Chapter 44

vaiśaṃpāyana uvāca |
tato'bhiṣekasaṃbhārānsarvānsaṃbhṛtya śāstrataḥ |
bṛhaspatiḥ samiddhe'gnau juhāvājyaṃ yathāvidhi || 1 ||
[Analyze grammar]

tato himavatā datte maṇipravaraśobhite |
divyaratnācite divye niṣaṇṇaḥ paramāsane || 2 ||
[Analyze grammar]

sarvamaṅgalasaṃbhārairvidhimantrapuraskṛtam |
ābhiṣecanikaṃ dravyaṃ gṛhītvā devatāgaṇāḥ || 3 ||
[Analyze grammar]

indrāviṣṇū mahāvīryau sūryācandramasau tathā |
dhātā caiva vidhātā ca tathā caivānilānalau || 4 ||
[Analyze grammar]

pūṣṇā bhagenāryamṇā ca aṃśena ca vivasvatā |
rudraśca sahito dhīmānmitreṇa varuṇena ca || 5 ||
[Analyze grammar]

rudrairvasubhirādityairaśvibhyāṃ ca vṛtaḥ prabhuḥ |
viśvedevairmarudbhiśca sādhyaiśca pitṛbhiḥ saha || 6 ||
[Analyze grammar]

gandharvairapsarobhiśca yakṣarākṣasapannagaiḥ |
devarṣibhirasaṃkhyeyaistathā brahmarṣibhirvaraiḥ || 7 ||
[Analyze grammar]

vaikhānasairvālakhilyairvāyvāhārairmarīcipaiḥ |
bhṛgubhiścāṅgirobhiśca yatibhiśca mahātmabhiḥ |
sarvairvidyādharaiḥ puṇyairyogasiddhaistathā vṛtaḥ || 8 ||
[Analyze grammar]

pitāmahaḥ pulastyaśca pulahaśca mahātapāḥ |
aṅgirāḥ kaśyapo'triśca marīcirbhṛgureva ca || 9 ||
[Analyze grammar]

kraturharaḥ pracetāśca manurdakṣastathaiva ca |
ṛtavaśca grahāścaiva jyotīṃṣi ca viśāṃ pate || 10 ||
[Analyze grammar]

mūrtimatyaśca sarito vedāścaiva sanātanāḥ |
samudrāśca hradāścaiva tīrthāni vividhāni ca |
pṛthivī dyaurdiśaścaiva pādapāśca janādhipa || 11 ||
[Analyze grammar]

aditirdevamātā ca hrīḥ śrīḥ svāhā sarasvatī |
umā śacī sinīvālī tathā cānumatiḥ kuhūḥ |
rākā ca dhiṣaṇā caiva patnyaścānyā divaukasām || 12 ||
[Analyze grammar]

himavāṃścaiva vindhyaśca meruścānekaśṛṅgavān |
airāvataḥ sānucaraḥ kalāḥ kāṣṭhāstathaiva ca |
māsārdhamāsā ṛtavastathā rātryahanī nṛpa || 13 ||
[Analyze grammar]

uccaiḥśravā hayaśreṣṭho nāgarājaśca vāmanaḥ |
aruṇo garuḍaścaiva vṛkṣāścauṣadhibhiḥ saha || 14 ||
[Analyze grammar]

dharmaśca bhagavāndevaḥ samājagmurhi saṃgatāḥ |
kālo yamaśca mṛtyuśca yamasyānucarāśca ye || 15 ||
[Analyze grammar]

bahulatvācca noktā ye vividhā devatāgaṇāḥ |
te kumārābhiṣekārthaṃ samājagmustatastataḥ || 16 ||
[Analyze grammar]

jagṛhuste tadā rājansarva eva divaukasaḥ |
ābhiṣecanikaṃ bhāṇḍaṃ maṅgalāni ca sarvaśaḥ || 17 ||
[Analyze grammar]

divyasaṃbhārasaṃyuktaiḥ kalaśaiḥ kāñcanairnṛpa |
sarasvatībhiḥ puṇyābhirdivyatoyābhireva tu || 18 ||
[Analyze grammar]

abhyaṣiñcankumāraṃ vai saṃprahṛṣṭā divaukasaḥ |
senāpatiṃ mahātmānamasurāṇāṃ bhayāvaham || 19 ||
[Analyze grammar]

purā yathā mahārāja varuṇaṃ vai jaleśvaram |
tathābhyaṣiñcadbhagavānbrahmā lokapitāmahaḥ |
kaśyapaśca mahātejā ye cānye nānukīrtitāḥ || 20 ||
[Analyze grammar]

tasmai brahmā dadau prīto balino vātaraṃhasaḥ |
kāmavīryadharānsiddhānmahāpāriṣadānprabhuḥ || 21 ||
[Analyze grammar]

nandiṣeṇaṃ lohitākṣaṃ ghaṇṭākarṇaṃ ca saṃmatam |
caturthamasyānucaraṃ khyātaṃ kumudamālinam || 22 ||
[Analyze grammar]

tataḥ sthāṇuṃ mahāvegaṃ mahāpāriṣadaṃ kratum |
māyāśatadharaṃ kāmaṃ kāmavīryabalānvitam |
dadau skandāya rājendra surārivinibarhaṇam || 23 ||
[Analyze grammar]

sa hi devāsure yuddhe daityānāṃ bhīmakarmaṇām |
jaghāna dorbhyāṃ saṃkruddhaḥ prayutāni caturdaśa || 24 ||
[Analyze grammar]

tathā devā dadustasmai senāṃ nairṛtasaṃkulām |
devaśatrukṣayakarīmajayyāṃ viśvarūpiṇīm || 25 ||
[Analyze grammar]

jayaśabdaṃ tataścakrurdevāḥ sarve savāsavāḥ |
gandharvayakṣarakṣāṃsi munayaḥ pitarastathā || 26 ||
[Analyze grammar]

yamaḥ prādādanucarau yamakālopamāvubhau |
unmāthaṃ ca pramāthaṃ ca mahāvīryau mahādyutī || 27 ||
[Analyze grammar]

subhrājo bhāskaraścaiva yau tau sūryānuyāyinau |
tau sūryaḥ kārttikeyāya dadau prītaḥ pratāpavān || 28 ||
[Analyze grammar]

kailāsaśṛṅgasaṃkāśau śvetamālyānulepanau |
somo'pyanucarau prādānmaṇiṃ sumaṇimeva ca || 29 ||
[Analyze grammar]

jvālājihvaṃ tathā jyotirātmajāya hutāśanaḥ |
dadāvanucarau śūrau parasainyapramāthinau || 30 ||
[Analyze grammar]

parighaṃ ca vaṭaṃ caiva bhīmaṃ ca sumahābalam |
dahatiṃ dahanaṃ caiva pracaṇḍau vīryasaṃmatau |
aṃśo'pyanucarānpañca dadau skandāya dhīmate || 31 ||
[Analyze grammar]

utkrośaṃ paṅkajaṃ caiva vajradaṇḍadharāvubhau |
dadāvanalaputrāya vāsavaḥ paravīrahā |
tau hi śatrūnmahendrasya jaghnatuḥ samare bahūn || 32 ||
[Analyze grammar]

cakraṃ vikramakaṃ caiva saṃkramaṃ ca mahābalam |
skandāya trīnanucarāndadau viṣṇurmahāyaśāḥ || 33 ||
[Analyze grammar]

vardhanaṃ nandanaṃ caiva sarvavidyāviśāradau |
skandāya dadatuḥ prītāvaśvinau bharatarṣabha || 34 ||
[Analyze grammar]

kundanaṃ kusumaṃ caiva kumudaṃ ca mahāyaśāḥ |
ḍambarāḍambarau caiva dadau dhātā mahātmane || 35 ||
[Analyze grammar]

vakrānuvakrau balinau meṣavaktrau balotkaṭau |
dadau tvaṣṭā mahāmāyau skandāyānucarau varau || 36 ||
[Analyze grammar]

suvrataṃ satyasaṃdhaṃ ca dadau mitro mahātmane |
kumārāya mahātmānau tapovidyādharau prabhuḥ || 37 ||
[Analyze grammar]

sudarśanīyau varadau triṣu lokeṣu viśrutau |
suprabhaṃ ca mahātmānaṃ śubhakarmāṇameva ca |
kārttikeyāya saṃprādādvidhātā lokaviśrutau || 38 ||
[Analyze grammar]

pālitakaṃ kālikaṃ ca mahāmāyāvināvubhau |
pūṣā ca pārṣadau prādātkārttikeyāya bhārata || 39 ||
[Analyze grammar]

balaṃ cātibalaṃ caiva mahāvaktrau mahābalau |
pradadau kārttikeyāya vāyurbharatasattama || 40 ||
[Analyze grammar]

ghasaṃ cātighasaṃ caiva timivaktrau mahābalau |
pradadau kārttikeyāya varuṇaḥ satyasaṃgaraḥ || 41 ||
[Analyze grammar]

suvarcasaṃ mahātmānaṃ tathaivāpyativarcasam |
himavānpradadau rājanhutāśanasutāya vai || 42 ||
[Analyze grammar]

kāñcanaṃ ca mahātmānaṃ meghamālinameva ca |
dadāvanucarau meruragniputrāya bhārata || 43 ||
[Analyze grammar]

sthiraṃ cātisthiraṃ caiva merurevāparau dadau |
mahātmane'gniputrāya mahābalaparākramau || 44 ||
[Analyze grammar]

ucchritaṃ cātiśṛṅgaṃ ca mahāpāṣāṇayodhinau |
pradadāvagniputrāya vindhyaḥ pāriṣadāvubhau || 45 ||
[Analyze grammar]

saṃgrahaṃ vigrahaṃ caiva samudro'pi gadādharau |
pradadāvagniputrāya mahāpāriṣadāvubhau || 46 ||
[Analyze grammar]

unmādaṃ puṣpadantaṃ ca śaṅkukarṇaṃ tathaiva ca |
pradadāvagniputrāya pārvatī śubhadarśanā || 47 ||
[Analyze grammar]

jayaṃ mahājayaṃ caiva nāgau jvalanasūnave |
pradadau puruṣavyāghra vāsukiḥ pannageśvaraḥ || 48 ||
[Analyze grammar]

evaṃ sādhyāśca rudrāśca vasavaḥ pitarastathā |
sāgarāḥ saritaścaiva girayaśca mahābalāḥ || 49 ||
[Analyze grammar]

daduḥ senāgaṇādhyakṣāñśūlapaṭṭiśadhāriṇaḥ |
divyapraharaṇopetānnānāveṣavibhūṣitān || 50 ||
[Analyze grammar]

śṛṇu nāmāni cānyeṣāṃ ye'nye skandasya sainikāḥ |
vividhāyudhasaṃpannāścitrābharaṇavarmiṇaḥ || 51 ||
[Analyze grammar]

śaṅkukarṇo nikumbhaśca padmaḥ kumuda eva ca |
ananto dvādaśabhujastathā kṛṣṇopakṛṣṇakau || 52 ||
[Analyze grammar]

droṇaśravāḥ kapiskandhaḥ kāñcanākṣo jalaṃdhamaḥ |
akṣasaṃtarjano rājankunadīkastamobhrakṛt || 53 ||
[Analyze grammar]

ekākṣo dvādaśākṣaśca tathaivaikajaṭaḥ prabhuḥ |
sahasrabāhurvikaṭo vyāghrākṣaḥ kṣitikampanaḥ || 54 ||
[Analyze grammar]

puṇyanāmā sunāmā ca suvaktraḥ priyadarśanaḥ |
pariśrutaḥ kokanadaḥ priyamālyānulepanaḥ || 55 ||
[Analyze grammar]

ajodaro gajaśirāḥ skandhākṣaḥ śatalocanaḥ |
jvālājihvaḥ karālaśca sitakeśo jaṭī hariḥ || 56 ||
[Analyze grammar]

caturdaṃṣṭro'ṣṭajihvaśca meghanādaḥ pṛthuśravāḥ |
vidyudakṣo dhanurvaktro jaṭharo mārutāśanaḥ || 57 ||
[Analyze grammar]

udarākṣo jhaṣākṣaśca vajranābho vasuprabhaḥ |
samudravego rājendra śailakampī tathaiva ca || 58 ||
[Analyze grammar]

putrameṣaḥ pravāhaśca tathā nandopanandakau |
dhūmraḥ śvetaḥ kaliṅgaśca siddhārtho varadastathā || 59 ||
[Analyze grammar]

priyakaścaiva nandaśca gonandaśca pratāpavān |
ānandaśca pramodaśca svastiko dhruvakastathā || 60 ||
[Analyze grammar]

kṣemavāpaḥ sujātaśca siddhayātraśca bhārata |
govrajaḥ kanakāpīḍo mahāpāriṣadeśvaraḥ || 61 ||
[Analyze grammar]

gāyano hasanaścaiva bāṇaḥ khaḍgaśca vīryavān |
vaitālī cātitālī ca tathā katikavātikau || 62 ||
[Analyze grammar]

haṃsajaḥ paṅkadigdhāṅgaḥ samudronmādanaśca ha |
raṇotkaṭaḥ prahāsaśca śvetaśīrṣaśca nandakaḥ || 63 ||
[Analyze grammar]

kālakaṇṭhaḥ prabhāsaśca tathā kumbhāṇḍako'paraḥ |
kālakākṣaḥ sitaścaiva bhūtalonmathanastathā || 64 ||
[Analyze grammar]

yajñavāhaḥ pravāhaśca devayājī ca somapaḥ |
sajālaśca mahātejāḥ krathakrāthau ca bhārata || 65 ||
[Analyze grammar]

tuhanaśca tuhānaśca citradevaśca vīryavān |
madhuraḥ suprasādaśca kirīṭī ca mahābalaḥ || 66 ||
[Analyze grammar]

vasano madhuvarṇaśca kalaśodara eva ca |
dhamanto manmathakaraḥ sūcīvaktraśca vīryavān || 67 ||
[Analyze grammar]

śvetavaktraḥ suvaktraśca cāruvaktraśca pāṇḍuraḥ |
daṇḍabāhuḥ subāhuśca rajaḥ kokilakastathā || 68 ||
[Analyze grammar]

acalaḥ kanakākṣaśca bālānāmayikaḥ prabhuḥ |
saṃcārakaḥ kokanado gṛdhravaktraśca jambukaḥ || 69 ||
[Analyze grammar]

lohāśavaktro jaṭharaḥ kumbhavaktraśca kuṇḍakaḥ |
madgugrīvaśca kṛṣṇaujā haṃsavaktraśca candrabhāḥ || 70 ||
[Analyze grammar]

pāṇikūrmā ca śambūkaḥ pañcavaktraśca śikṣakaḥ |
cāṣavaktraśca jambūkaḥ śākavaktraśca kuṇḍakaḥ || 71 ||
[Analyze grammar]

yogayuktā mahātmānaḥ satataṃ brāhmaṇapriyāḥ |
paitāmahā mahātmāno mahāpāriṣadāśca ha |
yauvanasthāśca bālāśca vṛddhāśca janamejaya || 72 ||
[Analyze grammar]

sahasraśaḥ pāriṣadāḥ kumāramupatasthire |
vaktrairnānāvidhairye tu śṛṇu tāñjanamejaya || 73 ||
[Analyze grammar]

kūrmakukkuṭavaktrāśca śaśolūkamukhāstathā |
kharoṣṭravadanāścaiva varāhavadanāstathā || 74 ||
[Analyze grammar]

manuṣyameṣavaktrāśca sṛgālavadanāstathā |
bhīmā makaravaktrāśca śiṃśumāramukhāstathā || 75 ||
[Analyze grammar]

mārjāraśaśavaktrāśca dīrghavaktrāśca bhārata |
nakulolūkavaktrāśca śvavaktrāśca tathāpare || 76 ||
[Analyze grammar]

ākhubabhrukavaktrāśca mayūravadanāstathā |
matsyameṣānanāścānye ajāvimahiṣānanāḥ || 77 ||
[Analyze grammar]

ṛkṣaśārdūlavaktrāśca dvīpisiṃhānanāstathā |
bhīmā gajānanāścaiva tathā nakramukhāḥ pare || 78 ||
[Analyze grammar]

garuḍānanāḥ khaḍgamukhā vṛkakākamukhāstathā |
gokharoṣṭramukhāścānye vṛṣadaṃśamukhāstathā || 79 ||
[Analyze grammar]

mahājaṭharapādāṅgāstārakākṣāśca bhārata |
pārāvatamukhāścānye tathā vṛṣamukhāḥ pare || 80 ||
[Analyze grammar]

kokilāvadanāścānye śyenatittirikānanāḥ |
kṛkalāsamukhāścaiva virajombaradhāriṇaḥ || 81 ||
[Analyze grammar]

vyālavaktrāḥ śūlamukhāścaṇḍavaktrāḥ śatānanāḥ |
āśīviṣāścīradharā gonāsāvaraṇāstathā || 82 ||
[Analyze grammar]

sthūlodarāḥ kṛśāṅgāśca sthūlāṅgāśca kṛśodarāḥ |
hrasvagrīvā mahākarṇā nānāvyālavibhūṣitāḥ || 83 ||
[Analyze grammar]

gajendracarmavasanāstathā kṛṣṇājināmbarāḥ |
skandhemukhā mahārāja tathā hyudaratomukhāḥ || 84 ||
[Analyze grammar]

pṛṣṭhemukhā hanumukhāstathā jaṅghāmukhā api |
pārśvānanāśca bahavo nānādeśamukhāstathā || 85 ||
[Analyze grammar]

tathā kīṭapataṃgānāṃ sadṛśāsyā gaṇeśvarāḥ |
nānāvyālamukhāścānye bahubāhuśirodharāḥ || 86 ||
[Analyze grammar]

nānāvṛkṣabhujāḥ kecitkaṭiśīrṣāstathāpare |
bhujaṃgabhogavadanā nānāgulmanivāsinaḥ || 87 ||
[Analyze grammar]

cīrasaṃvṛtagātrāśca tathā phalakavāsasaḥ |
nānāveṣadharāścaiva carmavāsasa eva ca || 88 ||
[Analyze grammar]

uṣṇīṣiṇo mukuṭinaḥ kambugrīvāḥ suvarcasaḥ |
kirīṭinaḥ pañcaśikhāstathā kaṭhinamūrdhajāḥ || 89 ||
[Analyze grammar]

triśikhā dviśikhāścaiva tathā saptaśikhāḥ pare |
śikhaṇḍino mukuṭino muṇḍāśca jaṭilāstathā || 90 ||
[Analyze grammar]

citramālyadharāḥ kecitkecidromānanāstathā |
divyamālyāmbaradharāḥ satataṃ priyavigrahāḥ || 91 ||
[Analyze grammar]

kṛṣṇā nirmāṃsavaktrāśca dīrghapṛṣṭhā nirūdarāḥ |
sthūlapṛṣṭhā hrasvapṛṣṭhāḥ pralambodaramehanāḥ || 92 ||
[Analyze grammar]

mahābhujā hrasvabhujā hrasvagātrāśca vāmanāḥ |
kubjāśca dīrghajaṅghāśca hastikarṇaśirodharāḥ || 93 ||
[Analyze grammar]

hastināsāḥ kūrmanāsā vṛkanāsāstathāpare |
dīrghoṣṭhā dīrghajihvāśca vikarālā hyadhomukhāḥ || 94 ||
[Analyze grammar]

mahādaṃṣṭrā hrasvadaṃṣṭrāścaturdaṃṣṭrāstathāpare |
vāraṇendranibhāścānye bhīmā rājansahasraśaḥ || 95 ||
[Analyze grammar]

suvibhaktaśarīrāśca dīptimantaḥ svalaṃkṛtāḥ |
piṅgākṣāḥ śaṅkukarṇāśca vakranāsāśca bhārata || 96 ||
[Analyze grammar]

pṛthudaṃṣṭrā mahādaṃṣṭrāḥ sthūlauṣṭhā harimūrdhajāḥ |
nānāpādauṣṭhadaṃṣṭrāśca nānāhastaśirodharāḥ |
nānāvarmabhirācchannā nānābhāṣāśca bhārata || 97 ||
[Analyze grammar]

kuśalā deśabhāṣāsu jalpanto'nyonyamīśvarāḥ |
hṛṣṭāḥ paripatanti sma mahāpāriṣadāstathā || 98 ||
[Analyze grammar]

dīrghagrīvā dīrghanakhā dīrghapādaśirobhujāḥ |
piṅgākṣā nīlakaṇṭhāśca lambakarṇāśca bhārata || 99 ||
[Analyze grammar]

vṛkodaranibhāścaiva kecidañjanasaṃnibhāḥ |
śvetāṅgā lohitagrīvāḥ piṅgākṣāśca tathāpare |
kalmāṣā bahavo rājaṃścitravarṇāśca bhārata || 100 ||
[Analyze grammar]

cāmarāpīḍakanibhāḥ śvetalohitarājayaḥ |
nānāvarṇāḥ savarṇāśca mayūrasadṛśaprabhāḥ || 101 ||
[Analyze grammar]

punaḥ praharaṇānyeṣāṃ kīrtyamānāni me śṛṇu |
śeṣaiḥ kṛtaṃ pāriṣadairāyudhānāṃ parigraham || 102 ||
[Analyze grammar]

pāśodyatakarāḥ kecidvyāditāsyāḥ kharānanāḥ |
pṛthvakṣā nīlakaṇṭhāśca tathā parighabāhavaḥ || 103 ||
[Analyze grammar]

śataghnīcakrahastāśca tathā musalapāṇayaḥ |
śūlāsihastāśca tathā mahākāyā mahābalāḥ || 104 ||
[Analyze grammar]

gadābhuśuṇḍihastāśca tathā tomarapāṇayaḥ |
asimudgarahastāśca daṇḍahastāśca bhārata || 105 ||
[Analyze grammar]

āyudhairvividhairghorairmahātmāno mahājavāḥ |
mahābalā mahāvegā mahāpāriṣadāstathā || 106 ||
[Analyze grammar]

abhiṣekaṃ kumārasya dṛṣṭvā hṛṣṭā raṇapriyāḥ |
ghaṇṭājālapinaddhāṅgā nanṛtuste mahaujasaḥ || 107 ||
[Analyze grammar]

ete cānye ca bahavo mahāpāriṣadā nṛpa |
upatasthurmahātmānaṃ kārttikeyaṃ yaśasvinam || 108 ||
[Analyze grammar]

divyāścāpyāntarikṣāśca pārthivāścānilopamāḥ |
vyādiṣṭā daivataiḥ śūrāḥ skandasyānucarābhavan || 109 ||
[Analyze grammar]

tādṛśānāṃ sahasrāṇi prayutānyarbudāni ca |
abhiṣiktaṃ mahātmānaṃ parivāryopatasthire || 110 ||
[Analyze grammar]