Chapter 273

bhīṣma uvāca |
vṛtrasya tu mahārāja jvarāviṣṭasya sarvaśaḥ |
abhavanyāni liṅgāni śarīre tāni me śṛṇu || 1 ||
[Analyze grammar]

jvalitāsyo'bhavadghoro vaivarṇyaṃ cāgamatparam |
gātrakampaśca sumahāñśvāsaścāpyabhavanmahān |
romaharṣaśca tīvro'bhūnniḥśvāsaśca mahānnṛpa || 2 ||
[Analyze grammar]

śivā cāśivasaṃkāśā tasya vaktrātsudāruṇā |
niṣpapāta mahāghorā smṛtiḥ sā tasya bhārata |
ulkāśca jvalitāstasya dīptāḥ pārśve prapedire || 3 ||
[Analyze grammar]

gṛdhrakaṅkavaḍāścaiva vāco'muñcansudāruṇāḥ |
vṛtrasyopari saṃhṛṣṭāścakravatparibabhramuḥ || 4 ||
[Analyze grammar]

tatastaṃ rathamāsthāya devāpyāyitamāhave |
vajrodyatakaraḥ śakrastaṃ daityaṃ pratyavaikṣata || 5 ||
[Analyze grammar]

amānuṣamatho nādaṃ sa mumoca mahāsuraḥ |
vyajṛmbhata ca rājendra tīvrajvarasamanvitaḥ |
athāsya jṛmbhataḥ śakrastato vajramavāsṛjat || 6 ||
[Analyze grammar]

sa vajraḥ sumahātejāḥ kālāgnisadṛśopamaḥ |
kṣiprameva mahākāyaṃ vṛtraṃ daityamapātayat || 7 ||
[Analyze grammar]

tato nādaḥ samabhavatpunareva samantataḥ |
vṛtraṃ vinihataṃ dṛṣṭvā devānāṃ bharatarṣabha || 8 ||
[Analyze grammar]

vṛtraṃ tu hatvā bhagavāndānavārirmahāyaśāḥ |
vajreṇa viṣṇuyuktena divameva samāviśat || 9 ||
[Analyze grammar]

atha vṛtrasya kauravya śarīrādabhiniḥsṛtā |
brahmahatyā mahāghorā raudrā lokabhayāvahā || 10 ||
[Analyze grammar]

karāladaśanā bhīmā vikṛtā kṛṣṇapiṅgalā |
prakīrṇamūrdhajā caiva ghoranetrā ca bhārata || 11 ||
[Analyze grammar]

kapālamālinī caiva kṛśā ca bharatarṣabha |
rudhirārdrā ca dharmajña cīravastranivāsinī || 12 ||
[Analyze grammar]

sābhiniṣkramya rājendra tādṛgrūpā bhayāvahā |
vajriṇaṃ mṛgayāmāsa tadā bharatasattama || 13 ||
[Analyze grammar]

kasyacittvatha kālasya vṛtrahā kurunandana |
svargāyābhimukhaḥ prāyāllokānāṃ hitakāmyayā || 14 ||
[Analyze grammar]

bisānniḥsaramāṇaṃ tu dṛṣṭvā śakraṃ mahaujasam |
kaṇṭhe jagrāha devendraṃ sulagnā cābhavattadā || 15 ||
[Analyze grammar]

sa hi tasminsamutpanne brahmahatyākṛte bhaye |
nalinyāṃ bisamadhyastho babhūvābdagaṇānbahūn || 16 ||
[Analyze grammar]

anusṛtya tu yatnātsa tayā vai brahmahatyayā |
tadā gṛhītaḥ kauravya niśceṣṭaḥ samapadyata || 17 ||
[Analyze grammar]

tasyā vyapohane śakraḥ paraṃ yatnaṃ cakāra ha |
na cāśakattāṃ devendro brahmahatyāṃ vyapohitum || 18 ||
[Analyze grammar]

gṛhīta eva tu tayā devendro bharatarṣabha |
pitāmahamupāgamya śirasā pratyapūjayat || 19 ||
[Analyze grammar]

jñātvā gṛhītaṃ śakraṃ tu dvijapravarahatyayā |
brahmā saṃcintayāmāsa tadā bharatasattama || 20 ||
[Analyze grammar]

tāmuvāca mahābāho brahmahatyāṃ pitāmahaḥ |
svareṇa madhureṇātha sāntvayanniva bhārata || 21 ||
[Analyze grammar]

mucyatāṃ tridaśendro'yaṃ matpriyaṃ kuru bhāmini |
brūhi kiṃ te karomyadya kāmaṃ kaṃ tvamihecchasi || 22 ||
[Analyze grammar]

brahmahatyovāca |
trilokapūjite deve prīte trailokyakartari |
kṛtameveha manye'haṃ nivāsaṃ tu vidhatsva me || 23 ||
[Analyze grammar]

tvayā kṛteyaṃ maryādā lokasaṃrakṣaṇārthinā |
sthāpanā vai sumahatī tvayā deva pravartitā || 24 ||
[Analyze grammar]

prīte tu tvayi dharmajña sarvalokeśvare prabho |
śakrādapagamiṣyāmi nivāsaṃ tu vidhatsva me || 25 ||
[Analyze grammar]

bhīṣma uvāca |
tatheti tāṃ prāha tadā brahmahatyāṃ pitāmahaḥ |
upāyataḥ sa śakrasya brahmahatyāṃ vyapohata || 26 ||
[Analyze grammar]

tataḥ svayaṃbhuvā dhyātastatra vahnirmahātmanā |
brahmāṇamupasaṃgamya tato vacanamabravīt || 27 ||
[Analyze grammar]

prāpto'smi bhagavandeva tvatsakāśamariṃdama |
yatkartavyaṃ mayā deva tadbhavānvaktumarhati || 28 ||
[Analyze grammar]

brahmovāca |
bahudhā vibhajiṣyāmi brahmahatyāmimāmaham |
śakrasyādya vimokṣārthaṃ caturbhāgaṃ pratīccha me || 29 ||
[Analyze grammar]

agniruvāca |
mama mokṣasya ko'nto vai brahmandhyāyasva vai prabho |
etadicchāmi vijñātuṃ tattvato lokapūjita || 30 ||
[Analyze grammar]

brahmovāca |
yastvāṃ jvalantamāsādya svayaṃ vai mānavaḥ kvacit |
bījauṣadhirasairvahne na yakṣyati tamovṛtaḥ || 31 ||
[Analyze grammar]

tameṣā yāsyati kṣipraṃ tatraiva ca nivatsyati |
brahmahatyā havyavāha vyetu te mānaso jvaraḥ || 32 ||
[Analyze grammar]

bhīṣma uvāca |
ityuktaḥ pratijagrāha tadvaco havyakavyabhuk |
pitāmahasya bhagavāṃstathā ca tadabhūtprabho || 33 ||
[Analyze grammar]

tato vṛkṣauṣadhitṛṇaṃ samāhūya pitāmahaḥ |
imamarthaṃ mahārāja vaktuṃ samupacakrame || 34 ||
[Analyze grammar]

tato vṛkṣauṣadhitṛṇaṃ tathaivoktaṃ yathātatham |
vyathitaṃ vahnivadrājanbrahmāṇamidamabravīt || 35 ||
[Analyze grammar]

asmākaṃ brahmahatyāto ko'nto lokapitāmaha |
svabhāvanihatānasmānna punarhantumarhasi || 36 ||
[Analyze grammar]

vayamagniṃ tathā śītaṃ varṣaṃ ca pavaneritam |
sahāmaḥ satataṃ deva tathā chedanabhedanam || 37 ||
[Analyze grammar]

brahmahatyāmimāmadya bhavataḥ śāsanādvayam |
grahīṣyāmastrilokeśa mokṣaṃ cintayatāṃ bhavān || 38 ||
[Analyze grammar]

brahmovāca |
parvakāle tu saṃprāpte yo vai chedanabhedanam |
kariṣyati naro mohāttameṣānugamiṣyati || 39 ||
[Analyze grammar]

bhīṣma uvāca |
tato vṛkṣauṣadhitṛṇamevamuktaṃ mahātmanā |
brahmāṇamabhisaṃpūjya jagāmāśu yathāgatam || 40 ||
[Analyze grammar]

āhūyāpsaraso devastato lokapitāmahaḥ |
vācā madhurayā prāha sāntvayanniva bhārata || 41 ||
[Analyze grammar]

iyamindrādanuprāptā brahmahatyā varāṅganāḥ |
caturthamasyā bhāgaṃ hi mayoktāḥ saṃpratīcchata || 42 ||
[Analyze grammar]

apsarasa ūcuḥ |
grahaṇe kṛtabuddhīnāṃ deveśa tava śāsanāt |
mokṣaṃ samayato'smākaṃ cintayasva pitāmaha || 43 ||
[Analyze grammar]

brahmovāca |
rajasvalāsu nārīṣu yo vai maithunamācaret |
tameṣā yāsyati kṣipraṃ vyetu vo mānaso jvaraḥ || 44 ||
[Analyze grammar]

bhīṣma uvāca |
tatheti hṛṣṭamanasa uktvāthāpsarasāṃ gaṇāḥ |
svāni sthānāni saṃprāpya remire bharatarṣabha || 45 ||
[Analyze grammar]

tatastrilokakṛddevaḥ punareva mahātapāḥ |
apaḥ saṃcintayāmāsa dhyātāstāścāpyathāgaman || 46 ||
[Analyze grammar]

tāstu sarvāḥ samāgamya brahmāṇamamitaujasam |
idamūcurvaco rājanpraṇipatya pitāmaham || 47 ||
[Analyze grammar]

imāḥ sma deva saṃprāptāstvatsakāśamariṃdama |
śāsanāttava deveśa samājñāpaya no vibho || 48 ||
[Analyze grammar]

brahmovāca |
iyaṃ vṛtrādanuprāptā puruhūtaṃ mahābhayā |
brahmahatyā caturthāṃśamasyā yūyaṃ pratīcchata || 49 ||
[Analyze grammar]

āpa ūcuḥ |
evaṃ bhavatu lokeśa yathā vadasi naḥ prabho |
mokṣaṃ samayato'smākaṃ saṃcintayitumarhasi || 50 ||
[Analyze grammar]

tvaṃ hi deveśa sarvasya jagataḥ paramo guruḥ |
ko'nyaḥ prasādo hi bhavedyaḥ kṛcchrānnaḥ samuddharet || 51 ||
[Analyze grammar]

brahmovāca |
alpā iti matiṃ kṛtvā yo naro buddhimohitaḥ |
śleṣmamūtrapurīṣāṇi yuṣmāsu pratimokṣyati || 52 ||
[Analyze grammar]

tameṣā yāsyati kṣipraṃ tatraiva ca nivatsyati |
tathā vo bhavitā mokṣa iti satyaṃ bravīmi vaḥ || 53 ||
[Analyze grammar]

bhīṣma uvāca |
tato vimucya devendraṃ brahmahatyā yudhiṣṭhira |
yathānisṛṣṭaṃ taṃ deśamagacchaddevaśāsanāt || 54 ||
[Analyze grammar]

evaṃ śakreṇa saṃprāptā brahmahatyā janādhipa |
pitāmahamanujñāpya so'śvamedhamakalpayat || 55 ||
[Analyze grammar]

śrūyate hi mahārāja saṃprāptā vāsavena vai |
brahmahatyā tataḥ śuddhiṃ hayamedhena labdhavān || 56 ||
[Analyze grammar]

samavāpya śriyaṃ devo hatvārīṃśca sahasraśaḥ |
praharṣamatulaṃ lebhe vāsavaḥ pṛthivīpate || 57 ||
[Analyze grammar]

vṛtrasya rudhirāccaiva khukhuṇḍāḥ pārtha jajñire |
dvijātibhirabhakṣyāste dīkṣitaiśca tapodhanaiḥ || 58 ||
[Analyze grammar]

sarvāvasthaṃ tvamapyeṣāṃ dvijātīnāṃ priyaṃ kuru |
ime hi bhūtale devāḥ prathitāḥ kurunandana || 59 ||
[Analyze grammar]

evaṃ śakreṇa kauravya buddhisaukṣmyānmahāsuraḥ |
upāyapūrvaṃ nihato vṛtro'thāmitatejasā || 60 ||
[Analyze grammar]

evaṃ tvamapi kauravya pṛthivyāmaparājitaḥ |
bhaviṣyasi yathā devaḥ śatakraturamitrahā || 61 ||
[Analyze grammar]

ye tu śakrakathāṃ divyāmimāṃ parvasu parvasu |
vipramadhye paṭhiṣyanti na te prāpsyanti kilbiṣam || 62 ||
[Analyze grammar]

ityetadvṛtramāśritya śakrasyātyadbhutaṃ mahat |
kathitaṃ karma te tāta kiṃ bhūyaḥ śrotumicchasi || 63 ||
[Analyze grammar]