Chapter 9

saṃjaya uvāca |
te hatvā sarvapāñcālāndraupadeyāṃśca sarvaśaḥ |
agacchansahitāstatra yatra duryodhano hataḥ || 1 ||
[Analyze grammar]

gatvā cainamapaśyaṃste kiṃcitprāṇaṃ narādhipam |
tato rathebhyaḥ praskandya parivavrustavātmajam || 2 ||
[Analyze grammar]

taṃ bhagnasakthaṃ rājendra kṛcchraprāṇamacetasam |
vamantaṃ rudhiraṃ vaktrādapaśyanvasudhātale || 3 ||
[Analyze grammar]

vṛtaṃ samantādbahubhiḥ śvāpadairghoradarśanaiḥ |
śālāvṛkagaṇaiścaiva bhakṣayiṣyadbhirantikāt || 4 ||
[Analyze grammar]

nivārayantaṃ kṛcchrāttāñśvāpadānsaṃcikhādiṣūn |
viveṣṭamānaṃ mahyāṃ ca subhṛśaṃ gāḍhavedanam || 5 ||
[Analyze grammar]

taṃ śayānaṃ mahātmānaṃ bhūmau svarudhirokṣitam |
hataśiṣṭāstrayo vīrāḥ śokārtāḥ paryavārayan |
aśvatthāmā kṛpaścaiva kṛtavarmā ca sātvataḥ || 6 ||
[Analyze grammar]

taistribhiḥ śoṇitādigdhairniḥśvasadbhirmahārathaiḥ |
śuśubhe saṃvṛto rājā vedī tribhirivāgnibhiḥ || 7 ||
[Analyze grammar]

te taṃ śayānaṃ saṃprekṣya rājānamatathocitam |
aviṣahyena duḥkhena tataste rurudustrayaḥ || 8 ||
[Analyze grammar]

tataste rudhiraṃ hastairmukhānnirmṛjya tasya ha |
raṇe rājñaḥ śayānasya kṛpaṇaṃ paryadevayan || 9 ||
[Analyze grammar]

kṛpa uvāca |
na daivasyātibhāro'sti yadayaṃ rudhirokṣitaḥ |
ekādaśacamūbhartā śete duryodhano hataḥ || 10 ||
[Analyze grammar]

paśya cāmīkarābhasya cāmīkaravibhūṣitām |
gadāṃ gadāpriyasyemāṃ samīpe patitāṃ bhuvi || 11 ||
[Analyze grammar]

iyamenaṃ gadā śūraṃ na jahāti raṇe raṇe |
svargāyāpi vrajantaṃ hi na jahāti yaśasvinam || 12 ||
[Analyze grammar]

paśyemāṃ saha vīreṇa jāmbūnadavibhūṣitām |
śayānāṃ śayane dharme bhāryāṃ prītimatīmiva || 13 ||
[Analyze grammar]

yo vai mūrdhāvasiktānāmagre yātaḥ paraṃtapaḥ |
sa hato grasate pāṃsūnpaśya kālasya paryayam || 14 ||
[Analyze grammar]

yenājau nihatā bhūmāvaśerata purā dviṣaḥ |
sa bhūmau nihataḥ śete kururājaḥ parairayam || 15 ||
[Analyze grammar]

bhayānnamanti rājāno yasya sma śatasaṃghaśaḥ |
sa vīraśayane śete kravyādbhiḥ parivāritaḥ || 16 ||
[Analyze grammar]

upāsata nṛpāḥ pūrvamarthahetoryamīśvaram |
dhiksadyo nihataḥ śete paśya kālasya paryayam || 17 ||
[Analyze grammar]

saṃjaya uvāca |
taṃ śayānaṃ nṛpaśreṣṭhaṃ tato bharatasattama |
aśvatthāmā samālokya karuṇaṃ paryadevayat || 18 ||
[Analyze grammar]

āhustvāṃ rājaśārdūla mukhyaṃ sarvadhanuṣmatām |
dhanādhyakṣopamaṃ yuddhe śiṣyaṃ saṃkarṣaṇasya ha || 19 ||
[Analyze grammar]

kathaṃ vivaramadrākṣīdbhīmasenastavānagha |
balinaḥ kṛtino nityaṃ sa ca pāpātmavānnṛpa || 20 ||
[Analyze grammar]

kālo nūnaṃ mahārāja loke'sminbalavattaraḥ |
paśyāmo nihataṃ tvāṃ cedbhīmasenena saṃyuge || 21 ||
[Analyze grammar]

kathaṃ tvāṃ sarvadharmajñaṃ kṣudraḥ pāpo vṛkodaraḥ |
nikṛtyā hatavānmando nūnaṃ kālo duratyayaḥ || 22 ||
[Analyze grammar]

dharmayuddhe hyadharmeṇa samāhūyaujasā mṛdhe |
gadayā bhīmasenena nirbhinne sakthinī tava || 23 ||
[Analyze grammar]

adharmeṇa hatasyājau mṛdyamānaṃ padā śiraḥ |
yadupekṣitavānkṣudro dhiktamastu yudhiṣṭhiram || 24 ||
[Analyze grammar]

yuddheṣvapavadiṣyanti yodhā nūnaṃ vṛkodaram |
yāvatsthāsyanti bhūtāni nikṛtyā hyasi pātitaḥ || 25 ||
[Analyze grammar]

nanu rāmo'bravīdrājaṃstvāṃ sadā yadunandanaḥ |
duryodhanasamo nāsti gadayā iti vīryavān || 26 ||
[Analyze grammar]

ślāghate tvāṃ hi vārṣṇeyo rājansaṃsatsu bhārata |
suśiṣyo mama kauravyo gadāyuddha iti prabho || 27 ||
[Analyze grammar]

yāṃ gatiṃ kṣatriyasyāhuḥ praśastāṃ paramarṣayaḥ |
hatasyābhimukhasyājau prāptastvamasi tāṃ gatim || 28 ||
[Analyze grammar]

duryodhana na śocāmi tvāmahaṃ puruṣarṣabha |
hataputrāṃ tu śocāmi gāndhārīṃ pitaraṃ ca te |
bhikṣukau vicariṣyete śocantau pṛthivīmimām || 29 ||
[Analyze grammar]

dhigastu kṛṣṇaṃ vārṣṇeyamarjunaṃ cāpi durmatim |
dharmajñamāninau yau tvāṃ vadhyamānamupekṣatām || 30 ||
[Analyze grammar]

pāṇḍavāścāpi te sarve kiṃ vakṣyanti narādhipān |
kathaṃ duryodhano'smābhirhata ityanapatrapāḥ || 31 ||
[Analyze grammar]

dhanyastvamasi gāndhāre yastvamāyodhane hataḥ |
prayāto'bhimukhaḥ śatrūndharmeṇa puruṣarṣabha || 32 ||
[Analyze grammar]

hataputrā hi gāndhārī nihatajñātibāndhavā |
prajñācakṣuśca durdharṣaḥ kāṃ gatiṃ pratipatsyate || 33 ||
[Analyze grammar]

dhigastu kṛtavarmāṇaṃ māṃ kṛpaṃ ca mahāratham |
ye vayaṃ na gatāḥ svargaṃ tvāṃ puraskṛtya pārthivam || 34 ||
[Analyze grammar]

dātāraṃ sarvakāmānāṃ rakṣitāraṃ prajāhitam |
yadvayaṃ nānugacchāmastvāṃ dhigasmānnarādhamān || 35 ||
[Analyze grammar]

kṛpasya tava vīryeṇa mama caiva pituśca me |
sabhṛtyānāṃ naravyāghra ratnavanti gṛhāṇi ca || 36 ||
[Analyze grammar]

bhavatprasādādasmābhiḥ samitraiḥ sahabāndhavaiḥ |
avāptāḥ kratavo mukhyā bahavo bhūridakṣiṇāḥ || 37 ||
[Analyze grammar]

kutaścāpīdṛśaṃ sārthamupalapsyāmahe vayam |
yādṛśena puraskṛtya tvaṃ gataḥ sarvapārthivān || 38 ||
[Analyze grammar]

vayameva trayo rājangacchantaṃ paramāṃ gatim |
yadvai tvāṃ nānugacchāmastena tapsyāmahe vayam || 39 ||
[Analyze grammar]

tvatsvargahīnā hīnārthāḥ smarantaḥ sukṛtasya te |
kiṃ nāma tadbhavetkarma yena tvānuvrajema vai || 40 ||
[Analyze grammar]

duḥkhaṃ nūnaṃ kuruśreṣṭha cariṣyāmo mahīmimām |
hīnānāṃ nastvayā rājankutaḥ śāntiḥ kutaḥ sukham || 41 ||
[Analyze grammar]

gatvaitāṃstu mahārāja sametya tvaṃ mahārathān |
yathāśreṣṭhaṃ yathājyeṣṭhaṃ pūjayervacanānmama || 42 ||
[Analyze grammar]

ācāryaṃ pūjayitvā ca ketuṃ sarvadhanuṣmatām |
hataṃ mayādya śaṃsethā dhṛṣṭadyumnaṃ narādhipa || 43 ||
[Analyze grammar]

pariṣvajethā rājānaṃ bāhlikaṃ sumahāratham |
saindhavaṃ somadattaṃ ca bhūriśravasameva ca || 44 ||
[Analyze grammar]

tathā pūrvagatānanyānsvargaṃ pārthivasattamān |
asmadvākyātpariṣvajya pṛcchethāstvamanāmayam || 45 ||
[Analyze grammar]

ityevamuktvā rājānaṃ bhagnasakthamacetasam |
aśvatthāmā samudvīkṣya punarvacanamabravīt || 46 ||
[Analyze grammar]

duryodhana jīvasi cedvācaṃ śrotrasukhāṃ śṛṇu |
sapta pāṇḍavataḥ śeṣā dhārtarāṣṭrāstrayo vayam || 47 ||
[Analyze grammar]

te caiva bhrātaraḥ pañca vāsudevo'tha sātyakiḥ |
ahaṃ ca kṛtavarmā ca kṛpaḥ śāradvatastathā || 48 ||
[Analyze grammar]

draupadeyā hatāḥ sarve dhṛṣṭadyumnasya cātmajāḥ |
pāñcālā nihatāḥ sarve matsyaśeṣaṃ ca bhārata || 49 ||
[Analyze grammar]

kṛte pratikṛtaṃ paśya hataputrā hi pāṇḍavāḥ |
sauptike śibiraṃ teṣāṃ hataṃ sanaravāhanam || 50 ||
[Analyze grammar]

mayā ca pāpakarmāsau dhṛṣṭadyumno mahīpate |
praviśya śibiraṃ rātrau paśumāreṇa māritaḥ || 51 ||
[Analyze grammar]

duryodhanastu tāṃ vācaṃ niśamya manasaḥ priyām |
pratilabhya punaśceta idaṃ vacanamabravīt || 52 ||
[Analyze grammar]

na me'karottadgāṅgeyo na karṇo na ca te pitā |
yattvayā kṛpabhojābhyāṃ sahitenādya me kṛtam || 53 ||
[Analyze grammar]

sa cetsenāpatiḥ kṣudro hataḥ sārdhaṃ śikhaṇḍinā |
tena manye maghavatā samamātmānamadya vai || 54 ||
[Analyze grammar]

svasti prāpnuta bhadraṃ vaḥ svarge naḥ saṃgamaḥ punaḥ |
ityevamuktvā tūṣṇīṃ sa kururājo mahāmanāḥ |
prāṇānudasṛjadvīraḥ suhṛdāṃ śokamādadhat || 55 ||
[Analyze grammar]

tatheti te pariṣvaktāḥ pariṣvajya ca taṃ nṛpam |
punaḥ punaḥ prekṣamāṇāḥ svakānāruruhū rathān || 56 ||
[Analyze grammar]

ityevaṃ tava putrasya niśamya karuṇāṃ giram |
pratyūṣakāle śokārtaḥ prādhāvaṃ nagaraṃ prati || 57 ||
[Analyze grammar]

tava putre gate svargaṃ śokārtasya mamānagha |
ṛṣidattaṃ pranaṣṭaṃ taddivyadarśitvamadya vai || 58 ||
[Analyze grammar]

vaiśaṃpāyana uvāca |
iti śrutvā sa nṛpatiḥ putrajñātivadhaṃ tadā |
niḥśvasya dīrghamuṣṇaṃ ca tataścintāparo'bhavat || 59 ||
[Analyze grammar]