Chapter 43

janamejaya uvāca |
sarasvatyāḥ prabhāvo'yamuktaste dvijasattama |
kumārasyābhiṣekaṃ tu brahmanvyākhyātumarhasi || 1 ||
[Analyze grammar]

yasminkāle ca deśe ca yathā ca vadatāṃ vara |
yaiścābhiṣikto bhagavānvidhinā yena ca prabhuḥ || 2 ||
[Analyze grammar]

skando yathā ca daityānāmakarotkadanaṃ mahat |
tathā me sarvamācakṣva paraṃ kautūhalaṃ hi me || 3 ||
[Analyze grammar]

vaiśaṃpāyana uvāca |
kuruvaṃśasya sadṛśamidaṃ kautūhalaṃ tava |
harṣamutpādayatyetadvaco me janamejaya || 4 ||
[Analyze grammar]

hanta te kathayiṣyāmi śṛṇvānasya janādhipa |
abhiṣekaṃ kumārasya prabhāvaṃ ca mahātmanaḥ || 5 ||
[Analyze grammar]

tejo māheśvaraṃ skannamagnau prapatitaṃ purā |
tatsarvabhakṣo bhagavānnāśakaddagdhumakṣayam || 6 ||
[Analyze grammar]

tenāsīdati tejasvī dīptimānhavyavāhanaḥ |
na caiva dhārayāmāsa garbhaṃ tejomayaṃ tadā || 7 ||
[Analyze grammar]

sa gaṅgāmabhisaṃgamya niyogādbrahmaṇaḥ prabhuḥ |
garbhamāhitavāndivyaṃ bhāskaropamatejasam || 8 ||
[Analyze grammar]

atha gaṅgāpi taṃ garbhamasahantī vidhāraṇe |
utsasarja girau ramye himavatyamarārcite || 9 ||
[Analyze grammar]

sa tatra vavṛdhe lokānāvṛtya jvalanātmajaḥ |
dadṛśurjvalanākāraṃ taṃ garbhamatha kṛttikāḥ || 10 ||
[Analyze grammar]

śarastambe mahātmānamanalātmajamīśvaram |
mamāyamiti tāḥ sarvāḥ putrārthinyo'bhicakramuḥ || 11 ||
[Analyze grammar]

tāsāṃ viditvā bhāvaṃ taṃ mātṝṇāṃ bhagavānprabhuḥ |
prasnutānāṃ payaḥ ṣaḍbhirvadanairapibattadā || 12 ||
[Analyze grammar]

taṃ prabhāvaṃ samālakṣya tasya bālasya kṛttikāḥ |
paraṃ vismayamāpannā devyo divyavapurdharāḥ || 13 ||
[Analyze grammar]

yatrotsṛṣṭaḥ sa bhagavāngaṅgayā girimūrdhani |
sa śailaḥ kāñcanaḥ sarvaḥ saṃbabhau kurusattama || 14 ||
[Analyze grammar]

vardhatā caiva garbheṇa pṛthivī tena rañjitā |
ataśca sarve saṃvṛttā girayaḥ kāñcanākarāḥ || 15 ||
[Analyze grammar]

kumāraśca mahāvīryaḥ kārttikeya iti smṛtaḥ |
gāṅgeyaḥ pūrvamabhavanmahāyogabalānvitaḥ || 16 ||
[Analyze grammar]

sa devastapasā caiva vīryeṇa ca samanvitaḥ |
vavṛdhe'tīva rājendra candravatpriyadarśanaḥ || 17 ||
[Analyze grammar]

sa tasminkāñcane divye śarastambe śriyā vṛtaḥ |
stūyamānastadā śete gandharvairmunibhistathā || 18 ||
[Analyze grammar]

tathainamanvanṛtyanta devakanyāḥ sahasraśaḥ |
divyavāditranṛttajñāḥ stuvantyaścārudarśanāḥ || 19 ||
[Analyze grammar]

anvāste ca nadī devaṃ gaṅgā vai saritāṃ varā |
dadhāra pṛthivī cainaṃ bibhratī rūpamuttamam || 20 ||
[Analyze grammar]

jātakarmādikāstasya kriyāścakre bṛhaspatiḥ |
vedaścainaṃ caturmūrtirupatasthe kṛtāñjaliḥ || 21 ||
[Analyze grammar]

dhanurvedaścatuṣpādaḥ śastragrāmaḥ sasaṃgrahaḥ |
tatrainaṃ samupātiṣṭhatsākṣādvāṇī ca kevalā || 22 ||
[Analyze grammar]

sa dadarśa mahāvīryaṃ devadevamumāpatim |
śailaputryā sahāsīnaṃ bhūtasaṃghaśatairvṛtam || 23 ||
[Analyze grammar]

nikāyā bhūtasaṃghānāṃ paramādbhutadarśanāḥ |
vikṛtā vikṛtākārā vikṛtābharaṇadhvajāḥ || 24 ||
[Analyze grammar]

vyāghrasiṃharkṣavadanā biḍālamakarānanāḥ |
vṛṣadaṃśamukhāścānye gajoṣṭravadanāstathā || 25 ||
[Analyze grammar]

ulūkavadanāḥ kecidgṛdhragomāyudarśanāḥ |
krauñcapārāvatanibhairvadanai rāṅkavairapi || 26 ||
[Analyze grammar]

śvāvicchalyakagodhānāṃ kharaiḍakagavāṃ tathā |
sadṛśāni vapūṃṣyanye tatra tatra vyadhārayan || 27 ||
[Analyze grammar]

kecicchailāmbudaprakhyāścakrālātagadāyudhāḥ |
kecidañjanapuñjābhāḥ kecicchvetācalaprabhāḥ || 28 ||
[Analyze grammar]

saptamātṛgaṇāścaiva samājagmurviśāṃ pate |
sādhyā viśve'tha maruto vasavaḥ pitarastathā || 29 ||
[Analyze grammar]

rudrādityāstathā siddhā bhujagā dānavāḥ khagāḥ |
brahmā svayaṃbhūrbhagavānsaputraḥ saha viṣṇunā || 30 ||
[Analyze grammar]

śakrastathābhyayāddraṣṭuṃ kumāravaramacyutam |
nāradapramukhāścāpi devagandharvasattamāḥ || 31 ||
[Analyze grammar]

devarṣayaśca siddhāśca bṛhaspatipurogamāḥ |
ṛbhavo nāma varadā devānāmapi devatāḥ |
te'pi tatra samājagmuryāmā dhāmāśca sarvaśaḥ || 32 ||
[Analyze grammar]

sa tu bālo'pi bhagavānmahāyogabalānvitaḥ |
abhyājagāma deveśaṃ śūlahastaṃ pinākinam || 33 ||
[Analyze grammar]

tamāvrajantamālakṣya śivasyāsīnmanogatam |
yugapacchailaputryāśca gaṅgāyāḥ pāvakasya ca || 34 ||
[Analyze grammar]

kiṃ nu pūrvamayaṃ bālo gauravādabhyupaiṣyati |
api māmiti sarveṣāṃ teṣāmāsīnmanogatam || 35 ||
[Analyze grammar]

teṣāmetamabhiprāyaṃ caturṇāmupalakṣya saḥ |
yugapadyogamāsthāya sasarja vividhāstanūḥ || 36 ||
[Analyze grammar]

tato'bhavaccaturmūrtiḥ kṣaṇena bhagavānprabhuḥ |
skandaḥ śākho viśākhaśca naigameṣaśca pṛṣṭhataḥ || 37 ||
[Analyze grammar]

evaṃ sa kṛtvā hyātmānaṃ caturdhā bhagavānprabhuḥ |
yato rudrastataḥ skando jagāmādbhutadarśanaḥ || 38 ||
[Analyze grammar]

viśākhastu yayau yena devī girivarātmajā |
śākho yayau ca bhagavānvāyumūrtirvibhāvasum |
naigameṣo'gamadgaṅgāṃ kumāraḥ pāvakaprabhaḥ || 39 ||
[Analyze grammar]

sarve bhāsvaradehāste catvāraḥ samarūpiṇaḥ |
tānsamabhyayuravyagrāstadadbhutamivābhavat || 40 ||
[Analyze grammar]

hāhākāro mahānāsīddevadānavarakṣasām |
taddṛṣṭvā mahadāścaryamadbhutaṃ romaharṣaṇam || 41 ||
[Analyze grammar]

tato rudraśca devī ca pāvakaśca pitāmaham |
gaṅgayā sahitāḥ sarve praṇipeturjagatpatim || 42 ||
[Analyze grammar]

praṇipatya tataste tu vidhivadrājapuṃgava |
idamūcurvaco rājankārttikeyapriyepsayā || 43 ||
[Analyze grammar]

asya bālasya bhagavannādhipatyaṃ yathepsitam |
asmatpriyārthaṃ deveśa sadṛśaṃ dātumarhasi || 44 ||
[Analyze grammar]

tataḥ sa bhagavāndhīmānsarvalokapitāmahaḥ |
manasā cintayāmāsa kimayaṃ labhatāmiti || 45 ||
[Analyze grammar]

aiśvaryāṇi hi sarvāṇi devagandharvarakṣasām |
bhūtayakṣavihaṃgānāṃ pannagānāṃ ca sarvaśaḥ || 46 ||
[Analyze grammar]

pūrvamevādideśāsau nikāyeṣu mahātmanām |
samarthaṃ ca tamaiśvarye mahāmatiramanyata || 47 ||
[Analyze grammar]

tato muhūrtaṃ sa dhyātvā devānāṃ śreyasi sthitaḥ |
senāpatyaṃ dadau tasmai sarvabhūteṣu bhārata || 48 ||
[Analyze grammar]

sarvadevanikāyānāṃ ye rājānaḥ pariśrutāḥ |
tānsarvānvyādideśāsmai sarvabhūtapitāmahaḥ || 49 ||
[Analyze grammar]

tataḥ kumāramādāya devā brahmapurogamāḥ |
abhiṣekārthamājagmuḥ śailendraṃ sahitāstataḥ || 50 ||
[Analyze grammar]

puṇyāṃ haimavatīṃ devīṃ saricchreṣṭhāṃ sarasvatīm |
samantapañcake yā vai triṣu lokeṣu viśrutā || 51 ||
[Analyze grammar]

tatra tīre sarasvatyāḥ puṇye sarvaguṇānvite |
niṣedurdevagandharvāḥ sarve saṃpūrṇamānasāḥ || 52 ||
[Analyze grammar]