Chapter 121

yudhiṣṭhira uvāca |
ayaṃ pitāmahenokto rājadharmaḥ sanātanaḥ |
īśvaraśca mahādaṇḍo daṇḍe sarvaṃ pratiṣṭhitam || 1 ||
[Analyze grammar]

devatānāmṛṣīṇāṃ ca pitṝṇāṃ ca mahātmanām |
yakṣarakṣaḥpiśācānāṃ martyānāṃ ca viśeṣataḥ || 2 ||
[Analyze grammar]

sarveṣāṃ prāṇināṃ loke tiryakṣvapi nivāsinām |
sarvavyāpī mahātejā daṇḍaḥ śreyāniti prabho || 3 ||
[Analyze grammar]

ityetaduktaṃ bhavatā sarvaṃ daṇḍyaṃ carācaram |
dṛśyate lokamāsaktaṃ sasurāsuramānuṣam || 4 ||
[Analyze grammar]

etadicchāmyahaṃ jñātuṃ tattvena bharatarṣabha |
ko daṇḍaḥ kīdṛśo daṇḍaḥ kiṃrūpaḥ kiṃparāyaṇaḥ || 5 ||
[Analyze grammar]

kimātmakaḥ kathaṃbhūtaḥ katimūrtiḥ kathaṃprabhuḥ |
jāgarti sa kathaṃ daṇḍaḥ prajāsvavahitātmakaḥ || 6 ||
[Analyze grammar]

kaśca pūrvāparamidaṃ jāgarti paripālayan |
kaśca vijñāyate pūrvaṃ ko'paro daṇḍasaṃjñitaḥ |
kiṃsaṃsthaśca bhaveddaṇḍaḥ kā cāsya gatiriṣyate || 7 ||
[Analyze grammar]

bhīṣma uvāca |
śṛṇu kauravya yo daṇḍo vyavahāryo yathā ca saḥ |
yasminhi sarvamāyattaṃ sa daṇḍa iha kevalaḥ || 8 ||
[Analyze grammar]

dharmasyākhyā mahārāja vyavahāra itīṣyate |
tasya lopaḥ kathaṃ na syāllokeṣvavahitātmanaḥ |
ityarthaṃ vyavahārasya vyavahāratvamiṣyate || 9 ||
[Analyze grammar]

api caitatpurā rājanmanunā proktamāditaḥ |
supraṇītena daṇḍena priyāpriyasamātmanā |
prajā rakṣati yaḥ samyagdharma eva sa kevalaḥ || 10 ||
[Analyze grammar]

athoktametadvacanaṃ prāgeva manunā purā |
janma coktaṃ vasiṣṭhena brahmaṇo vacanaṃ mahat || 11 ||
[Analyze grammar]

prāgidaṃ vacanaṃ proktamataḥ prāgvacanaṃ viduḥ |
vyavahārasya cākhyānādvyavahāra ihocyate || 12 ||
[Analyze grammar]

daṇḍāttrivargaḥ satataṃ supraṇītātpravartate |
daivaṃ hi paramo daṇḍo rūpato'gnirivocchikhaḥ || 13 ||
[Analyze grammar]

nīlotpaladalaśyāmaścaturdaṃṣṭraścaturbhujaḥ |
aṣṭapānnaikanayanaḥ śaṅkukarṇordhvaromavān || 14 ||
[Analyze grammar]

jaṭī dvijihvastāmrāsyo mṛgarājatanucchadaḥ |
etadrūpaṃ bibhartyugraṃ daṇḍo nityaṃ durāvaraḥ || 15 ||
[Analyze grammar]

asirgadā dhanuḥ śaktistriśūlaṃ mudgaraḥ śaraḥ |
musalaṃ paraśuścakraṃ prāso daṇḍarṣṭitomarāḥ || 16 ||
[Analyze grammar]

sarvapraharaṇīyāni santi yānīha kānicit |
daṇḍa eva hi sarvātmā loke carati mūrtimān || 17 ||
[Analyze grammar]

bhindaṃśchindanrujankṛntandārayanpāṭayaṃstathā |
ghātayannabhidhāvaṃśca daṇḍa eva caratyuta || 18 ||
[Analyze grammar]

asirviśasano dharmastīkṣṇavartmā durāsadaḥ |
śrīgarbho vijayaḥ śāstā vyavahāraḥ prajāgaraḥ || 19 ||
[Analyze grammar]

śāstraṃ brāhmaṇamantraśca śāstā prāgvacanaṃ gataḥ |
dharmapālo'kṣaro devaḥ satyago nityago grahaḥ || 20 ||
[Analyze grammar]

asaṅgo rudratanayo manujyeṣṭhaḥ śivaṃkaraḥ |
nāmānyetāni daṇḍasya kīrtitāni yudhiṣṭhira || 21 ||
[Analyze grammar]

daṇḍo hi bhagavānviṣṇuryajño nārāyaṇaḥ prabhuḥ |
śaśvadrūpaṃ mahadbibhranmahāpuruṣa ucyate || 22 ||
[Analyze grammar]

yathoktā brahmakanyeti lakṣmīrnītiḥ sarasvatī |
daṇḍanītirjagaddhātrī daṇḍo hi bahuvigrahaḥ || 23 ||
[Analyze grammar]

arthānarthau sukhaṃ duḥkhaṃ dharmādharmau balābale |
daurbhāgyaṃ bhāgadheyaṃ ca puṇyāpuṇye guṇāguṇau || 24 ||
[Analyze grammar]

kāmākāmāvṛturmāsaḥ śarvarī divasaḥ kṣaṇaḥ |
aprasādaḥ prasādaśca harṣaḥ krodhaḥ śamo damaḥ || 25 ||
[Analyze grammar]

daivaṃ puruṣakāraśca mokṣāmokṣau bhayābhaye |
hiṃsāhiṃse tapo yajñaḥ saṃyamo'tha viṣāviṣam || 26 ||
[Analyze grammar]

antaścādiśca madhyaṃ ca kṛtyānāṃ ca prapañcanam |
madaḥ pramādo darpaśca dambho dhairyaṃ nayānayau || 27 ||
[Analyze grammar]

aśaktiḥ śaktirityeva mānastambhau vyayāvyayau |
vinayaśca visargaśca kālākālau ca bhārata || 28 ||
[Analyze grammar]

anṛtaṃ jñājñatā satyaṃ śraddhāśraddhe tathaiva ca |
klībatā vyavasāyaśca lābhālābhau jayājayau || 29 ||
[Analyze grammar]

tīkṣṇatā mṛdutā mṛtyurāgamānāgamau tathā |
virāddhiścaiva rāddhiśca kāryākārye balābale || 30 ||
[Analyze grammar]

asūyā cānasūyā ca dharmādharmau tathaiva ca |
apatrapānapatrape hrīśca saṃpadvipacca ha || 31 ||
[Analyze grammar]

tejaḥ karmaṇi pāṇḍityaṃ vākśaktistattvabuddhitā |
evaṃ daṇḍasya kauravya loke'sminbahurūpatā || 32 ||
[Analyze grammar]

na syādyadīha daṇḍo vai pramatheyuḥ parasparam |
bhayāddaṇḍasya cānyonyaṃ ghnanti naiva yudhiṣṭhira || 33 ||
[Analyze grammar]

daṇḍena rakṣyamāṇā hi rājannaharahaḥ prajāḥ |
rājānaṃ vardhayantīha tasmāddaṇḍaḥ parāyaṇam || 34 ||
[Analyze grammar]

vyavasthāpayati kṣipramimaṃ lokaṃ nareśvara |
satye vyavasthito dharmo brāhmaṇeṣvavatiṣṭhate || 35 ||
[Analyze grammar]

dharmayuktā dvijāḥ śreṣṭhā vedayuktā bhavanti ca |
babhūva yajño vedebhyo yajñaḥ prīṇāti devatāḥ || 36 ||
[Analyze grammar]

prītāśca devatā nityamindre paridadatyuta |
annaṃ dadāti śakraścāpyanugṛhṇannimāḥ prajāḥ || 37 ||
[Analyze grammar]

prāṇāśca sarvabhūtānāṃ nityamanne pratiṣṭhitāḥ |
tasmātprajāḥ pratiṣṭhante daṇḍo jāgarti tāsu ca || 38 ||
[Analyze grammar]

evaṃprayojanaścaiva daṇḍaḥ kṣatriyatāṃ gataḥ |
rakṣanprajāḥ prajāgarti nityaṃ suvihito'kṣaraḥ || 39 ||
[Analyze grammar]

īśvaraḥ puruṣaḥ prāṇaḥ sattvaṃ vittaṃ prajāpatiḥ |
bhūtātmā jīva ityeva nāmabhiḥ procyate'ṣṭabhiḥ || 40 ||
[Analyze grammar]

adadaddaṇḍa evāsmai dhruvamaiśvaryameva ca |
bale nayaśca saṃyuktaḥ sadā pañcavidhātmakaḥ || 41 ||
[Analyze grammar]

kulabāhudhanāmātyāḥ prajñā coktā balāni ca |
āhāryaṃ cāṣṭakairdravyairbalamanyadyudhiṣṭhira || 42 ||
[Analyze grammar]

hastino'śvā rathāḥ pattirnāvo viṣṭistathaiva ca |
daiśikāścārakāścaiva tadaṣṭāṅgaṃ balaṃ smṛtam || 43 ||
[Analyze grammar]

aṣṭāṅgasya tu yuktasya hastino hastiyāyinaḥ |
aśvārohāḥ padātāśca mantriṇo rasadāśca ye || 44 ||
[Analyze grammar]

bhikṣukāḥ prāḍvivākāśca mauhūrtā daivacintakāḥ |
kośo mitrāṇi dhānyaṃ ca sarvopakaraṇāni ca || 45 ||
[Analyze grammar]

saptaprakṛti cāṣṭāṅgaṃ śarīramiha yadviduḥ |
rājyasya daṇḍa evāṅgaṃ daṇḍaḥ prabhava eva ca || 46 ||
[Analyze grammar]

īśvareṇa prayatnena dhāraṇe kṣatriyasya hi |
daṇḍo dattaḥ samānātmā daṇḍo hīdaṃ sanātanam |
rājñāṃ pūjyatamo nānyo yathādharmapradarśanaḥ || 47 ||
[Analyze grammar]

brahmaṇā lokarakṣārthaṃ svadharmasthāpanāya ca |
bhartṛpratyaya utpanno vyavahārastathāparaḥ |
tasmādyaḥ sahito dṛṣṭo bhartṛpratyayalakṣaṇaḥ || 48 ||
[Analyze grammar]

vyavahārastu vedātmā vedapratyaya ucyate |
maulaśca naraśārdūla śāstroktaśca tathāparaḥ || 49 ||
[Analyze grammar]

ukto yaścāpi daṇḍo'sau bhartṛpratyayalakṣaṇaḥ |
jñeyo na sa narendrastho daṇḍapratyaya eva ca || 50 ||
[Analyze grammar]

daṇḍapratyayadṛṣṭo'pi vyavahārātmakaḥ smṛtaḥ |
vyavahāraḥ smṛto yaśca sa vedaviṣayātmakaḥ || 51 ||
[Analyze grammar]

yaśca vedaprasūtātmā sa dharmo guṇadarśakaḥ |
dharmapratyaya utpanno yathādharmaḥ kṛtātmabhiḥ || 52 ||
[Analyze grammar]

vyavahāraḥ prajāgoptā brahmadiṣṭo yudhiṣṭhira |
trīndhārayati lokānvai satyātmā bhūtivardhanaḥ || 53 ||
[Analyze grammar]

yaśca daṇḍaḥ sa dṛṣṭo no vyavahāraḥ sanātanaḥ |
vyavahāraśca yo dṛṣṭaḥ sa dharma iti naḥ śrutaḥ |
yaśca vedaḥ sa vai dharmo yaśca dharmaḥ sa satpathaḥ || 54 ||
[Analyze grammar]

brahmā prajāpatiḥ pūrvaṃ babhūvātha pitāmahaḥ |
lokānāṃ sa hi sarveṣāṃ sasurāsurarakṣasām |
samanuṣyoragavatāṃ kartā caiva sa bhūtakṛt || 55 ||
[Analyze grammar]

tato no vyavahāro'yaṃ bhartṛpratyayalakṣaṇaḥ |
tasmādidamavocāma vyavahāranidarśanam || 56 ||
[Analyze grammar]

mātā pitā ca bhrātā ca bhāryā cātha purohitaḥ |
nādaṇḍyo vidyate rājñāṃ yaḥ svadharme na tiṣṭhati || 57 ||
[Analyze grammar]