Chapter 7

saṃjaya uvāca |
vyatītāyāṃ rajanyāṃ tu rājā duryodhanastadā |
abravīttāvakānsarvānsaṃnahyantāṃ mahārathāḥ || 1 ||
[Analyze grammar]

rājñastu matamājñāya samanahyata sā camūḥ |
ayojayanrathāṃstūrṇaṃ paryadhāvaṃstathāpare || 2 ||
[Analyze grammar]

akalpyanta ca mātaṅgāḥ samanahyanta pattayaḥ |
hayānāstaraṇopetāṃścakruranye sahasraśaḥ || 3 ||
[Analyze grammar]

vāditrāṇāṃ ca ninadaḥ prādurāsīdviśāṃ pate |
bodhanārthaṃ hi yodhānāṃ sainyānāṃ cāpyudīryatām || 4 ||
[Analyze grammar]

tato balāni sarvāṇi senāśiṣṭāni bhārata |
saṃnaddhānyeva dadṛśurmṛtyuṃ kṛtvā nivartanam || 5 ||
[Analyze grammar]

śalyaṃ senāpatiṃ kṛtvā madrarājaṃ mahārathāḥ |
pravibhajya balaṃ sarvamanīkeṣu vyavasthitāḥ || 6 ||
[Analyze grammar]

tataḥ sarve samāgamya putreṇa tava sainikāḥ |
kṛpaśca kṛtavarmā ca drauṇiḥ śalyo'tha saubalaḥ || 7 ||
[Analyze grammar]

anye ca pārthivāḥ śeṣāḥ samayaṃ cakrire tadā |
na na ekena yoddhavyaṃ kathaṃcidapi pāṇḍavaiḥ || 8 ||
[Analyze grammar]

yo hyekaḥ pāṇḍavairyudhyedyo vā yudhyantamutsṛjet |
sa pañcabhirbhavedyuktaḥ pātakaiḥ sopapātakaiḥ |
anyonyaṃ parirakṣadbhiryoddhavyaṃ sahitaiśca naḥ || 9 ||
[Analyze grammar]

evaṃ te samayaṃ kṛtvā sarve tatra mahārathāḥ |
madrarājaṃ puraskṛtya tūrṇamabhyadravanparān || 10 ||
[Analyze grammar]

tathaiva pāṇḍavā rājanvyūhya sainyaṃ mahāraṇe |
abhyayuḥ kauravānsarvānyotsyamānāḥ samantataḥ || 11 ||
[Analyze grammar]

tadbalaṃ bharataśreṣṭha kṣubdhārṇavasamasvanam |
samuddhūtārṇavākāramuddhūtarathakuñjaram || 12 ||
[Analyze grammar]

dhṛtarāṣṭra uvāca |
droṇasya bhīṣmasya ca vai rādheyasya ca me śrutam |
pātanaṃ śaṃsa me bhūyaḥ śalyasyātha sutasya me || 13 ||
[Analyze grammar]

kathaṃ raṇe hataḥ śalyo dharmarājena saṃjaya |
bhīmena ca mahābāhuḥ putro duryodhano mama || 14 ||
[Analyze grammar]

saṃjaya uvāca |
kṣayaṃ manuṣyadehānāṃ rathanāgāśvasaṃkṣayam |
śṛṇu rājansthiro bhūtvā saṃgrāmaṃ śaṃsato mama || 15 ||
[Analyze grammar]

āśā balavatī rājanputrāṇāṃ te'bhavattadā |
hate bhīṣme ca droṇe ca sūtaputre ca pātite |
śalyaḥ pārthānraṇe sarvānnihaniṣyati māriṣa || 16 ||
[Analyze grammar]

tāmāśāṃ hṛdaye kṛtvā samāśvāsya ca bhārata |
madrarājaṃ ca samare samāśritya mahāratham |
nāthavantamathātmānamamanyata sutastava || 17 ||
[Analyze grammar]

yadā karṇe hate pārthāḥ siṃhanādaṃ pracakrire |
tadā rājandhārtarāṣṭrānāviveśa mahadbhayam || 18 ||
[Analyze grammar]

tānsamāśvāsya tu tadā madrarājaḥ pratāpavān |
vyūhya vyūhaṃ mahārāja sarvatobhadramṛddhimat || 19 ||
[Analyze grammar]

pratyudyāto raṇe pārthānmadrarājaḥ pratāpavān |
vidhunvankārmukaṃ citraṃ bhāraghnaṃ vegavattaram || 20 ||
[Analyze grammar]

rathapravaramāsthāya saindhavāśvaṃ mahārathaḥ |
tasya sītā mahārāja rathasthāśobhayadratham || 21 ||
[Analyze grammar]

sa tena saṃvṛto vīro rathenāmitrakarśanaḥ |
tasthau śūro mahārāja putrāṇāṃ te bhayapraṇut || 22 ||
[Analyze grammar]

prayāṇe madrarājo'bhūnmukhaṃ vyūhasya daṃśitaḥ |
madrakaiḥ sahito vīraiḥ karṇaputraiśca durjayaiḥ || 23 ||
[Analyze grammar]

savye'bhūtkṛtavarmā ca trigartaiḥ parivāritaḥ |
gautamo dakṣiṇe pārśve śakaiśca yavanaiḥ saha || 24 ||
[Analyze grammar]

aśvatthāmā pṛṣṭhato'bhūtkāmbojaiḥ parivāritaḥ |
duryodhano'bhavanmadhye rakṣitaḥ kurupuṃgavaiḥ || 25 ||
[Analyze grammar]

hayānīkena mahatā saubalaścāpi saṃvṛtaḥ |
prayayau sarvasainyena kaitavyaśca mahārathaḥ || 26 ||
[Analyze grammar]

pāṇḍavāśca maheṣvāsā vyūhya sainyamariṃdamāḥ |
tridhā bhūtvā mahārāja tava sainyamupādravan || 27 ||
[Analyze grammar]

dhṛṣṭadyumnaḥ śikhaṇḍī ca sātyakiśca mahārathaḥ |
śalyasya vāhinīṃ tūrṇamabhidudruvurāhave || 28 ||
[Analyze grammar]

tato yudhiṣṭhiro rājā svenānīkena saṃvṛtaḥ |
śalyamevābhidudrāva jighāṃsurbharatarṣabha || 29 ||
[Analyze grammar]

hārdikyaṃ tu maheṣvāsamarjunaḥ śatrupūgahā |
saṃśaptakagaṇāṃścaiva vegato'bhividudruve || 30 ||
[Analyze grammar]

gautamaṃ bhīmaseno vai somakāśca mahārathāḥ |
abhyadravanta rājendra jighāṃsantaḥ parānyudhi || 31 ||
[Analyze grammar]

mādrīputrau tu śakunimulūkaṃ ca mahārathau |
sasainyau sahasenau tāvupatasthaturāhave || 32 ||
[Analyze grammar]

tathaivāyutaśo yodhāstāvakāḥ pāṇḍavānraṇe |
abhyadravanta saṃkruddhā vividhāyudhapāṇayaḥ || 33 ||
[Analyze grammar]

dhṛtarāṣṭra uvāca |
hate bhīṣme maheṣvāse droṇe karṇe mahārathe |
kuruṣvalpāvaśiṣṭeṣu pāṇḍaveṣu ca saṃyuge || 34 ||
[Analyze grammar]

susaṃrabdheṣu pārtheṣu parākrānteṣu saṃjaya |
māmakānāṃ pareṣāṃ ca kiṃ śiṣṭamabhavadbalam || 35 ||
[Analyze grammar]

saṃjaya uvāca |
yathā vayaṃ pare rājanyuddhāya samavasthitāḥ |
yāvaccāsīdbalaṃ śiṣṭaṃ saṃgrāme tannibodha me || 36 ||
[Analyze grammar]

ekādaśa sahasrāṇi rathānāṃ bharatarṣabha |
daśa dantisahasrāṇi sapta caiva śatāni ca || 37 ||
[Analyze grammar]

pūrṇe śatasahasre dve hayānāṃ bharatarṣabha |
narakoṭyastathā tisro balametattavābhavat || 38 ||
[Analyze grammar]

rathānāṃ ṣaṭsahasrāṇi ṣaṭsahasrāśca kuñjarāḥ |
daśa cāśvasahasrāṇi pattikoṭī ca bhārata || 39 ||
[Analyze grammar]

etadbalaṃ pāṇḍavānāmabhavaccheṣamāhave |
eta eva samājagmuryuddhāya bharatarṣabha || 40 ||
[Analyze grammar]

evaṃ vibhajya rājendra madrarājamate sthitāḥ |
pāṇḍavānpratyudīyāma jayagṛddhāḥ pramanyavaḥ || 41 ||
[Analyze grammar]

tathaiva pāṇḍavāḥ śūrāḥ samare jitakāśinaḥ |
upayātā naravyāghrāḥ pāñcālāśca yaśasvinaḥ || 42 ||
[Analyze grammar]

evamete balaughena parasparavadhaiṣiṇaḥ |
upayātā naravyāghrāḥ pūrvāṃ saṃdhyāṃ prati prabho || 43 ||
[Analyze grammar]

tataḥ pravavṛte yuddhaṃ ghorarūpaṃ bhayānakam |
tāvakānāṃ pareṣāṃ ca nighnatāmitaretaram || 44 ||
[Analyze grammar]