Chapter 26

yudhiṣṭhira uvāca |
tīrthānāṃ darśanaṃ śreyaḥ snānaṃ ca bharatarṣabha |
śravaṇaṃ ca mahāprājña śrotumicchāmi tattvataḥ || 1 ||
[Analyze grammar]

pṛthivyāṃ yāni tīrthāni puṇyāni bharatarṣabha |
vaktumarhasi me tāni śrotāsmi niyataḥ prabho || 2 ||
[Analyze grammar]

bhīṣma uvāca |
imamaṅgirasā proktaṃ tīrthavaṃśaṃ mahādyute |
śrotumarhasi bhadraṃ te prāpsyase dharmamuttamam || 3 ||
[Analyze grammar]

tapovanagataṃ vipramabhigamya mahāmunim |
papracchāṅgirasaṃ vīra gautamaḥ saṃśitavrataḥ || 4 ||
[Analyze grammar]

asti me bhagavankaścittīrthebhyo dharmasaṃśayaḥ |
tatsarvaṃ śrotumicchāmi tanme śaṃsa mahāmune || 5 ||
[Analyze grammar]

upaspṛśya phalaṃ kiṃ syātteṣu tīrtheṣu vai mune |
pretyabhāve mahāprājña tadyathāsti tathā vada || 6 ||
[Analyze grammar]

aṅgirā uvāca |
saptāhaṃ candrabhāgāṃ vai vitastāmūrmimālinīm |
vigāhya vai nirāhāro nirmamo munivadbhavet || 7 ||
[Analyze grammar]

kāśmīramaṇḍale nadyo yāḥ patanti mahānadam |
tā nadīḥ sindhumāsādya śīlavānsvargamāpnuyāt || 8 ||
[Analyze grammar]

puṣkaraṃ ca prabhāsaṃ ca naimiṣaṃ sāgarodakam |
devikāmindramārgaṃ ca svarṇabinduṃ vigāhya ca |
vibodhyate vimānasthaḥ so'psarobhirabhiṣṭutaḥ || 9 ||
[Analyze grammar]

hiraṇyabinduṃ vikṣobhya prayataścābhivādya tam |
kuśeśayaṃ ca devatvaṃ pūyate tasya kilbiṣam || 10 ||
[Analyze grammar]

indratoyāṃ samāsādya gandhamādanasaṃnidhau |
karatoyāṃ kuraṅgeṣu trirātropoṣito naraḥ |
aśvamedhamavāpnoti vigāhya niyataḥ śuciḥ || 11 ||
[Analyze grammar]

gaṅgādvāre kuśāvarte bilvake nemiparvate |
tathā kanakhale snātvā dhūtapāpmā divaṃ vrajet || 12 ||
[Analyze grammar]

apāṃ hrada upaspṛśya vājapeyaphalaṃ labhet |
brahmacārī jitakrodhaḥ satyasaṃdhastvahiṃsakaḥ || 13 ||
[Analyze grammar]

yatra bhāgīrathī gaṅgā bhajate diśamuttarām |
maheśvarasya niṣṭhāne yo narastvabhiṣicyate |
ekamāsaṃ nirāhāraḥ svayaṃ paśyati devatāḥ || 14 ||
[Analyze grammar]

saptagaṅge trigaṅge ca indramārge ca tarpayan |
sudhāṃ vai labhate bhoktuṃ yo naro jāyate punaḥ || 15 ||
[Analyze grammar]

mahāśrama upaspṛśya yo'gnihotraparaḥ śuciḥ |
ekamāsaṃ nirāhāraḥ siddhiṃ māsena sa vrajet || 16 ||
[Analyze grammar]

mahāhrada upaspṛśya bhṛgutuṅge tvalolupaḥ |
trirātropoṣito bhūtvā mucyate brahmahatyayā || 17 ||
[Analyze grammar]

kanyākūpa upaspṛśya balākāyāṃ kṛtodakaḥ |
deveṣu kīrtiṃ labhate yaśasā ca virājate || 18 ||
[Analyze grammar]

deśakāla upaspṛśya tathā sundarikāhrade |
aśvibhyāṃ rūpavarcasyaṃ pretya vai labhate naraḥ || 19 ||
[Analyze grammar]

mahāgaṅgāmupaspṛśya kṛttikāṅgārake tathā |
pakṣamekaṃ nirāhāraḥ svargamāpnoti nirmalaḥ || 20 ||
[Analyze grammar]

vaimānika upaspṛśya kiṅkiṇīkāśrame tathā |
nivāse'psarasāṃ divye kāmacārī mahīyate || 21 ||
[Analyze grammar]

kālikāśramamāsādya vipāśāyāṃ kṛtodakaḥ |
brahmacārī jitakrodhastrirātrānmucyate bhavāt || 22 ||
[Analyze grammar]

āśrame kṛttikānāṃ tu snātvā yastarpayetpitṝn |
toṣayitvā mahādevaṃ nirmalaḥ svargamāpnuyāt || 23 ||
[Analyze grammar]

mahāpura upaspṛśya trirātropoṣito naraḥ |
trasānāṃ sthāvarāṇāṃ ca dvipadānāṃ bhayaṃ tyajet || 24 ||
[Analyze grammar]

devadāruvane snātvā dhūtapāpmā kṛtodakaḥ |
devalokamavāpnoti saptarātroṣitaḥ śuciḥ || 25 ||
[Analyze grammar]

kauśante ca kuśastambe droṇaśarmapade tathā |
āpaḥprapatane snātaḥ sevyate so'psarogaṇaiḥ || 26 ||
[Analyze grammar]

citrakūṭe janasthāne tathā mandākinījale |
vigāhya vai nirāhāro rājalakṣmīṃ nigacchati || 27 ||
[Analyze grammar]

śyāmāyāstvāśramaṃ gatvā uṣya caivābhiṣicya ca |
trīṃstrirātrānsa saṃdhāya gandharvanagare vaset || 28 ||
[Analyze grammar]

ramaṇyāṃ ca upaspṛśya tathā vai gandhatārike |
ekamāsaṃ nirāhārastvantardhānaphalaṃ labhet || 29 ||
[Analyze grammar]

kauśikīdvāramāsādya vāyubhakṣastvalolupaḥ |
ekaviṃśatirātreṇa svargamārohate naraḥ || 30 ||
[Analyze grammar]

mataṅgavāpyāṃ yaḥ snāyādekarātreṇa sidhyati |
vigāhati hyanālambamandhakaṃ vai sanātanam || 31 ||
[Analyze grammar]

naimiṣe svargatīrthe ca upaspṛśya jitendriyaḥ |
phalaṃ puruṣamedhasya labhenmāsaṃ kṛtodakaḥ || 32 ||
[Analyze grammar]

gaṅgāhrada upaspṛśya tathā caivotpalāvane |
aśvamedhamavāpnoti tatra māsaṃ kṛtodakaḥ || 33 ||
[Analyze grammar]

gaṅgāyamunayostīrthe tathā kālaṃjare girau |
ṣaṣṭihrada upaspṛśya dānaṃ nānyadviśiṣyate || 34 ||
[Analyze grammar]

daśa tīrthasahasrāṇi tisraḥ koṭyastathāparāḥ |
samāgacchanti māghyāṃ tu prayāge bharatarṣabha || 35 ||
[Analyze grammar]

māghamāsaṃ prayāge tu niyataḥ saṃśitavrataḥ |
snātvā tu bharataśreṣṭha nirmalaḥ svargamāpnuyāt || 36 ||
[Analyze grammar]

marudgaṇa upaspṛśya pitṝṇāmāśrame śuciḥ |
vaivasvatasya tīrthe ca tīrthabhūto bhavennaraḥ || 37 ||
[Analyze grammar]

tathā brahmaśiro gatvā bhāgīrathyāṃ kṛtodakaḥ |
ekamāsaṃ nirāhāraḥ somalokamavāpnuyāt || 38 ||
[Analyze grammar]

kapotake naraḥ snātvā aṣṭāvakre kṛtodakaḥ |
dvādaśāhaṃ nirāhāro naramedhaphalaṃ labhet || 39 ||
[Analyze grammar]

muñjapṛṣṭhaṃ gayāṃ caiva nirṛtiṃ devaparvatam |
tṛtīyāṃ krauñcapādīṃ ca brahmahatyā viśudhyati || 40 ||
[Analyze grammar]

kalaśyāṃ vāpyupaspṛśya vedyāṃ ca bahuśojalām |
agneḥ pure naraḥ snātvā viśālāyāṃ kṛtodakaḥ |
devahrada upaspṛśya brahmabhūto virājate || 41 ||
[Analyze grammar]

purāpavartanaṃ nandāṃ mahānandāṃ ca sevya vai |
nandane sevyate dāntastvapsarobhirahiṃsakaḥ || 42 ||
[Analyze grammar]

urvaśīkṛttikāyoge gatvā yaḥ susamāhitaḥ |
lauhitye vidhivatsnātvā puṇḍarīkaphalaṃ labhet || 43 ||
[Analyze grammar]

rāmahrada upaspṛśya viśālāyāṃ kṛtodakaḥ |
dvādaśāhaṃ nirāhāraḥ kalmaṣādvipramucyate || 44 ||
[Analyze grammar]

mahāhrada upaspṛśya śuddhena manasā naraḥ |
ekamāsaṃ nirāhāro jamadagnigatiṃ labhet || 45 ||
[Analyze grammar]

vindhye saṃtāpya cātmānaṃ satyasaṃdhastvahiṃsakaḥ |
ṣaṇmāsaṃ padamāsthāya māsenaikena śudhyati || 46 ||
[Analyze grammar]

narmadāyāmupaspṛśya tathā sūrpārakodake |
ekapakṣaṃ nirāhāro rājaputro vidhīyate || 47 ||
[Analyze grammar]

jambūmārge tribhirmāsaiḥ saṃyataḥ susamāhitaḥ |
ahorātreṇa caikena siddhiṃ samadhigacchati || 48 ||
[Analyze grammar]

kokāmukhe vigāhyāpo gatvā caṇḍālikāśramam |
śākabhakṣaścīravāsāḥ kumārīrvindate daśa || 49 ||
[Analyze grammar]

vaivasvatasya sadanaṃ na sa gacchetkadācana |
yasya kanyāhrade vāso devalokaṃ sa gacchati || 50 ||
[Analyze grammar]

prabhāse tvekarātreṇa amāvāsyāṃ samāhitaḥ |
sidhyate'tra mahābāho yo naro jāyate punaḥ || 51 ||
[Analyze grammar]

ujjānaka upaspṛśya ārṣṭiṣeṇasya cāśrame |
piṅgāyāścāśrame snātvā sarvapāpaiḥ pramucyate || 52 ||
[Analyze grammar]

kulyāyāṃ samupaspṛśya japtvā caivāghamarṣaṇam |
aśvamedhamavāpnoti trirātropoṣitaḥ śuciḥ || 53 ||
[Analyze grammar]

piṇḍāraka upaspṛśya ekarātroṣito naraḥ |
agniṣṭomamavāpnoti prabhātāṃ śarvarīṃ śuciḥ || 54 ||
[Analyze grammar]

tathā brahmasaro gatvā dharmāraṇyopaśobhitam |
puṇḍarīkamavāpnoti prabhātāṃ śarvarīṃ śuciḥ || 55 ||
[Analyze grammar]

maināke parvate snātvā tathā saṃdhyāmupāsya ca |
kāmaṃ jitvā ca vai māsaṃ sarvamedhaphalaṃ labhet || 56 ||
[Analyze grammar]

vikhyāto himavānpuṇyaḥ śaṃkaraśvaśuro giriḥ |
ākaraḥ sarvaratnānāṃ siddhacāraṇasevitaḥ || 57 ||
[Analyze grammar]

śarīramutsṛjettatra vidhipūrvamanāśake |
adhruvaṃ jīvitaṃ jñātvā yo vai vedāntago dvijaḥ || 58 ||
[Analyze grammar]

abhyarcya devatāstatra namaskṛtya munīṃstathā |
tataḥ siddho divaṃ gacchedbrahmalokaṃ sanātanam || 59 ||
[Analyze grammar]

kāmaṃ krodhaṃ ca lobhaṃ ca yo jitvā tīrthamāvaset |
na tena kiṃcinna prāptaṃ tīrthābhigamanādbhavet || 60 ||
[Analyze grammar]

yānyagamyāni tīrthāni durgāṇi viṣamāṇi ca |
manasā tāni gamyāni sarvatīrthasamāsataḥ || 61 ||
[Analyze grammar]

idaṃ medhyamidaṃ dhanyamidaṃ svargyamidaṃ sukham |
idaṃ rahasyaṃ devānāmāplāvyānāṃ ca pāvanam || 62 ||
[Analyze grammar]

idaṃ dadyāddvijātīnāṃ sādhūnāmātmajasya vā |
suhṛdāṃ ca japetkarṇe śiṣyasyānugatasya vā || 63 ||
[Analyze grammar]

dattavāngautamasyedamaṅgirā vai mahātapāḥ |
gurubhiḥ samanujñātaḥ kāśyapena ca dhīmatā || 64 ||
[Analyze grammar]

maharṣīṇāmidaṃ japyaṃ pāvanānāṃ tathottamam |
japaṃścābhyutthitaḥ śaśvannirmalaḥ svargamāpnuyāt || 65 ||
[Analyze grammar]

idaṃ yaścāpi śṛṇuyādrahasyaṃ tvaṅgiromatam |
uttame ca kule janma labhejjātiṃ ca saṃsmaret || 66 ||
[Analyze grammar]