Chapter 42

vaiśaṃpāyana uvāca |
sā śaptā tena kruddhena viśvāmitreṇa dhīmatā |
tasmiṃstīrthavare śubhre śoṇitaṃ samupāvahat || 1 ||
[Analyze grammar]

athājagmustato rājanrākṣasāstatra bhārata |
tatra te śoṇitaṃ sarve pibantaḥ sukhamāsate || 2 ||
[Analyze grammar]

tṛptāśca subhṛśaṃ tena sukhitā vigatajvarāḥ |
nṛtyantaśca hasantaśca yathā svargajitastathā || 3 ||
[Analyze grammar]

kasyacittvatha kālasya ṛṣayaḥ satapodhanāḥ |
tīrthayātrāṃ samājagmuḥ sarasvatyāṃ mahīpate || 4 ||
[Analyze grammar]

teṣu sarveṣu tīrtheṣu āplutya munipuṃgavāḥ |
prāpya prītiṃ parāṃ cāpi tapolubdhā viśāradāḥ |
prayayurhi tato rājanyena tīrthaṃ hi tattathā || 5 ||
[Analyze grammar]

athāgamya mahābhāgāstattīrthaṃ dāruṇaṃ tadā |
dṛṣṭvā toyaṃ sarasvatyāḥ śoṇitena pariplutam |
pīyamānaṃ ca rakṣobhirbahubhirnṛpasattama || 6 ||
[Analyze grammar]

tāndṛṣṭvā rākṣasānrājanmunayaḥ saṃśitavratāḥ |
paritrāṇe sarasvatyāḥ paraṃ yatnaṃ pracakrire || 7 ||
[Analyze grammar]

te tu sarve mahābhāgāḥ samāgamya mahāvratāḥ |
āhūya saritāṃ śreṣṭhāmidaṃ vacanamabruvan || 8 ||
[Analyze grammar]

kāraṇaṃ brūhi kalyāṇi kimarthaṃ te hrado hyayam |
evamākulatāṃ yātaḥ śrutvā pāsyāmahe vayam || 9 ||
[Analyze grammar]

tataḥ sā sarvamācaṣṭa yathāvṛttaṃ pravepatī |
duḥkhitāmatha tāṃ dṛṣṭvā ta ūcurvai tapodhanāḥ || 10 ||
[Analyze grammar]

kāraṇaṃ śrutamasmābhiḥ śāpaścaiva śruto'naghe |
kariṣyanti tu yatprāptaṃ sarva eva tapodhanāḥ || 11 ||
[Analyze grammar]

evamuktvā saricchreṣṭhāmūcuste'tha parasparam |
vimocayāmahe sarve śāpādetāṃ sarasvatīm || 12 ||
[Analyze grammar]

teṣāṃ tu vacanādeva prakṛtisthā sarasvatī |
prasannasalilā jajñe yathā pūrvaṃ tathaiva hi |
vimuktā ca saricchreṣṭhā vibabhau sā yathā purā || 13 ||
[Analyze grammar]

dṛṣṭvā toyaṃ sarasvatyā munibhistaistathā kṛtam |
kṛtāñjalīstato rājanrākṣasāḥ kṣudhayārditāḥ |
ūcustānvai munīnsarvānkṛpāyuktānpunaḥ punaḥ || 14 ||
[Analyze grammar]

vayaṃ hi kṣudhitāścaiva dharmāddhīnāśca śāśvatāt |
na ca naḥ kāmakāro'yaṃ yadvayaṃ pāpakāriṇaḥ || 15 ||
[Analyze grammar]

yuṣmākaṃ cāprasādena duṣkṛtena ca karmaṇā |
pakṣo'yaṃ vardhate'smākaṃ yataḥ sma brahmarākṣasāḥ || 16 ||
[Analyze grammar]

evaṃ hi vaiśyaśūdrāṇāṃ kṣatriyāṇāṃ tathaiva ca |
ye brāhmaṇānpradviṣanti te bhavantīha rākṣasāḥ || 17 ||
[Analyze grammar]

ācāryamṛtvijaṃ caiva guruṃ vṛddhajanaṃ tathā |
prāṇino ye'vamanyante te bhavantīha rākṣasāḥ |
yoṣitāṃ caiva pāpānāṃ yonidoṣeṇa vardhate || 18 ||
[Analyze grammar]

tatkurudhvamihāsmākaṃ kāruṇyaṃ dvijasattamāḥ |
śaktā bhavantaḥ sarveṣāṃ lokānāmapi tāraṇe || 19 ||
[Analyze grammar]

teṣāṃ te munayaḥ śrutvā tuṣṭuvustāṃ mahānadīm |
mokṣārthaṃ rakṣasāṃ teṣāmūcuḥ prayatamānasāḥ || 20 ||
[Analyze grammar]

kṣutakīṭāvapannaṃ ca yaccocchiṣṭāśitaṃ bhavet |
keśāvapannamādhūtamārugṇamapi yadbhavet |
śvabhiḥ saṃspṛṣṭamannaṃ ca bhāgo'sau rakṣasāmiha || 21 ||
[Analyze grammar]

tasmājjñātvā sadā vidvānetānyannāni varjayet |
rākṣasānnamasau bhuṅkte yo bhuṅkte hyannamīdṛśam || 22 ||
[Analyze grammar]

śodhayitvā tatastīrthamṛṣayaste tapodhanāḥ |
mokṣārthaṃ rākṣasānāṃ ca nadīṃ tāṃ pratyacodayan || 23 ||
[Analyze grammar]

maharṣīṇāṃ mataṃ jñātvā tataḥ sā saritāṃ varā |
aruṇāmānayāmāsa svāṃ tanuṃ puruṣarṣabha || 24 ||
[Analyze grammar]

tasyāṃ te rākṣasāḥ snātvā tanūstyaktvā divaṃ gatāḥ |
aruṇāyāṃ mahārāja brahmahatyāpahā hi sā || 25 ||
[Analyze grammar]

etamarthamabhijñāya devarājaḥ śatakratuḥ |
tasmiṃstīrthavare snātvā vimuktaḥ pāpmanā kila || 26 ||
[Analyze grammar]

janamejaya uvāca |
kimarthaṃ bhagavāñśakro brahmahatyāmavāptavān |
kathamasmiṃśca tīrthe vai āplutyākalmaṣo'bhavat || 27 ||
[Analyze grammar]

vaiśaṃpāyana uvāca |
śṛṇuṣvaitadupākhyānaṃ yathāvṛttaṃ janeśvara |
yathā bibheda samayaṃ namucervāsavaḥ purā || 28 ||
[Analyze grammar]

namucirvāsavādbhītaḥ sūryaraśmiṃ samāviśat |
tenendraḥ sakhyamakarotsamayaṃ cedamabravīt || 29 ||
[Analyze grammar]

nārdreṇa tvā na śuṣkeṇa na rātrau nāpi vāhani |
vadhiṣyāmyasuraśreṣṭha sakhe satyena te śape || 30 ||
[Analyze grammar]

evaṃ sa kṛtvā samayaṃ sṛṣṭvā nīhāramīśvaraḥ |
cicchedāsya śiro rājannapāṃ phenena vāsavaḥ || 31 ||
[Analyze grammar]

tacchiro namuceśchinnaṃ pṛṣṭhataḥ śakramanvayāt |
he mitrahanpāpa iti bruvāṇaṃ śakramantikāt || 32 ||
[Analyze grammar]

evaṃ sa śirasā tena codyamānaḥ punaḥ punaḥ |
pitāmahāya saṃtapta evamarthaṃ nyavedayat || 33 ||
[Analyze grammar]

tamabravīllokagururaruṇāyāṃ yathāvidhi |
iṣṭvopaspṛśa devendra brahmahatyāpahā hi sā || 34 ||
[Analyze grammar]

ityuktaḥ sa sarasvatyāḥ kuñje vai janamejaya |
iṣṭvā yathāvadbalabhidaruṇāyāmupāspṛśat || 35 ||
[Analyze grammar]

sa muktaḥ pāpmanā tena brahmahatyākṛtena ha |
jagāma saṃhṛṣṭamanāstridivaṃ tridaśeśvaraḥ || 36 ||
[Analyze grammar]

śirastaccāpi namucestatraivāplutya bhārata |
lokānkāmadughānprāptamakṣayānrājasattama || 37 ||
[Analyze grammar]

tatrāpyupaspṛśya balo mahātmā dattvā ca dānāni pṛthagvidhāni |
avāpya dharmaṃ paramāryakarmā jagāma somasya mahatsa tīrtham || 38 ||
[Analyze grammar]

yatrāyajadrājasūyena somaḥ sākṣātpurā vidhivatpārthivendra |
atrirdhīmānvipramukhyo babhūva hotā yasminkratumukhye mahātmā || 39 ||
[Analyze grammar]

yasyānte'bhūtsumahāndānavānāṃ daiteyānāṃ rākṣasānāṃ ca devaiḥ |
sa saṃgrāmastārakākhyaḥ sutīvro yatra skandastārakākhyaṃ jaghāna || 40 ||
[Analyze grammar]

senāpatyaṃ labdhavāndevatānāṃ mahāseno yatra daityāntakartā |
sākṣāccātra nyavasatkārttikeyaḥ sadā kumāro yatra sa plakṣarājaḥ || 41 ||
[Analyze grammar]