Chapter 122

bhīṣma uvāca |
atrāpyudāharantīmamitihāsaṃ purātanam |
aṅgeṣu rājā dyutimānvasuhoma iti śrutaḥ || 1 ||
[Analyze grammar]

sa rājā dharmanityaḥ sansaha patnyā mahātapāḥ |
muñjapṛṣṭhaṃ jagāmātha devarṣigaṇapūjitam || 2 ||
[Analyze grammar]

tatra śṛṅge himavato merau kanakaparvate |
yatra muñjavaṭe rāmo jaṭāharaṇamādiśat || 3 ||
[Analyze grammar]

tadāprabhṛti rājendra ṛṣibhiḥ saṃśitavrataiḥ |
muñjapṛṣṭha iti proktaḥ sa deśo rudrasevitaḥ || 4 ||
[Analyze grammar]

sa tatra bahubhiryuktaḥ sadā śrutimayairguṇaiḥ |
brāhmaṇānāmanumato devarṣisadṛśo'bhavat || 5 ||
[Analyze grammar]

taṃ kadācidadīnātmā sakhā śakrasya mānitaḥ |
abhyāgacchanmahīpālo māndhātā śatrukarśanaḥ || 6 ||
[Analyze grammar]

so'bhisṛtya tu māndhātā vasuhomaṃ narādhipam |
dṛṣṭvā prakṛṣṭaṃ tapasā vinayenābhyatiṣṭhata || 7 ||
[Analyze grammar]

vasuhomo'pi rājño vai gāmarghyaṃ ca nyavedayat |
aṣṭāṅgasya ca rājyasya papraccha kuśalaṃ tadā || 8 ||
[Analyze grammar]

sadbhirācaritaṃ pūrvaṃ yathāvadanuyāyinam |
apṛcchadvasuhomastaṃ rājankiṃ karavāṇi te || 9 ||
[Analyze grammar]

so'bravītparamaprīto māndhātā rājasattamam |
vasuhomaṃ mahāprājñamāsīnaṃ kurunandana || 10 ||
[Analyze grammar]

bṛhaspatermataṃ rājannadhītaṃ sakalaṃ tvayā |
tathaivauśanasaṃ śāstraṃ vijñātaṃ te narādhipa || 11 ||
[Analyze grammar]

tadahaṃ śrotumicchāmi daṇḍa utpadyate katham |
kiṃ vāpi pūrvaṃ jāgarti kiṃ vā paramamucyate || 12 ||
[Analyze grammar]

kathaṃ kṣatriyasaṃsthaśca daṇḍaḥ saṃpratyavasthitaḥ |
brūhi me sumahāprājña dadāmyācāryavetanam || 13 ||
[Analyze grammar]

vasuhoma uvāca |
śṛṇu rājanyathā daṇḍaḥ saṃbhūto lokasaṃgrahaḥ |
prajāvinayarakṣārthaṃ dharmasyātmā sanātanaḥ || 14 ||
[Analyze grammar]

brahmā yiyakṣurbhagavānsarvalokapitāmahaḥ |
ṛtvijaṃ nātmanā tulyaṃ dadarśeti hi naḥ śrutam || 15 ||
[Analyze grammar]

sa garbhaṃ śirasā devo varṣapūgānadhārayat |
pūrṇe varṣasahasre tu sa garbhaḥ kṣuvato'patat || 16 ||
[Analyze grammar]

sa kṣupo nāma saṃbhūtaḥ prajāpatirariṃdama |
ṛtvigāsīttadā rājanyajñe tasya mahātmanaḥ || 17 ||
[Analyze grammar]

tasminpravṛtte satre tu brahmaṇaḥ pārthivarṣabha |
hṛṣṭarūpapracāratvāddaṇḍaḥ so'ntarhito'bhavat || 18 ||
[Analyze grammar]

tasminnantarhite cātha prajānāṃ saṃkaro'bhavat |
naiva kāryaṃ na cākāryaṃ bhojyābhojyaṃ na vidyate || 19 ||
[Analyze grammar]

peyāpeyaṃ kutaḥ siddhirhiṃsanti ca parasparam |
gamyāgamyaṃ tadā nāsītparasvaṃ svaṃ ca vai samam || 20 ||
[Analyze grammar]

parasparaṃ vilumpante sārameyā ivāmiṣam |
abalaṃ balino jaghnurnirmaryādamavartata || 21 ||
[Analyze grammar]

tataḥ pitāmaho viṣṇuṃ bhagavantaṃ sanātanam |
saṃpūjya varadaṃ devaṃ mahādevamathābravīt || 22 ||
[Analyze grammar]

atra sādhvanukampāṃ vai kartumarhasi kevalam |
saṃkaro na bhavedatra yathā vai tadvidhīyatām || 23 ||
[Analyze grammar]

tataḥ sa bhagavāndhyātvā ciraṃ śūlajaṭādharaḥ |
ātmānamātmanā daṇḍamasṛjaddevasattamaḥ || 24 ||
[Analyze grammar]

tasmācca dharmacaraṇāṃ nītiṃ devīṃ sarasvatīm |
asṛjaddaṇḍanītiḥ sā triṣu lokeṣu viśrutā || 25 ||
[Analyze grammar]

bhūyaḥ sa bhagavāndhyātvā ciraṃ śūlavarāyudhaḥ |
tasya tasya nikāyasya cakāraikaikamīśaram || 26 ||
[Analyze grammar]

devānāmīśvaraṃ cakre devaṃ daśaśatekṣaṇam |
yamaṃ vaivasvataṃ cāpi pitṝṇāmakarotpatim || 27 ||
[Analyze grammar]

dhanānāṃ rakṣasāṃ cāpi kuberamapi ceśvaram |
parvatānāṃ patiṃ meruṃ saritāṃ ca mahodadhim || 28 ||
[Analyze grammar]

apāṃ rājye surāṇāṃ ca vidadhe varuṇaṃ prabhum |
mṛtyuṃ prāṇeśvaramatho tejasāṃ ca hutāśanam || 29 ||
[Analyze grammar]

rudrāṇāmapi ceśānaṃ goptāraṃ vidadhe prabhuḥ |
mahātmānaṃ mahādevaṃ viśālākṣaṃ sanātanam || 30 ||
[Analyze grammar]

vasiṣṭhamīśaṃ viprāṇāṃ vasūnāṃ jātavedasam |
tejasāṃ bhāskaraṃ cakre nakṣatrāṇāṃ niśākaram || 31 ||
[Analyze grammar]

vīrudhāmaṃśumantaṃ ca bhūtānāṃ ca prabhuṃ varam |
kumāraṃ dvādaśabhujaṃ skandaṃ rājānamādiśat || 32 ||
[Analyze grammar]

kālaṃ sarveśamakarotsaṃhāravinayātmakam |
mṛtyoścaturvibhāgasya duḥkhasya ca sukhasya ca || 33 ||
[Analyze grammar]

īśvaraḥ sarvadehastu rājarājo dhanādhipaḥ |
sarveṣāmeva rudrāṇāṃ śūlapāṇiriti śrutiḥ || 34 ||
[Analyze grammar]

tamekaṃ brahmaṇaḥ putramanujātaṃ kṣupaṃ dadau |
prajānāmadhipaṃ śreṣṭhaṃ sarvadharmabhṛtāmapi || 35 ||
[Analyze grammar]

mahādevastatastasminvṛtte yajñe yathāvidhi |
daṇḍaṃ dharmasya goptāraṃ viṣṇave satkṛtaṃ dadau || 36 ||
[Analyze grammar]

viṣṇuraṅgirase prādādaṅgirā munisattamaḥ |
prādādindramarīcibhyāṃ marīcirbhṛgave dadau || 37 ||
[Analyze grammar]

bhṛgurdadāvṛṣibhyastu taṃ daṇḍaṃ dharmasaṃhitam |
ṛṣayo lokapālebhyo lokapālāḥ kṣupāya ca || 38 ||
[Analyze grammar]

kṣupastu manave prādādādityatanayāya ca |
putrebhyaḥ śrāddhadevastu sūkṣmadharmārthakāraṇāt |
taṃ dadau sūryaputrastu manurvai rakṣaṇātmakam || 39 ||
[Analyze grammar]

vibhajya daṇḍaḥ kartavyo dharmeṇa na yadṛcchayā |
durvācā nigraho bandho hiraṇyaṃ bāhyataḥkriyā || 40 ||
[Analyze grammar]

vyaṅgatvaṃ ca śarīrasya vadho vā nālpakāraṇāt |
śarīrapīḍāstāstāstu dehatyāgo vivāsanam || 41 ||
[Analyze grammar]

ānupūrvyā ca daṇḍo'sau prajā jāgarti pālayan |
indro jāgarti bhagavānindrādagnirvibhāvasuḥ || 42 ||
[Analyze grammar]

agnerjāgarti varuṇo varuṇācca prajāpatiḥ |
prajāpatestato dharmo jāgarti vinayātmakaḥ || 43 ||
[Analyze grammar]

dharmācca brahmaṇaḥ putro vyavasāyaḥ sanātanaḥ |
vyavasāyāttatastejo jāgarti paripālayan || 44 ||
[Analyze grammar]

oṣadhyastejasastasmādoṣadhibhyaśca parvatāḥ |
parvatebhyaśca jāgarti raso rasaguṇāttathā || 45 ||
[Analyze grammar]

jāgarti nirṛtirdevī jyotīṃṣi nirṛterapi |
vedāḥ pratiṣṭhā jyotirbhyastato hayaśirāḥ prabhuḥ || 46 ||
[Analyze grammar]

brahmā pitāmahastasmājjāgarti prabhuravyayaḥ |
pitāmahānmahādevo jāgarti bhagavāñśivaḥ || 47 ||
[Analyze grammar]

viśvedevāḥ śivāccāpi viśvebhyaśca tatharṣayaḥ |
ṛṣibhyo bhagavānsomaḥ somāddevāḥ sanātanāḥ || 48 ||
[Analyze grammar]

devebhyo brāhmaṇā loke jāgratītyupadhāraya |
brāhmaṇebhyaśca rājanyā lokānrakṣanti dharmataḥ |
sthāvaraṃ jaṅgamaṃ caiva kṣatriyebhyaḥ sanātanam || 49 ||
[Analyze grammar]

prajā jāgrati loke'smindaṇḍo jāgarti tāsu ca |
sarvasaṃkṣepako daṇḍaḥ pitāmahasamaḥ prabhuḥ || 50 ||
[Analyze grammar]

jāgarti kālaḥ pūrvaṃ ca madhye cānte ca bhārata |
īśvaraḥ sarvalokasya mahādevaḥ prajāpatiḥ || 51 ||
[Analyze grammar]

devadevaḥ śivaḥ śarvo jāgarti satataṃ prabhuḥ |
kapardī śaṃkaro rudro bhavaḥ sthāṇurumāpatiḥ || 52 ||
[Analyze grammar]

ityeṣa daṇḍo vikhyāta ādau madhye tathāvare |
bhūmipālo yathānyāyaṃ vartetānena dharmavit || 53 ||
[Analyze grammar]

bhīṣma uvāca |
itīdaṃ vasuhomasya śṛṇuyādyo mataṃ naraḥ |
śrutvā ca samyagvarteta sa kāmānāpnuyānnṛpaḥ || 54 ||
[Analyze grammar]

iti te sarvamākhyātaṃ yo daṇḍo manujarṣabha |
niyantā sarvalokasya dharmākrāntasya bhārata || 55 ||
[Analyze grammar]