Chapter 58

yudhiṣṭhira uvāca |
yānīmāni bahirvedyāṃ dānāni paricakṣate |
tebhyo viśiṣṭaṃ kiṃ dānaṃ mataṃ te kurupuṃgava || 1 ||
[Analyze grammar]

kautūhalaṃ hi paramaṃ tatra me vartate prabho |
dātāraṃ dattamanveti yaddānaṃ tatpracakṣva me || 2 ||
[Analyze grammar]

bhīṣma uvāca |
abhayaṃ sarvabhūtebhyo vyasane cāpyanugraham |
yaccābhilaṣitaṃ dadyāttṛṣitāyābhiyācate || 3 ||
[Analyze grammar]

dattaṃ manyeta yaddattvā taddānaṃ śreṣṭhamucyate |
dattaṃ dātāramanveti yaddānaṃ bharatarṣabha || 4 ||
[Analyze grammar]

hiraṇyadānaṃ godānaṃ pṛthivīdānameva ca |
etāni vai pavitrāṇi tārayantyapi duṣkṛtam || 5 ||
[Analyze grammar]

etāni puruṣavyāghra sādhubhyo dehi nityadā |
dānāni hi naraṃ pāpānmokṣayanti na saṃśayaḥ || 6 ||
[Analyze grammar]

yadyadiṣṭatamaṃ loke yaccāsya dayitaṃ gṛhe |
tattadguṇavate deyaṃ tadevākṣayamicchatā || 7 ||
[Analyze grammar]

priyāṇi labhate loke priyadaḥ priyakṛttathā |
priyo bhavati bhūtānāmiha caiva paratra ca || 8 ||
[Analyze grammar]

yācamānamabhīmānādāśāvantamakiṃcanam |
yo nārcati yathāśakti sa nṛśaṃso yudhiṣṭhira || 9 ||
[Analyze grammar]

amitramapi ceddīnaṃ śaraṇaiṣiṇamāgatam |
vyasane yo'nugṛhṇāti sa vai puruṣasattamaḥ || 10 ||
[Analyze grammar]

kṛśāya hrīmate tāta vṛttikṣīṇāya sīdate |
apahanyātkṣudhaṃ yastu na tena puruṣaḥ samaḥ || 11 ||
[Analyze grammar]

hriyā tu niyatānsādhūnputradāraiśca karśitān |
ayācamānānkaunteya sarvopāyairnimantraya || 12 ||
[Analyze grammar]

āśiṣaṃ ye na deveṣu na martyeṣu ca kurvate |
arhanto nityasattvasthā yathālabdhopajīvinaḥ || 13 ||
[Analyze grammar]

āśīviṣasamebhyaśca tebhyo rakṣasva bhārata |
tānyuktairupajijñāsya tathā dvijavarottamān || 14 ||
[Analyze grammar]

kṛtairāvasathairnityaṃ sapreṣyaiḥ saparicchadaiḥ |
nimantrayethāḥ kauravya sarvakāmasukhāvahaiḥ || 15 ||
[Analyze grammar]

yadi te pratigṛhṇīyuḥ śraddhāpūtaṃ yudhiṣṭhira |
kāryamityeva manvānā dhārmikāḥ puṇyakarmiṇaḥ || 16 ||
[Analyze grammar]

vidyāsnātā vratasnātā ye vyapāśrityajīvinaḥ |
gūḍhasvādhyāyatapaso brāhmaṇāḥ saṃśitavratāḥ || 17 ||
[Analyze grammar]

teṣu śuddheṣu dānteṣu svadāranirateṣu ca |
yatkariṣyasi kalyāṇaṃ tattvā lokeṣu dhāsyati || 18 ||
[Analyze grammar]

yathāgnihotraṃ suhutaṃ sāyaṃ prātardvijātinā |
tathā bhavati dattaṃ vai dvijebhyo'tha kṛtātmanā || 19 ||
[Analyze grammar]

eṣa te vitato yajñaḥ śraddhāpūtaḥ sadakṣiṇaḥ |
viśiṣṭaḥ sarvayajñebhyo dadatastāta vartatām || 20 ||
[Analyze grammar]

nivāpo dānasadṛśastādṛśeṣu yudhiṣṭhira |
nivapanpūjayaṃścaiva teṣvānṛṇyaṃ nigacchati || 21 ||
[Analyze grammar]

ya eva no na kupyanti na lubhyanti tṛṇeṣvapi |
ta eva naḥ pūjyatamā ye cānye priyavādinaḥ || 22 ||
[Analyze grammar]

ye no na bahu manyante na pravartanti cāpare |
putravatparipālyāste namastebhyastathābhayam || 23 ||
[Analyze grammar]

ṛtvikpurohitācāryā mṛdubrahmadharā hi te |
kṣatreṇāpi hi saṃsṛṣṭaṃ tejaḥ śāmyati vai dvije || 24 ||
[Analyze grammar]

asti me balavānasmi rājāsmīti yudhiṣṭhira |
brāhmaṇānmā sma paryaśnīrvāsobhiraśanena ca || 25 ||
[Analyze grammar]

yacchobhārthaṃ balārthaṃ vā vittamasti tavānagha |
tena te brāhmaṇāḥ pūjyāḥ svadharmamanutiṣṭhatā || 26 ||
[Analyze grammar]

namaskāryāstvayā viprā vartamānā yathātatham |
yathāsukhaṃ yathotsāhaṃ lalantu tvayi putravat || 27 ||
[Analyze grammar]

ko hyanyaḥ suprasādānāṃ suhṛdāmalpatoṣiṇām |
vṛttimarhatyupakṣeptuṃ tvadanyaḥ kurusattama || 28 ||
[Analyze grammar]

yathā patyāśrayo dharmaḥ strīṇāṃ loke sanātanaḥ |
sa devaḥ sā gatirnānyā tathāsmākaṃ dvijātayaḥ || 29 ||
[Analyze grammar]

yadi no brāhmaṇāstāta saṃtyajeyurapūjitāḥ |
paśyanto dāruṇaṃ karma satataṃ kṣatriye sthitam || 30 ||
[Analyze grammar]

avedānāmakīrtīnāmalokānāmayajvanām |
ko'smākaṃ jīvitenārthastaddhi no brāhmaṇāśrayam || 31 ||
[Analyze grammar]

atra te vartayiṣyāmi yathā dharmaḥ sanātanaḥ |
rājanyo brāhmaṇaṃ rājanpurā paricacāra ha |
vaiśyo rājanyamityeva śūdro vaiśyamiti śrutiḥ || 32 ||
[Analyze grammar]

dūrācchūdreṇopacaryo brāhmaṇo'gniriva jvalan |
saṃsparśaparicaryastu vaiśyena kṣatriyeṇa ca || 33 ||
[Analyze grammar]

mṛdubhāvānsatyaśīlānsatyadharmānupālakān |
āśīviṣāniva kruddhāṃstānupācarata dvijān || 34 ||
[Analyze grammar]

apareṣāṃ pareṣāṃ ca parebhyaścaiva ye pare |
kṣatriyāṇāṃ pratapatāṃ tejasā ca balena ca |
brāhmaṇeṣveva śāmyanti tejāṃsi ca tapāṃsi ca || 35 ||
[Analyze grammar]

na me pitā priyataro na tvaṃ tāta tathā priyaḥ |
na me pituḥ pitā rājanna cātmā na ca jīvitam || 36 ||
[Analyze grammar]

tvattaśca me priyataraḥ pṛthivyāṃ nāsti kaścana |
tvatto'pi me priyatarā brāhmaṇā bharatarṣabha || 37 ||
[Analyze grammar]

bravīmi satyametacca yathāhaṃ pāṇḍunandana |
tena satyena gaccheyaṃ lokānyatra sa śaṃtanuḥ || 38 ||
[Analyze grammar]

paśyeyaṃ ca satāṃ lokāñchucīnbrahmapuraskṛtān |
tatra me tāta gantavyamahnāya ca cirāya ca || 39 ||
[Analyze grammar]

so'hametādṛśāṃllokāndṛṣṭvā bharatasattama |
yanme kṛtaṃ brāhmaṇeṣu na tapye tena pārthiva || 40 ||
[Analyze grammar]