Chapter 41

janamejaya uvāca |
vasiṣṭhasyāpavāho vai bhīmavegaḥ kathaṃ nu saḥ |
kimarthaṃ ca saricchreṣṭhā tamṛṣiṃ pratyavāhayat || 1 ||
[Analyze grammar]

kena cāsyābhavadvairaṃ kāraṇaṃ kiṃ ca tatprabho |
śaṃsa pṛṣṭo mahāprājña na hi tṛpyāmi kathyatām || 2 ||
[Analyze grammar]

vaiśaṃpāyana uvāca |
viśvāmitrasya caivarṣervasiṣṭhasya ca bhārata |
bhṛśaṃ vairamabhūdrājaṃstapaḥspardhākṛtaṃ mahat || 3 ||
[Analyze grammar]

āśramo vai vasiṣṭhasya sthāṇutīrthe'bhavanmahān |
pūrvataḥ paścimaścāsīdviśvāmitrasya dhīmataḥ || 4 ||
[Analyze grammar]

yatra sthāṇurmahārāja taptavānsumahattapaḥ |
yatrāsya karma tadghoraṃ pravadanti manīṣiṇaḥ || 5 ||
[Analyze grammar]

yatreṣṭvā bhagavānsthāṇuḥ pūjayitvā sarasvatīm |
sthāpayāmāsa tattīrthaṃ sthāṇutīrthamiti prabho || 6 ||
[Analyze grammar]

tatra sarve surāḥ skandamabhyaṣiñcannarādhipa |
senāpatyena mahatā surārivinibarhaṇam || 7 ||
[Analyze grammar]

tasminsarasvatītīrthe viśvāmitro mahāmuniḥ |
vasiṣṭhaṃ cālayāmāsa tapasogreṇa tacchṛṇu || 8 ||
[Analyze grammar]

viśvāmitravasiṣṭhau tāvahanyahani bhārata |
spardhāṃ tapaḥkṛtāṃ tīvrāṃ cakratustau tapodhanau || 9 ||
[Analyze grammar]

tatrāpyadhikasaṃtāpo viśvāmitro mahāmuniḥ |
dṛṣṭvā tejo vasiṣṭhasya cintāmabhijagāma ha |
tasya buddhiriyaṃ hyāsīddharmanityasya bhārata || 10 ||
[Analyze grammar]

iyaṃ sarasvatī tūrṇaṃ matsamīpaṃ tapodhanam |
ānayiṣyati vegena vasiṣṭhaṃ japatāṃ varam |
ihāgataṃ dvijaśreṣṭhaṃ haniṣyāmi na saṃśayaḥ || 11 ||
[Analyze grammar]

evaṃ niścitya bhagavānviśvāmitro mahāmuniḥ |
sasmāra saritāṃ śreṣṭhāṃ krodhasaṃraktalocanaḥ || 12 ||
[Analyze grammar]

sā dhyātā muninā tena vyākulatvaṃ jagāma ha |
jajñe cainaṃ mahāvīryaṃ mahākopaṃ ca bhāminī || 13 ||
[Analyze grammar]

tata enaṃ vepamānā vivarṇā prāñjalistadā |
upatasthe munivaraṃ viśvāmitraṃ sarasvatī || 14 ||
[Analyze grammar]

hatavīrā yathā nārī sābhavadduḥkhitā bhṛśam |
brūhi kiṃ karavāṇīti provāca munisattamam || 15 ||
[Analyze grammar]

tāmuvāca muniḥ kruddho vasiṣṭhaṃ śīghramānaya |
yāvadenaṃ nihanmyadya tacchrutvā vyathitā nadī || 16 ||
[Analyze grammar]

sāñjaliṃ tu tataḥ kṛtvā puṇḍarīkanibhekṣaṇā |
vivyathe suvirūḍheva latā vāyusamīritā || 17 ||
[Analyze grammar]

tathāgatāṃ tu tāṃ dṛṣṭvā vepamānāṃ kṛtāñjalim |
viśvāmitro'bravītkruddho vasiṣṭhaṃ śīghramānaya || 18 ||
[Analyze grammar]

tato bhītā saricchreṣṭhā cintayāmāsa bhārata |
ubhayoḥ śāpayorbhītā kathametadbhaviṣyati || 19 ||
[Analyze grammar]

sābhigamya vasiṣṭhaṃ tu imamarthamacodayat |
yaduktā saritāṃ śreṣṭhā viśvāmitreṇa dhīmatā || 20 ||
[Analyze grammar]

ubhayoḥ śāpayorbhītā vepamānā punaḥ punaḥ |
cintayitvā mahāśāpamṛṣivitrāsitā bhṛśam || 21 ||
[Analyze grammar]

tāṃ kṛśāṃ ca vivarṇāṃ ca dṛṣṭvā cintāsamanvitām |
uvāca rājandharmātmā vasiṣṭho dvipadāṃ varaḥ || 22 ||
[Analyze grammar]

trāhyātmānaṃ saricchreṣṭhe vaha māṃ śīghragāminī |
viśvāmitraḥ śapeddhi tvāṃ mā kṛthāstvaṃ vicāraṇām || 23 ||
[Analyze grammar]

tasya tadvacanaṃ śrutvā kṛpāśīlasya sā sarit |
cintayāmāsa kauravya kiṃ kṛtaṃ sukṛtaṃ bhavet || 24 ||
[Analyze grammar]

tasyāścintā samutpannā vasiṣṭho mayyatīva hi |
kṛtavānhi dayāṃ nityaṃ tasya kāryaṃ hitaṃ mayā || 25 ||
[Analyze grammar]

atha kūle svake rājañjapantamṛṣisattamam |
juhvānaṃ kauśikaṃ prekṣya sarasvatyabhyacintayat || 26 ||
[Analyze grammar]

idamantaramityeva tataḥ sā saritāṃ varā |
kūlāpahāramakarotsvena vegena sā sarit || 27 ||
[Analyze grammar]

tena kūlāpahāreṇa maitrāvaruṇirauhyata |
uhyamānaśca tuṣṭāva tadā rājansarasvatīm || 28 ||
[Analyze grammar]

pitāmahasya sarasaḥ pravṛttāsi sarasvati |
vyāptaṃ cedaṃ jagatsarvaṃ tavaivāmbhobhiruttamaiḥ || 29 ||
[Analyze grammar]

tvamevākāśagā devi megheṣūtsṛjase payaḥ |
sarvāścāpastvameveti tvatto vayamadhīmahe || 30 ||
[Analyze grammar]

puṣṭirdyutistathā kīrtiḥ siddhirvṛddhirumā tathā |
tvameva vāṇī svāhā tvaṃ tvayyāyattamidaṃ jagat |
tvameva sarvabhūteṣu vasasīha caturvidhā || 31 ||
[Analyze grammar]

evaṃ sarasvatī rājanstūyamānā maharṣiṇā |
vegenovāha taṃ vipraṃ viśvāmitrāśramaṃ prati |
nyavedayata cābhīkṣṇaṃ viśvāmitrāya taṃ munim || 32 ||
[Analyze grammar]

tamānītaṃ sarasvatyā dṛṣṭvā kopasamanvitaḥ |
athānveṣatpraharaṇaṃ vasiṣṭhāntakaraṃ tadā || 33 ||
[Analyze grammar]

taṃ tu kruddhamabhiprekṣya brahmahatyābhayānnadī |
apovāha vasiṣṭhaṃ tu prācīṃ diśamatandritā |
ubhayoḥ kurvatī vākyaṃ vañcayitvā tu gādhijam || 34 ||
[Analyze grammar]

tato'pavāhitaṃ dṛṣṭvā vasiṣṭhamṛṣisattamam |
abravīdatha saṃkruddho viśvāmitro hyamarṣaṇaḥ || 35 ||
[Analyze grammar]

yasmānmā tvaṃ saricchreṣṭhe vañcayitvā punargatā |
śoṇitaṃ vaha kalyāṇi rakṣogrāmaṇisaṃmatam || 36 ||
[Analyze grammar]

tataḥ sarasvatī śaptā viśvāmitreṇa dhīmatā |
avahacchoṇitonmiśraṃ toyaṃ saṃvatsaraṃ tadā || 37 ||
[Analyze grammar]

atharṣayaśca devāśca gandharvāpsarasastathā |
sarasvatīṃ tathā dṛṣṭvā babhūvurbhṛśaduḥkhitāḥ || 38 ||
[Analyze grammar]

evaṃ vasiṣṭhāpavāho loke khyāto janādhipa |
āgacchacca punarmārgaṃ svameva saritāṃ varā || 39 ||
[Analyze grammar]