Chapter 62

yudhiṣṭhira uvāca |
kāni dānāni loke'smindātukāmo mahīpatiḥ |
guṇādhikebhyo viprebhyo dadyādbharatasattama || 1 ||
[Analyze grammar]

kena tuṣyanti te sadyastuṣṭāḥ kiṃ pradiśantyuta |
śaṃsa me tanmahābāho phalaṃ puṇyakṛtaṃ mahat || 2 ||
[Analyze grammar]

dattaṃ kiṃ phalavadrājanniha loke paratra ca |
bhavataḥ śrotumicchāmi tanme vistarato vada || 3 ||
[Analyze grammar]

bhīṣma uvāca |
imamarthaṃ purā pṛṣṭo nārado devadarśanaḥ |
yaduktavānasau tanme gadataḥ śṛṇu bhārata || 4 ||
[Analyze grammar]

nārada uvāca |
annameva praśaṃsanti devāḥ sarṣigaṇāḥ purā |
lokatantraṃ hi yajñāśca sarvamanne pratiṣṭhitam || 5 ||
[Analyze grammar]

annena sadṛśaṃ dānaṃ na bhūtaṃ na bhaviṣyati |
tasmādannaṃ viśeṣeṇa dātumicchanti mānavāḥ || 6 ||
[Analyze grammar]

annamūrjaskaraṃ loke prāṇāścānne pratiṣṭhitāḥ |
annena dhāryate sarvaṃ viśvaṃ jagadidaṃ prabho || 7 ||
[Analyze grammar]

annādgṛhasthā loke'sminbhikṣavastata eva ca |
annātprabhavati prāṇaḥ pratyakṣaṃ nātra saṃśayaḥ || 8 ||
[Analyze grammar]

kuṭumbaṃ pīḍayitvāpi brāhmaṇāya mahātmane |
dātavyaṃ bhikṣave cānnamātmano bhūtimicchatā || 9 ||
[Analyze grammar]

brāhmaṇāyābhirūpāya yo dadyādannamarthine |
nidadhāti nidhiṃ śreṣṭhaṃ pāralaukikamātmanaḥ || 10 ||
[Analyze grammar]

śrāntamadhvani vartantaṃ vṛddhamarhamupasthitam |
arcayedbhūtimanvicchangṛhastho gṛhamāgatam || 11 ||
[Analyze grammar]

krodhamutpatitaṃ hitvā suśīlo vītamatsaraḥ |
annadaḥ prāpnute rājandivi ceha ca yatsukham || 12 ||
[Analyze grammar]

nāvamanyedabhigataṃ na praṇudyātkathaṃcana |
api śvapāke śuni vā na dānaṃ vipraṇaśyati || 13 ||
[Analyze grammar]

yo dadyādaparikliṣṭamannamadhvani vartate |
śrāntāyādṛṣṭapūrvāya sa mahaddharmamāpnuyāt || 14 ||
[Analyze grammar]

pitṝndevānṛṣīnviprānatithīṃśca janādhipa |
yo naraḥ prīṇayatyannaistasya puṇyaphalaṃ mahat || 15 ||
[Analyze grammar]

kṛtvāpi pāpakaṃ karma yo dadyādannamarthine |
brāhmaṇāya viśeṣeṇa na sa pāpena yujyate || 16 ||
[Analyze grammar]

brāhmaṇeṣvakṣayaṃ dānamannaṃ śūdre mahāphalam |
annadānaṃ ca śūdre ca brāhmaṇe ca viśiṣyate || 17 ||
[Analyze grammar]

na pṛcchedgotracaraṇaṃ svādhyāyaṃ deśameva vā |
bhikṣito brāhmaṇeneha janma vānnaṃ prayācitaḥ || 18 ||
[Analyze grammar]

annadasyānnavṛkṣāśca sarvakāmaphalānvitāḥ |
bhavantīhātha vāmutra nṛpate nātra saṃśayaḥ || 19 ||
[Analyze grammar]

āśaṃsante hi pitaraḥ suvṛṣṭimiva karṣakāḥ |
asmākamapi putro vā pautro vānnaṃ pradāsyati || 20 ||
[Analyze grammar]

brāhmaṇo hi mahadbhūtaṃ svayaṃ dehīti yācate |
akāmo vā sakāmo vā dattvā puṇyamavāpnuyāt || 21 ||
[Analyze grammar]

brāhmaṇaḥ sarvabhūtānāmatithiḥ prasṛtāgrabhuk |
viprā yamabhigacchanti bhikṣamāṇā gṛhaṃ sadā || 22 ||
[Analyze grammar]

satkṛtāśca nivartante tadatīva pravardhate |
mahābhoge kule janma pretya prāpnoti bhārata || 23 ||
[Analyze grammar]

dattvā tvannaṃ naro loke tathā sthānamanuttamam |
mṛṣṭamṛṣṭānnadāyī tu svarge vasati satkṛtaḥ || 24 ||
[Analyze grammar]

annaṃ prāṇā narāṇāṃ hi sarvamanne pratiṣṭhitam |
annadaḥ paśumānputrī dhanavānbhogavānapi || 25 ||
[Analyze grammar]

prāṇavāṃścāpi bhavati rūpavāṃśca tathā nṛpa |
annadaḥ prāṇado loke sarvadaḥ procyate tu saḥ || 26 ||
[Analyze grammar]

annaṃ hi dattvātithaye brāhmaṇāya yathāvidhi |
pradātā sukhamāpnoti devaiścāpyabhipūjyate || 27 ||
[Analyze grammar]

brāhmaṇo hi mahadbhūtaṃ kṣetraṃ carati pādavat |
upyate tatra yadbījaṃ taddhi puṇyaphalaṃ mahat || 28 ||
[Analyze grammar]

pratyakṣaṃ prītijananaṃ bhoktṛdātrorbhavatyuta |
sarvāṇyanyāni dānāni parokṣaphalavantyuta || 29 ||
[Analyze grammar]

annāddhi prasavaṃ viddhi ratimannāddhi bhārata |
dharmārthāvannato viddhi roganāśaṃ tathānnataḥ || 30 ||
[Analyze grammar]

annaṃ hyamṛtamityāha purākalpe prajāpatiḥ |
annaṃ bhuvaṃ divaṃ khaṃ ca sarvamanne pratiṣṭhitam || 31 ||
[Analyze grammar]

annapraṇāśe bhidyante śarīre pañca dhātavaḥ |
balaṃ balavato'pīha praṇaśyatyannahānitaḥ || 32 ||
[Analyze grammar]

āvāhāśca vivāhāśca yajñāścānnamṛte tathā |
na vartante naraśreṣṭha brahma cātra pralīyate || 33 ||
[Analyze grammar]

annataḥ sarvametaddhi yatkiṃcitsthāṇu jaṅgamam |
triṣu lokeṣu dharmārthamannaṃ deyamato budhaiḥ || 34 ||
[Analyze grammar]

annadasya manuṣyasya balamojo yaśaḥ sukham |
kīrtiśca vardhate śaśvattriṣu lokeṣu pārthiva || 35 ||
[Analyze grammar]

megheṣvambhaḥ saṃnidhatte prāṇānāṃ pavanaḥ śivaḥ |
tacca meghagataṃ vāri śakro varṣati bhārata || 36 ||
[Analyze grammar]

ādatte ca rasaṃ bhaumamādityaḥ svagabhastibhiḥ |
vāyurādityatastāṃśca rasāndevaḥ prajāpatiḥ || 37 ||
[Analyze grammar]

tadyadā meghato vāri patitaṃ bhavati kṣitau |
tadā vasumatī devī snigdhā bhavati bhārata || 38 ||
[Analyze grammar]

tataḥ sasyāni rohanti yena vartayate jagat |
māṃsamedosthiśukrāṇāṃ prādurbhāvastataḥ punaḥ || 39 ||
[Analyze grammar]

saṃbhavanti tataḥ śukrātprāṇinaḥ pṛthivīpate |
agnīṣomau hi tacchukraṃ prajanaḥ puṣyataśca ha || 40 ||
[Analyze grammar]

evamannaṃ ca sūryaśca pavanaḥ śukrameva ca |
eka eva smṛto rāśiryato bhūtāni jajñire || 41 ||
[Analyze grammar]

prāṇāndadāti bhūtānāṃ tejaśca bharatarṣabha |
gṛhamabhyāgatāyāśu yo dadyādannamarthine || 42 ||
[Analyze grammar]

bhīṣma uvāca |
nāradenaivamukto'hamadāmannaṃ sadā nṛpa |
anasūyustvamapyannaṃ tasmāddehi gatajvaraḥ || 43 ||
[Analyze grammar]

dattvānnaṃ vidhivadrājanviprebhyastvamapi prabho |
yathāvadanurūpebhyastataḥ svargamavāpsyasi || 44 ||
[Analyze grammar]

annadānāṃ hi ye lokāstāṃstvaṃ śṛṇu narādhipa |
bhavanāni prakāśante divi teṣāṃ mahātmanām |
nānāsaṃsthānarūpāṇi nānāstambhānvitāni ca || 45 ||
[Analyze grammar]

candramaṇḍalaśubhrāṇi kiṅkiṇījālavanti ca |
taruṇādityavarṇāni sthāvarāṇi carāṇi ca || 46 ||
[Analyze grammar]

anekaśatabhaumāni sāntarjalavanāni ca |
vaiḍūryārkaprakāśāni raupyarukmamayāni ca || 47 ||
[Analyze grammar]

sarvakāmaphalāścāpi vṛkṣā bhavanasaṃsthitāḥ |
vāpyo vīthyaḥ sabhāḥ kūpā dīrghikāścaiva sarvaśaḥ || 48 ||
[Analyze grammar]

ghoṣavanti ca yānāni yuktānyatha sahasraśaḥ |
bhakṣyabhojyamayāḥ śailā vāsāṃsyābharaṇāni ca || 49 ||
[Analyze grammar]

kṣīraṃ sravantyaḥ saritastathā caivānnaparvatāḥ |
prāsādāḥ pāṇḍurābhrābhāḥ śayyāśca kanakojjvalāḥ |
tānannadāḥ prapadyante tasmādannaprado bhava || 50 ||
[Analyze grammar]

ete lokāḥ puṇyakṛtāmannadānāṃ mahātmanām |
tasmādannaṃ viśeṣeṇa dātavyaṃ mānavairbhuvi || 51 ||
[Analyze grammar]