Chapter 337

janamejaya uvāca |
sāṃkhyaṃ yogaṃ pañcarātraṃ vedāraṇyakameva ca |
jñānānyetāni brahmarṣe lokeṣu pracaranti ha || 1 ||
[Analyze grammar]

kimetānyekaniṣṭhāni pṛthaṅniṣṭhāni vā mune |
prabrūhi vai mayā pṛṣṭaḥ pravṛttiṃ ca yathākramam || 2 ||
[Analyze grammar]

vaiśaṃpāyana uvāca |
jajñe bahujñaṃ paramatyudāraṃ yaṃ dvīpamadhye sutamātmavantam |
parāśarādgandhavatī maharṣiṃ tasmai namo'jñānatamonudāya || 3 ||
[Analyze grammar]

pitāmahādyaṃ pravadanti ṣaṣṭhaṃ maharṣimārṣeyavibhūtiyuktam |
nārāyaṇasyāṃśajamekaputraṃ dvaipāyanaṃ vedamahānidhānam || 4 ||
[Analyze grammar]

tamādikāleṣu mahāvibhūtirnārāyaṇo brahmamahānidhānam |
sasarja putrārthamudāratejā vyāsaṃ mahātmānamajaḥ purāṇaḥ || 5 ||
[Analyze grammar]

janamejaya uvāca |
tvayaiva kathitaḥ pūrvaṃ saṃbhavo dvijasattama |
vasiṣṭhasya sutaḥ śaktiḥ śakteḥ putraḥ parāśaraḥ || 6 ||
[Analyze grammar]

parāśarasya dāyādaḥ kṛṣṇadvaipāyano muniḥ |
bhūyo nārāyaṇasutaṃ tvamevainaṃ prabhāṣase || 7 ||
[Analyze grammar]

kimataḥ pūrvajaṃ janma vyāsasyāmitatejasaḥ |
kathayasvottamamate janma nārāyaṇodbhavam || 8 ||
[Analyze grammar]

vaiśaṃpāyana uvāca |
vedārthānvettukāmasya dharmiṣṭhasya taponidheḥ |
gurorme jñānaniṣṭhasya himavatpāda āsataḥ || 9 ||
[Analyze grammar]

kṛtvā bhāratamākhyānaṃ tapaḥśrāntasya dhīmataḥ |
śuśrūṣāṃ tatparā rājankṛtavanto vayaṃ tadā || 10 ||
[Analyze grammar]

sumanturjaiminiścaiva pailaśca sudṛḍhavrataḥ |
ahaṃ caturthaḥ śiṣyo vai śuko vyāsātmajastathā || 11 ||
[Analyze grammar]

ebhiḥ parivṛto vyāsaḥ śiṣyaiḥ pañcabhiruttamaiḥ |
śuśubhe himavatpāde bhūtairbhūtapatiryathā || 12 ||
[Analyze grammar]

vedānāvartayansāṅgānbhāratārthāṃśca sarvaśaḥ |
tamekamanasaṃ dāntaṃ yuktā vayamupāsmahe || 13 ||
[Analyze grammar]

kathāntare'tha kasmiṃścitpṛṣṭo'smābhirdvijottamaḥ |
vedārthānbhāratārthāṃśca janma nārāyaṇāttathā || 14 ||
[Analyze grammar]

sa pūrvamuktvā vedārthānbhāratārthāṃśca tattvavit |
nārāyaṇādidaṃ janma vyāhartumupacakrame || 15 ||
[Analyze grammar]

śṛṇudhvamākhyānavarametadārṣeyamuttamam |
ādikālodbhavaṃ viprāstapasādhigataṃ mayā || 16 ||
[Analyze grammar]

prāpte prajāvisarge vai saptame padmasaṃbhave |
nārāyaṇo mahāyogī śubhāśubhavivarjitaḥ || 17 ||
[Analyze grammar]

sasṛje nābhitaḥ putraṃ brahmāṇamamitaprabham |
tataḥ sa prādurabhavadathainaṃ vākyamabravīt || 18 ||
[Analyze grammar]

mama tvaṃ nābhito jātaḥ prajāsargakaraḥ prabhuḥ |
sṛja prajāstvaṃ vividhā brahmansajaḍapaṇḍitāḥ || 19 ||
[Analyze grammar]

sa evamukto vimukhaścintāvyākulamānasaḥ |
praṇamya varadaṃ devamuvāca harimīśvaram || 20 ||
[Analyze grammar]

kā śaktirmama deveśa prajāḥ sraṣṭuṃ namo'stu te |
aprajñāvānahaṃ deva vidhatsva yadanantaram || 21 ||
[Analyze grammar]

sa evamukto bhagavānbhūtvāthāntarhitastataḥ |
cintayāmāsa deveśo buddhiṃ buddhimatāṃ varaḥ || 22 ||
[Analyze grammar]

svarūpiṇī tato buddhirupatasthe hariṃ prabhum |
yogena caināṃ niryogaḥ svayaṃ niyuyuje tadā || 23 ||
[Analyze grammar]

sa tāmaiśvaryayogasthāṃ buddhiṃ śaktimatīṃ satīm |
uvāca vacanaṃ devo buddhiṃ vai prabhuravyayaḥ || 24 ||
[Analyze grammar]

brahmāṇaṃ praviśasveti lokasṛṣṭyarthasiddhaye |
tatastamīśvarādiṣṭā buddhiḥ kṣipraṃ viveśa sā || 25 ||
[Analyze grammar]

athainaṃ buddhisaṃyuktaṃ punaḥ sa dadṛśe hariḥ |
bhūyaścainaṃ vacaḥ prāha sṛjemā vividhāḥ prajāḥ || 26 ||
[Analyze grammar]

evamuktvā sa bhagavāṃstatraivāntaradhīyata |
prāpa caiva muhūrtena svasthānaṃ devasaṃjñitam || 27 ||
[Analyze grammar]

tāṃ caiva prakṛtiṃ prāpya ekībhāvagato'bhavat |
athāsya buddhirabhavatpunaranyā tadā kila || 28 ||
[Analyze grammar]

sṛṣṭā imāḥ prajāḥ sarvā brahmaṇā parameṣṭhinā |
daityadānavagandharvarakṣogaṇasamākulāḥ |
jātā hīyaṃ vasumatī bhārākrāntā tapasvinī || 29 ||
[Analyze grammar]

bahavo balinaḥ pṛthvyāṃ daityadānavarākṣasāḥ |
bhaviṣyanti tapoyuktā varānprāpsyanti cottamān || 30 ||
[Analyze grammar]

avaśyameva taiḥ sarvairvaradānena darpitaiḥ |
bādhitavyāḥ suragaṇā ṛṣayaśca tapodhanāḥ |
tatra nyāyyamidaṃ kartuṃ bhārāvataraṇaṃ mayā || 31 ||
[Analyze grammar]

atha nānāsamudbhūtairvasudhāyāṃ yathākramam |
nigraheṇa ca pāpānāṃ sādhūnāṃ pragraheṇa ca || 32 ||
[Analyze grammar]

imāṃ tapasvinīṃ satyāṃ dhārayiṣyāmi medinīm |
mayā hyeṣā hi dhriyate pātālasthena bhoginā || 33 ||
[Analyze grammar]

mayā dhṛtā dhārayati jagaddhi sacarācaram |
tasmātpṛthvyāḥ paritrāṇaṃ kariṣye saṃbhavaṃ gataḥ || 34 ||
[Analyze grammar]

evaṃ sa cintayitvā tu bhagavānmadhusūdanaḥ |
rūpāṇyanekānyasṛjatprādurbhāvabhavāya saḥ || 35 ||
[Analyze grammar]

vārāhaṃ nārasiṃhaṃ ca vāmanaṃ mānuṣaṃ tathā |
ebhirmayā nihantavyā durvinītāḥ surārayaḥ || 36 ||
[Analyze grammar]

atha bhūyo jagatsraṣṭā bhoḥśabdenānunādayan |
sarasvatīmuccacāra tatra sārasvato'bhavat || 37 ||
[Analyze grammar]

apāntaratamā nāma suto vāksaṃbhavo vibhoḥ |
bhūtabhavyabhaviṣyajñaḥ satyavādī dṛḍhavrataḥ || 38 ||
[Analyze grammar]

tamuvāca nataṃ mūrdhnā devānāmādiravyayaḥ |
vedākhyāne śrutiḥ kāryā tvayā matimatāṃ vara |
tasmātkuru yathājñaptaṃ mayaitadvacanaṃ mune || 39 ||
[Analyze grammar]

tena bhinnāstadā vedā manoḥ svāyaṃbhuve'ntare |
tatastutoṣa bhagavānharistenāsya karmaṇā |
tapasā ca sutaptena yamena niyamena ca || 40 ||
[Analyze grammar]

śrībhagavānuvāca |
manvantareṣu putra tvamevaṃ lokapravartakaḥ |
bhaviṣyasyacalo brahmannapradhṛṣyaśca nityaśaḥ || 41 ||
[Analyze grammar]

punastiṣye ca saṃprāpte kuravo nāma bhāratāḥ |
bhaviṣyanti mahātmāno rājānaḥ prathitā bhuvi || 42 ||
[Analyze grammar]

teṣāṃ tvattaḥ prasūtānāṃ kulabhedo bhaviṣyati |
parasparavināśārthaṃ tvāmṛte dvijasattama || 43 ||
[Analyze grammar]

tatrāpyanekadhā vedānbhetsyase tapasānvitaḥ |
kṛṣṇe yuge ca saṃprāpte kṛṣṇavarṇo bhaviṣyasi || 44 ||
[Analyze grammar]

dharmāṇāṃ vividhānāṃ ca kartā jñānakarastathā |
bhaviṣyasi tapoyukto na ca rāgādvimokṣyase || 45 ||
[Analyze grammar]

vītarāgaśca putraste paramātmā bhaviṣyati |
maheśvaraprasādena naitadvacanamanyathā || 46 ||
[Analyze grammar]

yaṃ mānasaṃ vai pravadanti putraṃ pitāmahasyottamabuddhiyuktam |
vasiṣṭhamagryaṃ tapaso nidhānaṃ yaścāpi sūryaṃ vyatiricya bhāti || 47 ||
[Analyze grammar]

tasyānvaye cāpi tato maharṣiḥ parāśaro nāma mahāprabhāvaḥ |
pitā sa te vedanidhirvariṣṭho mahātapā vai tapaso nivāsaḥ |
kānīnagarbhaḥ pitṛkanyakāyāṃ tasmādṛṣestvaṃ bhavitā ca putraḥ || 48 ||
[Analyze grammar]

bhūtabhavyabhaviṣyāṇāṃ chinnasarvārthasaṃśayaḥ |
ye hyatikrāntakāḥ pūrvaṃ sahasrayugaparyayāḥ || 49 ||
[Analyze grammar]

tāṃśca sarvānmayoddiṣṭāndrakṣyase tapasānvitaḥ |
punardrakṣyasi cānekasahasrayugaparyayān || 50 ||
[Analyze grammar]

anādinidhanaṃ loke cakrahastaṃ ca māṃ mune |
anudhyānānmama mune naitadvacanamanyathā || 51 ||
[Analyze grammar]

śanaiścaraḥ sūryaputro bhaviṣyati manurmahān |
tasminmanvantare caiva saptarṣigaṇapūrvakaḥ |
tvameva bhavitā vatsa matprasādānna saṃśayaḥ || 52 ||
[Analyze grammar]

vyāsa uvāca |
evaṃ sārasvatamṛṣimapāntaratamaṃ tadā |
uktvā vacanamīśānaḥ sādhayasvetyathābravīt || 53 ||
[Analyze grammar]

so'haṃ tasya prasādena devasya harimedhasaḥ |
apāntaratamā nāma tato jāto''jñayā hareḥ |
punaśca jāto vikhyāto vasiṣṭhakulanandanaḥ || 54 ||
[Analyze grammar]

tadetatkathitaṃ janma mayā pūrvakamātmanaḥ |
nārāyaṇaprasādena tathā nārāyaṇāṃśajam || 55 ||
[Analyze grammar]

mayā hi sumahattaptaṃ tapaḥ paramadāruṇam |
purā matimatāṃ śreṣṭhāḥ parameṇa samādhinā || 56 ||
[Analyze grammar]

etadvaḥ kathitaṃ sarvaṃ yanmāṃ pṛcchatha putrakāḥ |
pūrvajanma bhaviṣyaṃ ca bhaktānāṃ snehato mayā || 57 ||
[Analyze grammar]

vaiśaṃpāyana uvāca |
eṣa te kathitaḥ pūrvaṃ saṃbhavo'smadgurornṛpa |
vyāsasyākliṣṭamanaso yathā pṛṣṭaḥ punaḥ śṛṇu || 58 ||
[Analyze grammar]

sāṃkhyaṃ yogaṃ pañcarātraṃ vedāḥ pāśupataṃ tathā |
jñānānyetāni rājarṣe viddhi nānāmatāni vai || 59 ||
[Analyze grammar]

sāṃkhyasya vaktā kapilaḥ paramarṣiḥ sa ucyate |
hiraṇyagarbho yogasya vettā nānyaḥ purātanaḥ || 60 ||
[Analyze grammar]

apāntaratamāścaiva vedācāryaḥ sa ucyate |
prācīnagarbhaṃ tamṛṣiṃ pravadantīha kecana || 61 ||
[Analyze grammar]

umāpatirbhūtapatiḥ śrīkaṇṭho brahmaṇaḥ sutaḥ |
uktavānidamavyagro jñānaṃ pāśupataṃ śivaḥ || 62 ||
[Analyze grammar]

pañcarātrasya kṛtsnasya vettā tu bhagavānsvayam |
sarveṣu ca nṛpaśreṣṭha jñāneṣveteṣu dṛśyate || 63 ||
[Analyze grammar]

yathāgamaṃ yathājñānaṃ niṣṭhā nārāyaṇaḥ prabhuḥ |
na cainamevaṃ jānanti tamobhūtā viśāṃ pate || 64 ||
[Analyze grammar]

tameva śāstrakartāraṃ pravadanti manīṣiṇaḥ |
niṣṭhāṃ nārāyaṇamṛṣiṃ nānyo'stīti ca vādinaḥ || 65 ||
[Analyze grammar]

niḥsaṃśayeṣu sarveṣu nityaṃ vasati vai hariḥ |
sasaṃśayānhetubalānnādhyāvasati mādhavaḥ || 66 ||
[Analyze grammar]

pañcarātravido ye tu yathākramaparā nṛpa |
ekāntabhāvopagatāste hariṃ praviśanti vai || 67 ||
[Analyze grammar]

sāṃkhyaṃ ca yogaṃ ca sanātane dve vedāśca sarve nikhilena rājan |
sarvaiḥ samastairṛṣibhirnirukto nārāyaṇo viśvamidaṃ purāṇam || 68 ||
[Analyze grammar]

śubhāśubhaṃ karma samīritaṃ yatpravartate sarvalokeṣu kiṃcit |
tasmādṛṣestadbhavatīti vidyāddivyantarikṣe bhuvi cāpsu cāpi || 69 ||
[Analyze grammar]