saṃkīrṇakarmāṇo rājāno raudrakarmiṇaḥ |
tebhyaḥ pavitramākhyeyaṃ bhūmidānamanuttamam || 17 ||
[Analyze grammar]

alpāntaramidaṃ śaśvatpurāṇā menire janāḥ |
yo yajedaśvamedhena dadyādvā sādhave mahīm || 18 ||
[Analyze grammar]

api cetsukṛtaṃ kṛtvā śaṅkerannapi paṇḍitāḥ |
aśakyamekamevaitadbhūmidānamanuttamam || 19 ||
[Analyze grammar]

suvarṇaṃ rajataṃ vastraṃ maṇimuktāvasūni ca |
sarvametanmahāprājña dadāti vasudhāṃ dadat || 20 ||
[Analyze grammar]

tapo yajñaḥ śrutaṃ śīlamalobhaḥ satyasaṃdhatā |
gurudaivatapūjā ca nātivartanti bhūmidam || 21 ||
[Analyze grammar]

bharturniḥśreyase yuktāstyaktātmāno raṇe hatāḥ |
brahmalokagatāḥ siddhā nātikrāmanti bhūmidam || 22 ||
[Analyze grammar]

yathā janitrī kṣīreṇa svaputraṃ bharate sadā |
anugṛhṇāti dātāraṃ tathā sarvarasairmahī || 23 ||
[Analyze grammar]

mṛtyorvai kiṃkaro daṇḍastāpo vahneḥ sudāruṇaḥ |
ghorāśca vāruṇāḥ pāśā nopasarpanti bhūmidam || 24 ||
[Analyze grammar]

pitṝṃśca pitṛlokasthāndevaloke ca devatāḥ |
saṃtarpayati śāntātmā yo dadāti vasuṃdharām || 25 ||
[Analyze grammar]

kṛśāya mriyamāṇāya vṛttimlānāya sīdate |
bhūmiṃ vṛttikarīṃ dattvā satrī bhavati mānavaḥ || 26 ||
[Analyze grammar]

yathā dhāvati gaurvatsaṃ kṣīramabhyutsṛjantyuta |
evameva mahābhāga bhūmirbhavati bhūmidam || 27 ||
[Analyze grammar]

halakṛṣṭāṃ mahīṃ dattvā sabījāṃ saphalāmapi |
udīrṇaṃ vāpi śaraṇaṃ tathā bhavati kāmadaḥ || 28 ||
[Analyze grammar]

brāhmaṇaṃ vṛttasaṃpannamāhitāgniṃ śucivratam |
naraḥ pratigrāhya mahīṃ na yāti yamasādanam || 29 ||
[Analyze grammar]

yathā candramaso vṛddhirahanyahani jāyate |
tathā bhūmikṛtaṃ dānaṃ sasye sasye vivardhate || 30 ||
[Analyze grammar]

atra gāthā bhūmigītāḥ kīrtayanti purāvidaḥ |
yāḥ śrutvā jāmadagnyena dattā bhūḥ kāśyapāya vai || 31 ||
[Analyze grammar]

māmevādatta māṃ datta māṃ dattvā māmavāpsyatha |
asmiṃlloke pare caiva tataścājanane punaḥ || 32 ||
[Analyze grammar]

ya imāṃ vyāhṛtiṃ veda brāhmaṇo brahmasaṃśritaḥ |
śrāddhasya hūyamānasya brahmabhūyaṃ sa gacchati || 33 ||
[Analyze grammar]

kṛtyānāmabhiśastānāṃ duriṣṭaśamanaṃ mahat |
prāyaścittamahaṃ kṛtvā punātyubhayato daśa || 34 ||
[Analyze grammar]

punāti ya idaṃ veda veda cāhaṃ tathaiva ca |
prakṛtiḥ sarvabhūtānāṃ bhūmirvai śāśvatī matā || 35 ||
[Analyze grammar]

abhiṣicyaiva nṛpatiṃ śrāvayedimamāgamam |
yathā śrutvā mahīṃ dadyānnādadyātsādhutaśca tām || 36 ||
[Analyze grammar]

so'yaṃ kṛtsno brāhmaṇārtho rājārthaścāpyasaṃśayam |
rājā hi dharmakuśalaḥ prathamaṃ bhūtilakṣaṇam || 37 ||
[Analyze grammar]

atha yeṣāmadharmajño rājā bhavati nāstikaḥ |
na te sukhaṃ prabudhyante na sukhaṃ prasvapanti ca || 38 ||
[Analyze grammar]

sadā bhavanti codvignāstasya duścaritairnarāḥ |
yogakṣemā hi bahavo rāṣṭraṃ nāsyāviśanti tat || 39 ||
[Analyze grammar]

atha yeṣāṃ punaḥ prājño rājā bhavati dhārmikaḥ |
sukhaṃ te pratibudhyante susukhaṃ prasvapanti ca || 40 ||
[Analyze grammar]

tasya rājñaḥ śubhairāryaiḥ karmabhirnirvṛtāḥ prajāḥ |
yogakṣemeṇa vṛṣṭyā ca vivardhante svakarmabhiḥ || 41 ||
[Analyze grammar]

sa kulīnaḥ sa puruṣaḥ sa bandhuḥ sa ca puṇyakṛt |
sa dātā sa ca vikrānto yo dadāti vasuṃdharām || 42 ||
[Analyze grammar]

ādityā iva dīpyante tejasā bhuvi mānavāḥ |
dadanti vasudhāṃ sphītāṃ ye vedaviduṣi dvije || 43 ||
[Analyze grammar]

yathā bījāni rohanti prakīrṇāni mahītale |
tathā kāmāḥ prarohanti bhūmidānasamārjitāḥ || 44 ||
[Analyze grammar]

ādityo varuṇo viṣṇurbrahmā somo hutāśanaḥ |
śūlapāṇiśca bhagavānpratinandanti bhūmidam || 45 ||
[Analyze grammar]

bhūmau jāyanti puruṣā bhūmau niṣṭhāṃ vrajanti ca |
caturvidho hi loko'yaṃ yo'yaṃ bhūmiguṇātmakaḥ || 46 ||
[Analyze grammar]

eṣā mātā pitā caiva jagataḥ pṛthivīpate |
nānayā sadṛśaṃ bhūtaṃ kiṃcidasti janādhipa || 47 ||
[Analyze grammar]

atrāpyudāharantīmamitihāsaṃ purātanam |
bṛhaspateśca saṃvādamindrasya ca yudhiṣṭhira || 48 ||
[Analyze grammar]

iṣṭvā kratuśatenātha mahatā dakṣiṇāvatā |
maghavā vāgvidāṃ śreṣṭhaṃ papracchedaṃ bṛhaspatim || 49 ||
[Analyze grammar]

bhagavankena dānena svargataḥ sukhamedhate |
yadakṣayaṃ mahārghaṃ ca tadbrūhi vadatāṃ vara || 50 ||
[Analyze grammar]

ityuktaḥ sa surendreṇa tato devapurohitaḥ |
bṛhaspatirmahātejāḥ pratyuvāca śatakratum || 51 ||
[Analyze grammar]

suvarṇadānaṃ godānaṃ bhūmidānaṃ ca vṛtrahan |
dadadetānmahāprājñaḥ sarvapāpaiḥ pramucyate || 52 ||
[Analyze grammar]

na bhūmidānāddevendra paraṃ kiṃciditi prabho |
viśiṣṭamiti manyāmi yathā prāhurmanīṣiṇaḥ || 53 ||
[Analyze grammar]

ye śūrā nihatā yuddhe svaryātā dānagṛddhinaḥ |
sarve te vibudhaśreṣṭha nātikrāmanti bhūmidam || 54 ||
[Analyze grammar]

bharturniḥśreyase yuktāstyaktātmāno raṇe hatāḥ |
brahmalokagatāḥ śūrā nātikrāmanti bhūmidam || 55 ||
[Analyze grammar]

pañca pūrvādipuruṣāḥ ṣaṭca ye vasudhāṃ gatāḥ |
ekādaśa dadadbhūmiṃ paritrātīha mānavaḥ || 56 ||
[Analyze grammar]

ratnopakīrṇāṃ vasudhāṃ yo dadāti puraṃdara |
sa muktaḥ sarvakaluṣaiḥ svargaloke mahīyate || 57 ||
[Analyze grammar]

mahīṃ sphītāṃ dadadrājā sarvakāmaguṇānvitām |
rājādhirājo bhavati taddhi dānamanuttamam || 58 ||
[Analyze grammar]

sarvakāmasamāyuktāṃ kāśyapīṃ yaḥ prayacchati |
sarvabhūtāni manyante māṃ dadātīti vāsava || 59 ||
[Analyze grammar]

sarvakāmadughāṃ dhenuṃ sarvakāmapurogamām |
dadāti yaḥ sahasrākṣa sa svargaṃ yāti mānavaḥ || 60 ||
[Analyze grammar]

madhusarpiḥpravāhinyaḥ payodadhivahāstathā |
saritastarpayantīha surendra vasudhāpradam || 61 ||
[Analyze grammar]

bhūmipradānānnṛpatirmucyate rājakilbiṣāt |
na hi bhūmipradānena dānamanyadviśiṣyate || 62 ||
[Analyze grammar]

dadāti yaḥ samudrāntāṃ pṛthivīṃ śastranirjitām |
taṃ janāḥ kathayantīha yāvaddharati gauriyam || 63 ||
[Analyze grammar]

puṇyāmṛddharasāṃ bhūmiṃ yo dadāti puraṃdara |
na tasya lokāḥ kṣīyante bhūmidānaguṇārjitāḥ || 64 ||
[Analyze grammar]

sarvathā pārthiveneha satataṃ bhūtimicchatā |
bhūrdeyā vidhivacchakra pātre sukhamabhīpsatā || 65 ||
[Analyze grammar]

api kṛtvā naraḥ pāpaṃ bhūmiṃ dattvā dvijātaye |
samutsṛjati tatpāpaṃ jīrṇāṃ tvacamivoragaḥ || 66 ||
[Analyze grammar]

sāgarānsaritaḥ śailānkānanāni ca sarvaśaḥ |
sarvametannaraḥ śakra dadāti vasudhāṃ dadat || 67 ||
[Analyze grammar]

taḍāgānyudapānāni srotāṃsi ca sarāṃsi ca |
snehānsarvarasāṃścaiva dadāti vasudhāṃ dadat || 68 ||
[Analyze grammar]

oṣadhīḥ kṣīrasaṃpannā nagānpuṣpaphalānvitān |
kānanopalaśailāṃśca dadāti vasudhāṃ dadat || 69 ||
[Analyze grammar]

agniṣṭomaprabhṛtibhiriṣṭvā ca svāptadakṣiṇaiḥ |
na tatphalamavāpnoti bhūmidānādyadaśnute || 70 ||
[Analyze grammar]

dātā daśānugṛhṇāti daśa hanti tathā kṣipan |
pūrvadattāṃ haranbhūmiṃ narakāyopagacchati || 71 ||
[Analyze grammar]

na dadāti pratiśrutya dattvā vā harate tu yaḥ |
sa baddho vāruṇaiḥ pāśaistapyate mṛtyuśāsanāt || 72 ||
[Analyze grammar]

āhitāgniṃ sadāyajñaṃ kṛśabhṛtyaṃ priyātithim |
ye bharanti dvijaśreṣṭhaṃ nopasarpanti te yamam || 73 ||
[Analyze grammar]

brāhmaṇeṣvṛṇabhūtaṃ syātpārthivasya puraṃdara |
itareṣāṃ tu varṇānāṃ tārayetkṛśadurbalān || 74 ||
[Analyze grammar]

nācchindyātsparśitāṃ bhūmiṃ pareṇa tridaśādhipa |
brāhmaṇāya suraśreṣṭha kṛśabhṛtyāya kaścana || 75 ||
[Analyze grammar]

athāśru patitaṃ teṣāṃ dīnānāmavasīdatām |
brāhmaṇānāṃ hṛte kṣetre hanyāttripuruṣaṃ kulam || 76 ||
[Analyze grammar]

bhūmipālaṃ cyutaṃ rāṣṭrādyastu saṃsthāpayetpunaḥ |
tasya vāsaḥ sahasrākṣa nākapṛṣṭhe mahīyate || 77 ||
[Analyze grammar]

ikṣubhiḥ saṃtatāṃ bhūmiṃ yavagodhūmasaṃkulām |
gośvavāhanasaṃpūrṇāṃ bāhuvīryasamārjitām || 78 ||
[Analyze grammar]

nidhigarbhāṃ dadadbhūmiṃ sarvaratnaparicchadām |
akṣayāṃllabhate lokānbhūmisatraṃ hi tasya tat || 79 ||
[Analyze grammar]

vidhūya kaluṣaṃ sarvaṃ virajāḥ saṃmataḥ satām |
loke mahīyate sadbhiryo dadāti vasuṃdharām || 80 ||
[Analyze grammar]

yathāpsu patitaḥ śakra tailabindurvisarpati |
tathā bhūmikṛtaṃ dānaṃ sasye sasye visarpati || 81 ||
[Analyze grammar]

ye raṇāgre mahīpālāḥ śūrāḥ samitiśobhanāḥ |
vadhyante'bhimukhāḥ śakra brahmalokaṃ vrajanti te || 82 ||
[Analyze grammar]

nṛtyagītaparā nāryo divyamālyavibhūṣitāḥ |
upatiṣṭhanti devendra sadā bhūmipradaṃ divi || 83 ||
[Analyze grammar]

modate ca sukhaṃ svarge devagandharvapūjitaḥ |
yo dadāti mahīṃ samyagvidhineha dvijātaye || 84 ||
[Analyze grammar]

śatamapsarasaścaiva divyamālyavibhūṣitāḥ |
upatiṣṭhanti devendra sadā bhūmipradaṃ naram || 85 ||
[Analyze grammar]

śaṅkhaṃ bhadrāsanaṃ chatraṃ varāśvā varavāraṇāḥ |
bhūmipradānātpuṣpāṇi hiraṇyanicayāstathā || 86 ||
[Analyze grammar]

ājñā sadāpratihatā jayaśabdo bhavatyatha |
bhūmidānasya puṣpāṇi phalaṃ svargaḥ puraṃdara || 87 ||
[Analyze grammar]

hiraṇyapuṣpāścauṣadhyaḥ kuśakāñcanaśāḍvalāḥ |
amṛtaprasavāṃ bhūmiṃ prāpnoti puruṣo dadat || 88 ||
[Analyze grammar]

nāsti bhūmisamaṃ dānaṃ nāsti mātṛsamo guruḥ |
nāsti satyasamo dharmo nāsti dānasamo nidhiḥ || 89 ||
[Analyze grammar]

etadāṅgirasācchrutvā vāsavo vasudhāmimām |
vasuratnasamākīrṇāṃ dadāvāṅgirase tadā || 90 ||
[Analyze grammar]

ya imaṃ śrāvayecchrāddhe bhūmidānasya saṃstavam |
na tasya rakṣasāṃ bhāgo nāsurāṇāṃ bhavatyuta || 91 ||
[Analyze grammar]

akṣayaṃ ca bhaveddattaṃ pitṛbhyastanna saṃśayaḥ |
tasmācchrāddheṣvidaṃ vipro bhuñjataḥ śrāvayeddvijān || 92 ||
[Analyze grammar]

ityetatsarvadānānāṃ śreṣṭhamuktaṃ tavānagha |
mayā bharataśārdūla kiṃ bhūyaḥ śrotumicchasi || 93 ||
[Analyze grammar]