Chapter 318

nārada uvāca |
sukhaduḥkhaviparyāso yadā samupapadyate |
nainaṃ prajñā sunītaṃ vā trāyate nāpi pauruṣam || 1 ||
[Analyze grammar]

svabhāvādyatnamātiṣṭhedyatnavānnāvasīdati |
jarāmaraṇarogebhyaḥ priyamātmānamuddharet || 2 ||
[Analyze grammar]

rujanti hi śarīrāṇi rogāḥ śārīramānasāḥ |
sāyakā iva tīkṣṇāgrāḥ prayuktā dṛḍhadhanvibhiḥ || 3 ||
[Analyze grammar]

vyādhitasya vivitsābhistrasyato jīvitaiṣiṇaḥ |
avaśasya vināśāya śarīramapakṛṣyate || 4 ||
[Analyze grammar]

sravanti na nivartante srotāṃsi saritāmiva |
āyurādāya martyānāṃ rātryahāni punaḥ punaḥ || 5 ||
[Analyze grammar]

vyatyayo hyayamatyantaṃ pakṣayoḥ śuklakṛṣṇayoḥ |
jātaṃ martyaṃ jarayati nimeṣaṃ nāvatiṣṭhate || 6 ||
[Analyze grammar]

sukhaduḥkhāni bhūtānāmajaro jarayannasau |
ādityo hyastamabhyeti punaḥ punarudeti ca || 7 ||
[Analyze grammar]

adṛṣṭapūrvānādāya bhāvānapariśaṅkitān |
iṣṭāniṣṭānmanuṣyāṇāmastaṃ gacchanti rātrayaḥ || 8 ||
[Analyze grammar]

yo yamicchedyathākāmaṃ kāmānāṃ tattadāpnuyāt |
yadi syānna parādhīnaṃ puruṣasya kriyāphalam || 9 ||
[Analyze grammar]

saṃyatāśca hi dakṣāśca matimantaśca mānavāḥ |
dṛśyante niṣphalāḥ santaḥ prahīṇāśca svakarmabhiḥ || 10 ||
[Analyze grammar]

apare bāliśāḥ santo nirguṇāḥ puruṣādhamāḥ |
āśīrbhirapyasaṃyuktā dṛśyante sarvakāminaḥ || 11 ||
[Analyze grammar]

bhūtānāmaparaḥ kaściddhiṃsāyāṃ satatotthitaḥ |
vañcanāyāṃ ca lokasya sa sukheṣveva jīryate || 12 ||
[Analyze grammar]

aceṣṭamānamāsīnaṃ śrīḥ kaṃcidupatiṣṭhati |
kaścitkarmānusṛtyānyo na prāpyamadhigacchati || 13 ||
[Analyze grammar]

aparādhaṃ samācakṣva puruṣasya svabhāvataḥ |
śukramanyatra saṃbhūtaṃ punaranyatra gacchati || 14 ||
[Analyze grammar]

tasya yonau prasaktasya garbho bhavati vā na vā |
āmrapuṣpopamā yasya nivṛttirupalabhyate || 15 ||
[Analyze grammar]

keṣāṃcitputrakāmānāmanusaṃtānamicchatām |
siddhau prayatamānānāṃ naivāṇḍamupajāyate || 16 ||
[Analyze grammar]

garbhāccodvijamānānāṃ kruddhādāśīviṣādiva |
āyuṣmāñjāyate putraḥ kathaṃ pretaḥ pitaiva saḥ || 17 ||
[Analyze grammar]

devāniṣṭvā tapastaptvā kṛpaṇaiḥ putragṛddhibhiḥ |
daśa māsānparidhṛtā jāyante kulapāṃsanāḥ || 18 ||
[Analyze grammar]

apare dhanadhānyāni bhogāṃśca pitṛsaṃcitān |
vipulānabhijāyante labdhāstaireva maṅgalaiḥ || 19 ||
[Analyze grammar]

anyonyaṃ samabhipretya maithunasya samāgame |
upadrava ivāviṣṭo yoniṃ garbhaḥ prapadyate || 20 ||
[Analyze grammar]

śīrṇaṃ paraśarīreṇa nicchavīkaṃ śarīriṇam |
prāṇināṃ prāṇasaṃrodhe māṃsaśleṣmaviceṣṭitam || 21 ||
[Analyze grammar]

nirdagdhaṃ paradehena paradehaṃ calācalam |
vinaśyantaṃ vināśānte nāvi nāvamivāhitam || 22 ||
[Analyze grammar]

saṃgatyā jaṭhare nyastaṃ retobindumacetanam |
kena yatnena jīvantaṃ garbhaṃ tvamiha paśyasi || 23 ||
[Analyze grammar]

annapānāni jīryante yatra bhakṣāśca bhakṣitāḥ |
tasminnevodare garbhaḥ kiṃ nānnamiva jīryate || 24 ||
[Analyze grammar]

garbhamūtrapurīṣāṇāṃ svabhāvaniyatā gatiḥ |
dhāraṇe vā visarge vā na karturvidyate vaśaḥ || 25 ||
[Analyze grammar]

sravanti hyudarādgarbhā jāyamānāstathāpare |
āgamena sahānyeṣāṃ vināśa upapadyate || 26 ||
[Analyze grammar]

etasmādyonisaṃbandhādyo jīvanparimucyate |
prajāṃ ca labhate kāṃcitpunardvaṃdveṣu majjati || 27 ||
[Analyze grammar]

śatasya sahajātasya saptamīṃ daśamīṃ daśām |
prāpnuvanti tataḥ pañca na bhavanti śatāyuṣaḥ || 28 ||
[Analyze grammar]

nābhyutthāne manuṣyāṇāṃ yogāḥ syurnātra saṃśayaḥ |
vyādhibhiśca vimathyante vyālaiḥ kṣudramṛgā iva || 29 ||
[Analyze grammar]

vyādhibhirbhakṣyamāṇānāṃ tyajatāṃ vipulaṃ dhanam |
vedanāṃ nāpakarṣanti yatamānāścikitsakāḥ || 30 ||
[Analyze grammar]

te cāpi nipuṇā vaidyāḥ kuśalāḥ saṃbhṛtauṣadhāḥ |
vyādhibhiḥ parikṛṣyante mṛgā vyādhairivārditāḥ || 31 ||
[Analyze grammar]

te pibantaḥ kaṣāyāṃśca sarpīṃṣi vividhāni ca |
dṛśyante jarayā bhagnā nāgā nāgairivottamaiḥ || 32 ||
[Analyze grammar]

ke vā bhuvi cikitsante rogārtānmṛgapakṣiṇaḥ |
śvāpadāni daridrāṃśca prāyo nārtā bhavanti te || 33 ||
[Analyze grammar]

ghorānapi durādharṣānnṛpatīnugratejasaḥ |
ākramya roga ādatte paśūnpaśupaco yathā || 34 ||
[Analyze grammar]

iti lokamanākrandaṃ mohaśokapariplutam |
srotasā sahasā kṣiptaṃ hriyamāṇaṃ balīyasā || 35 ||
[Analyze grammar]

na dhanena na rājyena nogreṇa tapasā tathā |
svabhāvā vyativartante ye niyuktāḥ śarīriṣu || 36 ||
[Analyze grammar]

na mriyeranna jīryeransarve syuḥ sarvakāmikāḥ |
nāpriyaṃ pratipaśyeyurutthānasya phalaṃ prati || 37 ||
[Analyze grammar]

uparyupari lokasya sarvo bhavitumicchati |
yatate ca yathāśakti na ca tadvartate tathā || 38 ||
[Analyze grammar]

aiśvaryamadamattāṃśca mattānmadyamadena ca |
apramattāḥ śaṭhāḥ krūrā vikrāntāḥ paryupāsate || 39 ||
[Analyze grammar]

kleśāḥ pratinivartante keṣāṃcidasamīkṣitāḥ |
svaṃ svaṃ ca punaranyeṣāṃ na kiṃcidabhigamyate || 40 ||
[Analyze grammar]

mahacca phalavaiṣamyaṃ dṛśyate karmasaṃdhiṣu |
vahanti śibikāmanye yāntyanye śibikāgatāḥ || 41 ||
[Analyze grammar]

sarveṣāmṛddhikāmānāmanye rathapuraḥsarāḥ |
manujāśca śatastrīkāḥ śataśo vidhavāḥ striyaḥ || 42 ||
[Analyze grammar]

dvaṃdvārāmeṣu bhūteṣu gacchantyekaikaśo narāḥ |
idamanyatparaṃ paśya mātra mohaṃ kariṣyasi || 43 ||
[Analyze grammar]

tyaja dharmamadharmaṃ ca ubhe satyānṛte tyaja |
ubhe satyānṛte tyaktvā yena tyajasi taṃ tyaja || 44 ||
[Analyze grammar]

etatte paramaṃ guhyamākhyātamṛṣisattama |
yena devāḥ parityajya martyalokaṃ divaṃ gatāḥ || 45 ||
[Analyze grammar]

bhīṣma uvāca |
nāradasya vacaḥ śrutvā śukaḥ paramabuddhimān |
saṃcintya manasā dhīro niścayaṃ nādhyagacchata || 46 ||
[Analyze grammar]

putradārairmahānkleśo vidyāmnāye mahāñśramaḥ |
kiṃ nu syācchāśvataṃ sthānamalpakleśaṃ mahodayam || 47 ||
[Analyze grammar]

tato muhūrtaṃ saṃcintya niścitāṃ gatimātmanaḥ |
parāvarajño dharmasya parāṃ naiḥśreyasīṃ gatim || 48 ||
[Analyze grammar]

kathaṃ tvahamasaṃkliṣṭo gaccheyaṃ paramāṃ gatim |
nāvarteyaṃ yathā bhūyo yonisaṃsārasāgare || 49 ||
[Analyze grammar]

paraṃ bhāvaṃ hi kāṅkṣāmi yatra nāvartate punaḥ |
sarvasaṅgānparityajya niścitāṃ manaso gatim || 50 ||
[Analyze grammar]

tatra yāsyāmi yatrātmā śamaṃ me'dhigamiṣyati |
akṣayaścāvyayaścaiva yatra sthāsyāmi śāśvataḥ || 51 ||
[Analyze grammar]

na tu yogamṛte śakyā prāptuṃ sā paramā gatiḥ |
avabandho hi muktasya karmabhirnopapadyate || 52 ||
[Analyze grammar]

tasmādyogaṃ samāsthāya tyaktvā gṛhakalevaram |
vāyubhūtaḥ pravekṣyāmi tejorāśiṃ divākaram || 53 ||
[Analyze grammar]

na hyeṣa kṣayamāpnoti somaḥ suragaṇairyathā |
kampitaḥ patate bhūmiṃ punaścaivādhirohati |
kṣīyate hi sadā somaḥ punaścaivābhipūryate || 54 ||
[Analyze grammar]

ravistu saṃtāpayati lokānraśmibhirulbaṇaiḥ |
sarvatasteja ādatte nityamakṣayamaṇḍalaḥ || 55 ||
[Analyze grammar]

ato me rocate gantumādityaṃ dīptatejasam |
atra vatsyāmi durdharṣo niḥsaṅgenāntarātmanā || 56 ||
[Analyze grammar]

sūryasya sadane cāhaṃ nikṣipyedaṃ kalevaram |
ṛṣibhiḥ saha yāsyāmi sauraṃ tejo'tiduḥsaham || 57 ||
[Analyze grammar]

āpṛcchāmi nagānnāgāngirīnurvīṃ diśo divam |
devadānavagandharvānpiśācoragarākṣasān || 58 ||
[Analyze grammar]

lokeṣu sarvabhūtāni pravekṣyāmi nasaṃśayaḥ |
paśyantu yogavīryaṃ me sarve devāḥ saharṣibhiḥ || 59 ||
[Analyze grammar]

athānujñāpya tamṛṣiṃ nāradaṃ lokaviśrutam |
tasmādanujñāṃ saṃprāpya jagāma pitaraṃ prati || 60 ||
[Analyze grammar]

so'bhivādya mahātmānamṛṣiṃ dvaipāyanaṃ munim |
śukaḥ pradakṣiṇīkṛtya kṛṣṇamāpṛṣṭavānmuniḥ || 61 ||
[Analyze grammar]

śrutvā ṛṣistadvacanaṃ śukasya prīto mahātmā punarāha cainam |
bho bhoḥ putra sthīyatāṃ tāvadadya yāvaccakṣuḥ prīṇayāmi tvadartham || 62 ||
[Analyze grammar]

nirapekṣaḥ śuko bhūtvā niḥsneho muktabandhanaḥ |
mokṣamevānusaṃcintya gamanāya mano dadhe |
pitaraṃ saṃparityajya jagāma dvijasattamaḥ || 63 ||
[Analyze grammar]